Kronika Wakutoma
16 Natenepa iwo abweresa Bokosi ya Mulungu wandimomwene mbaipitisa mu nsasa ukhadamanga Dhavidhi toera kuiikha.+ Buluka penepo, iwo apereka ntsembe zakupiswa na ntsembe toera kupereka takhuta* pamaso pa Mulungu wandimomwene.+ 2 Dhavidhi pidamala iye kupereka ntsembe zakupiswa+ na ntsembe toera kupereka takhuta,+ apasa nkhombo mbumba mu dzina ya Yahova. 3 Kusiyapo pyenepi, iye agawiza Aizraeli onsene amuna na akazi ene, mikate yakucitwa ninga mphete, misapo ya micindu yakuumiswa mbiumbwa pabodzi na mauva akuumiswa mbaumbwa pabodzi. 4 Buluka penepo, iye asankhula Alevi angasi toera atumikire patsogolo pa Bokosi ya Yahova,+ toera apase mbiri,* apereke takhuta na kusimba Yahova Mulungu wa Izraeli. 5 Azafe+ akhali ntsogoleri wawo, waciwiri akhali Zakariya. Jeiyeli, Semiramoti, Jeiyeli, Matitiya, Eliabhe, Bhenaya, Obhedhi-Edhomi na Jeiyeli+ akhaimba na pyakuimba napyo pya nkhambala na maarpa;+ Azafe akhaimba pyakuimba napyo pya utale.+ 6 Anyantsembe Bhenaya na Yaaziyeli akhaliza matuluka ndzidzi onsene kutsogolo kwa Bokosi ya Cibverano ca Mulungu wandimomwene.
7 Pa ntsiku ineyi, Dhavidhi alemba nyimbo yace yakutoma yakupereka takhuta kuna Yahova, iye apfundzisa Azafe+ na abale ace toera kuiimba tenepa:
10 Gayani thangwi yakusimba dzina yace yakucena.+
Mbitsandzaye mitima ya ale anasaka Yahova.+
11 Sakani Yahova+ na mphambvu zace.
Sakani nkhope yace* ndzidzi onsene.+
12 Kumbukani pinthu pyakudzumisa pidacita iye,+
Pirengo pyace na kutonga kudacita iye,
13 Imwe dzindza ya Izraeli ntumiki wace,+
Imwe ana a Yakobe, anthu ace adasankhula iye.+
14 Iye ndi Yahova Mulungu wathu.+
Kutonga kwace kusaoneka pa dziko yonsene.+
15 Kumbukani cibverano cace cakukhonda mala,*
Pikiro idacita iye* mpaka ubalwi 1.000,+
16 Cibverano cidacita iye kuna Abhrahamu,+
Na dumbiro idacita iye kuna Izaki,+
17 Cidakhazikisa iye ninga ntemo kuna Yakobe,+
Ninga cibverano cakukhonda mala kuna Izraeli,
18 Mbalonga: ‘Ndinadzakupasa dziko ya Kanani,+
Toera ikhale unthaka wako.’+
19 Pa ndzidzi unoyu imwe mukhali pang’ono basi,
Inde, imwe mukhali akucepa kakamwe, pontho mukhali alendo mu dziko ineyi.+
20 Iwo afamba pakati pa anthu a madzindza akusiyana-siyana,
Buluka mu umambo uyu kuenda mu umambo unango.+
21 Iye nee atawirisa kuti munthu unango aathabuse,+
Mbwenye thangwi ya iwo, iye asandika amambo,+
22 Mbalonga: ‘Lekani kukhuya anthu anga akudzodzwa,
Lekani kucita pinthu pyakuipa kuna aprofeta anga.’+
23 Imbirani Yahova imwe monsene muli pa dziko yapantsi!
Dziwisani cipulumuso cace ntsiku zonsene!+
24 Dziwisani mbiri yace pakati pa anthu a madzindza anango,
Dziwisani mabasace akudzumisa pakati pa mbumba zonsene.
25 Thangwi Yahova ndi wankulu, pontho athema kusimbwa kakamwe.
Iye athema kugopiwa kupiringana alungu onsene.+
27 N’khundu mwace, iye azungulirwa na mbiri na kubalika;+
Mphambvu na kutsandzaya piri pa mbuto inakhala iye.+
28 Pasani Yahova pidathema iye, imwe mabanja pakati pa mbumba,
Pasani Yahova pidathema iye thangwi ya mbiri yace na mphambvu zace.+
Bvalani nguwo zakusowa midonthi* mbamugodamira Yahova.*+
30 Tetemerani pamaso pace, imwe monsene munakhala pa dziko yapantsi!
Dziko yapantsi yakhazikika mwadidi; iyo nkhabe kubuluswa pa mbuto payo.*+
31 Sekerani imwe muli kudzulu, komerwani imwe muli pa dziko yapantsi;+
Longani pakati pa mbumba zinango kuti: ‘Yahova adzakhala Mambo!’+
32 Mbititime bara na pinthu pyonsene piri mwenemu;
Mbusekere ntunda na pinthu pyonsene piri mwenemu.
33 Mu ndzidzi ubodzi ene, miti ya mu nsitu mbikhuwe mwakutsandzaya pamaso pa Yahova,
Thangwi iye ali kubwera toera kutonga dziko.
35 Pontho longani kuti: ‘Tipulumuseni, imwe Mulungu mpulumusi wathu,+
Tigumanyeni mbamutiombola m’manja mwa anthu a madzindza anango,
Toera tikwanise kusimba dzina yanu yakucena,+
Pontho toera tikomerwe kakamwe na kukupasani mbiri.+
Penepo mbumba yonsene yatawira: “Ameni!” Mbasimba Yahova.
37 Buluka penepo, Dhavidhi asiya Azafe+ na abale ace patsogolo pa Bokosi ya Cibverano ca Yahova, toera ndzidzi onsene iwo atumikire kutsogolo kwa Bokosi ya Cibverano,+ mwakubverana na pinthu pikhafunika kucitwa pa ntsiku ibodzi na ibodzi.+ 38 Obhedhi-Edhomi na abale ace akukwana 68, Obhedhi-Edhomi mwana wa Yedhutuni pabodzi na Osa akhali anyakuonera misuwo; 39 nyantsembe Zadhoke+ pabodzi na anyantsembe andzace akhatumikira kutsogolo kwa tabhernakulo ya Yahova pa mbuto yakucena ikhali ku Jibheyoni,+ 40 toera ndzidzi onsene apereke kuna Yahova ntsembe zakupiswa pa guwa ya ntsembe zakupiswa, namacibese pontho namaulo; toera acite pyonsene pidalembwa mu Mwambo wa Yahova udapereka iye kuna Aizraeli.+ 41 Iwo akhali pabodzi na Emani na Yedhutuni+ kuphatanizambo amuna anango adasankhulwa mbakhazikiswa mwakubverana na madzina awo toera apereke takhuta kuna Yahova,+ thangwi “ufuni wace ndi wakukhonda mala.”+ 42 Emani+ na Yedhutuni akhali pabodzi na iwo toera kuimba matuluka, pyakuimba napyo pya utale na pyakuimba napyo nyimbo pinaphatisirwa toera kusimba Mulungu wandimomwene; pontho ana a Yedhutuni+ apaswa basa yakuonera nsuwo ukulu. 43 Buluka penepo, anthu onsene aenda kunyumba kwawo, mbwenye Dhavidhi aenda kapasa nkhombo anthu a panyumba pace.