Kronika Waciwiri

6 Pa ndzidzi unoyu Salomoni alonga: “Yahova alonga kuti mbadakhala pa makole akupswipa kakamwe.+ 2 Mbwenye cincino ine ndakumangirani nyumba yakubalika kakamwe, mbuto yakulikha toera mukhale mwenemu kwenda na kwenda.”+

3 Buluka penepo, mambo azungunuka mbatoma kupasa nkhombo mbumba yonsene ya Izraeli yakuti mu ndzidzi unoyu ikhali dzololo.+ 4 Iye alonga: “Mbasimbwe Yahova, Mulungu wa Izraeli, ule adakwanirisa na djanja yace pikiro idacita iye kuna babanga Dhavidhi, mbalonga na mulomo wace kuti: 5 ‘Kutomera pa ntsiku idabulusa ine mbumba yanga ya Izraeli mu dziko ya Ejitu, nee ndasankhula nzinda pakati pa mizinda ya madzindza a Izraeli toera ndimange nyumba yakuti dzina yanga ipitirize kupaswa mbiri mwenemu,+ pontho nee ndasankhula munthu toera akhale ntsogoleri wa mbumba yanga ya Izraeli. 6 Mbwenye ndasankhula Yerusalemu+ toera dzina yanga ipitirize kupaswa mbiri mwenemo, pontho ndasankhula Dhavidhi toera atonge mbumba yanga ya Izraeli.’+ 7 Babanga Dhavidhi akhafuna kakamwe kumanga nyumba toera kupasa mbiri dzina ya Yahova, Mulungu wa Izraeli.+ 8 Mbwenye Yahova apanga babanga Dhavidhi kuti: ‘Iwe ukhafuna kakamwe kumanga nyumba toera dzina yanga ipaswe mbiri mwenemu, pyenepi mphyadidi kakamwe. 9 Mbwenye siwe tayu anafuna kumanga nyumba; mwanako anafuna iwe kubala ndiye anafuna kumanga nyumba toera dzina yanga+ ipaswe mbiri mwenemu.’ 10 Yahova acita pidapikira iye, thangwi ndapita pa mbuto ya babanga Dhavidhi, mbandikhala pa mpando waumambo wa Izraeli+ ninga mudapikira Yahova.+ Pontho ine ndamanga nyumba toera dzina ya Yahova, Mulungu wa Izraeli ipaswe mbiri, 11 pontho ndaikha mwenemu Bokosi yakuti iri na cibverano+ cidacita Yahova na mbumba ya Izraeli.”

12 Buluka penepo, Salomoni alimira patsogolo pa guwa ya Yahova, pamaso pa mbumba yonsene ya Izraeli, mbathukula manja ace ndzulu.+ 13 (Salomoni akhadasasanya mbuto yapadzulu ya nkuwa, pontho aiikha pakati pa thando ya nyumba.+ Mbuto ineyi ikhali na makhono* maxanu aulaphi, maxanu augugumi, na matatu a cengo, iye alimira padzulu pa mbuto ineyi.) Iye agodama pamaso pa mbumba yonsene ya Izraeli, athukula manja ace ndzulu,+ 14 mbalonga: “Yahova Mulungu wa Izraeli, nkhabepo Mulungu unango ninga imwe kudzulu peno pa dziko yapantsi, wakuti asakwanirisa cibverano, mbapangiza ufuni ukulu kuna ale anantumikira na ntima onsene.+ 15 Imwe mwacita pidapikira imwe kuna babanga Dhavidhi ntumiki wanu.+ Mwalonga pikiro ineyi na mulomo wanu, pontho lero mwacita na djanja yanu pidapikira imwe.+ 16 Yahova Mulungu wa Izraeli, cincino citani pidapikira imwe kuna babanga Dhavidhi ntumiki wanu, pidalonga imwe kuti: ‘Anako angacita mphole-mphole na makhaliro awo, mbafamba munjira zanga+ ninga pidacita iwe pamaso panga,+ m’banja mwako nee munadzasoweka mwana anafuna kukhala pa mpando waumambo wa Izraeli.’ 17 Cincino Yahova, Mulungu wa Izraeli, mbapicitike pidapikira imwe ntumiki wanu Dhavidhi.

18 “Kodi Mulungu anakhaladi pa dziko yapantsi pabodzi na anthu?+ Onani! Kudzulu, inde, kudzulu kakamwe, imwe nkhabe kwanako;+ ndiye tani nyumba iyi idamanga ine!+ 19 Yahova Mulungu wanga, bveserani phembero inacita ntumiki wanu na phembo inacita iye toera kubverwa ntsisi, pontho bveserani kuphemba ciphedzo kunacita ntumiki wanu na phembero inacita iye pamaso panu. 20 Maso anu mbaonere nyumba ino masiku na masikati, mbuto idalonga imwe kuti munadzaikha* dzina yanu,+ pontho bveserani phembero inacita ntumiki wanu mbakayang’ana mbuto ino. 21 Bveserani kudembetera kunacita ntumiki wanu toera kubverwa ntsisi na kudembetera kunacita mbumba yanu ya Izraeli pa mbuto ino.+ Bveserani bulukira kudzulu+ pa mbuto inakhala imwe; inde, bveserani, mbamulekerera.+

22 “Munthu angadawira ndzace, mbakakamizwa kuti adumbire* toera kupangiza kuti nee adawa, angabwera pa guwa yanu ya ntsembe n’nyumba ino,+ mu ndzidzi wakuti amala kucita dumbiro ineyi, 23 bveserani bulukira kudzulu, pontho citani pinthu mwakubverana na nseru unoyu mbamutonga atumiki anu: Pasani mulando ule adacita pinthu pyakuipa, mbamuntcunyusa mwakubverana na pidacita iye.+ Nyakusowa mulando muoneni ninga wakulungama, mbamumpasa nkhombo mwakubverana na ulungami wace.+

