MPHANGWA ZADIDI NINGA MUDAZILEMBERA JUWAU

1 Pakutoma akhalipo anacemerwa Fala,+ Fala akhali pabodzi na Mulungu,+ pontho Fala akhali mulungu.+ 2 Iye akhali pabodzi na Mulungu kubulukira pakutoma. 3 Mulungu amʼphatisira toera kucita pinthu pyonsene,+ pontho nkhabepo cinthu cidacitwa mwakukhonda phatisira iye.

4 Iye aphatisirwa toera kucita umaso, pontho umaso unoyu ukhali ceza kuna anthu.+ 5 Ceza cikugaka ncidima,+ mbwenye cidima nee cakwanisa kukunda ceza.

6 Aoneka munthu mʼbodzi adatumwa na Mulungu; dzina yace ikhali Juwau.+ 7 Munthu unoyu abwera toera kupanga anthu pya ceza ceneci,+ toera kubulukira mʼmafalace anthu a madzindza onsene akhulupire. 8 Iye nee akhali ceza ceneci,+ mbwenye abwera toera kupanga anthu pya ceza ceneci.

9 Ceza candimomwene cinamwinikira anthu a madzindza onsene cikhali cifupi toera kubwera pa dziko.+ 10 Iye* akhali pa dziko,+ Mulungu amʼphatisira toera kucita dziko,+ mbwenye dziko nee yandziwa. 11 Iye afika kucisa cace, mbwenye anthu a mucisa cace nee antambira. 12 Mbwenye kwa onsene adantambira, iye aatawirisa toera akhale ana a Mulungu,+ thangwi iwo akhakhulupira dzina yace.+ 13 Pontho iwo nee abalwa na anthu, peno thangwi yakufuna kwa manungo, peno thangwi yakufuna kwa anyakubalawo, mbwenye abalwa mwakubverana na cifuno ca Mulungu.+

14 Natenepa, ule anacemerwa Fala adzabalwa na manungo aunyama+ mbakhala pakati pathu, ife taona mbiri yace, mbiri ninga ya mwana mʼbodzi ekha+ wa babace; iye akhadadzala na ntsisi zikulu za Mulungu na undimomwene. 15 (Juwau apereka umboni thangwi ya iye, mbalonga mwakugaluza: “Uyu ndi ule adalonga ine kuti: ‘Ule anabwera nduli mwanga aenda patsogolo panga, thangwi iye akhalipo ine mbandidzati kubalwa.’”)+ 16 Nakuti iye akhadadzala na ntsisi zikulu za Mulungu, tonsene tisapitiriza kutambira ntsisi zenezi zikulu. 17 Thangwi Mulungu apereka Mwambo kubulukira kuna Mose,+ mbwenye kubulukira kuna Yezu Kristu+ iye atipangiza ntsisi zikulu+ na undimomwene. 18 Cipo munthu aona kale Mulungu;+ mbwenye mwana mʼbodzi ekha wakulandana na Mulungu+ wakuti ali cifupi kakamwe na Baba,*+ ndiye adatifokotozera pya Iye.+

19 Juwau apereka umboni uyu pa ndzidzi udabwera anyantsembe na Alevi buluka ku Yerusalemu adatumwa na Ayuda toera kumbvundza kuti: “Kodi iwe ndiwe ani?”+ 20 Iye nee akhonda kutawira, mbwenye alonga pakweca kuti: “Ine sine Kristu tayu.” 21 Iwo ambvundza: “Mphapo ndiwe ani? Ndiwe Eliya?”+ Iye atawira: “Sine Eliya tayu.” “Ndiwe mprofeta?”+ Iye atawira: “Nkhabe!” 22 Penepo iwo ambvundza: “Ndiwe ani mphapo? Tipange toera tikwanise kutawira ale adatituma. Longa wekha, ndiwe ani?” 23 Iye atawira: “Ndine fala ya munthu anakhuwa nʼthando kuti: ‘Lungamisani njira ya Yahova,’*+ ninga mudalongera mprofeta Izaiya.”+ 24 Ale adatumwa akhali a nsoka wa Afarisi. 25 Iwo ambvundza: “Khala siwe Kristu tayu, peno Eliya peno Mprofeta; mphapo thangwi yanji usabatiza anthu?” 26 Juwau aatawira: “Ine ndisabatiza anthu mʼmadzi. Mbwenye alipo adalimira pakati panu wakuti imwe nkhabe kundziwa, 27 iye ndi ule anabwera nduli mwanga, wakuti mithambo ya masandalya ace ine sidathema tayu toera kuisudzula.”+ 28 Pinthu pyenepi pyacitika ku Bhetanya, kuntunda unango wa Yordani, ku mbuto ikhabatiza Juwau.+

29 Mangwana mwace Juwau aona Yezu mbakabwera kuna iye, natenepa iye alonga: “Onani, uyu ndi Mwanabira+ wa Mulungu anabulusa madawo+ pa dziko!+ 30 Iye ndi ule adalonga ine kuti: ‘Nduli mwanga mukubwera munthu adaenda patsogolo panga, thangwi iye akhalipo ine mbandidzati kubalwa.’+ 31 Ine nee ndikhandziwa, mbwenye ndi na thangwi ineyi ine ndisabatiza anthu mʼmadzi toera iye apangizike kuna Aizraeli.”+ 32 Juwau aperekambo umboni, mbalonga: “Ine ndaona nzimu wakucena ukhatcita ninga nkhangaiwa buluka kudzulu, mbupitiriza kukhala pana iye.+ 33 Ine nee ndikhandziwa, mbwenye Ule adandituma toera kubatiza anthu mʼmadzi, andipanga: ‘Ungaona nzimu wakucena mbutcita pana munthu mbupitiriza kukhala pana iye,+ unoyu ndiye anabatiza na nzimu wakucena.’+ 34 Ine ndaona pyenepi, mbandipereka umboni wakuti iye ndi Mwana wa Mulungu.”+

35 Nkuca mwace, Juwau akhali dzololo pabodzi na anyakupfundzace awiri, 36 pidaona iye Yezu mbakagwanda, iye alonga: “Onani, iye ndi Mwanabira+ wa Mulungu!” 37 Anyakupfundzace awiri pidabva iwo pyenepi, atowera Yezu. 38 Pidazungunuka Yezu aona kuti iwo akuntowera, iye aabvundza: “Musafunanji?” Iwo antawira: “Rabhi, imwe mwafikira kupi? (Fala yakuti Rabhi isabveka Mpfundzisi.)” 39 Iye aapanga: “Bwerani muone.” Natenepa iwo aenda na Yezu mbaona kudafikira iye, iwo akhala na iye ntsiku ineyi; ukhali ndzidzi unai wakumaulo. 40 Andreya+ mʼbale wace Simau Pedhru, ndi mʼbodzi wa anyakupfundza awiri adabva pidalonga Juwau mbatowera Yezu. 41 Buluka penepo, munthu wakutoma adaonana na iye ndi mʼbale wace akhacemerwa Simau, mbampanga: “Ife tagumana Mesiya”+ (fala yakuti Mesiya isabveka “Kristu”), 42 Andreya aenda naye kuna Yezu. Pidamuona Yezu, alonga: “Iwe ndiwe Simau+ mwana wa Juwau; iwe unadzacemerwa Kefa,” (dzina ineyi isabveka “Pedhru”).+

43 Mangwana mwace Yezu akhafuna kuenda ku Galileya. Buluka penepo iye aonana na Filipi,+ mbampanga: “Bwera ukhale nyakupfundza wanga.” 44 Filipi akhali wa ku Bhetisaidha, nzinda udabalwa Andreya na Pedhru. 45 Filipi agumanikana na Natanieli+ mbampanga: “Ife tagumana ule adalembwa mu Mwambo wa Mose na mʼmabukhu a Aprofeta: Yezu mwana wa Zuze,+ wa ku Nazareti.” 46 Mbwenye Natanieli ambvundza: “Kodi ku Nazareti kunabulukadi pinthu pyadidi?” Filipi antawira: “Bwera uone wekhene.” 47 Yezu aona Natanieli akhabwera kuna iye, mbalonga thangwi ya iye: “Onani, uyu ndi Muizraeli wandimomwene, mwa iye nkhabemo uthambi.”+ 48 Natanieli ambvundza: “Musandidziwa tani?” Yezu antawira: “Ine ndakuona pikhali iwe pantsi pamuti wa nsambvu, Filipi mbadzati kukucemera.” 49 Natanieli alonga: “Rabhi, imwe ndimwe Mwana wa Mulungu, imwe ndimwe Mambo wa Izraeli.”+ 50 Yezu ambvundza: “Iwe usandikhulupira thangwi ndakupanga kuti ndakuona pantsi pamuti wa nsambvu? Iwe unadzaona pinthu pyakudzumisa kakamwe kupiringana pyenepi.” 51 Buluka penepo Yezu alonga: “Mwandimomwene ine ndinakupangani monsene kuti munadzaona kudzulu kwafunguka, aanju a Mulungu mbatcita kudza pana Mwana wa munthu, mbakwira pontho kudzulu.”+

2 Pa ntsiku yacitatu anthu acita phwando yakumanga banja ku Kana wa ku Galileya, mai wace Yezu akhalimbo kweneko. 2 Yezu na anyakupfundzace akhadacemerwambo kuphwando ineyi yakumanga banja.

3 Pikhamala vinyu, Yezu apangwa na mai wace: “Iwo nkhabebve vinyu.” 4 Mbwenye Yezu antawira: “Kodi imwe na ine tinapyonji ife?* Ndzidzi wanga udzati kukwana.” 5 Mai wace apanga ale akhaphedzera mabasa: “Citani pyonsene pinakupangani iye.” 6 Dhuzi na penepo pakhali nkhali zitanthatu zakucitwa na miyala toera kuikhira madzi mwakubverana na miyambo yakuceneswa kwa Ayuda.+ Nkhali ibodzi ikhapita malitru 44 peno 66.* 7 Yezu aapanga: “Dzadzani madzi mu nkhali zonsene.” Natenepa iwo azidzadza mpaka pamulomo. 8 Penepo iye aapanga: “Tungani pangʼono muende kapase muimiriri wa phwando.” Iwo acita pyenepi. 9 Muimiriri wa phwando alawira madzi adasanduzwa kudza vinyu. (Mbwenye iye nee akhadziwa kudabuluka vinyu ineyi, maseze ale adatunga madzi mu nkhali akhapidziwa.) Penepo muimiriri wa phwando acemeresa mankhadzi wamamuna, 10 mbampanga: “Anthu onsene asatoma kupereka vinyu yadidi, buluka penepo anthu angaledzera, asapereka vinyu yakukhonda dzipa. Mbwenye iwe wakoya vinyu yadidi mpaka pano.” 11 Yezu acita pyenepi ku Kana wa ku Galileya ninga cipangizo cakutoma kwa pirengo pyace. Munjira ineyi iye apangiza mbiri yace,+ pontho anyakupfundzace anʼkhulupira.

12 Buluka penepo Yezu aenda ku Kafarnau+ pabodzi na mai wace, abale ace+ na anyakupfundzace, mbwenye iwo nee akhalako ntsiku zizinji.

13 Phwando ya Paskwa+ ya Ayuda ikhali cifupi, natenepa Yezu aenda ku Yerusalemu. 14 Pidapita iye mu templo, agumana anthu akugulisa ngʼombe, mabira na nkhangaiwa.+ Agumanambo anyakucinjisa kobiri akhali mʼmipando yawo. 15 Pidamala iye kucita ntcamu wa nkhambala, athamangisa anthu onsene akhagulisa mabira na ngʼombe mu templo, amwaza kobiri za anyakucinjisa kobiri mbabhoma meza zawo.+ 16 Iye apanga ale akhagulisa nkhangaiwa kuti: “Bulusani pyenepi muno! Lekani kusanduza nyumba ya Babanga kudza mbuto yakucitira malonda.”+ 17 Anyakupfundzace akumbuka kuti pyalembwa tenepa: “Phinga iri na ine thangwi ya nyumba yanu ndi ninga moto wakugaka muntima mwanga.”+

18 Mbwenye Ayuda ambvundza: “Ndi cidzindikiro cipi ciri na iwe toera kutipangiza+ kuti wathema kucita pinthu pyenepi?” 19 Yezu aatawira: “Fudzani templo iyi, ine ndinaimanga pontho mu ntsiku zitatu.”+ 20 Penepo Ayuda ambvundza: “Templo iyi yamala pyaka 46 mbikamangwa, iwe walonga kuti unaimanga mu ntsiku zitatu?” 21 Mbwenye templo ikhalonga iye ndi manungo ace.+ 22 Pidalamuswa iye muli akufa, anyakupfundzace akumbuka kuti iye akhalonga pyenepi.+ Natenepa iwo akhulupira khundu ineyi ya Malemba na pidalonga Yezu.

23 Mbwenye pikhali iye ku Yerusalemu pa phwando ya Paskwa, anthu azinji akhulupira dzina yace pidaona iwo pirengo pikhacita iye. 24 Mbwenye Yezu nee akhaanyindira mwakukwana thangwi iye akhaadziwa onsene, 25 pontho iye nee akhafuna munthu toera kunfokotozera pya manyerezero a anthu, thangwi iye akhadziwa ekhene piri muntima mwa munthu.+

3 Akhalipo mamuna mʼbodzi wa nsoka wa Afarisi akhacemerwa Nikodhemu,+ iye akhali ntongi wa Ayuda. 2 Iye aenda kuna Yezu namasiku,+ mbampanga: “Rabhi,+ ife tisadziwa kuti imwe ndimwe mpfundzisi adabuluka kuna Mulungu, thangwi nkhabe munthu anakwanisa kucita pirengo+ pinacita imwe angakhonda kuphedzwa na Mulungu.”+ 3 Yezu antawira: “Ine ndinakupanga na cinyindiro consene kuti munthu angakhonda kubalwa pontho,+ anacimwana kupita mu Umambo wa Mulungu.”+ 4 Nikodhemu ambvundza: “Munthu anakwanisa tani kubalwa pontho khala iye akalamba? Kodi iye anakwanisa kupita pontho mʼmimba mwa mai wace mbabalwa kaciwiri?” 5 Yezu antawira: “Ine ndinakupanga na cinyindiro consene kuti munthu angakhonda kubalwa na madzi,+ pontho na nzimu,+ anacimwana kupita mu Umambo wa Mulungu. 6 Ule adabalwa na munthu ndi munthu, mbwenye ule adabalwa na nzimu ndi nzimu. 7 Lekani kudzudzumika thangwi ine ndakupangani kuti: ‘Imwe musafunika mubalwe pontho.’ 8 Mphepo isaenda kunafuna iyo, iwe usabva kutitima kwayo basi, mbwenye nee usadziwa kunabuluka iyo nee kunaenda iyo. Pyenepi ndi sawasawa na pinacitika kuna munthu anabalwa na nzimu.”+

9 Nikodhemu antawira: “Pyenepi pinakwanisika tani?” 10 Yezu alonga: “Iwe ndiwe mpfundzisi wa Aizraeli, thangwi yanji nee usadziwa pinthu pyenepi? 11 Ine ndinakupanga na cinyindiro consene kuti ife tisalonga pinadziwa ife, pontho tisapereka umboni wa pinthu pidaona ife, mbwenye imwe nee musatawira umboni unapereka ife. 12 Ine ndakupangani pinthu pya pantsi pano, mbwenye imwe nee mwakhulupira. Mphapo ndingalonga pinthu pyakudzulu munakwanisa tani kukhulupira? 13 Kusiyapo pyenepi, nkhabe munthu adakwira kudzulu,+ mbwenye Mwana wa munthu ndiye adatcita buluka kudzulu.+ 14 Ninga Mose amanika nyoka pamuti nʼthando,+ Mwana wa munthu asafunikambo amanikwe,+ 15 toera munthu ananʼkhulupira agumane umaso wakukhonda mala.+

16 “Thangwi Mulungu afuna kakamwe dziko yapantsi mbapereka Mwanace mʼbodzi ekha,+ toera munthu ananʼkhulupira akhonde kufudzwa, mbwenye agumane umaso wakukhonda mala.+ 17 Thangwi Mulungu nee atuma Mwanace pa dziko toera kutonga anthu pa dziko,* mbwenye toera anthu pa dziko apulumuswe kubulukira mwa iye.+ 18 Munthu ananʼkhulupira nee anadzatongwa.+ Munthu anakhonda kunʼkhulupira amala kutongwa kale, thangwi iye nee akhulupira dzina ya Mwana mʼbodzi ekha wa Mulungu.+ 19 Anthu anadzatongwa na thangwi iyi: Ceza cabwera pa dziko,+ mbwenye anthu afuna cidima mʼmbuto mwakufuna ceza, thangwi mabasa awo akhali akuipa. 20 Thangwi munthu anacita pyakuipa asaida ceza, pontho iye nkhabe kufendedzera ceza, toera pinacita iye pikhonde kuoneka pakweca. 21 Mbwenye munthu anacita pinthu pyadidi asafendedzera ceza,+ toera pinthu pinacita iye pioneke kuti pisacitwa mwakubverana na pinafuna Mulungu.”

22 Buluka penepo, Yezu na anyakupfundzace aenda kupisa pya ku Yudeya, iwo akhala kweneko mu ntsiku zingasi, pontho akhabatiza* anthu.+ 23 Mbwenye Juwau akhabatizambo anthu ku Enoni cifupi na Salimu, thangwi kweneko kukhali na madzi mazinji,+ anthu akhapitiriza kuenda kuna iye mbabatizwa;+ 24 pa ndzidzi unoyu Juwau akhadzati kuikhwa nkaidi.+

25 Penepo anyakupfundza a Juwau aketesana na Muyuda unango thangwi ya miyambo yakucenesa. 26 Natenepa iwo aenda kuna Juwau mbampanga: “Rabhi, mamuna akhali na imwe kuntunda unango wa Yordani, ule adacitira imwe umboni,+ akubatiza anthu, pontho anthu onsene ali kuenda kuna iye.” 27 Juwau atawira: “Munthu nkhabe kutambira cinthu, kusiyapo khala acipaswa na Mulungu. 28 Imwe ndimwe amboni a pidalonga ine kuti: ‘Ine sine Kristu tayu,+ mbwenye ndatumwa toera kuenda patsogolo pace.’+ 29 Ali na mankhadzi wankazi ndi mankhadzi wamamuna.+ Mbwenye xamwali wa mankhadzi wamamuna angakhala cifupi mbabva pinalonga iye, asakomerwa thangwi yakubva fala ya mankhadzi wamamuna. Natenepa, kutsandzaya kwanga ndi kukulu kakamwe. 30 Basa yace isafunika kupitiriza kuenda kutsogolo, mbwenye yanga isafunika kupitiriza kubwerera nduli.”

31 Ule adabuluka kudzulu+ ali padzulu pa anthu onsene. Munthu wa pantsi pano, ndi wa pantsi pano, pontho asalonga pinthu pya pantsi pano. Mbwenye ule adabuluka kudzulu ali padzulu pa anthu onsene.+ 32 Iye asapereka umboni wa pinthu pidaona iye na pidabva iye,+ mbwenye nkhabe munthu anatawira pinalonga iye.+ 33 Munthu anatawira umboni wace ali na cinyindiro cakuti Mulungu ndi wandimomwene.+ 34 Ule adatumwa na Mulungu asalonga mafala a Mulungu,+ thangwi Mulungu nkhabe kupereka nzimu wace mwakuumirwa.* 35 Baba asafuna Mwana,+ pontho iye apereka pinthu pyonsene mʼmanja mwace.+ 36 Ule anakhulupira Mwana ali na umaso wakukhonda mala;+ ule anakhonda kubvera Mwana nee anadzawina umaso,+ mbwenye anadzaona ukali wa Mulungu.+

4 Pidadziwa Mbuya kuti Afarisi abva kuti Yezu ali na anyakupfundza azinji, pontho kuti asabatiza+ anthu azinji kupiringana Juwau, 2 (maseze Yezu nee akhabatiza anthu, mbwenye akhabatiza ndi anyakupfundzace), 3 iye abuluka ku Yudeya mbaenda pontho ku Galileya. 4 Mbwenye iye akhafunika kupita na ku Samariya. 5 Natenepa iye afika ku Samariya mu nzinda unacemerwa Sikari, cifupi na munda wa Yakobe ukhadapasa iye mwanace Zuze.+ 6 Pontho kweneko kukhali na ncera wa Yakobe.+ Nakuti Yezu akhadaneta na ulendo, iye akhala pa ncera. Ukhali ndzidzi 12 wakumasikati.

