Tsogolo Yakutsandzayisa

Sathani na madimonyo ace nee anadzapitiriza kunyengeza anthu ndzidzi wakulapha. Yahova aathamangisa kudzulu. (Apokalipse 12:9) Mpostolo Juwau aona masomphenya anapangiza kuti mwakukhonda dembuka Yahova anadzafudza Sathani na madimonyo ace. Iye alemba: “Ine ndaona anju akhatcita buluka kudzulu, iye akhali na xavi ya djenje yakuzika kakamwe, pontho akhali na unyolo m’manja mwace. Iye aphata nyoka ikulu, nyoka yakale ire, yakuti ndi Dyabo na Sathani, mbam’manga mu pyaka 1.000. Iye amponya mu djenje yakuzika kakamwe, afunga djenje ineyi mbaikha cidzindikiro padzulu pace, toera akhonde kunyengeza pontho anthu mpaka kumala kwa pyaka 1.000. Buluka penepo, iye anadzasudzulwa mu ndzidzi wakucepa.” (Apokalipse 20:1-3) Patsogolo pace, Dyabo na madimonyo ace anadzafudzwa kwenda na kwenda.—Apokalipse 20:10.

Anthu akuipa pa dziko yapantsi anadzafudzwambo.—Masalmo 37:9, 10; Luka 13:5.

Anyakufa Anadzakhala Pontho Maso!

Sathani na madimonyo angamala kufudzwa, Yahova anadzabweresa nkhombo zizinji kwa anthu. Kumbukani kuti anyakufa nkhabe umaso, pontho nkhabe dziwa cinthu. Yezu alandanisa kufa na kugona, citulo cikulu cakusowa ndota. (Juwau 11:11-14) Iye alonga pyenepi thangwi akhadziwa kuti unafika ndzidzi wakuti ale anagona munthumbi anadzalamuswa mbakhala pontho maso. Iye alonga: ‘Unadzafika ndzidzi wakuti munthu onsene ali munthumbi zakukumbukirwa . . . anadzabuluka.’—Juwau 5:28, 29; landanisani na Mabasa 24:15.

Iwo anadzalamuswa toera kukhala pano pa dziko yapantsi. M’mbuto mwakubva mphangwa za kufa kwa anthu, tinadzabva mphangwa zakutsandzayisa za kulamuswa kwa anyakufa! Pinadzakhala pyakutsandzayisa kakamwe kutambira ale anafuna kudzalamuswa muli akufa!