Amambo Waciwiri

17 Mu caka 12 ca Mambo Ahazi wa ku Yuda, Ozeya+ mwana wa Ela, adzakhala mambo wa Izraeli ku Samariya; iye atonga mu pyaka pipfemba. 2 Iye akhacita pinthu pyakuipa pamaso pa Yahova, mbwenye nee afika pakucita ninga pidacita amambo a Izraeli iye mbadzati kutonga. 3 Mambo Salimanezere wa Asirya abwera kudzamenyana na iye,+ pontho Ozeya adzakhala ntumiki wace mbatoma kulipa nsonkho kuna iye.+ 4 Mbwenye mambo wa Asirya adzindikira kuti Ozeya akhadacitambo masasanyiro akunsandukira, thangwi iye akhadatuma anthu kuna Mambo So wa ku Ejitu,+ pontho iye nee akhalipabve nsonkho kuna mambo wa Asirya ninga pikhacita iye pyaka pya nduli. Natenepa, mambo wa Asirya am’manga mbanfungira nkaidi.

5 Mambo wa Asirya abweresa anyankhondo ace mu dziko ineyi yonsene, pontho iye afika ku Samariya mbazungulira nzinda unoyu mu pyaka pitatu. 6 Mu caka cacipfemba ca Ozeya, mambo wa Asirya akunda Samariya.+ Buluka penepo, iye akwata mbumba ya Izraeli mbaenda nayo ku ubitcu+ ku Asirya, mbaenda kaaikha ku Ala, ku Abhori dhuzi na nkulo wa Gozani+ na m’mizinda ya Amedhi.+

7 Pyenepi pyacitika thangwi mbumba ya Izraeli ikhadadawira Yahova Mulungu wawo, ule adaabulusa mu dziko ya Ejitu m’manja mwa mambo Farau wa ku Ejitu.+ Iwo alambira* alungu anango,+ 8 atowezera misambo ya madzindza adathamangisa Yahova pakati pa Aizraeli, pontho iwo atowezera misambo idakhazikisa amambo a Izraeli.

9 Aizraeli akhacita pinthu pyakuti nee pikhali pyadidi pamaso pa Yahova Mulungu wawo. Iwo amanga mbuto za padzulu m’mizinda yawo yonsene,+ kutomera panyumba yandzulu ya nyakuonera mpaka mu nzinda wakuwanga.* 10 Iwo apitiriza kumanga mizati ya miyala na miti yakulambirwa*+ m’mapiri monsene na pantsi pa miti mikulu yonsene ya masamba akubithimira;+ 11 pontho iwo akhapereka ntsembe* m’mbuto zonsene za padzulu ninga pikhacita madzindza adathamangiswa na Yahova pakati pawo mbaendeswa ku ubitcu.+ Iwo akhacita pinthu pyakuipa toera kutsukwalisa Yahova.

12 Iwo apitiriza kutumikira madzimunthu akunyanyasa,*+ ale akuti thangwi ya iwo, Yahova akhadaapanga kuti: “Nee musafunika kucita pyenepi!”+ 13 Yahova apitiriza kucenjeza Izraeli na Yuda kubulukira kuna aprofeta ace onsene na anyakuona masomphenya ace onsene+ kuti: “Siyani njira zanu zakuipa!+ Bverani matongero anga na mitemo yanga mwakubverana na mwambo onsene udapereka ine kuna ambuyanu, udakupangani ine kubulukira kuna atumiki anga akuti ndi aprofeta.” 14 Mbwenye iwo nee abvera, pontho iwo apitiriza kukhala akudzikuza* ninga ambuyawo akuti nee apangiza cikhulupiro kuna Yahova Mulungu wawo.+ 15 Iwo apitiriza kukhonda matongero ace, cibverano+ cidacita iye na ambuyawo na macenjezo adapereka iye kuna iwo toera kuacenjeza,+ pontho iwo apitiriza kulambira madzimunthu akusowa basa,+ iwo mbadzakhalambo akusowa basa.+ Natenepa atowezera madzindza akhali dhuzi na iwo, ale akuti Yahova akhadaakhondesa toera kuatowezera.+

16 Iwo asiya matongero onsene a Yahova Mulungu wawo, acita anang’ombe awiri a utale*+ na muti wakulambirwa,+ pontho iwo agodamira anyankhondo onsene a kudzulu,*+ mbatumikira Bhaale.+ 17 Kusiyapo pyenepi iwo akhapisa pa moto anawo amuna na akazi,*+ iwo akhacita pyakulotera+ na pyakuombedza, pontho akhapitiriza kucita pinthu pyakuipa pamaso pa Yahova toera kuntsukwalisa.

18 Natenepa Yahova aipirwa kakamwe na Aizraeli, mbaabulusa pamaso pace.+ Iye nee asiya dzindza inango kupitiriza kusiyapo dzindza ya Yuda.

