Samweli Waciwiri
15 Pidamala kucitika pinthu pyenepi pyonsene, Abhisaloni asasanyisa ngolo, asaka makavalo na amuna 50 toera athamange patsogolo pace.+ 2 Abhisaloni akhalamuka namacibese kakamwe, mbalimira n’khundu mwa nseu wakuenda ku nsuwo ukulu wa nzinda.+ Munthu angabweresa nseru wace kuna mambo toera atongwe,+ Abhisaloni akhancemera mbambvundza: “Wabuluka nzinda upi?” Iye akhatawira: “Ntumiki wanu abuluka mu nzinda ubodzi wa madzindza a Izraeli.” 3 Abhisaloni akhampanga: “Pinalonga iwe mphyandimomwene, mbwenye mambo nkhabe munthu toera kubvesera nseru wako.” 4 Abhisaloni akhalonga: “Ine mbidakhala nyakutonga miseru mu dziko yonsene, anthu onsene anakhala na miseru yawo mbadabwera kuna ine, pontho mbandidacita pyonsene toera atongwe mwaulungami.”
5 Munthu angafika dhuzi toera kun’godamira, Abhisaloni akhafuthula nkono wace, akham’phata mbampswompswona.+ 6 Abhisaloni akhacita pyenepi kuna Aizraeli onsene akhaenda kuna mambo toera kutongwa; natenepa Abhisaloni apitiriza kupeusa mitima ya anthu a mu Izraeli.+
7 Pidapita pyaka pinai,* Abhisaloni apanga mambo: “Ndaphata miyendo, nditawiriseni ndiende ku Ebhroni+ toera ndikacite pidapikira ine Yahova. 8 Thangwi ine ntumiki wanu pikhali ine mu Jesuri+ ku Sirya ndacita pikiro iyi:+ ‘Yahova anganditawirisa kubwerera ku Yerusalemu, ine ndinadzapereka ntsembe* kuna Yahova.’” 9 Natenepa mambo ampanga: “Ndoko muntendere.” Penepo iye alamuka mbaenda ku Ebhroni.
10 Abhisaloni atuma anthu mwacibisobiso kuna madzindza onsene a Izraeli, toera kuapanga: “Mungabva kulira kwa nyanga khuwani: ‘Abhisaloni ndi mambo wa mu Ebhroni!’”+ 11 Abhisaloni pikhabuluka iye mu Yerusalemu akwata amuna 200 mbaenda nawo; iye aacemera, pontho iwo atawira kuenda mbakhonda kudziwa pikhacitika. 12 Kusiyapo pyenepi, Abhisaloni pidapereka iye ntsembe, acemeresa Aitofeli+ phungu wa Dhavidhi+ wa ku nzinda wa Jilo.+ Abhisaloni akhawangisira toera kupeusa anthu, pontho numero ya ale akham’phedzera ikhapitiriza kuthimizirika.+
13 Mukupita kwa ndzidzi, munthu m’bodzi apanga Dhavidhi: “Anthu a mu Izraeli ali kukhundu ya Abhisaloni.” 14 Mwakukhonda dembuka, Dhavidhi apanga atumiki onsene akhali na iye mu Yerusalemu: “Lamukani, pontho tendeni tithawe,+ thangwi nkhabe anafuna kupulumuka m’manja mwa Abhisaloni! Cimbizani, gopa iye anatigumana pano mbatikunda, pontho mbafudza nzinda na supada!”+ 15 Atumiki a mambo antawira: “Mbuyathu mambo, ife atumiki anu tiri dzololo toera kucita pyonsene pinafuna imwe.”+ 16 Natenepa mambo aenda pabodzi na anthu onsene a panyumba pace, mbwenye asiya akazace khumi apakhundu+ toera atsalakane nyumba.* 17 Mambo apitiriza na ulendo wace pabodzi na anthu onsene akhantowera, mbwenye iwo alimira pa Bheti-Meraki.
18 Atumiki onsene adabuluka na iye,* Akereti onsene, Apeleti+ na Agati,+ amuna 600 akhantowera kutomera ku Gati,+ akhapita dhuzi na mambo toera iye aaone kuti ali tani.* 19 Penepo mambo apanga Itai+ wa ku Gati: “Thangwi yanji iwe uli kuendambo na ife? Bwerera ukakhale na mambo mupswa, thangwi iwe ndiwe munthu wakudza, pontho wathawa kwanu. 20 Iwe wafika kwene dzulo, mphapo pinacitika tani kuti ine lero ndikuphembe toera uende na ine mu ndzidzi unafuna ine kuenda kunafuna ine kuenda? Bwerera pabodzi na abale ako, pontho Yahova mbapangize ufuni wakukhonda mala na kukhulupirika kwace kuna iwe!”+ 21 Mbwenye Itai atawira mambo: “Ndiri kudumbira mu dzina ya Yahova Mulungu wa m’maso na mu dzina yanu mbuyanga mambo wakuti muli m’maso, konsene kunafuna kukhala imwe, ntumiki wanu anakhalambo kweneko, pontho ine ndiri dzololo toera kufa pabodzi na imwe!”+ 22 Natenepa Dhavidhi apanga Itai:+ “Ndoko, pontho wambuka gowa.” Penepo Itai wa ku Gati awambuka gowa na amuna onsene akhali na iye pabodzi na mabanja awo.