7 Nkazi wa ku Samariya abwera kudzatunga madzi. Yezu ampanga: “Ndipasembo madzi ndimwe.” 8 (Thangwi anyakupfundzace akhadaenda kagula pyakudya ku nzinda.) 9 Penepo nkazi wa ku Samariya ambvundza: “Pinacitika tani kuti imwe Muyuda muphembe madzi akumwa kuna ine nkazi wa ku Samariya?” (Thangwi Ayuda nee asabverana na Asamariya.)+ 10 Yezu antawira: “Iwe mbudadziwa pya muoni wa Mulungu+ na ule anakupanga kuti: ‘Ndipasembo madzi ndimwe,’ iwe mbudamʼphemba, iye mbadakupasa madzi akupasa umaso.”+ 11 Nkazi alonga: “Mbuya, imwe nkhabe nʼthepu toera kutunga nawo madzi, pontho ncera ndi wakuzika. Mphapo munaatunga kupi madzi anewa akupasa umaso? 12 Kodi imwe ndimwe nkulu kupiringana mbuyathu Yakobe? Iye atipasa ncera uyu ukhamwa iye na anace pabodzi na pifuyo pyace.” 13 Yezu antawira: “Munthu anamwa madzi awa, anadzakhala pontho na nyota. 14 Munthu anamwa madzi anafuna kumpasa ine, cipo anadzakhala pontho na nyota,+ mbwenye madzi anafuna kumpasa ine anadzakhala muna iye ninga mphuno ya madzi toera kumpasa umaso wakukhonda mala.”+ 15 Nkazi alonga: “Mbuya, ndipaseni madzi anewa toera ndikhonde kukhala pontho na nyota, ndikhondembo kubwera pontho pano kudzatunga madzi.”

16 Iye ampanga: “Ndoko, kacemere mamunako ubwere naye kuno.” 17 Nkazi atawira: “Ine nkhabe mamuna.” Yezu ampanga: “Pidalonga iwe kuti: ‘Ine nkhabe mamuna,’ walonga mwadidi. 18 Thangwi iwe ukhadasembwa na amuna axanu, pontho mamuna ali na iwe cincino si mamunako tayu. Pidalonga iwe mphyandimomwene.” 19 Nkazi alonga: “Mbuya, ndisaona kuti imwe ndimwe mprofeta.+ 20 Ambuyathu akhalambira Mulungu paphiri iyi, mbwenye imwe Ayuda musalonga kuti anthu asafunika kulambira Mulungu ku Yerusalemu.”+ 21 Yezu ampanga: “Nkaziwe, mwandimomwene ine ndinakupanga kuti unadzafika ndzidzi wakuti imwe nee munadzalambira Baba paphiri iyi, nee ku Yerusalemu. 22 Imwe musalambira cinakhonda imwe kudziwa,+ mbwenye ife tisalambira cinadziwa ife, thangwi cipulumuso cisabuluka kuna Ayuda.+ 23 Mbwenye unadzafika ndzidzi, pontho ndzidzi unoyu wafika, wakuti alambiri andimomwene anadzalambira Baba mukutsogolerwa na nzimu na undimomwene, thangwi mwandimomwene Baba asasaka anthu ninga anewa toera kumulambira.+ 24 Mulungu ndi nzimu,+ pontho ale anamulambira asafunika kumulambira mukutsogolerwa na nzimu na undimomwene.”+ 25 Nkazi antawira: “Ine ndisadziwa kuti anabwera Mesiya, ule anacemerwa Kristu. Iye angabwera, anadzatifokotozera pinthu pyonsene.” 26 Yezu antawira: “Iye, ndine pano analonga na iwe.”+

27 Pa ndzidzi unoyu anyakupfundzace afika, iwo adzumatirwa thangwi iye akhalonga na nkazi. Mbwenye nee mʼbodzi adambvundza kuti: “Musafunanji na iye?” peno “Thangwi yanji mukulonga naye?” 28 Penepo nkazi asiya nkhali yace ya madzi, aenda ku nzinda, mbapanga anthu kuti: 29 “Bwerani muone munthu adandipanga pinthu pyonsene pidacita ine. Kodi iye panango si Kristu tayu?” 30 Iwo abuluka mu nzinda mbaenda kuna Yezu.

31 Iwo mbadzati kufika, anyakupfundza akhakulumiza Yezu, mbampanga: “Mpfundzisi,+ dyani.” 32 Mbwenye iye aatawira: “Ine ndiri na cakudya cinakhonda imwe kudziwa.” 33 Penepo anyakupfundzace abvundzana okha-okha: “Kodi alipo adamʼbweresera cakudya?” 34 Yezu aapanga: “Cakudya canga ndi kucita pinafuna ule adandituma,+ mbandimalisa basa yace.+ 35 Kodi imwe nee musalonga kuti yasala miyezi minai toera kufika ndzidzi wakubvuna? Mbwenye ine ndinakupangani kuti: Fungulani maso anu muyangʼane minda, onani kuti pyakudya pyamala kukola toera kubvunwa,+ 36 nyakubzwala akutambiriswa, pontho akugumanya misapo toera kuwina umaso wakukhonda mala, toera nyakubzwala na nyakubvuna atsandzaye pabodzi pene.+ 37 Thangwi munjira ineyi, mafala awa ndi andimomwene: Mʼbodzi ndi nyakubzwala, unango ndi nyakubvuna. 38 Ine ndakutumani toera kubvuna pidakhonda imwe kubzwala. Anango abzwala, mbwenye imwe muli kutsandzaya na misapo ya basa yawo.”

39 Asamariya azinji a mu nzinda unoyu akhulupira Yezu thangwi ya mafala a nkazi ule, mudapereka iye umboni, mbalonga: “Iye andipanga pinthu pyonsene pidacita ine.”+ 40 Pidafika Asamariya kuna Yezu, aphemba toera iye akhale na iwo. Natenepa Yezu akhala kweneko ntsiku ziwiri. 41 Penepo anthu azinji akhulupira thangwi ya pinthu pikhalonga iye, 42 iwo apanga nkazi: “Ife nee tisakhulupira thangwi ya pidalonga iwe basi; thangwi ife tabva tekhene, pontho tisadziwa kuti mwandimomwene munthu uyu ndi mpulumusi wa dziko.”+

43 Mudapita ntsiku ziwiri, iye abuluka kweneko mbaenda ku Galileya. 44 Mbwenye Yezu akhalonga kuti* mprofeta nee asalemedzwa kucisa cace.+ 45 Mbwenye pidafika iye ku Galileya, Agalileu azinji antambira mwadidi, thangwi iwo akhadaona pinthu pizinji pidacita iye pa phwando ku Yerusalemu,+ thangwi iwo akhadaendambo kuphwando ineyi.+

46 Buluka penepo iye afika pontho ku Kana wa ku Galileya, kukhadasanduza iye madzi kudza vinyu.+ Akhalipo nyabasa wankulu wa mambo ku Kafarnau, wakuti mwanace wamamuna akhaduwala. 47 Pidabva iye kuti Yezu afika ku Galileya buluka ku Yudeya, aenda kuna iye mbamʼphemba kuti aende pabodzi na iye toera akawangise mwanace, thangwi akhali cifupi na kufa. 48 Mbwenye Yezu ampanga: “Mungakhonda kuona pirengo na pinthu pyakudzumisa, imwe cipo munakhulupira.”+ 49 Nyabasa wankulu wa mambo alonga: “Mbuya, tendeni mwananga mbadzati kufa.” 50 Yezu ampanga: “Bwerera kunyumba kwako, mwanako awanga.”+ Iye akhulupira mafala adampanga Yezu, mbabwerera kunyumba kwace. 51 Mbwenye pikhabwerera iye kunyumba, anyabasa ace akhaenda kuna iye toera kumpanga kuti mwanace awanga. 52 Natenepa iye aabvundza kuti ndi ndzidzi upi udawanga iye. Iwo antawira: “Iye awanga dzulo pa ndzidzi ubodzi wakumasikati.” 53 Babace adzindikira kuti ndi ndzidzi unoyu udapangwa iye na Yezu kuti: “Mwanako awanga.”+ Natenepa, iye na anthu onsene a panyumba pace, akhulupira Yezu. 54 Ceneci cikhali cirengo caciwiri+ cidacita Yezu pidabuluka iye ku Yudeya mbaenda ku Galileya.

5 Buluka penepo, ikhadafika ntsiku ya phwando+ ya Ayuda, natenepa Yezu aenda ku Yerusalemu. 2 Ku Yerusalemu cifupi na Nsuwo wa Mabira+ kuna thawala yakuti Mucihebheri isacemerwa Bhetesata, penepo pana makhonde maxanu. 3 Penepo pakhali na anthu azinji akuduwala, pakhalimbo na maboliboli, anyakulamala miyendo, anyakulamala mikono na anyampfutete. 4 *—— 5 Mbwenye penepo pakhali na mamuna mʼbodzi wakuti akhaduwala mu pyaka 38. 6 Yezu pidaona iye mamuna unoyu mbakagona, pontho nakuti akhadziwa kuti iye akhaduwala mu pyaka pizinji, ambvundza: “Usafuna uwange?”+ 7 Nyakuduwala antawira: “Mbuya, ine nkhabe munthu toera kundibiza nʼthawala madzi angatekenyeka, mu ndzidzi unaenda ine, unango asandipitira patsogolo mbabira mʼmadzi.” 8 Yezu ampanga: “Lamuka! Kwata makha ako* ufambe.”+ 9 Penepo pene iye awanga, akwata makha ace* mbatoma kufamba.

Ineyi ikhali ntsiku ya Sabudu. 10 Natenepa Ayuda atoma kupanga mamuna adawangiswa: “Lero ndi ntsiku ya Sabudu, iwe nee usatawiriswa kuthukula makha.”*+ 11 Mbwenye iye aatawira: “Ule adandiwangisa ndiye adandipanga kuti: ‘Kwata makha ako* ufambe.’” 12 Iwo ambvundza: “Mbani munthu unoyu adakupanga kuti: ‘Kwata makha ako ufambe’?” 13 Mbwenye mamuna unoyu nee akhadziwa kuti mbani adamuwangisa, thangwi Yezu akhadapita pakati pa mwinji wa anthu akhali penepo.

14 Buluka penepo Yezu anʼgumana mu templo, mbampanga: “Ona, iwe wawanga. Leka kudawa pontho, toera ukhonde kucitikirwa na cinthu cakuipa kakamwe kupiringana utenda.” 15 Mamuna unoyu aenda kuna Ayuda, mbaapanga kuti adamuwangisa ndi Yezu. 16 Na thangwi ineyi, Ayuda akhatcinga Yezu thangwi iye akhacita pyenepi pa ntsiku ya Sabudu. 17 Mbwenye iye aapanga: “Babanga asapitiriza kuphata basa mpaka lero, inembo ndisapitiriza kuphata basa.”+ 18 Ineyi ndi thangwi idacitisa Ayuda kusaka kakamwe Yezu toera kumupha, thangwi iwo akhanyerezera kuti iye nee akhapwaza ntsiku ya Sabudu basi, mbwenye akhalongambo kuti Mulungu ndi Babace,+ mbacitika ekhene kukhala sawasawa na Mulungu.+

19 Natenepa, Yezu aatawira: “Mwandimomwene ine ndinakupangani kuti Mwana nkhabe kucita cinthu ninga munafunira iye, mbwenye basi ene asacita cinaona iye Babace mbakacita.+ Thangwi pinthu pyonsene pinacita Baba, Mwana asapicitambo munjira ibodzi ene. 20 Thangwi Baba asafuna kakamwe Mwana,+ mbampangiza pinthu pyonsene pinacita Iye, pontho iye anampangiza mabasa makulu kakamwe kupiringana anewa, toera imwe mudzumatirwe.+ 21 Ninga Baba asalamusa anyakufa mbaapasa umaso,+ Mwana asalamusambo muli akufa ule anafuna iye.+ 22 Thangwi Baba nkhabe kutonga munthu, mbwenye basa yakutonga aipereka kuna Mwana,+ 23 toera anthu onsene alemedze Mwana ninga munalemedza iwo Baba. Munthu anakhonda kulemedza Mwana nee akulemedza Baba adatuma Mwana.+ 24 Mwandimomwene ine ndinakupangani kuti munthu anabva mafala anga mbakhulupira Ule adandituma, ali na umaso wakukhonda mala,+ pontho iye nee anatongwa, mbwenye abuluka mu kufa mbakhala mʼmaso.+

25 “Mwandimomwene ine ndinakupangani kuti unadzafika ndzidzi, pontho ndzidzi unoyu wafika, wakuti anyakufa anadzabva fala ya Mwana wa Mulungu, pontho ale adabvera anadzakhala mʼmaso. 26 Thangwi ninga Baba ali na mphambvu yakupasa umaso,+ iye apasambo Mwana mphambvu yakupasa umaso.+ 27 Iye ampasa mphambvu toera kutonga,+ thangwi iye ndi Mwana wa munthu.+ 28 Lekani kudzumatirwa na pyenepi, thangwi unadzafika ndzidzi wakuti onsene ali munthumbi zakukumbukirwa anadzabva fala yace,+ 29 mbabuluka. Ale adacita pinthu pyadidi anadzalamuka toera kukhala mʼmaso, ale adacita pinthu pyakuipa anadzalamuka toera kutongwa.+ 30 Nee cinthu cibodzi cinacita ine ninga munafunira ine. Ine ndisatonga anthu ninga munandipangira Baba. Kutonga kwanga ndi kwakulungama+ thangwi nee ndisacita pinafuna ine, mbwenye ndisacita pinafuna Ule adandituma.+

31 “Ndingapereka umboni thangwi ya ine, umboni wanga nee ndi wandimomwene.+ 32 Mbwenye alipombo anapereka umboni thangwi ya ine, pontho ndisadziwa kuti umboni unapereka iye thangwi ya ine ndi wandimomwene.+ 33 Imwe mwatuma anthu mbaenda kuna Juwau, pontho iye apereka umboni thangwi ya undimomwene.+ 34 Ine nee ndisafuna munthu toera kundicitira umboni, mbwenye ndisalonga pinthu pyenepi toera imwe mupulumuswe. 35 Munthu unoyu akhali ninga nyale yakugaka na yakuyetimira, pontho mu ndzidzi wakucepa imwe mukhafuna kakamwe kutsandzaya mu ceza cace.+ 36 Ine ndiri na umboni ukulu kakamwe kupiringana wa Juwau, thangwi mabasa adandipasa Babanga toera kucita, mabasa anewa anacita ine, asapereka umboni wakuti ine ndatumwa na Baba.+ 37 Baba adandituma ndiye adapereka umboni thangwi ya ine.+ Imwe cipo mwabva fala yace, peno kuona kuti iye akhala tani,+ 38 pontho fala yace nkhabe kukhazikika mʼmitima yanu, thangwi imwe nee musakhulupira ule adatuma iye.

39 “Imwe musafufudza Malemba+ thangwi musanyerezera kuti mungacita pyenepi munagumana umaso wakukhonda mala; mbwenye Malemba anewa ndiwo anapereka umboni thangwi ya ine.+ 40 Ngakhale tenepo, imwe nkhabe funa kubwera kuna ine+ toera mukhale na umaso. 41 Ine nkhabe funa kupaswa mbiri na anthu, 42 mbwenye ine ndisadziwa mwadidi kuti imwe nkhabe ufuni wa Mulungu mʼmitima yanu. 43 Ine ndabwera mu dzina ya Babanga, mbwenye imwe nee mwanditambira. Munthu unango angabwera mu dzina yace ene, imwe munantambira. 44 Munakwanisa tani kukhulupira khala imwe musatawira kupasana mbiri unango na ndzace, mbamukhonda kusaka mbiri inabuluka kuna Mulungu mʼbodzi basi?+ 45 Lekani kunyerezera kuti ine ndinakusumirani kuna Baba; anakusumirani ndi Mose,+ ule ananyindira imwe. 46 Mwandimomwene, mbamudakhulupira Mose, imwe mbamudakhulupirambo ine, thangwi iye alemba pya ine.+ 47 Mphapo khala nee musakhulupira pidalemba iye, munakhulupira tani pinalonga ine?”

6 Buluka penepo, Yezu aenda kuntunda unango wa Bara ya Galileya, inacemerwambo Tibheriyadhe.+ 2 Mwinji ukulu wa anthu ukhantowera+ thangwi iwo akhaona pirengo pikhacita iye pya kuwangisa atenda.+ 3 Natenepa, Yezu akwira paphiri mbakhala pantsi pabodzi na anyakupfundzace. 4 Phwando ya Paskwa+ ya Ayuda ikhali cifupi. 5 Yezu pidaona iye mwinji ukulu wa anthu mbukabwera kuna iye, abvundza Filipi: “Tinagula kupi mikate toera anthu awa adye?”+ 6 Mbwenye iye acita mbvundzo unoyu toera kudziwa pikhanyerezera Filipi, thangwi Yezu akhadziwa kale pikhafuna iye kucita. 7 Filipi antawira: “Maseze tiphatisire madhenaryo* 200 toera kugula mikate, nee inakwana toera mʼbodzi na mʼbodzi wa iwo atambire phindi yace.” 8 Nyakupfundzace unango akhacemerwa Andreya, mʼbale wace Simau Pedhru, ampanga: 9 “Pano pana mʼphale mʼbodzi ali na mikate mixanu ya sevadha na ntsomba ziwiri zingʼono. Mbwenye pyenepi pinakwananji kuna anthu onsene awa?”+

10 Yezu alonga: “Pangani anthu akhale pantsi.” Nakuti pa mbuto ineyi pakhali na tsanga izinji, anthu akhala pantsi. Pa mwinji unoyu pakhali na amuna cifupi na 5.000.+ 11 Yezu akwata mikate, pidamala iye kucita phembero yakupereka takhuta, aigawira anthu adakhala pantsi penepo, iye acitambo pibodzi pyene na ntsomba zingʼono, anthu adya ninga mukhafunira iwo. 12 Pidamala iwo kudya mbakhuta, Yezu apanga anyakupfundzace: “Gumanyani mapindi adasala, toera pakhonde kubvungika cinthu.” 13 Iwo agumanya mapindi adasala a mikate mixanu ya sevadha idadya iwo, mbadzadza pitundu 12.