19 Ayuda nee akoyambo matongero a Yahova Mulungu wawo;+ iwo atowezerambo misambo idatowezera Aizraeli.+ 20 Yahova akhonda Aizraeli onsene,* iye aatcunyusa mbaapereka m’manja mwa anyakutapata, mpaka kumala kuthamangisa onsene pamaso pace. 21 Iye abulusa Izraeli panyumba ya Dhavidhi, pontho iwo akhazikisa Yerobhoamu mwana wa Nebhati ninga mambo.+ Mbwenye Yerobhoamu acitisa Aizraeli kusiya kutowera Yahova, iwo mbacita madawo makulu kakamwe. 22 Pontho mbumba ya Izraeli yapitiriza kucita madawo onsene adacita Yerobhoamu.+ Iwo apitiriza kucita madawo anewa, 23 mpaka Yahova kubulusa Aizraeli pamaso pace ninga mudalongera iye kubulukira kuna atumiki ace onsene, aprofeta.+ Natenepa Aizraeli akwatwa mu dziko yawo, mbaendeswa ku ubitcu ku Asirya,+ pontho iwo ali kweneko mpaka lero.

24 Buluka penepo, mambo wa Asirya abweresa anthu a ku Bhabhilonya, Kuta, Ava, Amati na a ku Sefarvaimu+ mbaaikha m’mizinda ya ku Samariya m’mbuto za Aizraeli; iwo akwata Samariya mbakhala m’mizinda yace. 25 Pidatoma iwo kukhala m’mizinda ineyi, iwo nee akhalambira* Yahova. Na thangwi ineyi, Yahova atuma nkhalamu mbizienda kuna iwo,+ anango a iwo mbaphiwa na nkhalamu zenezi. 26 Natenepa anthu apanga mambo wa ku Asirya: “Madzindza adaendesa imwe ku ubitcu mbamuaikha m’mizinda ya ku Samariya nkhabe dziwa kuti analambira tani Mulungu wa dziko ineyi. Na thangwi ineyi, akutumiza nkhalamu kuna iwo, zakuti ziri kuapha, thangwi nkhabe munthu anadziwa kuti analambira tani Mulungu wa dziko ineyi.”

27 Penepo mambo wa Asirya alonga: “Tumani m’bodzi wa anyantsembe adakwata imwe kweneko mbamuenda nawo ku ubitcu abwerere toera akhale kweneko mbaapfundzisa kuti analambira tani Mulungu wa dziko ineyi.” 28 Natenepa m’bodzi wa anyantsembe akuti akhadaendeswa ku ubitcu ku Samariya abwerera, mbakhala ku Bheteli,+ pontho iye atoma kuapfundzisa kuti analambira* tani Yahova.+

29 Mbwenye dzindza ibodzi na ibodzi yacita mulungu wawo,* mbamuikha n’nyumba zaulambiri pa mbuto za padzulu zidacita Asamariya; dzindza ibodzi na ibodzi yacita pyenepi m’mizinda ikakhala iyo. 30 Natenepa amuna a ku Bhabhilonya acita Sukoti-Bhenoti, amuna a ku Kuta acita Nerigali, amuna a ku Amati+ acita Asima, 31 pontho Aava acita Nibhazi na Tartaki. Asefarvaimu akhapisa anawo pa moto kuna Adhrameleki na kuna Anameleki, alungu a ku Sefarvaimu.+ 32 Maseze iwo akhalambira* Yahova, asankhula anthu pakati pa mbumba toera akhale anyantsembe, pontho iwo akhaatumikira n’nyumba zaulambiri pa mbuto za padzulu.+ 33 Iwo akhalambira* Yahova mu ndzidzi ubodzi ene mbalambirambo alungu awo mwakubverana na uphemberi* wa madzindza a mbuto idakwatwa iwo.+

34 Mpaka lero iwo asatowezera mauphemberi awo akale.* Nee m’bodzi wa iwo asalambira* Yahova, pontho nee m’bodzi wa iwo asatowezera mitemo yace, njira zace zakutonga, Mwambo na matongero adapereka Yahova kuna ana a Yakobe, ule adacinja iye dzina mbakhala Izraeli.+ 35 Yahova pidacita iye cibverano na iwo,+ aapanga: “Lekani kulambira alungu anango, lekani kuagodamira, nee kuatumikira, nee kupereka ntsembe kuna iwo.+ 36 Mbwenye Yahova, ule adakubulusani mu dziko ya Ejitu na mphambvu zikulu, pontho na nkono wamphambvu,*+ Ndiye anafunika imwe kulambira,+ ndiye anafunika imwe kugodamira, pontho musafunika kupereka ntsembe kuna iye. 37 Ndzidzi onsene imwe musafunika kubvera mwadidi mitemo yace, njira yace yakutonga, Mwambo wace na matongero adakulemberani iye,+ pontho nee musafunika kulambira* alungu anango. 38 Nee musafunika kuduwala cibverano cidacita ine na imwe,+ pontho nee musafunika kulambira* alungu anango. 39 Mbwenye imwe musafunika kulambira* Yahova Mulungu wanu, thangwi ndiye anafuna kukupulumusani m’manja mwa anyamalwa anu onsene.”

40 Iwo nee abvera, mbwenye akhatowezera mauphemberi awo akale.*+ 41 Natenepa, madzindza anewa adzatoma kulambira* Yahova,+ mbwenye mu ndzidzi ubodzi ene akhatumikira madzimunthu awo akusemwa. Mpaka lero, anawo na adzukulu awo asapitiriza kucita pinthu ninga pidacita ambuyawo.