Samweli Waciwiri
16 Dhavidhi pidapiringana iye pang’ono padzulu paphiri,+ aona Zibha+ ntumiki wa Mefibhoseti+ wakuti akhali na maburu mawiri, maburu anewa akhadakwata mikate 200, mapindi 100 a mauva akuumiswa mbaumbwa pabodzi, mapindi 100 a misapo ya ndzidzi wa malimwe* yakuumiswa mbiumbwa pabodzi, na citomba cikulu ca vinyu.+ 2 Penepo mambo abvundza Zibha: “Thangwi yanji wabweresa pinthu pyenepi?” Zibha atawira: “Maburu ndi toera anthu a panyumba ya mambo aakwire, mikate na misapo ya ndzidzi wa malimwe ndi toera aphale anu adye, pontho vinyu ndi toera ale anafuna kuneta n’thando amwe.”+ 3 Mambo ambvundza: “Ali kupi ndzukulu* wa mbuyako?”+ Zibha atawira mambo: “Iye asala ku Yerusalemu, thangwi alonga: ‘Lero mbumba ya Izraeli inandibwezera umambo wa yavu wanga.’”*+ 4 Penepo mambo apanga Zibha: “Ona, pinthu pyonsene pya Mefibhoseti, cincino mphyako.”+ Zibha atawira: “Ine ndiri kugodama pamaso panu. Mbandipitirize kukhala wakutawirika kuna imwe mbuyanga mambo.”+
5 Mambo Dhavidhi pidafika iye ku Bhaurimu, mamuna m’bodzi wa m’banja ya Sauli wakuti akhacemerwa Simei,+ mwana wa Jera, akhaenda kuna Dhavidhi uku mbakampasa dzedze.+ 6 Iye akhaponyera miyala Mambo Dhavidhi na atumiki ace onsene, kuphatanizambo anthu onsene pabodzi na amuna amphambvu akuti akhali kunkono wace wamadyo na wabzwere. 7 Mu ndzidzi ukhampasa iye dzedze, Simei akhalonga: “Buluka pano, buluka pano, iwe munthu wa mulando wa ciropa! Iwe munthu wakusowa basa! 8 Yahova akukubwezera pyakuipa thangwi iwe wapha banja ya Sauli, mbunkwatira umambo. Natenepa Yahova apereka umambo kuna mwanako Abhisaloni. Cincino iwe uli pa nyatwa thangwi ndiwe phanga!”+
9 Natenepa Abhisai, mwana wa Zeruya+ apanga mambo: “Thangwi yanji mwanambwa uyu wakufa+ ali kupasa dzedze mbuyanga mambo?+ Nditawiriseni toera ndiende kan’gwanda nsolo.”+ 10 Mbwenye mambo alonga: “Munapyonji imwe ana a Zeruya?+ Nsiyeni andipase dzedze,+ thangwi Yahova ampanga:+ ‘Pasa dzedze Dhavidhi!’ Natenepa mbani akhafunika kumbvundza kuti: ‘Thangwi yanji ukucita pyenepi?’” 11 Buluka penepo Dhavidhi apanga Abhisai na atumiki ace onsene: “Khala mwananga ene asafuna kundipha,+ ndiye tani munthu wa dzindza ya Bhenjamini!+ Nsiyeni andipase dzedze, thangwi ndi Yahova adampanga toera acite pyenepi! 12 Panango Yahova anadzaona nyatwa zanga,+ pontho Yahova anadzacinja dzedze inapaswa ine lero mbikhala nkhombo.”+ 13 Natenepa Dhavidhi na amuna akhali na iye akhapitiriza kufamba mu nseu. Mbwenye Simei akhafamba na n’khundu mwa phiri, mbakapasa dzedze Dhavidhi,+ akhamponyera miyala na mataka mazinji.
14 Pakumalisa, mambo na onsene akhali na iye afika kukhaenda iwo, mbwenye iwo akhadaneta kakamwe, natenepa iwo apuma.
15 Mu ndzidzi unoyu, Abhisaloni na amuna onsene a Izraeli afika ku Yerusalemu, pontho Aitofeli+ akhali pabodzi na iye. 16 Uzai+ Muareki,+ xamwali* wa Dhavidhi pidafika iye kuna Abhisaloni ampanga: “Mambo khalani na umaso mu ndzidzi uzinji! Mambo khalani na umaso mu ndzidzi uzinji!”+ 17 Penepo Abhisaloni abvundza Uzai: “Kodi ufuni ukulu uli na iwe kuna xamwali wako ndi unoyu? Thangwi yanji nee waenda na xamwali wako?” 18 Natenepa Uzai apanga Abhisaloni: “Nkhabe, ine ndiri kukhundu ya ule adasankhulwa na Yahova, mbumba yace na amuna onsene a Izraeli. Ine ndinakhala na iye. 19 Ndiri kuthimiza kulonga: Ndisafunika kutumikira ani? Kodi si mwanace tayu? Ine ndinakutumikirani+ ninga mudatumikira ine babanu.”
20 Buluka penepo Abhisaloni aphemba Aitofeli: “Ndipase uphungu.+ Ndisafunika kucitanji?” 21 Penepo Aitofeli apanga Abhisaloni: “Pita m’mabonde na akazi apakhundu a babako,+ ale adasala toera atsalakane nyumba.*+ Aizraeli onsene angabva kuti iwe wacita pyenepi, pontho kuti waxola babako, anthu anakuphedzera anadzawanga manungo.” 22 Natenepa amangira nsasa Abhisaloni padzulu panyumba,+ pontho Abhisaloni apita m’mabonde na akazi apakhundu a babace+ pamaso pa Aizraeli onsene.+
23 Mu ntsiku zenezi, uphungu ukhapereka Aitofeli+ ukhaoniwa ninga* mafala a Mulungu wandimomwene. Dhavidhi na Abhisaloni akhaonambo munjira ibodzi ene uphungu onsene ukhapereka Aitofeli.