14 Anthu pidaona iwo cirengo cidacita Yezu, atoma kulonga mbati: “Mwandimomwene, uyu ndi Mprofeta adalongwa kuti mbadabwera pa dziko.”+ 15 Pidadziwa Yezu kuti anthu akhafuna kudzamʼphata toera amuikhe ninga mambo wawo, iye abuluka pontho+ mbaenda kakhala ekhene kuphiri.+

16 Pidadoka dzuwa, anyakupfundzace aenda ku bara,+ 17 iwo akwira mʼmwadiya toera kuwambuka bara kuenda ku Kafarnau. Pa ndzidzi unoyu kunja kukhadapswipa, mbwenye Yezu akhadzati kuenda kuna iwo.+ 18 Pontho mʼbara mukhali na mabimbi thangwi kukhali na mphepo ikulu kakamwe.+ 19 Mbwenye pidacapa iwo nsindzo wa makilometru cifupi na maxanu peno matanthatu,* iwo aona Yezu akufamba padzulu pa madzi mbakafendedzera mwadiya, penepo iwo agopa kakamwe.20 Mbwenye iye aapanga: “Ndine pano, lekani kugopa!”+ 21 Penepo iwo ankwiza mʼmwadiya, mwakukhonda dembuka mwadiya watsama kuntunda ukhaenda iwo.+

22 Mangwana mwace, anthu akhadasala kuntunda unango wa bara aona kuti penepo pakhadasala mwadiya ungʼono basi. Pontho iwo akhadziwa kuti Yezu nee akhadakwira mʼmwadiya mu ndzidzi udabuluka anyakupfundzace, mbwenye anyakupfundza akhadabuluka okhene. 23 Natenepa, miyadiya idabuluka ku Tibheriyadhe yafika cifupi na mbuto idadya anthu mikate pidamala Mbuya kucita phembero yakupereka takhuta. 24 Mwinji wa anthu pidaona iwo kuti nee Yezu nee anyakupfundzace akhali kweneko, iwo akwira miyadiya ineyi mbaenda ku Kafarnau kasaka Yezu.

25 Pidanʼgumana iwo kuntunda unango wa bara, ambvundza: “Mpfundzisi,+ mwafika lini kuno?” 26 Yezu aatawira: “Ine ndinakupangani na cinyindiro consene kuti imwe nee musandisaka thangwi ya pirengo pidaona imwe, mbwenye thangwi mwadya mikate mbamukhuta.+ 27 Lekani kuphata basa thangwi ya cakudya cakuti cisamala, mbwenye phatani basa thangwi ya cakudya cakukhonda mala cinatsogolera ku umaso wakukhonda mala,+ cinafuna kupaswa imwe na Mwana wa munthu; thangwi Mulungu Baba, amuikha cidzindikiro cace cinapangiza kuti iye ndi wakutawirika.”+

28 Natenepa iwo ambvundza: “Ndi mabasa api asafunika ife kucita toera tikhale akutawirika kuna Mulungu?” 29 Yezu aatawira: “Basa ya Mulungu inafunika imwe kucita ndi iyi: Musafunika kukhulupira ule adatuma iye.”+ 30 Penepo iwo ambvundza: “Ndi cirengo+ cipi cinafuna imwe kucita toera ife ticione mbatikukhulupirani? Ninji cinafuna imwe kucita? 31 Ambuyathu adya mana nʼthando,+ ninga mudalemberwa ipyo kuti: ‘Iye aapasa nkate wakudzulu toera iwo adye.’”+ 32 Penepo Yezu aapanga: “Ine ndinakupangani na cinyindiro consene kuti Mose nee akupasani nkate wakudzulu, mbwenye Babanga asakupasani nkate wandimomwene wakudzulu. 33 Thangwi nkate wa Mulungu ndi ule adatcita buluka kudzulu mbapasa umaso dziko.” 34 Natenepa iwo ampanga: “Mbuya, tipaseni nkate unoyu ndzidzi onsene.”

35 Yezu aapanga: “Ine ndine nkate wa umaso. Munthu anabwera kuna ine cipo anadzakhala pontho na njala; munthu anandikhulupira cipo anadzakhala pontho na nyota.+ 36 Ninga mudakupangani ine kuti imwe mwandiona, mbwenye nee musandikhulupira.+ 37 Anthu onsene adandipasa Baba anabwera kuna ine, inembo cipo ndinadzakhonda munthu anafuna kubwera kuna ine;+ 38 thangwi ine nee ndatcita buluka kudzulu+ toera kucita pinafuna ine, mbwenye toera kucita pinafuna ule adandituma.+ 39 Ipi ndi pinafuna ule adandituma: Kuti ine ndikhonde kuluza nee mʼbodzi wa anthu onsene adandipasa iye, mbwenye ndisafunika kualamusa muli akufa+ pa ntsiku yakumalisa. 40 Thangwi ipi ndi pinafuna Babanga: Kuti munthu anadzindikira Mwana mbanʼkhulupira, agumane umaso wakukhonda mala,+ pontho ine ndinadzamulamusa muli akufa+ pa ntsiku yakumalisa.”

41 Penepo Ayuda atoma kudungunya thangwi ya Yezu pidalonga iye kuti: “Ine ndine nkate udatcita buluka kudzulu.”+ 42 Iwo atoma kulonga: “Kodi uyu nee ndi Yezu mwana wa Zuze? Babace na mai wace ife nee tisaadziwa?+ Mphapo thangwi yanji cincino asalonga kuti: ‘Ine ndatcita buluka kudzulu’?” 43 Yezu aatawira mbati: “Lekani kudungunya mwekhene. 44 Nkhabe munthu anabwera kuna ine, Baba angakhonda kumʼbweresa,+ pontho ine ndinadzamulamusa muli akufa pa ntsiku yakumalisa.+ 45 Aprofeta alemba kuti: ‘Onsene anadzapfundziswa na Yahova.’*+ Natenepa, munthu anabvesera Baba mbatawira pinapfundzisa iye, anabwera kuna ine. 46 Nkhabe munthu adaona kale Baba,+ kusiyapo ule adabuluka kuna Mulungu; unoyu ndiye adaona Baba.+ 47 Ine ndinakupangani na cinyindiro consene kuti, munthu anakhulupira, ali na umaso wakukhonda mala.+

48 “Ine ndine nkate wa umaso.+ 49 Ambuyanu adya mana nʼthando, mbwenye iwo afa.+ 50 Uyu ndi nkate udabuluka kudzulu, toera munthu anaudya akhonde kufa. 51 Ine ndine nkate wa umaso udabuluka kudzulu. Munthu anadya nkate unoyu anakhala mʼmaso kwenda na kwenda; mwandimomwene nkate unafuna kupereka ine ndi manungo anga, toera anthu a pa dziko agumane umaso.”+

52 Penepo Ayuda atoma kuketesana okha-okha, mbalonga: “Pinacitika tani kuti munthu uyu atipase manungo ace toera ife tidye?” 53 Natenepa Yezu aapanga: “Ine ndinakupangani na cinyindiro consene kuti mungakhonda kudya manungo a Mwana wa munthu, mbamukhonda kumwa ciropa cace, imwe nee munadzakhala na umaso.*+ 54 Munthu anadya manungo anga mbamwa ciropa canga ali na umaso wakukhonda mala, pontho ine ndinadzamulamusa muli akufa+ pa ntsiku yakumalisa; 55 thangwi manungo anga ndi cakudya candimomwene, pontho ciropa canga ndi cakumwa candimomwene. 56 Munthu anadya manungo anga mbamwa ciropa canga asapitiriza kukhala wakuphatana na ine, inembo ndisakhala wakuphatana na iye.+ 57 Ninga Baba adandituma ali mʼmaso, pontho ine ndiri mʼmaso thangwi ya Baba, tenepambo munthu anadya manungo anga anadzakhala mʼmaso thangwi ya ine.+ 58 Uyu ndi nkate udabuluka kudzulu. Iwo ndi wakusiyana na pidadya ambuyanu, mukupita kwa ndzidzi mbafa. Munthu anadya nkate uyu anakhala mʼmaso kwenda na kwenda.”+ 59 Iye alonga pinthu pyenepi pikhapfundzisa iye mu Sinagoga* ku Kafarnau.

60 Pidabva iwo mafala anewa, anyakupfundzace azinji alonga: “Mafala anewa mbakunentsa kakamwe; mbani anakwanisa kuabvesera?” 61 Mbwenye pidadziwa Yezu kuti anyakupfundzace akhadungunya thangwi ya mafala anewa, aabvundza: “Kodi mafala anewa asakutsukwalisani?* 62 Mphapo ndiye tani mungaona Mwana wa munthu mbakakwira kuenda kukakhala iye kale?+ 63 Nzimu ndiwo unapasa umaso;+ manungo nkhabe pinakwanisa iwo. Mafala adakupangani ine ndi akubverana na nzimu wakucena, pontho asapasa umaso.+ 64 Mbwenye alipo anango pakati panu anakhonda kukhulupira.” Thangwi kubulukira pakutoma Yezu akhadziwa kuti mbani adakhonda kukhulupira, na ule akhafuna kunsandukira.+ 65 Iye apitiriza kulonga: “Natenepa ine ndakupangani kuti, nkhabe munthu anabwera kuna ine angakhonda kutawiriswa na Baba.”+

66 Na thangwi ineyi, anyakupfundzace azinji abwerera ku pinthu pikhadasiya iwo nduli,+ pontho nee akhafambabve na iye. 67 Natenepa Yezu abvundza apostolo 12: “Kodi imwe nkhabe funa kuendambo?” 68 Simau Pedhru antawira: “Mbuya, tinaenda kuna ani?+ Imwe ndimwe ali na mafala anapasa umaso wakukhonda mala.+ 69 Ife takhulupira, pontho tisadziwa kuti imwe ndimwe Wakucena wa Mulungu.”+ 70 Yezu aapanga: “Kodi ine nee ndakusankhulani 12?+ Mbwenye mʼbodzi wa imwe ndi ninga dyabo.”*+ 71 Mwandimomwene iye akhalonga pya Yuda mwana wa Simau Iskariyoti, thangwi ndiye akhafuna kunsandukira, maseze akhali mʼbodzi wa apostolo 12.+

7 Buluka penepo, Yezu apitiriza kumwaza mphangwa ku Galileya. Iye nee akhafuna kuenda ku Yudeya thangwi Ayuda akhansaka toera kumupha.+ 2 Mbwenye Phwando ya Misasa*+ ikhacitwa na Ayuda ikhali cifupi. 3 Natenepa, abale ace+ ampanga: “Buluka kuno uende ku Yudeya toera anyakupfundza ako aonembo pinthu pinacita iwe. 4 Thangwi nkhabe munthu anacita pinthu ncibisobiso khala iye asafuna kudziwika pakweca. Khala iwe usacita pinthu pyenepi, picite pamaso pa anthu onsene.” 5 Mwandimomwene, abale ace nee akhanʼkhulupira.+ 6 Natenepa Yezu aapanga: “Ndzidzi wanga udzati kukwana,+ mbwenye kwa imwe, ndzidzi onsene ngwadidi. 7 Dziko nkhabe thangwi toera kukuidani, mbwenye isaida ine thangwi ndisapereka umboni wakuti mabasa ayo ndi akuipa.+ 8 Imwe ndokoni kuphwando, ine nee ndinaenda cincino kuphwando ineyi, thangwi ndzidzi wanga udzati kukwana.”+ 9 Pidamala iye kulonga pyenepi, apitiriza ku Galileya.

10 Mbwenye pidamala kuenda abale ace kuphwando, iye aendambo ncibisobiso. 11 Natenepa, Ayuda atoma kunsaka pa phwando, mbalonga: “Ali kupi munthu ule?” 12 Pakati pa mwinji, anthu akhalonga pinthu pizinji mwaciwerewere thangwi ya iye. Anango akhalonga kuti: “Iye ndi munthu wadidi.” Anangombo akhalonga: “Nkhabe, iye si munthu wadidi tayu. Iye asanyengeza anthu.”+ 13 Mbwenye nkhabe munthu akhakwanisa kumulonga pakweca, thangwi iwo akhagopa Ayuda.+

14 Phwando pikhali iyo pakati-nakati, Yezu aenda ku templo mbatoma kupfundzisa anthu. 15 Penepo Ayuda adzumatirwa kakamwe, mbalonga: “Munthu uyu nee aenda kapfundza kuxikola.*+ Mphapo asakwanisa tani kudziwa mwadidi Malemba?”+ 16 Natenepa Yezu aatawira: “Pinapfundzisa ine si pyanga tayu, mbwenye ndi pya ule adandituma.+ 17 Khala munthu asafuna kucita pinafuna Mulungu, munthu unoyu anadziwa khala pinapfundzisa ine pisabuluka kuna Mulungu,+ peno ndisalonga pinanyerezera ine. 18 Munthu analonga pinafuna iye, asasaka kupaswa mbiri; mbwenye munthu anasaka kupasa mbiri ule adantuma,+ munthu unoyu ndi wandimomwene, pontho asacita pinthu mwakulungama. 19 Kodi Mose nee akupasani Mwambo?+ Mbwenye nee mʼbodzi wa imwe asabvera Mwambo. Mphapo thangwi yanji musafuna kundipha?”+ 20 Mwinji wa anthu watawira: “Iwe uli na dimonyo. Mbani anafuna kukupha?” 21 Yezu aatawira: “Ine ndacita cinthu cibodzi basi, mbwenye monsene musadzudzumika. 22 Nyerezerani ipi: Mose akupasani mwambo unalonga pya kusidzwa,+ iwo nee wabuluka kuna Mose, mbwenye wabuluka kuna ambuyanu,+ natenepa imwe musasidza munthu pa ntsiku ya Sabudu. 23 Khala imwe musasidza munthu pa ntsiku ya Sabudu toera mukhonde kuswa Mwambo wa Mose, thangwi yanji mwaipirwa kakamwe na ine pidawangisa ine munthu pa ntsiku ya Sabudu?+ 24 Lekani kutonga mwakubverana na maonekero akunja, mbwenye tongani mwakulungama.”+

25 Anthu anango a ku Yerusalemu atoma kulonga: “Kodi munthu uyu nee ndiye anasaka iwo toera kumupha?+ 26 Mbwenye onani, iye akulonga pakweca, nkhabe cinthu cinalonga iwo kuna iye. Kodi atsogoleri athu asanyerezerambo kuti mwandimomwene iye ndi Kristu? 27 Kusiyapo pyenepi, ife tisadziwa kudabuluka munthu uyu;+ mbwenye Kristu angabwera, nkhabe munthu anafuna kudziwa kudabuluka iye.” 28 Pikhapfundzisa iye mu templo, Yezu alonga mwakugaluza, mbati: “Imwe musandidziwa, pontho musadziwa kudabuluka ine. Ine nee ndabwera ninga munafunira ine,+ mbwenye Ule adandituma ndi wandimomwene, imwe nkhabe kundziwa.+ 29 Ine ndisandziwa,+ thangwi ndine muimiriri wace, Iye ndiye adandituma.” 30 Natenepa, iwo akhafuna kumʼmanga,+ mbwenye nkhabepo adayesera kumʼphata, thangwi ndzidzi wace ukhadzati kukwana.+ 31 Ngakhale tenepo, anthu azinji anʼkhulupira,+ pontho iwo akhalonga: “Kodi Kristu angabwera anadzacita pirengo pizinji kupiringana pinacita munthu uyu?”

32 Afarisi abva mwinji wa anthu ukhadungunya thangwi ya Yezu, natenepa akulu a anyantsembe na Afarisi atuma anyakuonera toera aende kamʼmanga.* 33 Yezu alonga: “Ndinakhala na imwe mu ndzidzi ungasi mbandidzati kuenda kuna Ule adandituma.+ 34 Imwe munadzandisaka, mbwenye nee munadzandiona. Kunafuna ine kuenda, imwe munacimwana kuendako.”+ 35 Natenepa Ayuda alonga okha-okha: “Ndi kupi kunafuna kuenda munthu uyu, ife mbaticimwana kumuona? Kodi iye asafuna kuenda kuna Ayuda adabalalika pakati pa Agerego toera kupfundzisa Agerego? 36 Pisabvekanji pyenepi pidalonga iye kuti: ‘Imwe munadzandisaka, mbwenye nee munadzandiona. Kunafuna ine kuenda, imwe munacimwana kuendako’?”

37 Pa ntsiku yakumalisa, yakuti ndi ntsiku ikulu kakamwe ya phwando,+ Yezu alimira mbalonga mwakugaluza: “Khala munthu ali na nyota, mbabwere kuna ine toera amwe madzi.+ 38 Munthu anandikhulupira, Malemba asalonga kuti: ‘Muntima mwace munabuluka madzi akupasa umaso.’”+ 39 Mbwenye iye akhalonga pya nzimu wakucena ukhafuna kutambira ale ananʼkhulupira, thangwi iwo akhadzati kutambira nzimu wakucena+ thangwi Yezu akhadzati kupaswa mbiri yace.+ 40 Anthu anango adabva mafala anewa pakati pa mwinji, atoma kulonga: “Mwandimomwene uyu ndi Mprofeta.”+ 41 Anthu anango akhalonga: “Uyu ndi Kristu.”+ Anangombo akhalonga: “Kodi Kristu anabuluka ku Galileya?+ 42 Kodi Malemba nee asalonga kuti Kristu anabulukira mu dzindza ya Dhavidhi+ na ku Bhetelehemu+ cisa cikakhala Dhavidhi?”+ 43 Natenepa, kwaoneka kusiyana maonero pakati pa mwinji wa anthu thangwi ya Yezu. 44 Anango akhafuna kumʼmanga, mbwenye nee mʼbodzi adayesera kumʼphata.

45 Buluka penepo, anyakuonera abwerera kuna akulu a anyantsembe na Afarisi, iwo aabvundza: “Thangwi yanji nee mwabwera naye?” 46 Anyakuonera atawira: “Cipo munthu unango alonga kale ninga iye.”+ 47 Afarisi alonga: “Kodi imwe mwanyengezwambo? 48 Kodi alipo ananʼkhulupirambo pakati pa atsogoleri athu peno Afarisi?+ 49 Mbwenye mwinji uyu wa anthu anakhonda kudziwa Mwambo, ndi anthu adapaswa dzedze.” 50 Mʼbodzi wa iwo akhacemerwa Nikodhemu wakuti akhadaenda kale kuna Yezu, aapanga: 51 “Kodi Mwambo wathu usatitawirisa kutonga munthu mbatidzati kumubva toera kudziwa pinacita iye?”+ 52 Iwo antawira: “Kodi iwe ndiwembo wa ku Galileya? Dinga Malemba, unaona kuti nkhabepo mprofeta anafuna kubuluka ku Galileya.”*

8 12 Penepo Yezu aapanga pontho, mbati: “Ine ndine ceza ca dziko.+ Munthu ananditowera nee anafambabve ncidima, mbwenye anadzakhala na ceza+ cakupasa umaso.” 13 Afarisi ampanga: “Iwe usapereka wekhene umboni thangwi ya iwe, natenepa umboni wako si wandimomwene tayu.” 14 Yezu aatawira: “Maseze ine ndisapereka umboni thangwi ya ine, umboni wanga ndi wandimomwene, thangwi ndisadziwa kudabuluka ine na kunaenda ine.+ Mbwenye imwe nkhabe dziwa kudabuluka ine na kunaenda ine. 15 Imwe musatonga mwakubverana na maonekero akunja;+ mbwenye ine nkhabe kutonga munthu. 16 Ine ndingatonga munthu, ndisatonga mwakulungama thangwi nee ndiri ndekhene, mbwenye Baba adandituma ali na ine.+ 17 Pontho mu Mwambo wanu pyalembwa kuti: ‘Umboni wa anthu awiri ndi wandimomwene.’+ 18 Ine ndine mʼbodzi anapereka umboni thangwi ya ine, waciwiri anapereka umboni thangwi ya ine ndi Baba, ule adandituma.”+ 19 Penepo iwo ambvundza: “Babako ali kupi?” Yezu aatawira: “Imwe nkhabe kundidziwa, pontho nee musadziwa Babanga.+ Imwe mbamudandidziwa, mbamudadziwambo Babanga.”+ 20 Iye alonga mafala anewa+ pikhapfundzisa iye mu templo pa mbuto ikhagumanika mabokosi akuikhira pyakupereka. Mbwenye nee munthu mʼbodzi adamʼmanga, thangwi ndzidzi wace ukhadzati kukwana.+

21 Natenepa iye aapanga pontho: “Ine ndiri kuenda, imwe munadzandisaka, mbwenye munadzafa mʼmadawo anu.+ Kunafuna ine kuenda, imwe munacimwana kuendako.”+ 22 Penepo Ayuda atoma kulonga: “Kodi iye asafuna kupheka ekhene? Thangwi iye asalonga kuti: ‘Kunafuna ine kuenda, imwe munacimwana kuendako.’” 23 Iye apitiriza kuapanga: “Imwe ndimwe a pantsi pano; mbwenye ine ndine wakudzulu.+ Imwe ndimwe a pa dziko ino; mbwenye ine sine wa pa dziko ino tayu. 24 Na thangwi ineyi ine ndakupangani kuti: Imwe munadzafa mʼmadawo anu. Thangwi mungakhonda kukhulupira kuti ndine ule adalongwa kuti mbadabwera, imwe munadzafa mʼmadawo anu.” 25 Natenepa iwo atoma kumbvundza: “Iwe ndiwe ani?” Yezu aatawira: “Thangwi yanji ine ndisapitiriza kulonga na imwe? 26 Ine ndiri na pinthu pizinji toera kulonga thangwi ya imwe, na pinango toera kutonga. Pontho Ule adandituma ndi wandimomwene, pinthu pidabva ine kuna iye, ndi pyenepi pinalonga ine pa dziko.”+ 27 Iwo nee abvesesa kuti iye akhalonga pya Baba. 28 Natenepa Yezu alonga: “Mungamala kumanika Mwana wa munthu+ pamuti, imwe munadzadziwa kuti iye ndine pano,+ pontho nkhabe cinthu cinacita ine ninga munafunira ine;+ mbwenye ndisalonga pire pidandipfundzisa Baba. 29 Ule adandituma ali na ine; iye nee andisiya ndekhene, thangwi ndzidzi onsene ndisacita pinthu pinakomerwa na iye.”+ 30 Pidalonga iye pinthu pyenepi, anthu azinji anʼkhulupira.

