Masalmo
Nyimbo ya ntsiku ya Sabudu.
92 Mphyadidi kupereka takhuta kuna Yahova,+
Pontho kuimba nyimbo zakusimba dzina yanu, imwe Wakudzulu Kakamwe,
2 Toera kudziwisa ufuni wanu wakukhonda mala+ namacibese,
Pontho toera kudziwisa kukhulupirika kwanu namasiku,
3 Na cakuimba naco ca nkhambala khumi,
Pabodzi na arpa yakulira mwadidi.+
4 Thangwi imwe Yahova mwandicitisa kutsandzaya na mabasa anacita imwe;
Ine ndisakhuwa mwakukomerwa thangwi ya mabasa a manja anu.
5 Yahova, mabasa anu ndi akudzumisa kakamwe.+
Udziwisi wanu ndi ukulu kakamwe.+
6 Munthu wakusowa ndzeru nkhabe dziwa mabasa anu na udziwisi wanu;
Pontho nkhabe dzemwa anakwanisa kubvesesa ipi:+
7 Anthu akuipa angamera ninga tsanga
Pontho anyakucita pyakuipa onsene angathambaruka,
Ndi toera afudzwe kwenda na kwenda.+
8 Yahova, kwenda na kwenda imwe muli padzulu kakamwe kupiringana onsene.
9 Yahova, onani anyamalwa anu,
Mwandimomwene, anyamalwa anu anadzafudzwa;
Anyakucita pyakuipa onsene anadzabalalika.+
10 Mbwenye imwe munadzathimizira mphambvu* zanga mbazikhala ninga za nyati;
Ndinadzadzola mafuta toera khanda yanga ifewe.+
11 Maso anga anadzaona kukundwa kwa anyamalwa anga;+
Makutu anga anadzabva pya kukundwa kwa anyakucita pyakuipa anandisandukira.
12 Mbwenye anthu akulungama anadzakula mwadidi ninga muti wa ncindu,
Pontho anadzakula kakamwe ninga muti wa sedhro wa ku Libhano.+
13 Iwo ndi ninga miti idatcekwa panyumba ya Yahova;
Asakula pa kintalo ya nyumba ya Mulungu wathu.+
14 Maseze iwo akalambe,* anapitiriza kubala misapo;+
Iwo anadzapitiriza kukhala amphambvu* na aungumi wadidi,+
15 Mbadziwisa kuti Yahova ndi wakulungama.
Iye ndi Mwala wanga,+ pontho iye nkhabe kucita pinthu pyakusowa ulungami.