23 Anthu onsene a dziko ineyi akhalira mu ndzidzi wakuti anthu onsene akhali na Dhavidhi akhawambuka gowa, pontho mambo akhadalimira dhuzi na Gowa ya Sidhroni;+ anthu onsene akhali na Dhavidhi akhawambukira ku nseu unaenda kuthando. 24 Zadhoke+ akhalimbo kweneko pabodzi na Alevi+ onsene akuti akhathukula bokosi ya cibverano ya Mulungu+ wandimomwene;+ pontho iwo akhadasiya pantsi Bokosi ya Mulungu wandimomwene; Abhiyatari+ afika mu ndzidzi wakuti mbumba yonsene ikhawambuka gowa buluka mu nzinda. 25 Mbwenye mambo apanga Zadhoke: “Kwata Bokosi ya Mulungu wandimomwene, ubwerere nayo mu nzinda.+ Yahova angandikomera ntima, anandisiya toera ndibwerere mbandiona pontho bokosi na mbuto inakhala iyo.+ 26 Mbwenye iye angalonga: ‘Nee ndakomerwa na iwe,’ penepo mbacite kuna ine pyonsene pinaona iye kukhala pyadidi.” 27 Mambo apanga nyantsembe Zadhoke: “Kodi nyakuona masomphenya siwe tayu?+ Bwerera mu nzinda muntendere. Bwerera na Akimazi mwanako wamamuna pabodzi na Yonatani+ mwana wa Abhiyatari. 28 Ine ndinakhala m’mbuto zinawambuka na anthu nkulo wa Yordani dhuzi na thando, mpaka imwe mungandibweresera mphangwa.”+ 29 Natenepa Zadhoke na Abhiyatari akwata Bokosi ya Mulungu wandimomwene mbabwerera nayo ku Yerusalemu, pontho iwo apitiriza kukhala kweneko.
30 Dhavidhi akhalira pikhakwira iye Phiri* ya Milivera;+ iye akhadaphimbira nsolo wace, pontho nee akhadabvala ntsapato. Anthu onsene akhali na iye akhadaphimbirambo misolo yawo, pontho akhalira mu ndzidzi ukhakwira iwo phiri. 31 Buluka penepo Dhavidhi apangwa: “Aitofeli ndi m’bodzi wa anthu adapeuswa+ na Abhisaloni.”+ Penepo Dhavidhi alonga: “Ndaphata miyendo Yahova,+ citisani kuti uphungu wa Aitofeli uoniwe ninga uphungu wakukupwa!”*+
32 Dhavidhi pidafika iye padzulu paphiri pakhalambira* anthu Mulungu, Uzai+ Muareki+ akhali penepo toera kuonana na iye, akhadapandula tunika yace, pontho akhali na mataka munsolo mwace. 33 Dhavidhi ampanga: “Iwe ungaenda pabodzi na ine, unakhala ninga ntolo kuna ine. 34 Mbwenye iwe ungabwerera mu nzinda mbupanga Abhisaloni kuti: ‘Mambo, ine ndine ntumiki wanu. Kale ndikhali ntumiki wa babanu, mbwenye cincino ndine ntumiki wanu,’+ penepo iwe unandiphedza, mbucitisa kuti uphungu wa Aitofeli ukhonde kuphata basa.+ 35 Kodi nyantsembe Zadhoke na nyantsembe Abhiyatari nee ali kweneko? Pinthu pyonsene pinafuna kubva iwe kunyumba ya mambo+ usafunika kupanga nyantsembe Zadhoke na nyantsembe Abhiyatari. 36 Iwo ali kweneko pabodzi na anawo awiri, Akimazi+ mwana wa Zadhoke na Yonatani+ mwana wa Abhiyatari. Natenepa atumeni toera adzandipange pyonsene pinafuna kubva imwe.” 37 Penepo Uzai xamwali* wa Dhavidhi+ afika mu nzinda, mu ndzidzi ukhapita Abhisaloni mu Yerusalemu.