31 Natenepa Yezu apanga Ayuda adanʼkhulupira: “Imwe mungapitiriza mʼmafala anga, mwandimomwene ndimwe anyakupfundza anga, 32 imwe munadzadziwa undimomwene,+ pontho undimomwene unadzakusudzulani.”+ 33 Iwo antawira: “Ife ndife a dzindza ya Abhrahamu, pontho cipo takhala mabitcu a munthu. Mphapo thangwi yanji usalonga kuti: ‘Ife tinadzasudzulwa’?” 34 Yezu aatawira: “Ine ndinakupangani na cinyindiro consene kuti munthu anacita madawo ndi bitcu wa madawo.+ 35 Kusiyapo pyenepi, nyabasa nkhabe kupitiriza kukhala panyumba ya mbuyace kwenda na kwenda; mbwenye mwana wa mbuyace anakhala panyumba kwenda na kwenda. 36 Natenepa, Mwana angakusudzulani, imwe munadzakhaladi akusudzuka. 37 Ine ndisadziwa kuti imwe ndimwe a dzindza ya Abhrahamu. Mbwenye imwe musafuna kundipha, thangwi nee musatawira mafala anga. 38 Ine ndisalonga pinthu pidaona ine pikhali ine pabodzi na Babanga,+ mbwenye imwe musacita pinthu pidabva imwe kuna babanu.” 39 Iwo antawira: “Babathu ndi Abhrahamu.” Yezu aapanga: “Mbamudakhala ana a Abhrahamu,+ imwe mbamudacitambo pinthu pidacita Abhrahamu. 40 Mbwenye cincino imwe musafuna kupha ine pano, munthu adakupangani undimomwene udabva ine kuna Mulungu.+ Abhrahamu cipo mbadacita pyenepi. 41 Imwe musacita mabasa a Babanu.” Iwo antawira: “Ife nee ndife ana akunjira;* Babathu ndi mʼbodzi basi, Mulungu.”

42 Yezu aapanga: “Mbidakhala kuti Babanu ndi Mulungu, imwe mbamudandifuna,+ thangwi ine ndabuluka kuna Mulungu, natenepa ndiri pano. Ine nee ndabwera ninga munafunira ine, mbwenye Iye ndiye adandituma.+ 43 Thangwi yanji imwe nkhabe kubvesesa pinalonga ine? Thangwi imwe nkhabe funa kutawira mafala anga. 44 Imwe ndimwe ana a babanu Dyabo, pontho musafuna kucita pinafuna babanu.+ Iye ndi nyakupha anthu kubulukira padatoma iye,*+ pontho iye nee apitiriza mu undimomwene, thangwi muntima mwace nkhabemo undimomwene. Angalonga uthambi, asalonga mwakubverana na makhaliro ace, thangwi iye ndi nyauthambi, pontho ndi baba wa uthambi.+ 45 Mbwenye nakuti ine ndisakupangani undimomwene, imwe nkhabe kundikhulupira. 46 Mbani mwa imwe anafuna kupangiza kuti ine ndadawa? Khala ndisalonga undimomwene, mphapo thangwi yanji imwe nkhabe kundikhulupira? 47 Ana a Mulungu asabvesera mafala a Mulungu.+ Mbwenye imwe nkhabe kubvesera thangwi simwe ana a Mulungu tayu.”+

48 Ayuda antawira: “Ife tingalonga kuti: ‘Iwe ndiwe Nsamariya,+ pontho uli na dimonyo,+ tadawisa’?” 49 Yezu aapanga: “Ine nee ndiri na dimonyo, ndisalemedza Babanga, mbwenye imwe musandipwaza. 50 Ine nee ndisasaka kupasika mbiri ndekhene,+ mbwenye Alipo anafuna kuti ine ndipaswe mbiri, pontho iye ndi ntongi. 51 Ine ndinakupangani na cinyindiro consene kuti, munthu anabvera mafala anga, iye cipo anadzafa.”+ 52 Penepo Ayuda ampanga: “Cincino tisadziwa kuti iwe uli na dimonyo. Abhrahamu afa, aprofeta afambo, mbwenye iwe usalonga kuti, ‘munthu anabvera mafala ako, iye cipo anadzafa.’ 53 Kodi iwe ndiwe nkulu kakamwe kupiringana babathu Abhrahamu? Iye afa, aprofeta afambo. Kodi iwe usanyerezera kuti ndiwe ani?” 54 Yezu aatawira: “Ndingapasika mbiri ndekhene, mbiri yanga ndi yakusowa basa. Anandipasa mbiri ndi Babanga,+ ule analonga imwe kuti ndi Mulungu wanu. 55 Imwe nkhabe kundziwa,+ mbwenye ine ndisandziwa.+ Ndingalonga kuti ine nkhabe kundziwa, mbidakhala nyauthambi ninga imwe. Mbwenye ine ndisandziwa, pontho ndisabvera mafalace. 56 Babanu Abhrahamu akhafuna kakamwe kuona ntsiku ikhafuna ine kubwera, iye aiona mbakomerwa kakamwe.”+ 57 Penepo Ayuda ampanga: “Iwe udzati kufikisa pyaka 50 pyakubalwa, mphapo waona tani Abhrahamu?” 58 Yezu aatawira: “Ine ndinakupangani na cinyindiro consene kuti, Abhrahamu mbadzati kubalwa, ine ndikhalipo kale.”+ 59 Penepo iwo alokota miyala toera kumponyera, mbwenye Yezu abisala pyace, mbabuluka mu templo.

9 Yezu akhapita na njira mbaona munthu adabalwa boliboli. 2 Anyakupfundzace ambvundza: “Mpfundzisi,+ mbani adadawa, ndiye peno ndi anyakubalace toera iye abalwe boliboli?” 3 Yezu aatawira: “Nkhabe munthu adadawa, nee iye nee anyakubalace, mbwenye pyacitika tenepa toera anthu aone mabasa a Mulungu kubulukira mwa iye.+ 4 Tisafunika kuphata mabasa a Ule adandituma dzuwa mbiciripo;+ thangwi masiku ali kufika akuti nee munthu mʼbodzi anakwanisa kuphata basa. 5 Mbandiri pa dziko yapantsi, ine ndine ceza ca dziko.”+ 6 Pidamala iye kulonga mafala anewa, aphula mata pantsi mbamunya matope na mata, aakhwaza mʼmaso mwa boliboli,+ 7 mbampanga: “Ndoko kasambe nkhope ku thawala ya Silowe” (Silowe pisabveka “Ule Adatumwa”). Iye aenda, asamba nkhope mbabwerera akuona.+

8 Anthu a pacisa na ale akuti kale akhamuona mbakaphemba-phemba, atoma kulonga: “Kodi uyu nee ndi ule akakhala pantsi mbakaphemba-phemba?” 9 Anango akhalonga: “Ndiye.” Anangombo akhalonga: “Nkhabe, siye tayu mbwenye alandana na iye.” Iye ene akhalonga: “Ndine pano.” 10 Natenepa iwo ambvundza: “Mphapo maso ako afunguka tani?” 11 Iye aatawira: “Munthu unango anacemerwa Yezu amunya matope mbaakhwaza mʼmaso mwanga, mbandipanga: ‘Ndoko kasambe nkhope ku thawala ya Silowe.’+ Natenepa ine ndaenda, ndasamba nkhope mbanditoma kuona.” 12 Penepo iwo ambvundza: “Ali kupi munthu unoyu?” Iye aatawira: “Ine nkhabe dziwako kuna iye.”

13 Iwo akwata munthu unoyu wakuti kale akhali boliboli mbaenda naye kuna Afarisi. 14 Pyacitika kuti ntsiku idamunya Yezu matope mbafungula maso a boliboli,+ ikhali ntsiku ya Sabudu.+ 15 Penepo Afarisi atomambo kumbvundza kuti iye afungulwa tani maso ace. Iye aatawira: “Iye akhwaza matope mʼmaso mwanga, ndasamba nkhope, cincino ndiri kuona.” 16 Afarisi anango atoma kulonga: “Munthu unoyu nee atumwa na Mulungu, thangwi iye nkhabe kukoya ntsiku ya Sabudu.”+ Anango alonga: “Pinakwanisika tani kuti munthu wakudawa acite pirengo ninga pyenepi?”+ Natenepa paoneka kusiyana maonero pakati pawo.+ 17 Penepo Afarisi abvundza pontho boliboli adawangiswa: “Nakuti iye afungula maso ako, iwe usanyerezera kuti iye mbani?” Iye aatawira: “Iye ndi mprofeta.”

18 Mbwenye Ayuda nee akhatawira kuti mamuna unoyu kale akhali boliboli. Natenepa iwo acemeresa anyakubalace, 19 mbaabvundza: “Kodi uyu ndi mwananu analonga imwe kuti abalwa boliboli? Mphapo asakwanisa tani kuona cincino?” 20 Anyakubalace atawira: “Ife tisadziwa kuti uyu ndi mwanathu, pontho kuti iye abalwa boliboli. 21 Mbwenye ife nkhabe dziwa kuti iye asakwanisa tani kuona cincino; pontho ife nkhabe dziwa kuti mbani adafungula maso ace. Mbvundzeni iye. Iye ndi nkulu, anakwanisa kulonga ekhene.” 22 Anyakubalace alonga pyenepi thangwi akhagopa Ayuda.+ Thangwi Ayuda akhadabverana kuti munthu anafuna kulonga kuti Yezu ndi Kristu, asafunika kuthamangiswa mu sinagoga.+ 23 Ndi thangwi yace anyakubalace alonga: “Iye ndi nkulu. Mbvundzeni iye.”

24 Natenepa iwo acemeresa pontho munthu unoyu wakuti kale akhali boliboli, mbampanga: “Simba Mulungu; ife tisadziwa kuti munthu unoyu ndi nyakudawa.” 25 Iye aatawira: “Khala iye ndi nyakudawa, ine sinapidziwa tayu. Pinadziwa ine mphyakuti kale ndikhali boliboli, mbwenye cincino ndiri kuona.” 26 Penepo iwo ambvundza: “Ninji pidacita iye kuna iwe? Afungula tani maso ako?” 27 Iye aatawira: “Ine ndakupangani kale, mbwenye imwe nee mwapibvesera. Musafuna kubvanji pontho? Musafunambo kukhala anyakupfundzace?” 28 Natenepa iwo alonga mwakumpwaza mbati: “Iwe ndiwe nyakupfundza wa munthu unoyu, mbwenye ife ndife anyakupfundza a Mose. 29 Ife tisadziwa kuti Mulungu alonga na Mose, mbwenye munthu unoyu, ife nkhabe dziwa kudabuluka iye.” 30 Iye aatawira: “Pyenepi mphyakudzumisa kwa ine mungalonga kuti imwe nkhabe dziwa kudabuluka iye, mbwenye iye afungula maso anga. 31 Ife tisadziwa kuti Mulungu nkhabe kubvesera anyakudawa,+ mbwenye khala munthu asagopa Mulungu mbacita pinafuna iye, Mulungu asabvesera munthu unoyu.+ 32 Cipo pyabveka kale kuti alipo munthu unango adafungula maso a munthu adabalwa boliboli. 33 Munthu unoyu mbadakhonda kutumwa na Mulungu, iye nee mbadakwanisa kucita cinthu.”+ 34 Iwo antawira: “Iwe wabalwa mʼmadawo kakamwe, mphapo usafuna kupfundzisa ife?” Natenepa iwo anʼthamangisa!+

35 Yezu abva kuti iwo anʼthamangisa, pidaonana iye naye, ambvundza: “Iwe usakhulupira Mwana wa munthu?” 36 Iye antawira: “Mbuya, Mwana wa munthu mbani? Ndipangeni toera ine ndinʼkhulupire.” 37 Yezu antawira: “Iwe wamuona kale, mwandimomwene ndiye analonga na iwe.” 38 Iye alonga: “Mbuya, ine ndisanʼkhulupira.” Penepo iye agodamira Yezu. 39 Yezu alonga: “Ine ndabwera pa dziko yapantsi toera anthu atongwe, toera anthu anakhonda kuona aone,+ alembo anaona akhale maboliboli.”+ 40 Afarisi anango akhali penepo abva pinthu pyenepi, mbabvundza Yezu: “Kodi iwe usanyerezera kuti ifembo ndife maboliboli?” 41 Yezu aatawira: “Imwe mbamudakhala maboliboli nee mbamudakhala na mulando wa madawo. Mbwenye nakuti imwe musalonga kuti: ‘Ife tisaona,’ madawo anu munapitiriza nawo.”+

10 “Ine ndinakupangani na cinyindiro consene kuti munthu anakhonda kupita na pansuwo wa thanga ya mabira, mbwenye mbakwira na pa mbuto inango, unoyu ndi mbava.+ 2 Mbwenye ule anapita na pansuwo, ndi nkumbizi wa mabira.+ 3 Nyakuonera nsuwo asanfungulira,+ penepo mabira asabva fala yace.+ Iye asacemera mabira ace na dzina, mbabuluka nawo kunja. 4 Angamala kubulusa mabira ace, iye asaenda patsogolo pawo. Mabira asantowera thangwi iwo asadziwa fala yace. 5 Iwo cipo anatowera munthu anakhonda iwo kudziwa, mbwenye ananʼthawa, thangwi iwo nkhabe dziwa fala ya munthu unoyu.” 6 Yezu aapanga nsangani unoyu, mbwenye iwo nee abvesesa pikhalonga iye kuna iwo.

7 Natenepa Yezu alonga pontho: “Ine ndinakupangani na cinyindiro consene kuti ine ndine nsuwo wa mabira.+ 8 Onsene adabwera mbalonga kuti ndi akumbizi andimomwene, ndi mambava; mbwenye mabira nee aabvesera. 9 Ine ndine nsuwo; munthu anapita na pana ine anadzapulumuka, pontho munthu unoyu anapita, anabuluka mbagumana cakudya.+ 10 Mbava asabwera basi ene toera kuba, kupha na kufudza.+ Mbwenye ine ndabwera toera iwo akhale na umaso, pontho akhale na umaso wakukhonda mala. 11 Ine ndine nkumbizi wadidi;+ nkumbizi wadidi asapereka umaso wace toera kupulumusa mabira ace.+ 12 Nyabasa wakuti nee ndi nkumbizi, pontho wakuti mabira nee ndi ace, angaona bindzi mbikabwera asasiya mabira mbathawa. Penepo bindzi isapha mabira, mbibalalisa anango, 13 iye asathawa thangwi ndi nyabasa, pontho iye nkhabe kutsalakana mabira. 14 Ine ndine nkumbizi wadidi. Ine ndisadziwa mabira anga, pontho mabira anga asandidziwa,+ 15 sawasawa ninga Baba asandidziwa, ine ndisadziwambo Baba;+ ine ndisapereka umaso wanga thangwi ya mabira anga.+

16 “Pontho ine ndiri na mabira anango akuti nee ndi a nʼthanga iyi;+ anewa ndisafunikambo kuabweresa, iwo anadzabva fala yanga, mbadzakhala nkumbi ubodzi, na nkumbizi mʼbodzi.+ 17 Baba asandifuna,+ thangwi ine ndisapereka umaso wanga+ toera ndikwanise kuutambira pontho. 18 Nkhabe munthu anafuna kundikwatira umaso wanga, mbwenye ine ndisaupereka nakufuna kwanga. Ine ndiri na ufulu wakuupereka, inembo ndiri na ufulu wakuutambira pontho.+ Matongero anewa ndaapaswa na Babanga.”

19 Penepo kwaoneka pontho kusiyana maonero pakati pa Ayuda+ thangwi ya mafala anewa. 20 Azinji akhalonga: “Iye ali na dimonyo, pontho ali na nsala. Thangwi yanji musambvesera?” 21 Mbwenye anango akhalonga: “Mafala anewa nee ndi a munthu wakuti ali na dimonyo. Dimonyo anakwanisa kufungula maso a maboliboli?”

22 Pa ndzidzi unoyu kwacitika Phwando Yakucenesa Templo mu Yerusalemu. Unoyu ukhali ndzidzi wa khoni, 23 Yezu akhafamba mu templo pa mbuto inacemerwa ‘Khonde ya Salomoni.’+ 24 Penepo Ayuda anzungulira mbatoma kumbvundza: “Thangwi yanji iwe nkhabe kutipanga undimomwene thangwi ya iwe? Khala ndiwe Kristu, tipange pakweca.” 25 Yezu aatawira: “Ine ndakupangani, mbwenye imwe nee musakhulupira. Mabasa anacita ine mu dzina ya Babanga, asapereka umboni thangwi ya ine.+ 26 Imwe nee musakhulupira thangwi nee ndimwe mabira anga.+ 27 Mabira anga asabvesera fala yanga, ine ndisaadziwa, pontho iwo asanditowera.+ 28 Ine ndisaapasa umaso wakukhonda mala,+ iwo cipo anadzafudzwa, pontho nkhabe munthu anafuna kundipokosera mabira anewa mʼmanja mwanga.+ 29 Cinthu cidandipasa Babanga ndi cakufunika kakamwe kupiringana pinthu pinango pyonsene, pontho nkhabe munthu anafuna kuabulusa mʼmanja mwa Baba.+ 30 Ine na Baba ndife mʼbodzi.”*+

31 Penepo Ayuda alokota pontho miyala toera kumponyera. 32 Yezu aapanga: “Ine ndakupangizani mabasa mazinji adidi a Baba. Mphapo musafuna kundiponyera miyala thangwi ya basa ipi mwa anewa?” 33 Ayuda antawira: “Ife nee tisafuna kukuponyera miyala thangwi ya mabasa adidi, mbwenye ndi thangwi yakuti iwe usaxola Mulungu;+ thangwi maseze ndiwe munthu, iwe usalonga kuti ndiwe mulungu.” 34 Yezu aatawira: “Kodi mu Mwambo wanu nee pyalembwa kuti: ‘Ine ndalonga: “Imwe ndimwe alungu”’?*+ 35 Khala Mulungu acemera ‘alunguʼ+ ale adasandika iye na mafalace, anthu anacimwana kucinja pinalonga Malemba. 36 Ine ndine munthu adaceneswa na Baba mbanditumwa kudza pa dziko yapantsi, mphapo munalonga tani kuti: ‘Iwe usaxola Mulungu,’ thangwi ine ndalonga kuti: ‘Ndine Mwana wa Mulungu’?+ 37 Khala nee ndisacita mabasa a Babanga, lekani kundikhulupira. 38 Mbwenye khala ndiri kuacita, maseze mukhonde kundikhulupira, khulupirani mabasa+ anewa toera mudziwe, mbamupitiriza kudziwa kuti Baba ali pabodzi na ine, pontho ine ndiri pabodzi na Baba.”+ 39 Iwo ayesera pontho kumʼmanga, mbwenye iye abuluka pakati pawo.