24 “Mbumba yanu ya Izraeli ingakundwa na anyamalwa awo, thangwi yakupitiriza kukudawirani,+ iwo angabwerera kuna imwe mbasimba dzina yanu,+ angacita phembero+ na kudembetera n’nyumba ino+ toera kubverwa ntsisi, 25 bveserani bulukira kudzulu,+ pontho lekererani madawo a mbumba yanu ya Izraeli, mbamuibweza ku dziko idapasa imwe ambuyawo.+

26 “Kudzulu kungafungika, madzi mbakhonda kubvumba+ thangwi iwo apitiriza kukudawirani,+ iwo angacita phembero mbayang’ana mbuto ino, mbapasa mbiri dzina yanu, mbasiya madawo awo thangwi imwe mwaatcunyusa,+ 27 abvesereni bulukira kudzulu, pontho lekererani madawo a atumiki anu, a mbumba yanu ya Izraeli, apfundziseni njira yadidi inafunika iwo kufamba;+ pontho bvumbisani madzi+ mu dziko idapasa imwe mbumba yanu ninga unthaka wawo.

28 “Mu dziko ineyi+ mungaoneka njala, muliri,+ mphepo yakupisa, kuuma kwa pinthu pinabzwalwa+ peno anyadzombe+ azinji; anyamalwa awo angaazungulira m’mizinda yawo,+ peno angagwerwa na ntundu unango wa muliri peno utenda,+ 29 ntundu onsene wa phembero,+ ntundu onsene wa phembo+ toera kubverwa ntsisi inafuna kucitwa na munthu m’bodzi peno na mbumba yanu yonsene ya Izraeli (thangwi m’bodzi na m’bodzi asadziwa kuthabuka kwace na nyatwa zace)+ angathukula manja awo mbakayang’ana nyumba ino,+ 30 penepo bveserani bulukira kudzulu, pa mbuto inakhala imwe,+ lekererani,+ mbamupasa nkhombo m’bodzi na m’bodzi mwakubverana na pyonsene pinacita iye, thangwi imwe musadziwa ntima wace (mwandimomwene ndimwe basi anadziwa mitima ya anthu onsene),+ 31 toera iwo akugopeni, mbafamba munjira zanu mu ntsiku zonsene zinafuna kukhala iwo mu dziko idapasa imwe ambuyathu.

32 “Munthu wa dziko inango wakuti nee ndi wa mbumba yanu ya Izraeli, angabwera buluka ku dziko yakutali thangwi ya dzina yanu ikulu,+ thangwi yakubva pinthu pidacita imwe na djanja yanu yamphambvu na nkono wanu wamphambvu, angabwera, mbacita phembero mbakayang’ana nyumba ino,+ 33 bveserani bulukira kudzulu, pa mbuto inakhala imwe, mbamucita pyonsene pinakuphembani munthu wa dziko inango, toera anthu onsene pa dziko yapantsi akudziweni+ mbakugopani ninga pinacita mbumba yanu ya Izraeli, pontho toera adziwe kuti dzina yanu isacemerwa n’nyumba ino idamanga ine.

34 “Mungatuma mbumba yanu toera iende kunkhondo kamenyana na anyamalwa awo, mwakukhonda tsalakana mbuto idaatuma imwe,+ iwo angaphembera+ kuna imwe, mbakayang’ana nzinda udasankhula imwe na nyumba idamanga ine toera kupasa mbiri dzina yanu,+ 35 bveserani phembero yawo bulukira kudzulu, pontho bveserani phembo inacita iwo toera kubverwa ntsisi, mbamuaphedza.+

36 “Iwo angakudawirani (thangwi nkhabepo munthu anakhonda dawa),+ imwe mbamuipirwa nawo, buluka penepo mbamuapereka m’manja mwa anyamalwa awo mbaenda nawo ku dziko yawo, dhuzi peno kutali+ toera akhale mabitcu awo; 37 ku dziko idaendeswa iwo toera akhale mabitcu angadzindikira madawo adacita iwo, pontho angabwerera kuna imwe mbadembetera toera muabvere ntsisi mu dziko inakhala iwo ninga mabitcu, mbalonga: ‘Ife tadawa, pontho tacita pinthu pyakuipa,’+ 38 iwo angabwerera kuna imwe na ntima wawo onsene,+ pontho na umaso wawo onsene mu dziko idaenda iwo ku ubitcu,+ angacita phembero kuna imwe mbakayang’ana dziko idapasa imwe ambuyawo, nzinda udasankhula+ imwe na nyumba idamanga ine toera kupasa mbiri dzina yanu, 39 penepo, bveserani kubulukira kudzulu, pa mbuto inakhala imwe, phembero yawo na phembo inacita iwo toera kubverwa ntsisi, pontho citani pinthu toera kuaphedza,+ lekererani mbumba yanu thangwi ya kukudawirani kudacita iwo.

40 “Cincino Mulungu wanga, ndaphata miyendo, maso anu mbaone,* pontho makutu anu mbabve phembero inacitwa pa mbuto ino.+ 41 Cincino, Yahova Mulungu, kwirani pa mbuto yanu inakhala imwe;+ imwe pabodzi na Bokosi ya Cibverano, inapangiza kuti muli na mphambvu. Yahova Mulungu, anyantsembe anu mbapangize cipulumuso canu,* pontho ale akuti ndi akulungama kuna imwe mbatsandzaye thangwi ya udidi wanu.+ 42 Yahova Mulungu, lekani kukhonda nyakudzodzwa wanu.+ Kumbukani ufuni wanu wakukhonda mala udapangiza imwe kuna ntumiki wanu Dhavidhi.+