40 Iye awambuka pontho Nkulo wa Yordani mbaenda ku mbuto ikhadatoma Juwau kubatiza anthu,+ mbakhala kweneko. 41 Anthu azinji abwera kuna iye, mbatoma kulonga okha-okha: “Juwau nee acita pirengo, mbwenye pinthu pyonsene pidalonga Juwau thangwi ya munthu uyu, mphyandimomwene.”+ 42 Kweneko anthu azinji akhulupira Yezu.

11 Mamuna unango akhacemerwa Lazaro akhabva kupha. Iye akhali wa ku Bhetanya, cisa ca Mariya na mʼbale wace akhacemerwa Marta.+ 2 Mariya unoyu ndi mʼbodzi ene adakhwaza mafuta akununkhira mʼmiyendo ya Mbuya mbaipukuta na tsisi yace;+ Lazaro akhaduwala akhali mʼbale wace. 3 Natenepa anakazi ace Lazaro atumiza mphangwa kuna Yezu, mbalonga: “Mbuya, xamwali wanu wapantima anafuna imwe, akubva kupha.” 4 Mbwenye Yezu pidabva iye pyenepi, alonga: “Cifuniro ca utenda unoyu si kufa tayu, mbwenye ndi toera kupasa mbiri Mulungu,+ pontho toera Mwana wa Mulungu apaswe mbiri kubulukira mu utenda unoyu.”

5 Yezu akhafuna Marta, Mariya na Lazaro. 6 Mbwenye pidabva iye kuti Lazaro akuduwala, amala pontho ntsiku ziwiri ku mbuto ikhali iye. 7 Mudapita ntsiku zenezi ziwiri, Yezu apanga anyakupfundzace: “Tendeni pontho ku Yudeya.” 8 Anyakupfundzace ampanga: “Mpfundzisi,+ ntsiku zingasi nduli Ayuda akhafuna kukuponyerani miyala,+ mphapo musafuna kuenda pontho kweneko?” 9 Yezu atawira: “Kodi masikati nee ali na midzidzi 12?+ Munthu angafamba namasikati nkhabe cinanʼgwegwedusa, thangwi iye asaona ceza ca dziko ino. 10 Mbwenye munthu angafamba namasiku, asagwegweduka, thangwi mwa iye nkhabemo ceza.”

11 Yezu pidamala iye kulonga pyenepi, athimiza: “Xamwali wathu Lazaro akugona,+ mbwenye ine ndiri kuenda kweneko kamulamusa.” 12 Penepo anyakupfundzace antawira: “Mbuya, khala iye akugona, anawanga.” 13 Yezu akhadalonga pya kufa kwa Lazaro. Mbwenye anyakupfundzace akhanyerezera kuti iye akhalonga kuti Lazaro akugona toera kupuma. 14 Penepo Yezu aapanga pakweca kuti: “Lazaro afa,+ 15 ine ndisakomerwa thangwi ya imwe kuti ine nee ndikhali kweneko, toera imwe mukhulupire. Mbwenye tendeni kuna iye.” 16 Penepo Tomee anacemerwa Dhidhimo apanga anyakupfundza andzace: “Tendenimbo, toera tife pabodzi na Yezu.”+

17 Pidafika Yezu, agumana kuti zikhadapita ntsiku zinai Lazaro mbali munthumbi. 18 Cisa ca Bhetanya cikhali cifupi na Yerusalemu, nsindzo wa makilometru matatu.* 19 Ayuda azinji akhadaenda kuna Marta na Mariya toera kuabalangaza thangwi yakufa kwa mʼbale wawo. 20 Pidabva Marta kuti Yezu akubwera, iye aenda kaonana naye; mbwenye Mariya+ asala panyumba. 21 Penepo Marta apanga Yezu: “Mbuya, mbamudakhala pano, mʼbale wanga mbadafa tayu. 22 Mbwenye ngakhale cincino, ine ndisadziwa kuti cinthu consene cinaphemba imwe kuna Mulungu, Mulungu anakupasani.” 23 Yezu ampanga: “Mʼbale wako anadzalamuka.” 24 Marta atawira: “Ine ndisadziwa kuti iye anadzalamuka pakulamuswa kwa anyakufa+ pa ntsiku yakumalisa.” 25 Yezu ampanga: “Ine ndine kulamuka muli akufa na umaso.+ Munthu anandikhulupira, maseze afe, anadzakhala pontho mʼmaso; 26 pontho munthu ali mʼmaso angandikhulupira, iye cipo anadzafa.+ Usakhulupira pyenepi?” 27 Iye atawira: “Inde Mbuya, ine ndisakhulupira kuti imwe ndimwe Kristu, Mwana wa Mulungu, ule akhadikhirwa kuti mbadabwera pa dziko.” 28 Pidamala iye kulonga pyenepi, aenda kacemera Mariya, mʼbale wace, mbampanga pace ekha kuti: “Mpfundzisi+ ali pano, iye ali kukucemera.” 29 Pidabva iye pyenepi, alamuka mwakucimbiza mbaenda kuna Yezu.

30 Yezu akhadzati kupita mucisa, mbwenye akhali pa mbuto idaonana iye na Marta. 31 Ayuda akhali nʼnyumba pabodzi na Mariya toera kumʼbalangaza, pidaona iwo kuti iye alamuka mwakucimbiza mbabuluka, iwo antowera, thangwi akhanyerezera kuti iye ali kuenda kalira kunthumbi.+ 32 Pidafika Mariya pa mbuto ikhali Yezu, agodama mbakotamisa nkhope yace mpaka pantsi cifupi na miyendo ya Yezu, mbalonga: “Mbuya, mbamudakhala pano, mʼbale wanga mbadafa tayu.” 33 Yezu pidaona iye kuti Mariya akulira, pontho Ayuda adabwera na iye akhalira, iye anentseka muntima mwace mbatsukwala kakamwe. 34 Iye aabvundza: “Mwamuikha kupi?” Iwo antawira: “Mbuya, bwerani muone.” 35 Yezu atoma kulira.+ 36 Penepo Ayuda atoma kulonga: “Onani, iye akhanfuna kakamwe!” 37 Mbwenye anango mwa iwo alonga: “Khala munthu uyu akwanisa kufungula maso a boliboli,+ nee mbadakwanisambo kucita cinthu toera Lazaro akhonde kufa?”

38 Penepo Yezu atsukwala pontho kakamwe, mbaenda kunthumbi. Nthumbi ineyi ikhali mphako,* nsuwo wace ukhadafungwa na mwala ukulu. 39 Yezu alonga: “Bulusani mwala.” Marta mʼbale wace munthu adafa, alonga: “Mbuya, mpaka pano panango manungo ace akununkha, thangwi papita ntsiku zinai mbadamala kufa.” 40 Yezu antawira: “Kodi ine nee ndakupanga kuti ungakhulupira mbudaona mbiri ya Mulungu?”+ 41 Natenepa iwo abulusa mwala. Penepo Yezu ayangʼana kudzulu,+ mbalonga: “Baba, ine ndisapereka takhuta kuna imwe thangwi mwandibvesera. 42 Mwandimomwene, ine ndisapidziwa kuti ndzidzi onsene imwe musandibvesera; mbwenye ndalonga pyenepi thangwi ya mwinji wa anthu udalimira pano, toera iwo akhulupire kuti ndimwe adandituma.”+ 43 Pidamala iye kulonga pyenepi, akhuwa mwakugaluza: “Lazaro, buluka panja!”+ 44 Munthu unoyu wakuti akhadafa, abuluka panja, miyendo yace na mikono yace ikhadapyangirirwa na miceka, pontho nkhope yace ikhadaphimbirwa na nguwo. Yezu aapanga: “Nsudzuleni munsiye aende pyace.”

45 Natenepa, Ayuda azinji adaenda kaona Mariya, aona pidacita Yezu mbanʼkhulupira,+ 46 mbwenye anango mwa iwo aenda kuna Afarisi mbaapanga pinthu pidacita Yezu. 47 Natenepa akulu a anyantsembe na Afarisi agumanya Nsoka wa Anyakutonga Miseru mbalonga: “Tinacitanji, thangwi munthu uyu akucita pirengo pizinji?+ 48 Ife tingansiya mbapitiriza tenepa, anthu onsene ananʼkhulupira. Buluka penepo Aroma anabwera mbatikwatira templo yathu na mbumba yathu.” 49 Mbwenye mʼbodzi mwa iwo akhacemerwa Kaifa,+ wakuti akhali nkulu wa anyantsembe caka ceneci, aapanga: “Imwe nkhabe cinthu cinadziwa imwe, 50 mphyadidi kwa imwe kuti munthu mʼbodzi afere anthu mʼmbuto mwa kufudzwa mbumba yonsene.” 51 Iye nee alonga pyenepi thangwi yakufuna kwace, mbwenye nakuti iye akhali nyantsembe wankulu mu caka ceneci, iye alonga mwanyapantsi kuti Yezu mbadafera mbumba yace, 52 tayu basi kufera mbumba yace, mbwenye toera kugumanya ana a Mulungu adabalalika kuti akhale akuphatana. 53 Kutomera pa ntsiku ineyi iwo akhabverana toera kumupha.

54 Natenepa, Yezu nee akhafambabve pakweca pakati pa Ayuda, mbwenye abuluka kweneko mbaenda kucisa ciri cifupi na thando, mu nzinda unacemerwa Efraimu,+ mbakhala kweneko pabodzi na anyakupfundzace. 55 Paskwa+ ya Ayuda ikhali cifupi, natenepa anthu azinji abuluka mupisa pyawo mbaenda ku Yerusalemu Paskwa mbidzati kutoma toera kuceneseka mwakubverana na mwambo. 56 Iwo akhasaka Yezu, pontho pikhali iwo mu templo akhabvundzana unango na ndzace: “Musaona tani? Kodi iye nee anabwera pa phwando ino?” 57 Mbwenye akulu a anyantsembe na Afarisi akhadapereka ntemo wakuti munthu anadziwa kuna Yezu, asafunika kuadziwisa toera iwo akwanise kumʼmanga.

12 Ntsiku zitanthatu mbidzati kutoma phwando ya Paskwa, Yezu afika ku Bhetanya kukhali Lazaro,+ wakuti Yezu akhadamulamusa muli akufa. 2 Kweneko iwo anʼkhunganyira siyali. Marta ndiye akhapereka pyakudya,+ mbwenye Lazaro akhali mʼbodzi wa ale akhadya* pabodzi na Yezu. 3 Penepo Mariya akwata hafu ya litru* ya mafuta akununkhira a nardho wakukhonda kubvungazwa na pinango, a ntengo ukulu kakamwe, iye aatsanulira mʼmiyendo ya Yezu mbaipukuta na tsisi yace. Nʼnyumba monsene mukhadadzala na khwema ya mafuta anewa akununkhira.+ 4 Mʼbodzi wa anyakupfundzace anacemerwa Yuda Iskariyoti,+ wakuti akhali cifupi toera kunsandukira, alonga: 5 “Thangwi yanji mafuta anewa akununkhira nee aguliswa na madhenaryo* 300, mbatipereka kobiri ineyi kuna anyakutcerenga?” 6 Iye nee alonga pyenepi thangwi yakufuna kuphedza anyakutcerenga, mbwenye ndi thangwi yakuti iye akhali mbava. Iye ndiye akhakoya bokosi ya kobiri, pontho akhaba kobiri ikhaikhwa mwenemu. 7 Penepo Yezu alonga: “Nsiyeni pyace acite pyenepi toera akhunganye mwanyapantsi ntsiku yakuikhwa kwanga munthumbi.+ 8 Thangwi anyakutcerenga muli nawo pabodzi ndzidzi onsene,+ mbwenye ine nee ndinakhala na imwe ndzidzi onsene.”+

9 Mu ndzidzi unoyu, mwinji ukulu wa Ayuda wadziwa kuti Yezu akhali ku Bhetanya, iwo aenda kweneko, tayu toera kuona Yezu basi, mbwenye toera kuonambo Lazaro adalamusa iye muli akufa.+ 10 Akulu a anyantsembe abverana toera kuphambo Lazaro, 11 thangwi Ayuda azinji akhaenda kweneko mbakhulupira Yezu+ thangwi yakuona Lazaro.

12 Mangwana mwace, mwinji ukulu wa anthu adabwera kuphwando, abva kuti Yezu akhabwera ku Yerusalemu. 13 Natenepa iwo akwata matsandzo a micindu mbaenda kantambira. Iwo atoma kukhuwa mbati: “Mpulumuseni, tisakuphembani! Mbasimbwe Mambo wa Izraeli,+ ule anabwera mu dzina ya Yahova!”*+ 14 Yezu agumana mwanaburu mbankwira,+ ninga mudalembwa ipyo kuti: 15 “Leka kugopa, iwe mwana wankazi wa Sioni. Ona! Mambo wako ali kubwera, iye akwira pa mwanaburu.”+ 16 Pakutoma anyakupfundzace nee abvesesa pinthu pyenepi, mbwenye pidapaswa Yezu mbiri,+ iwo akumbuka kuti pinthu pyenepi pikhadalembwa thangwi ya iye, pontho kuti anthu ancitira pinthu pyenepi.+

17 Mwinji wa anthu ukhali pabodzi na iye mu ndzidzi udacemera iye Lazaro munthumbi+ mbamulamusa muli akufa, ukhapitiriza kupanga anango pinthu pidacitika.+ 18 Ineyi ndi thangwi inango idacitisa anthu toera kuenda kagumanikana na Yezu, thangwi iwo abva kuti iye akhadacita cirengo ceneci. 19 Natenepa Afarisi acedza okha-okha mbati: “Onani, nkhabe cinthu cinakwanisa ife. Anthu onsene ali kuenda kuna iye.”+

20 Penepo pakhalimbo Agerego angasi mwa ale adabwera kudzalambira pa phwando. 21 Iwo afendedzera Filipi,+ wakuti akhali wa ku Bhetisaidha cisa ca ku Galileya, mbamʼphemba: “Mbuya, ife tisafuna kuonana na Yezu.” 22 Filipi aenda kapanga Andreya. Andreya na Filipi aenda kapanga Yezu.

23 Mbwenye Yezu aatawira: “Wafika ndzidzi toera Mwana wa munthu apaswe mbiri.+ 24 Ine ndinakupangani na cinyindiro consene kuti, mbeu ya tirigu ingakhonda kugwa pantsi mbifa, isapitiriza kukhala mbeu ibodzi. Mbwenye ingagwa pantsi mbifa,+ isabala misapo mizinji. 25 Munthu anafuna kakamwe umaso wace akuufudza, mbwenye ule anaida umaso wace mu dziko ino,+ akuutsidzikiza toera akhale na umaso wakukhonda mala.+ 26 Khala munthu asafuna kunditumikira, mbanditowere, kunakhala ine, ule ananditumikira anadzakhalambo kweneko.+ Khala munthu asafuna kunditumikira, Babanga anadzamulemedza. 27 Cincino ndiri wakunentseka kakamwe,+ mphapo ndinalonganji? Baba, ndipulumuseni pa ndzidzi uno wakunentsa!+ Mbwenye ndzidzi unoyu usafunika kupita na pana ine, thangwi ine ndadzera pyenepi. 28 Baba, pasani mbiri dzina yanu.” Penepo kwabveka fala+ buluka kudzulu, mbilonga: “Ine ndaipasa kale mbiri, pontho ndinadzaipasa mbiri.”+

29 Mwinji wa anthu ukhadalimira penepo pidabva iwo pyenepi alonga kuti ndi njazi idadhima. Anango alonga: “Ndi anju adalonga na iye.” 30 Yezu atawira: “Fala ineyi yabveka nee thangwi ya ine, mbwenye thangwi ya imwe. 31 Cincino dziko ino ikutongwa; cincino ntongi wa dziko+ ino anathamangiswa.+ 32 Mbwenye ndingamanikwa pamuti,+ ndinadzabweresa kuna ine anthu a mitundu yonsene.” 33 Mwandimomwene iye akhalonga pyenepi toera kupangiza kuti iye mbadafa tani.+ 34 Penepo mwinji wa anthu walonga: “Mwambo usalonga kuti Kristu anakhala kwenda na kwenda.+ Mphapo thangwi yanji iwe usalonga kuti Mwana wa munthu asafunika kumanikwa pamuti?+ Mbani Mwana wa munthu unoyu?” 35 Natenepa Yezu aapanga: “Ceza cinapitiriza pakati panu mu ndzidzi ungasi. Fambani mu ceza mu ndzidzi wakuti muciri naco, toera cidima cikhonde kukukundani. Munthu anafamba ncidima nkhabe dziwa kunaenda iye.+ 36 Mu ndzidzi wakuti muciri na ceza, khulupirani ceza toera mukhale ana a ceza.”+

Pidamala Yezu kulonga pyenepi, abuluka pakati pawo mbabisala pyace. 37 Maseze iye acita pirengo pizinji pamaso pawo, iwo nee akhanʼkhulupira, 38 toera akwanirisike mafala adalonga mprofeta Izaiya kuti: “Yahova,* mbani adakhulupira pinthu pidalonga ife?*+ Pontho mphambvu za Yahova* zapangizwa kuna ani?”+ 39 Thangwi inango idaacitisa kukhonda khulupira ndi idalonga Izaiya kuti: 40 “Iye afunga maso awo mbaumisa mitima yawo toera iwo akhonde kuona na maso awo, pontho mitima yawo ikhonde kubvesesa, natenepa iwo nee anabwerera kuna ine, ine mbandiawangisa.”+ 41 Izaiya alonga pinthu pyenepi thangwi aona mbiri ya Kristu mbalonga thangwi ya iye.+ 42 Ngakhale tenepo, atongi azinji akakhulupira Yezu,+ mbwenye thangwi ya Afarisi, iwo nee akhalonga kuti asanʼkhulupira, toera akhonde kuthamangiswa mu sinagoga;+ 43 thangwi iwo akhafuna kakamwe mbiri ya anthu, kupiringana mbiri ya Mulungu.+

44 Mbwenye Yezu alonga mwakugaluza mbati: “Munthu anandikhulupira nee asakhulupira ine basi, mbwenye asakhulupirambo Ule adandituma;+ 45 pontho ule anandiona, asaonambo Ule adandituma.+ 46 Ine ndabwera ninga ceza pa dziko,+ toera munthu anandikhulupira akhonde kupitiriza ncidima.+ 47 Mbwenye munthu angabva mafala anga mbakhonda kuakoya, ine nkhabe kuntonga; thangwi ine nee ndabwera kudzatonga dziko, mbwenye ndabwera toera kupulumusa dziko.+ 48 Munthu anandipwaza mbakhonda kutawira mafala anga, alipo anafuna kuntonga. Mafala adalonga ine ndiwo anafuna kuntonga pa ntsiku yakumalisa. 49 Thangwi ine nee ndalonga pinafuna ine, mbwenye Baba adandituma ndiye adandipanga* pinalonga ine na pinapfundzisa ine.+ 50 Pontho ine ndisadziwa kuti pidandipanga iye* pisatsogolera ku umaso wakukhonda mala.+ Natenepa, pinthu pyonsene pinalonga ine, ndisapilonga ninga mudandipangira Baba.”+

13 Mbidzati kufika phwando ya Paskwa, Yezu akhadziwa kuti ukhadafika ndzidzi wace+ toera abuluke pa dziko yapantsi mbabwerera kuna Baba.+ Nakuti iye akhafuna atowereri ace pa dziko, iye apitiriza kuafuna mpaka kunkhomo kwa umaso wace.+ 2 Pikhasiyali iwo, Dyabo akhadaikha kale muntima mwa Yuda Iskariyoti+ mwana wa Simau, manyerezero akusandukira Yezu.+ 3 Yezu akhadziwa kuti Baba apereka pinthu pyonsene mʼmanja mwace. Iye akhadziwambo kuti abuluka kuna Mulungu, pontho akhabwerera kuna Mulungu.+ 4 Natenepa, Yezu alamuka pameza, mbaikha pakhundu nguwo yace yapadzulu. Iye akwata tuwalya mbaimanga ncunu mwace.+ 5 Buluka penepo, iye aikha madzi mʼbasiya, mbatoma kutsuka miyendo ya* anyakupfundzace, mbaipukuta na tuwalya ikhadamanga iye ncunu mwace. 6 Pidafika iye pana Simau Pedhru, Pedhru ambvundza: “Mbuya, musafuna kutsuka miyendo yanga?”* 7 Yezu antawira: “Pinacita ine ipi, nee unapibvesesa cincino, mbwenye unapibvesesa ntsogolo.” 8 Pedhru alonga: “Ine cipo ndinakutawirisani kutsuka miyendo yanga.”* Yezu ampanga: “Ndingakhonda kutsuka miyendo yako,*+ unacimwana kukhala mʼbodzi wa anthu anga.” 9 Simau Pedhru antawira: “Mbuya, lekani kutsuka miyendo yanga* basi, mbwenye tsukanimbo manja anga na nsolo wanga.” 10 Yezu ampanga: “Munthu adamala kusamba, manungo ace onsene ndi akucena, natenepa, nee asafunikabve kucita pizinji kusiyapo kutsuka miyendo yace.* Imwe mwacena, mbwenye si onsene a imwe tayu.” 11 Yezu akhadziwa munthu akhafuna kunsandukira.+ Na thangwi ineyi iye alonga kuti: “Nee ndi onsene a imwe akuti ndi akucena.”

12 Pidamala iye kutsuka miyendo yawo,* Yezu abvala nguwo yace yapadzulu, mbakhala pontho pameza, mbaabvundza: “Musabvesesa pinthu pidakucitirani ine? 13 Imwe musandicemera ‘Mpfundzisi,’ pontho musandicemera ‘Mbuya,’ ndimomwene, ine ndinedi.+ 14 Mphapo, khala ine Mbuya na Mpfundzisi, ndatsuka miyendo yanu,*+ imwe musafunikambo kutsuka miyendo ya* unango na ndzace.+ 15 Ine ndakupangizani pinafunika imwe kucita, toera imwe mucitembo sawasawa ninga mudakucitirani ine.+ 16 Ine ndinakupangani na cinyindiro consene kuti bitcu nee ndi nkulu kupiringana mbuyace, pontho munthu adatumwa nee ndi nkulu kupiringana ule adantuma. 17 Cincino imwe musadziwa pinthu pyenepi, mbwenye munakhala akutsandzaya mungapicita.+ 18 Ine nee ndikulonga pyenepi thangwi ya imwe monsene; ine ndisadziwa anthu adasankhula ine. Mbwenye pyenepi ndi toera kukwanirisa khundu ya Malemba inalonga kuti:+ ‘Ule akhadya nkate wanga, ndiye adandisandukira.’*+ 19 Ine ndisakupangani pyenepi cincino mbapidzati kucitika, toera pingadzacitika, imwe mukhulupire kuti lemba ineyi isalonga pya ine.+ 20 Ine ndinakupangani na cinyindiro consene kuti ule anatambira munthu anatuma ine, akutambirambo ine,+ pontho ule ananditambira, akutambirambo Ule adandituma.”+

21 Pidamala iye kulonga pyenepi, Yezu anentseka kakamwe, mbalonga pakweca: “Mwandimomwene ine ndinakupangani kuti mʼbodzi wa imwe anadzandisandukira.”+ 22 Anyakupfundza atoma kuyangʼanisana unango na ndzace, mbakhonda kudziwa kuti mbani akhalonga iye.+ 23 Mʼbodzi wa anyakupfundzace, wakuti Yezu akhanfuna+ kakamwe akhali cifupi na Yezu. 24 Natenepa, Simau Pedhru amuyangʼana soo, mbalonga: “Tipange, mbani analonga iye.” 25 Penepo nyakupfundza unoyu akotama panthimandzi* ya Yezu, mbambvundza: “Mbuya, mbani?”+ 26 Yezu atawira: “Ndi ule anapasa ine phindi ya nkate unafuna kupfonda ine mu mbale.” Natenepa, Yezu akwata phindi ya nkate mbapfonda+ mu mbale, mbaupasa Yuda mwana wa Simau Iskariyoti. 27 Pidamala Yuda kutambira phindi ya nkate, Sathani apita muntima mwace.+ Penepo Yezu ampanga: “Pinthu pinacita iwe, picite mwakucimbiza.” 28 Mbwenye nee mʼbodzi wa ale akhali pameza adzindikira kuti thangwi yanji Yezu ampanga pyenepi. 29 Nakuti Yuda ndiye akhakoya bokosi ya kobiri,+ anango anyerezera kuti Yezu akhampanga kuti: “Ndoko kagule pinthu pinafuna ife kuphatisira pa phwando,” peno kuti akhafunika kupereka pinthu kuna anyakutcerenga. 30 Natenepa, pidamala Yuda kutambira phindi ya nkate, abuluka mwakucimbiza. Pyenepi pyacitika camasiku.+

31 Pidabuluka Yuda, Yezu alonga: “Cincino Mwana wa munthu akupaswa mbiri,+ pontho Mulungu akupaswambo mbiri thangwi ya Mwana. 32 Mulungu anadzapasa mbiri Mwana wa munthu,+ pontho iye anacita pyenepi mwakucimbiza. 33 Ananga akufunika, ine ndiri na imwe mu ndzidzi ungasi. Imwe munadzandisaka, mbwenye ninga mudapanga ine Ayuda, ndiri kupangambo imwe: ‘Kunafuna ine kuenda,+ imwe munacimwana kuendako.’ 34 Ine ndinakupasani matongero mapswa kuti: Funanani unango na ndzace; ninga mudakufunani ine,+ imwembo mufunane unango na ndzace.+ 35 Imwe mungafunana unango na ndzace, anthu onsene anadzindikira kuti ndimwe anyakupfundza anga.”+

36 Simau Pedhru ambvundza: “Mbuya, muli kuenda kupi?” Yezu antawira: “Kunafuna ine kuenda, iwe unacimwana kunditowera cincino, mbwenye unadzanditowera kutsogolo.”+ 37 Pedhru ambvundza: “Mbuya, thangwi yanji ndinacimwana kukutowerani cincino? Ine ndiri dzololo toera kukuferani.”+ 38 Yezu antawira: “Iwe uli dzololo toera kundifera? Ine ndinakupanga na cinyindiro consene kuti, dzongwe mbidzati kulira, iwe unandikhonda katatu.”+

14 “Lekani kunentseka mʼmitima yanu.+ Khulupirani Mulungu;+ khulupiranimbo ine pano. 2 Nʼnyumba mwa Babanga muli na mbuto zizinji zakukhala. Mbapidakhonda khala tenepo, ine nee mbidakupangani pyenepi. Mbwenye cincino ine ndiri kuenda kakukhunganyirani mbuto.+ 3 Ine ndingaenda mbandikusasanyirani mbuto, ndinabwera pontho kudzakukwatani, toera imwe mukhalembo kule kunakhala ine.+ 4 Kunaenda ine, njira yace imwe musaidziwa.”

5 Tomee+ ambvundza: “Mbuya, ife nkhabe dziwa kunaenda imwe. Mphapo tinakwanisa tani kudziwa njira?”

6 Yezu antawira: “Ine ndine njira,+ undimomwene+ na umaso.+ Nkhabe munthu anaenda kuna Baba mbakhonda kupita na pana ine.+ 7 Imwe mbamudandidziwa, mbamudadziwambo Babanga; kutomera cincino imwe musandziwa, pontho musamuona.”+

8 Filipi ampanga: “Mbuya, tipangizeni Babanu, pyenepi pinakwana kuna ife.”

9 Yezu ampanga: “Ndiri na imwe mu ndzidzi uzinji kakamwe, mphapo iwe Filipi udzati kundidziwa?” Ule anandiona akuonambo Baba.+ Mphapo thangwi yanji iwe usalonga kuti: ‘Tipangizeni Babanu’? 10 Kodi iwe nee usatawira kuti ine ndiri pabodzi na Baba, pontho kuti Baba ali na ine?+ Pinthu pinakupangani ine nee pisabuluka muna ine,+ mbwenye Baba wakuti asapitiriza kukhala na ine, ndiye anacita mabasace. 11 Khulupirani pinakupangani ine kuti ine ndiri pabodzi na Baba, pontho Baba ali na ine; peno khulupirani thangwi ya mabasa anacita ine.+ 12 Ine ndinakupangani na cinyindiro consene kuti, munthu anandikhulupira anadzacitambo mabasa anacita ine; pontho anadzacita mabasa makulu kupiringana anacita ine,+ thangwi ine ndiri kuenda kuna Baba.+ 13 Pontho, cinthu consene cinafuna imwe kuphemba mu dzina yanga, ine ndinadzacicita, toera Baba apaswe mbiri kubulukira kuna Mwana.+ 14 Cinthu consene cinaphemba imwe mu dzina yanga, ine ndinadzacicita.

15 “Khala imwe musandifuna, munadzabvera mitemo yanga.+ 16 Pontho ine ndinadzaphemba Baba, penepo iye anadzakupasani mʼphedzi* unango toera akhale na imwe kwenda na kwenda.+ 17 Mʼphedzi unoyu ndi nzimu wakucena wa undimomwene,+ wakuti dziko nkhabe kuutambira thangwi dziko nkhabe kuuona, pontho nkhabe kuudziwa.+ Mbwenye imwe musaudziwa thangwi usapitiriza kukhala muna imwe, pontho uli na imwe. 18 Ine nee ndinakusiyani mwekhene.* Ine ndinabwera pontho kuna imwe.+ 19 Thimize pangʼono dziko nee inadzandionabve, mbwenye imwe munadzandiona,+ thangwi ine ndiri mʼmaso imwembo munadzakhala mʼmaso. 20 Pa ntsiku ineyi imwe munadzadziwa kuti ine ndiri pabodzi na Babanga, pontho imwe muli na ine, inembo ndiri na imwe.+ 21 Ule anatawira matongero anga mbaabvera, unoyu ndiye anandifuna. Pontho, munthu anandifuna anadzafuniwambo na Babanga, inembo ndinadzanfuna mbandipangizika pakweca kuna iye.”

22 Yuda+ unango wakuti nee ndi Iskariyoti, ambvundza: “Mbuya, thangwi yanji imwe musafuna kupangizika pakweca kuna ife, mbamukhonda kupangizika kuna dziko?”

23 Yezu antawira: “Munthu angandifuna, anadzabvera mafala anga,+ pontho iye anadzafuniwa na Babanga. Ifembo tinadzabwera kuna iye mbatikhala na iye.+ 24 Munthu anakhonda kundifuna nkhabe kubvera mafala anga. Mafala anabva imwe si anga tayu, mbwenye ndi a Baba adandituma.+

25 “Ndisakupangani pyenepi mu ndzidzi wakuti ndiciri pabodzi na imwe. 26 Mbwenye mʼphedzi wakuti ndi nzimu wakucena unafuna kutumiza Babanga mu dzina yanga, unadzakupfundzisani pinthu pyonsene, mbukukumbusani pinthu pyonsene pidakupangani ine.+ 27 Ine ndinakusiyirani ntendere; ine ndinakupasani ntendere.+ Ntendere unakupasani ine ndi wakusiyana na ntendere unapereka dziko kuna imwe. Lekani kunentseka mʼmitima yanu, pontho lekani kugopa. 28 Imwe mwabva pidakupangani ine kuti: ‘Ine ndiri kuenda, mbwenye ndinabwera pontho kuna imwe.’ Khala imwe musandifuna, munakomerwa kuti ine ndiri kuenda kuna Baba, thangwi Baba ndi nkulu kupiringana ine.+ 29 Ine ndakupangani pyenepi mbapidzati kucitika, toera pingadzacitika, imwe mukhulupire mafala anga.+ 30 Ine nee ndinalongabve pizinji na imwe, thangwi ntongi wa dziko+ ino ali kubwera. Iye nkhabe mphambvu kuna ine.+ 31 Mbwenye toera dziko idziwe kuti ine ndisafuna Baba, ine ndisacita pinthu ninga mudandipangira Baba.+ Lamukani, tendeni tibuluke pano.

15 “Ine ndine muti wandimomwene wa mauva, Babanga ndi nyakulima. 2 Nthawi zonsene ziri muna ine zinakhonda kubala misapo, iye asazigwanda. Mbwenye nthawi zinabala misapo, iye asazisadzulira toera zibale misapo mizinji.+ 3 Imwe mwaceneswa kale na mafala adakupangani ine.+ 4 Pitirizani kukhala akuphatana na ine, inembo ndinapitiriza kukhala akuphatana na imwe. Ninga nthawi inacimwana kubala misapo payokha ingakhonda kupitiriza kukhala yakuphatana na muti wa mauva, imwembo munacimwana kubala misapo mungakhonda kupitiriza kukhala akuphatana na ine.+ 5 Ine ndine muti wa mauva; imwe ndimwe nthawi. Munthu anapitiriza kukhala wakuphatana na ine, inembo mbandikhala wakuphatana na iye, anabala misapo mizinji;+ thangwi mungakhonda kukhala na ine, nee cibodzi cinafuna kwanisa imwe kucita. 6 Munthu anakhonda kupitiriza kukhala wakuphatana na ine, anadzakhala ninga nthawi inatayiwa kunja, mbiuma. Anthu asagumanya nthawi zenezi mbaziponya pa moto, izo mbazipya. 7 Imwe mungapitiriza kukhala akuphatana na ine, mafala anga mbapitiriza muna imwe, cinthu consene cinafuna kuphemba imwe cinadzacitika mwakubverana na phembo yanu.+ 8 Babanga asapaswa mbiri imwe mungapitiriza kubala misapo mizinji, mbamupangiza kuti ndimwe anyakupfundza anga.+ 9 Ninga munandifunira Baba,+ inembo ndisakufunani, natenepa pitirizani mu ufuni wanga. 10 Imwe mungabvera mitemo yanga, munadzapitiriza mu ufuni wanga, ninga ine ndisabverambo mitemo ya Babanga mbandipitiriza mu ufuni wace.

11 “Ine ndakupangani pinthu pyenepi toera kutsandzaya kwanga kukhale muna imwe, pontho kutsandzaya kwanu kuthimizirike kakamwe.+ 12 Matongero anga ndi awa: Funanani unango na ndzace ninga mudakufunani ine.+ 13 Nkhabe munthu ali na ufuni ukulu kakamwe kupiringana ule anapereka umaso wace thangwi ya axamwali ace.+ 14 Mungacita pidakupangani ine, imwe munadzakhala axamwali anga.+ 15 Ine nkhabe kukucemeranibve mabitcu, thangwi bitcu nkhabe dziwa pinacita mbuyace. Mbwenye ndisakucemerani axamwali, thangwi ine ndakupangani pinthu pyonsene pidabva ine kuna Babanga. 16 Imwe nee mwandisankhula, mbwenye ine ndakusankhulani toera mupitirize kubala misapo, pontho misapo yanu ipitirize kwenda na kwenda toera cinthu consene cinaphemba imwe kuna Baba mu dzina yanga, iye akupaseni.+

17 “Ine ndisakupangani pinthu pyenepi toera imwe mufunane unango na ndzace.+ 18 Khala dziko isakuidani, imwe musadziwa kuti iyo yaida ine mbidzati kuida imwe.+ 19 Mbamudakhala ninga anthu a dziko, anthu a dziko mbadakomerwa na imwe. Nakuti cincino nee musacitabve khundu ya dziko,+ mbwenye ine ndakusankhulani pakati pa anthu a dziko, na thangwi ineyi anthu a dziko asakuidani.+ 20 Kumbukani mafala adakupangani ine kuti: Bitcu nee ndi nkulu kupiringana mbuyace. Khala iwo anditcinga, iwo anadzakutcinganimbo;+ khala iwo abvera mafala anga, anadzabverambo mafala anu. 21 Mbwenye iwo anadzakucitirani pinthu pyenepi pyonsene thangwi ya dzina yanga, thangwi iwo nkhabe kundziwa Ule adandituma.+ 22 Ine mbidakhonda kubwera kudzalonga na iwo, iwo nee mbadakhala na madawo.+ Mbwenye cincino iwo nkhabe mathangwi toera kutuna madawo awo.+ 23 Ule anandiida, asaidambo Babanga.+ 24 Mbadakhonda kuona mabasa adacita ine pakati pawo, akuti cipo acitwa kale na munthu unango,+ iwo nee mbadakhala na madawo; mbwenye cincino iwo andiona mbaida ine na Babanga ene. 25 Pyenepi pyacitika toera kukwanirisa mafala adalembwa mu Mwambo wawo kuti: ‘Iwo andiida mwakusowa mathangwi.’+ 26 Angabwera mʼphedzi wakuti ndi nzimu wakucena wa undimomwene,+ unafuna kutumiza ine kuna imwe buluka kuna Baba, unadzapereka umboni thangwi ya ine,+ 27 imwembo munadzapereka umboni+ unalonga pya ine, thangwi imwe mwakhala na ine kubulukira pakutoma.

16 “Ine ndakupangani pinthu pyenepi toera mukhonde kuluza cikhulupiro canu.* 2 Anthu anadzakuthamangisani mʼmasinagoga.+ Mwandimomwene, unadzafika ndzidzi wakuti munthu anakuphani+ ananyerezera kuti akutumikira Mulungu. 3 Iwo anadzacita pyenepi thangwi nkhabe kudziwa Babanga, pontho iwo nkhabe kundidziwa.+ 4 Mbwenye ine ndakupangani pinthu pyenepi toera ndzidzi ungafika mbapitoma kucitika, imwe mukumbuke kuti ndakupangani kale pinthu pyenepi.+

“Pakutoma ine nee ndakupangani pinthu pyenepi, thangwi ndikhali pabodzi na imwe. 5 Mbwenye cincino ine ndiri kuenda kuna Ule adandituma;+ ngakhale tenepo, nee mʼbodzi wa imwe anandibvundza kuti: ‘Mbuya, muli kuenda kupi?’ 6 Nakuti cincino ndakupangani pinthu pyenepi, mitima yanu yadzala na kutsukwala.+ 7 Mbwenye mwandimomwene ine ndinakupangani kuti, mphyadidi kakamwe kwa imwe kuti ine ndiende. Thangwi ndingakhonda kuenda, nzimu wakucena nee unabwera toera kukuphedzani;+ mbwenye ndingaenda, ndinautumiza kuna imwe. 8 Iwo ungafika, unadzapangiza pakweca madawo a dziko, ulungami na kutonga kwa Mulungu. 9 Pakutoma unadzapangiza madawo+ a dziko, thangwi anthu nee asandikhulupira;+ 10 buluka penepo unadzapangiza ulungami, thangwi ine ndiri kuenda kuna Baba, pontho imwe nee munadzandionabve; 11 iwo unadzapangizambo kutonga kwa Mulungu, thangwi ntongi wa dziko ino amala kutongwa.+

12 “Ndiciri na pinthu pizinji toera kukupangani, mbwenye cincino nee munakwanisa kupibvesesa. 13 Mbwenye nzimu wakucena wa undimomwene+ ungafika, unadzakutsogolerani toera kubvesesa mwadidi undimomwene, thangwi nee unadzalonga pinafuna iwo, mbwenye unadzalonga pinabva iwo, pontho unadzakudziwisani pinthu pinafuna kucitika.+ 14 Nzimu wakucena unadzandipasa mbiri,+ thangwi iwo unadzakufokotozerani pinthu pidatambira iwo kuna ine.+ 15 Baba andipanga pinthu pyonsene pinadziwa iye.+ Na thangwi ineyi, ine ndakupangani kuti nzimu wakucena unadzakufokotozerani pinthu pidatambira iwo kuna ine. 16 Thimize pangʼono imwe nkhabe kudzandionabve,+ mbwenye thimize pangʼono imwe munadzandiona.”

17 Penepo anyakupfundzace anango akhabvundzana okha-okha: “Kodi iye asafuna kulonganji pinatipanga iye kuti: ‘Thimize pangʼono imwe nkhabe kudzandionabve, mbwenye thimize pangʼono imwe munadzandiona,’ pontho, ‘thangwi ine ndiri kuenda kuna Baba’?” 18 Natenepa iwo akhalonga: “Kodi iye asafuna kulonganji na mafala akuti, ‘thimize pangʼono’? Ife nee tisadziwa pinalonga iye.” 19 Yezu akhadziwa kuti iwo akhafuna kumbvundza, natenepa iye aabvundza: “Kodi imwe musabvundzana unango na ndzace thangwi ine ndalonga kuti: ‘Thimize pangʼono imwe nkhabe kudzandionabve, mbwenye thimize pangʼono imwe munadzandiona’? 20 Ine ndinakupangani na cinyindiro consene kuti imwe munadzalira mbamubulira, mbwenye dziko inadzatsandzaya; imwe munadzatsukwala, mbwenye kutsukwala kwanu kunadzacinja kudza kutsandzaya.+ 21 Nkazi angafuna kubala asabva kupha, thangwi ndzidzi wace wakubala wafika; mbwenye angamala kubala mwana, iye asaduwala nyatwa yonsene idaona iye, thangwi yakukomerwa na mwana adabalwa pa dziko. 22 Cincino imwembo musatsukwala; mbwenye mungadzandiona pontho, imwe munadzatsandzaya na ntima onsene,+ pontho nkhabe anafuna kudzakupokoserani kutsandzaya kwanu. 23 Pa ntsiku ineyi, imwe nee munadzandibvundzabve cinthu. Ine ndinakupangani na cinyindiro consene kuti, pyonsene pinafuna imwe kuphemba kuna Baba mu dzina yanga,+ iye anadzakupasani.+ 24 Mpaka pano imwe mudzati kuphemba cinthu mu dzina yanga. Phembani, imwe munadzapaswa, toera imwe mutsandzaye kakamwe.

25 “Ine ndaphatisira misangani toera kukupangani pinthu pyenepi. Unadzafika ndzidzi wakuti nee ndinadzaphatisirabve misangani toera kulonga na imwe, mbwenye ndinadzakupangani pakweca pyonsene thangwi ya Baba. 26 Pa ntsiku ineyi, imwe munadzaphemba Baba mu dzina yanga; mbwenye pyenepi nee pisabveka kuti ndine anafuna kukucitirani phembo kuna Baba. 27 Thangwi iye ene Baba asakufunani; iye asakufunani thangwi imwe mwandifuna+ mbamukhulupira kuti ine ndabwera ninga munthu adatumwa na Mulungu.+ 28 Ine ndabwera pa dziko yapantsi ninga munthu adatumwa na Baba. Cincino ndiri kubuluka pa dziko mbandibwerera kuna Baba.”+

29 Anyakupfundzace alonga: “Mbuya, cincino ife tisabvesesa pinalonga imwe, thangwi nee mukulongabve na misangani. 30 Cincino ife tisatawira kuti imwe musadziwa pinthu pyonsene, pontho nee musadikhira kuti munthu akubvundzeni. Na thangwi ineyi ife tisakhulupira kuti imwe mwabuluka kuna Mulungu.” 31 Yezu aatawira: “Cincino musakhulupira? 32 Onani, unadzafika ndzidzi, mwandimomwene wafika, wakuti munadzabalaliswa, mʼbodzi na mʼbodzi anadzabwerera kunyumba kwace, mbamundisiya ndekha.+ Mbwenye nee ndiri ndekha, thangwi Baba ali na ine.+ 33 Ine ndalonga pinthu pyenepi toera kubulukira mwa ine, imwe mukhale na ntendere.+ Mu dziko imwe munadzaona nyatwa, mbwenye khalani na cipapo! Ine ndakunda dziko.”+

17 Pidamala Yezu kulonga pinthu pyenepi, ayangʼana kudzulu, mbalonga: “Baba, ndzidzi wafika. Pasani mbiri mwananu, toera mwananu akupaseni mbiri.+ 2 Imwe mwampasa mphambvu zakutonga anthu onsene,+ toera iye apereke umaso wakukhonda mala+ kuna anthu onsene adampasa imwe.+ 3 Umaso wakukhonda mala+ ndi uyu: Anthu akudziweni imwe Mulungu mʼbodzi basi wandimomwene,+ pontho adziwembo Yezu Kristu,+ ule adatuma imwe. 4 Ine ndakupasani mbiri pa dziko yapantsi,+ mbandimalisa basa idandipasa imwe toera kucita.+ 5 Natenepa Baba, cincino ndipaseni mbiri pana imwe, ninga mbiri ikhali na ine pana imwe dziko mbidzati kucitwa.+

6 “Ine ndadziwisa dzina yanu kuna anthu adabulusa imwe pa dziko+ mbamundipasa. Iwo akhali anu, mbwenye imwe mwandipasa, pontho iwo abvera mafala anu. 7 Cincino iwo asadziwa kuti pinthu pyonsene pidandipasa imwe, pyabuluka kuna imwe; 8 thangwi ine ndaapanga mafala adandipasa imwe,+ iwo aatawira, mbadziwa kuti mwandimomwene ine ndabwera ninga muimiriri wanu,+ pontho iwo asakhulupira kuti ndimwe adandituma.+ 9 Ine ndisacita phembero thangwi ya iwo; ine nee ndisacita phembero thangwi ya dziko, mbwenye thangwi ya ale adandipasa imwe, thangwi iwo ndi anu. 10 Pinthu pyonsene piri na ine mphyanu,+ pinthu pyanu pyonsene mphyanga, pontho ine ndapaswa mbiri pakati pawo.

11 “Ine ndiri kubuluka pa dziko ino, mbwenye iwo ali pa dziko+ ino, ine ndiri kubwerera kuna imwe. Baba wakucena, aonereni+ thangwi ya dzina yanu idandipasa imwe; toera iwo akhale mʼbodzi,* ninga ife ndife mʼbodzi.*+ 12 Pikhali ine na iwo, ine ndikhaaonera+ thangwi ya dzina yanu idandipasa imwe; ine ndaatsidzikiza, pontho nee mʼbodzi wa iwo atayika,+ kusiyapo ule anafuna kudzafudzwa,+ toera Malemba akwanirisike.+ 13 Mbwenye cincino ine ndiri kubwera kuna imwe, ine ndisalonga pinthu pyenepi pa dziko toera iwo atsandzaye kakamwe na kukomerwa kuli na ine.+ 14 Ine ndaapasa mafala anu, mbwenye dziko isaaida, thangwi iwo nkhabe kucita khundu ya dziko,+ ninga ine nkhabe kucita khundu ya dziko.

15 “Nee ndisaphemba toera muabuluse pa dziko, mbwenye toera muaonere thangwi ya Nyakuipa.*+ 16 Iwo nkhabe kucita khundu ya dziko,+ ninga ine nkhabe kucita khundu ya dziko.+ 17 Aceneseni na undimomwene;+ mafala anu ndi undimomwene.+ 18 Ninga mudandituma imwe toera kudza pa dziko, inembo ndaatuma pa dziko.+ 19 Ine ndisaceneseka thangwi ya iwo, toera iwombo aceneswe na undimomwene.

20 “Nee ndisakuphembani thangwi ya awa basi, mbwenye ndisakuphembanimbo thangwi ya ale anafuna kundikhulupira kubulukira mʼmafala awo, 21 toera iwo onsene akhale mʼbodzi,+ ninga imwe Baba muli wakuphatana na ine,+ inembo ndiri wakuphatana na imwe, iwombo akhale akuphatana na ife, toera dziko ikhulupire kuti ndimwe adandituma. 22 Ine ndaapasa mbiri idandipasa imwe, toera iwo akhale mʼbodzi, ninga ife ndife mʼbodzi.+ 23 Ine ndikhale wakuphatana na iwo, imwe mukhale wakuphatana na ine, iwo mbakhala akuphatana kakamwe, toera dziko idziwe kuti ndimwe adandituma, pontho kuti imwe mwaafuna ninga mudandifunira imwe. 24 Baba, ndisafuna kuti ale adandipasa imwe akhale pabodzi na ine kunafuna kudzakhala ine,+ toera iwo aone mbiri yanga idandipasa imwe, thangwi imwe mwandifuna dziko mbidzati kucitwa.+ 25 Baba wakulungama, mwandimomwene, dziko nkhabe kukudziwani,+ mbwenye ine ndisakudziwani,+ pontho awa asadziwa kuti ndimwe adandituma. 26 Ine ndaadziwisa dzina yanu, pontho ndinapitiriza kuidziwisa,+ toera ufuni udandifuna na imwe ukhale muna iwo, inembo mbandikhala wakuphatana na iwo.”+

18 Pidamala iye kulonga pinthu pyenepi, Yezu na anyakupfundzace aenda kuntunda unango wa Gowa ya Sidhroni,+ kweneko kukhali na munda wa maluwa, mbapita mwenemo na anyakupfundzace.+ 2 Yuda, ule akhafuna kunsandukira, akhadziwambo mbuto ineyi, thangwi kazinji kene Yezu akhagumanyikana kweneko na anyakupfundzace. 3 Natenepa, Yuda abwera na nsoka wa anyankhondo na anyakuonera adatumwa na akulu a anyantsembe na Afarisi, iwo akhali na pyakumwinikira napyo, nyale na pida.+ 4 Nakuti Yezu akhadziwa pinthu pyonsene pikhafuna kuncitikira, iye aenda kutsogolo mbaabvundza: “Mbani anasaka imwe?” 5 Iwo antawira: “Yezu wa ku Nazareti.”+ Iye aapanga: “Ndine pano.” Yuda, nyakusandukira Yezu akhali pabodzi na iwo.+

6 Mbwenye pidaapanga Yezu kuti: “Ndine pano,” iwo abwerera nduli mbagwa pantsi.+ 7 Natenepa iye aabvundza pontho: “Mbani anasaka imwe?” Iwo atawira: “Yezu wa ku Nazareti.” 8 Yezu atawira: “Ine ndakupangani kale kuti ndine pano. Mphapo khala mukusaka ine, awa asiyeni aende pyawo.” 9 Pyenepi pyacitika toera akwanirisike mafala adalonga iye kuti: “Mwa ale adandipasa imwe, nkhabepo adatayika.”+

10 Penepo Simau Pedhru, wakuti akhali na supada, aibulusa mbagwanda khutu yamadyo ya nyabasa wa nyantsembe wankulu.+ Dzina ya nyabasa unoyu ikhali Malko. 11 Mbwenye Yezu apanga Pedhru: “Ikha supada yako pa mbuto payo.+ Kodi ine nee ndisafunika kumwera ndiko idandipasa Baba?”+

12 Penepo anyankhondo, nkulu wa anyankhondo na anyakuonera adatumwa na Ayuda, aphata Yezu mbamʼmanga. 13 Pakutoma iwo aenda naye kuna Anasi, thangwi iye akhali tebzwalace Kaifa.+ Kaifa akhali nyantsembe wankulu mu caka ceneci.+ 14 Kaifa ndiye akhadapanga Ayuda kuti mphyadidi kwa iwo kuti munthu mʼbodzi afere mbumba.+

15 Simau Pedhru na nyakupfundza unango, akhatowera Yezu.+ Nakuti nyakupfundza unango unoyu akhadziwika na nyantsembe wankulu, aenda pabodzi na Yezu mpaka panyumba ya nyantsembe wankulu, 16 mbwenye Pedhru akhadalimira kunja kwa nsuwo. Natenepa, nyakupfundza wakuti akhadziwika na nyantsembe wankulu, aenda kalonga na nyakuonera nsuwo, akwata Pedhru mbapita naye. 17 Penepo nyabasa wankazi akhaonera pansuwo abvundza Pedhru: “Kodi iwe nee ndiwe mʼbodzi wa anyakupfundza a munthu uyu?” Iye atawira: “Nkhabe, sine tayu.”+ 18 Nakuti kunja kukatonthola, anyabasa na anyakuonera agasa moto wa makala mbalimira nʼkhundu mwawo toera kuotha. Pedhru alimirambo pabodzi na iwo mbaotha moto.

19 Natenepa, nkulu wa anyantsembe abvundza Yezu thangwi ya anyakupfundzace na pipfundziso pyace. 20 Yezu antawira: “Ine ndikhalonga pamaso pa anthu onsene. Ndzidzi onsene ndikhapfundzisa mu sinagoga na mu templo,+ munasonkhana Ayuda onsene, nkhabe cinthu cidalonga ine ncibisobiso. 21 Thangwi yanji musandicita mibvundzo? Bvundzani ale adabva pikhalonga ine kuna iwo. Iwo asadziwa mwadidi pidalonga ine.” 22 Pidamala Yezu kulonga mafala anewa, mʼbodzi wa anyakuonera akhali cifupi na iye amʼmenya mbama,+ mbambvundza: “Unatawiradi tenepo nkulu wa anyantsembe?” 23 Yezu antawira: “Khala ndalonga cinthu cakuipa, longa cidaipisa ine; mbwenye khala pidalonga ine mphyadidi, thangwi yanji usandimenya?” 24 Penepo Anasi atumiza Yezu kuna nyantsembe wankulu Kaifa, iye akhadamangwa mikono.+

25 Simau Pedhru akhali penepo mbakaotha moto. Penepo anthu ambvundza: “Kodi iwe nee ndiwe mʼbodzi wa anyakupfundzace?” Iye akhonda mbalonga: “Nkhabe, sine tayu.”+ 26 Mʼbodzi wa anyabasa a nyantsembe wankulu wakuti ndi mʼbale wace mamuna akhadagwandwa+ khutu na Pedhru, ambvundza: “Kodi ine nee ndakuona pabodzi na iye mʼmunda wa maluwa?” 27 Mbwenye Pedhru akhonda pontho, penepo pene dzongwe yalira.+

28 Namacibese kakamwe, iwo abuluka na Yezu kunyumba ya Kaifa mbaenda naye kunyumba ya ntongi Pilato.+ Nakuti Ayuda akhafuna kudya Paskwa, iwo nee apita nʼnyumba ya Pilato, thangwi akhagopa kupswipisika.+ 29 Natenepa, Pilato abuluka kunja mbaabvundza: “Ndi cinthu cipi cakuipa cidacita munthu uyu?” 30 Iwo antawira: “Munthu uyu mbadakhonda kucita cinthu cakuipa, ife nee mbatidampereka kuna imwe.” 31 Natenepa Pilato aapanga: “Nkwateni toera muntonge mwakubverana na mwambo wanu.”+ Ayuda antawira: “Ife nee tisatawiriswa kupha munthu.”+ 32 Pyenepi pyacitika toera kukwanirisa mafala adalonga Yezu kuti iye mbadafa tani.+

33 Natenepa, Pilato apita pontho nʼnyumba yace yakutongera miseru, acemera Yezu mbambvundza: “Kodi iwe ndiwe Mambo wa Ayuda?”+ 34 Yezu ambvundza: “Mbvundzo unoyu adaunyerezera ndimwe, peno alipo adakupangani pinthu thangwi ya ine?” 35 Pilato atawira: “Kodi ine ndine Muyuda? Anthu a mbumba yako na akulu a anyantsembe ndiwo adakupereka kuna ine. Ninji pidacita iwe?” 36 Yezu atawira:+ “Umambo wanga nkhabe kucita khundu ya dziko.+ Umambo wanga mbudacita khundu ya dziko, atowereri anga mbadamenya nkhondo toera ine ndikhonde kuperekwa mʼmanja mwa Ayuda.+ Mbwenye undimomwene ndi wakuti Umambo wanga nee usacita khundu ya dziko.” 37 Penepo Pilato ambvundza: “Mphapo iwe ndiwe mambo?” Yezu atawira: “Mukulonga mwekhene kuti ine ndine mambo.+ Na thangwi ineyi ine ndabalwa, pontho ndabwera pa dziko yapantsi toera ndipereke umboni wa undimomwene.+ Munthu ali kukhundu ya undimomwene asabvesera pinalonga ine.” 38 Pilato ambvundza: “Undimomwene ninji?”

Pidamala iye kulonga pyenepi, aenda pontho kunja kuna Ayuda mbaapanga: “Nee ndisaona cinthu cakuipa cidacita iye.+ 39 Kusiyapo pyenepi, mwakubverana na mwambo wanu, ine ndisafunika kukubulusirani munthu nkaidi pa Paskwa.+ Mphapo musafuna kuti ndikubulusireni Mambo wa Ayuda?” 40 Iwo akhuwa pontho: “Lekani kubulusa munthu unoyu. Bulusani Bharabha!” Bharabha akhali phanga.+

19 Penepo Pilato akwata Yezu, mbankwapulisa.+ 2 Anyankhondo aluka nthimba ya minga, aiikha munsolo mwace, mbambvazika nguwo yakufuirira,+ 3 iwo akhafika dhuzi na iye, mbampanga: “Muli tani imwe, Mambo wa Ayuda!” Pontho iwo akhamʼmenya mbama.+ 4 Pilato abuluka pontho panja, mbapanga mwinji wa anthu: “Onani! Ine ndinamʼbulusa kunja toera imwe mudziwe kuti nee ndisaona cinthu cidadawisa iye.”+ 5 Natenepa, Yezu abuluka kunja, iye akhadabvala nthimba ya minga na nguwo yakufuirira. Penepo Pilato apanga anthu: “Onani! Mamuna ule ndi uyu!” 6 Mbwenye pidamuona akulu a anyantsembe na anyakuonera, akhuwa: “Mbamanikwe pamuti! Mbamanikwe pamuti!”*+ Pilato aapanga: “Nkwateni imwe muende kamuphe, thangwi ine nee ndikuona cinthu cidadawisa iye.”+ 7 Ayuda antawira: “Ife tiri na mwambo, pontho mwakubverana na mwambo unoyu, iye asatongwa kuphiwa,+ thangwi alonga ekhene kuti iye ndi mwana wa Mulungu.”+

8 Pilato pidabva iye pinthu pikhalonga iwo, agopa kakamwe, 9 iye apita pontho nʼnyumba yace yakutongera miseru, mbabvundza Yezu: “Iwe wabuluka kupi?” Mbwenye Yezu nee antawira.+ 10 Natenepa Pilato ambvundza: “Kodi iwe nkhabe funa kunditawira? Nee usadziwa kuti ine ndiri na mphambvu toera kukusudzula, pontho ndiri na mphambvu toera kukuphesa?”* 11 Yezu antawira: “Mbamudakhonda kuzipaswa na Mulungu, imwe nee mbamudakhala na mphambvu yakundicita cinthu. Na thangwi ineyi, ule adandipereka kuna imwe, ndiye ali na madawo makulu kakamwe.”

12 Natenepa, Pilato akhayesera kusaka njira toera kunsudzula, mbwenye Ayuda akhuwa: “Imwe mungasudzula munthu uyu, nee ndimwe xamwali wa Sezari. Munthu analonga ekhene kuti ndi mambo, ndi nyamalwa wa Sezari.”+ 13 Pilato pidamala iye kubva mafala anewa, abulusa Yezu kunja. Iye akhala pa mpando wakutongera miseru, pa mbuto inacemerwa Mbuto Yakusasanywa na Miyala, mbwenye Mucihebheri isacemerwa Gabhata. 14 Ineyi ikhali ntsiku Yakukhunganyika+ Paskwa; ukhali ndzidzi 12 wakumasikati. Pilato apanga Ayuda: “Onani! Uyu ndi mambo wanu!” 15 Mbwenye iwo akhuwa: “Mupheni! Mupheni! Mbamanikwe pamuti!”* Pilato aabvundza: “Ndisafunika kupha mambo wanu?” Akulu a anyantsembe atawira: “Ife nkhabe mambo unango, mambo wathu ndi Sezari basi.” 16 Penepo Pilato ampereka kuna iwo toera aphiwe pamuti.+

Natenepa iwo akwata Yezu mbaenda naye. 17 Yezu athukula ekhene muti wakusikimizira,* mbabuluka kuenda ku mbuto inacemerwa Madudu a Misolo,+ yakuti Mucihebheri isacemerwa Golgota.+ 18 Kweneko iwo akhomera Yezu pamuti,+ pakati pa amuna awiri, uku mʼbodzi, uku mʼbodzi, Yezu akhali pakati.+ 19 Pilato alemba mafala mbaaikha pamuti wakusikimizira.* Mafala anewa akhalonga tenepa: “Yezu wa ku Nazareti, Mambo wa Ayuda.”+ 20 Ayuda azinji aleri mafala anewa, thangwi mbuto idakhomerwa Yezu pamuti ikhali cifupi na nzinda, pontho mafala anewa akhadalembwa Mucihebheri, Cilatini na Cigerego. 21 Mbwenye akulu a anyantsembe a Ayuda apanga Pilato: “Lekani kulemba kuti: ‘Mambo wa Ayuda’ mbwenye lembani kuti iye alonga: ‘Ine ndine Mambo wa Ayuda.’” 22 Pilato atawira: “Pidalemba ine, ndapilemba.”

23 Anyankhondo pidamala iwo kukhomera Yezu pamuti, akwata nguwo zace mbazigawa mapindi manai mbagawana, nyankhondo mʼbodzi na mʼbodzi akwata phindi yace. Iwo akwatambo nguwo yace inacemerwa tunika. Mbwenye tunika ineyi nee ikhali na nsono, ikhali nguwo ibodzi ene buluka padzulu mpaka pantsi. 24 Natenepa iwo alonga okha-okha: “Mbatilekeni kuipandula, mbwenye tendeni ticite pyakulotera toera tione kuti inakhala na ani.”+ Pyenepi pyacitika toera kukwanirisa khundu ya Malemba inalonga kuti: “Iwo agawana nguwo zanga, pontho acita pyakulotera thangwi ya nguwo yanga.”+ Mwandimomwene, anyankhondo acitadi pinthu pyenepi.

25 Mbwenye cifupi na muti wakusikimizira* udakhomerwa Yezu, pakhali na mai wace,+ mʼbale wankazi wa mai wace, pabodzi na Mariya nkazi wa Klopa na Mariya Madhalena.+ 26 Yezu pidaona iye kuti mai wace na nyakupfundza ule akhafuna iye+ akhali dzololo cifupi na iye, apanga mai wace: “Mama, kutomera lero, uyu ndi mwananu!” 27 Buluka penepo iye apanga nyakupfundza ule: “Kutomera lero, uyu ndi mai wako!” Kubulukira pa ndzidzi unoyu, nyakupfundza unoyu ankwata mbaenda kakhala naye kunyumba kwace.

28 Buluka penepo, pidadziwa Yezu kuti pinthu pyonsene pikhadamala kucitika, toera kukwanirisa khundu ibodzi ya Malemba, iye alonga: “Ndina nyota.”+ 29 Penepo pakhali na combo cikhadadzala na vinyu yakudjamuka. Natenepa iwo abvika thonje mu vinyu yakudjamuka, aipfeka pa ntsonga ya muti unacemerwa isopo* mbaiikha pamulomo wa Yezu.+ 30 Pidalawira iye vinyu yakudjamuka, Yezu alonga: “Pyonsene pyakwanirisika!”+ Penepo iye akotamisa nsolo wace, mbafa.+

31 Nakuti ineyi ikhali ntsiku Yakukhunganyika,+ Ayuda nee akhafuna kuti manungo a anthu akhali pa miti yakusikimizira+ apitirize mpaka pa ntsiku ya Sabudu, (thangwi Sabudu ineyi ikhali ikulu kakamwe).+ Natenepa iwo aenda kaphemba Pilato toera miyendo ya anthu anewa ikhumulwe, mbatcitisa manungo awo. 32 Natenepa, anyankhondo abwera mbakhumula miyendo ya amuna awiri adamanikwa pamuti nʼkhundu mwa Yezu. 33 Mbwenye pidafika iwo pana Yezu, aona kuti iye akhadafa kale, natenepa iwo nee akhumula miyendo yace. 34 Mbwenye nyankhondo mʼbodzi amulasa na dipa+ pakhundu pace, mu ndzidzi ubodzi ene, penepo pabuluka ciropa na madzi. 35 Pontho ule adaona pyenepi asapereka umboni, umboni wace ndi wandimomwene, iyembo asadziwa kuti pinalonga iye mphyandimomwene, toera imwembo mukhulupire.+ 36 Mwandimomwene, pyenepi pyacitika toera kukwanirisa khundu ya Malemba inalonga kuti: “Nee gogodo yace ibodzi inadzakhumulwa.”*+ 37 Pontho khundu inango ya Malemba isalonga: “Iwo anadzayangʼana munthu adalasa iwo.”+

38 Pidamala kucitika pinthu pyenepi, Zuze wa ku Arimateya aenda kuna Pilato kaphemba manungo a Yezu. Iye akhali nyakupfundza wa Yezu,+ mbwenye nee akhalonga pakweca kuti ndi nyakupfundza wa Yezu thangwi akhagopa Ayuda. Pilato antawirisa, natenepa iye afika, mbatcitisa manungo a Yezu.+ 39 Nikodhemu,+ wakuti akhadaenda kalonga na Yezu camasiku, abwerambo. Iye abweresa mira wakubvungazwa na alowe akhalemera makilu cifupi na 33.+ 40 Natenepa, iwo akwata manungo a Yezu, aapyangirira na nguwo zadidi mbaaikha pyakununkhirisa+ mwakubverana na pikhacita Ayuda angafuna kuikha munthu wakufa. 41 Pyacitikambo kuti, cifupi na mbuto idakhomerwa Yezu, pakhali na munda wa maluwa, mʼmunda unoyu mukhali na nthumbi ipswa+ yakuti cipo ikhadaikhwa kale munthu. 42 Nakuti ineyi ikhali ntsiku ya Ayuda toera kukhunganyika+ ntsiku ya Sabudu, pontho nthumbi ikhali cifupi, iwo aikha manungo a Yezu mwenemo.

20 Pa ntsiku yakutoma ya sumana, Mariya Madhalena afika pa nthumbi namacibese,+ kunja mbakuli na cidima, penepo iye aona kuti mwala udaikhwa pansuwo wa nthumbi wabuluswa.+ 2 Natenepa, iye athamanga kuenda kukhali Simau Pedhru na nyakupfundza unango, wakuti akhafuniwa kakamwe na Yezu,+ mbaapanga: “Anthu abulusa Mbuya munthumbi,+ ife nkhabe dziwa kudamuikha iwo.”

3 Penepo Pedhru na nyakupfundza unango abuluka mbaenda kunthumbi. 4 Uwiri wawo atoma kuthamanga, mbwenye nyakupfundza unango athamanga kakamwe kupiringana Pedhru, mbatoma ndiye kufika kunthumbi. 5 Iye asuzumira munthumbi mbaona nguwo zidasala mwenemu,+ mbwenye nee apitamo. 6 Buluka penepo, afikambo Simau Pedhru akhabwera nduli mwace mbapita munthumbi. Iye aona nguwo zidasala mwenemu. 7 Nguwo ikhadaphimbira nsolo wa Yezu nee ikhali pabodzi na nguwo zikhadapyangirirwa mʼmanungo mwace, mbwenye ikhadafunyizwa payokha kukhundu inango. 8 Penepo nyakupfundza unango adafika pakutoma apitambo munthumbi, aona mbakhulupira pidapangwa iwo. 9 Thangwi iwo akhadzati kubvesesa khundu ya Malemba inalonga kuti iye asafunika kulamuswa muli akufa.+ 10 Natenepa, anyakupfundza abwerera mʼmanyumba mwawo.

11 Mbwenye Mariya asala mbalira penepo cifupi na nthumbi. Mu ndzidzi ukhalira iye, akotama mbasuzumira munthumbi, 12 mbaona aanju awiri+ akhadabvala nguwo zakucena. Iwo akhali nawa pa mbuto ikhadagoneswa manungo a Yezu, mʼbodzi akhali kumisolo unango akhali kumiyendo. 13 Iwo ambvundza: “Nkaziwe, ukuliranji?” Iye aatawira: “Anthu akwata Mbuyanga, ine nkhabe dziwa kudamuikha iwo.” 14 Pidamala iye kulonga pyenepi, azungunuka mbaona Yezu akhali dzololo penepo, mbwenye iye nee adzindikira kuti akhali Yezu.+ 15 Yezu ambvundza: “Nkaziwe, ukuliranji? Mbani anasaka iwe?” Nakuti Mariya akhanyerezera kuti ndi nyabasa wa mʼmunda wa maluwa, ampanga: “Khala ndimwe adankwata, ndipangizeni kudamuikha imwe, ine ndinaenda kankwata.” 16 Yezu alonga: “Mariya!” Penepo Mariya ayangʼana kuna iye mbalonga Mucihebheri: “Rabhoni!” (pisabveka “Mpfundzisi!”) 17 Yezu ampanga: “Leka pitiriza kundiphata, thangwi ndidzati kuenda kuna Baba. Mbwenye ndoko kuna abale anga,+ mbuapanga kuti: ‘Ine ndiri kuenda kuna Babanga,+ wakuti ndi Babanumbo, kuna Mulungu wanga,+ wakuti ndi Mulungu wanumbo.’” 18 Mariya Madhalena aenda kuna anyakupfundza mbaapanga kuti: “Ine ndamuona Mbuya!” Mbaadziwisa pinthu pidapangwa iye na Yezu.+

19 Pa ntsiku ineyi yakutoma ya sumana, anyakupfundza akhadagumanyikana nʼnyumba camasiku mbafunga misuwo thangwi akhagopa Ayuda. Penepo Yezu aonekera pakati pawo mbaapanga: “Ntendere mbukhale na imwe.”+ 20 Pidamala iye kulonga pyenepi, aapangiza manja ace na pakhundu pace.+ Penepo anyakupfundza atsandzaya kakamwe pidaona iwo Mbuya.+ 21 Yezu aapanga pontho: “Ntendere mbukhale na imwe.+ Ninga mudanditumira Baba,+ inembo ndiri kukutumani.”+ 22 Pidamala iye kulonga pyenepi, aapupusira mbaapanga: “Tambirani nzimu wakucena.+ 23 Imwe mungalekerera munthu adacita madawo, Mulungu amulekerera kale; imwe mungakhonda kulekerera munthu adacita madawo, Mulungu adzati kumulekerera.”

24 Mbwenye Tomee,+ mʼbodzi wa apostolo 12, wakuti akhadziwika na dzina ya Dhidhimo, nee akhali pabodzi na iwo pidaonekera Yezu pakati pawo. 25 Natenepa, anyakupfundza anango akhampanga: “Ife tamuona Mbuya!” Mbwenye iye aapanga: “Ndingakhonda kuona mule mudapholwa iye na maperego mʼmanja mwace, mbandipitisa cala canga pa benga ya maperego, pontho ndingakhonda kupitisa djanja yanga pakhundu pace,+ ine cipo ndinatawira pyenepi.”

26 Mudapita ntsiku zisere, anyakupfundzace akhadagumanyikana pontho, Tomee akhali pabodzi na iwo. Maseze misuwo ikhadafungwa, Yezu aonekera pakati pawo mbaapanga: “Ntendere mbukhale na imwe.”+ 27 Buluka penepo iye apanga Tomee: “Ikha cala cako apa, ona manja anga, bwera upitise djanja yako pakhundu panga. Leka kupenula, mbwenye khulupira.” 28 Tomee antawira: “Mbuyanga, Mulungu wanga!” 29 Yezu ampanga: “Usakhulupira thangwi wandiona? Anyakutsandzaya ndi ale anakhulupira, maseze nee aona.”

30 Mwandimomwene, Yezu acitambo pirengo pinango pizinji pamaso pa anyakupfundzace, pyakuti nee pyalembwa mʼbukhu* iyi.+ 31 Mbwenye pinthu ipi pyalembwa toera imwe mukhulupire kuti Yezu ndi Kristu, Mwana wa Mulungu, pontho thangwi yakukhulupira kwanu, mukhale na umaso kubulukira mu dzina yace.+

21 Buluka penepo, Yezu aonekera pontho kuna anyakupfundzace ku Bara ya Tibheriyadhe. Kuonekera kwace kwacitika tenepa: 2 Simau Pedhru, Tomee (akhacemerwa Dhidhimo),+ Natanieli+ wa ku Kana wa Galileya, ana a Zebhedheu+ na anyakupfundzace anango awiri, onsene akhali pabodzi pene. 3 Simau Pedhru aapanga: “Ndiri kuenda kamedza.”* Iwo antawira: “Tende pabodzi.” Iwo abuluka mbakwira mʼmwadiya, mbwenye aphuphudza nee kuphata cinthu.+

4 Pikhaca kunja, Yezu alimira pa gombe, anyakupfundzace nee adzindikira kuti akhali Yezu.+ 5 Penepo Yezu aabvundza: “Ananga, muna cinthu toera kudya?” Iwo antawira: “Nkhabe!” 6 Iye aapanga: “Gwisirani kokota kukhundu yamadyo ya mwadiya, munaphata zingasi.” Natenepa iwo aigwisira, mbwenye nee akhakwanisa kuikwewa thangwi ikhali na ntsomba zizinji.+ 7 Penepo nyakupfundza akhafuniwa+ na Yezu apanga Pedhru: “Ndi Mbuya!” Simau Pedhru pidabva iye kuti ndi Mbuya, abvala nguwo yace yakunja, thangwi akhali cipezipezi,* mbagwera mʼmadzi. 8 Mbwenye anyakupfundza anango akhabwera mʼmwadiya ungʼono mbakwewa kokota ikhadadzala na ntsomba, thangwi nee akhali kutali na ntunda, ukhadasala nsindzo wa metru 90* basi toera kupandira.

9 Pidafika iwo kuntunda, iwo aona moto wa makala pakhali ntsomba, mbaonambo nkate. 10 Yezu aapanga: “Bweresani ntsomba zingasi zidaphata imwe cincino.” 11 Natenepa Simau Pedhru aenda mʼmwadiya mbakwewa kokota yakudzala na ntsomba zikulu mbaipandiza kuntunda. Maseze zikhali ntsomba 153, kokota nee yapanduka. 12 Yezu aapanga: “Bwerani mudye.” Nee mʼbodzi wa anyakupfundzace akhali na cipapo toera kumbvundza kuti: “Ndimwe ani?” Thangwi iwo akhadziwa kuti iye ndi Mbuya. 13 Yezu aafendedzera, akwata nkate mbaapasa. Iye acitambo pibodzi pyene na ntsomba. 14 Kweneku kukhali kuonekera kwacitatu+ kudacita Yezu kuna anyakupfundzace pidamala iye kulamuswa muli akufa.

15 Pidamala iwo kudya, Yezu abvundza Simau Pedhru: “Simau mwana wa Juwau, kodi iwe usandifuna kupiringana izi?” Iye antawira: “Inde Mbuya, imwe musadziwa kuti ndisakufunani kakamwe.” Iye ampanga: “Dyesa anamabira anga.”+ 16 Iye ambvundza pontho kacikawiri: “Simau mwana wa Juwau, kodi iwe usandifuna?” Iye antawira: “Inde Mbuya, imwe musadziwa kuti ndisakufunani kakamwe.” Iye ampanga: “Kumbiza anamabira anga.”+ 17 Yezu ambvundza pontho kacitatu: “Simau mwana wa Juwau, kodi iwe usandifuna?” Pedhru atsukwala thangwi Yezu ambvundza pontho kacitatu kuti: “Iwe usandifuna?” Natenepa iye ampanga: “Mbuya, imwe musadziwa pinthu pyonsene; pontho imwe musadziwa kuti ine ndisakufunani kakamwe.” Yezu ampanga: “Dyesa anamabira anga.+ 18 Ine ndinakupanga na cinyindiro consene kuti, pikhali iwe mʼphale, ukhabvala wekhene nguwo zako mbuenda kukhafuna iwe. Mbwenye ungakalamba, unafuthula mikono yako munthu unango anadzakubvazika nguwo mbakuendesa ku mbuto inakhonda iwe kufuna.” 19 Yezu alonga mafala anewa toera kupangiza kuti Pedhru mbadafa munjira yakuti mbidapasa mbiri Mulungu. Pidamala iye kulonga pyenepi, ampanga: “Pitiriza kunditowera.”+

20 Pedhru ayangʼana nduli mbaona kuti nyakupfundza akhafuniwa+ na Yezu akhaatowera, unoyu ndi nyakupfundza adakhala cifupi na Yezu pikhadya iwo siyali, wakuti akhadakotama kuna iye mbambvundza: “Mbuya, mbani anafuna kukusandukirani?” 21 Pidamuona iye, Pedhru abvundza Yezu: “Mbuya, ninji pinafuna kudzacitika kuna uyu?” 22 Yezu antawira: “Khala ine ndisafuna kuti iye apitirize mpaka kubwera kwanga, iwe unapyonji? Iwe pitiriza kunditowera.” 23 Mafala anewa amwazika pakati pa abale athu kuti nyakupfundza unoyu nee mbadafa. Mwandimomwene, Yezu nee ampanga kuti nyakupfundza unoyu nee mbadafa, mbwenye iye alonga kuti: “Khala ine ndisafuna kuti iye apitirize mpaka kubwera kwanga, iwe unapyonji?”

24 Nyakupfundza+ unoyu ndiye anapereka umboni wa pinthu pyenepi. Iye ndiye adalemba pinthu pyenepi, pontho ife tisadziwa kuti umboni wace ndi wandimomwene.

25 Mwandimomwene, Yezu acitambo pinthu pinango pizinji. Pyonsene mbapidalembwa cibodzi na cibodzi, ndisanyerezera kuti dziko nee mbidakhala na mbuto yakukwana toera kukoya mabukhu onsene adalembwa.+