Pfunziro 4

Munakwanisa Tani Kupfunza Pya Mulungu

Munakwanisa kupfunza pya Yahova mwa kuleri Bibilya. Kalene kakamwe, Mulungu asankhula anthu akulengeseka towera alembe manyerezero Ace. Malemba anewa asacemerwa Bibilya. Lero, tisapfunza pya Mulungu mwa kuleri Bibilya. Nakuti m’Bibilya muna mafala peno mphangwa za Yahova, iyo pina isacemerwa Mafala a Mulungu. Tinakwanisa kukhulupira pinalonga Bibilya, thangwi Yahova cipo na cipo hanalonga unthawatawa tayu. “Mphyakukhonda kwanisika kuti Mulungu alonge unthawatawa.” (Ahebere 6:18) M’Mafala a Mulungu muna undimomwene.—Jwau 17:17.

Bibilya ndi ubodzi wa mitukwa yadidi kakawme idatipasa Mulungu. Ndi ninga tsamba ya baba wakufuna anace. Iyo isatipanga pya mapikiro a Mulungu akusanduza dziko yapantsi kukhala mbuto yakubalika towera kukhalamo, m’paradizu. Isatipanga pidacita Mulungu ndulimu, pinaciteye cincino na pinafuna dzaciteye n’tsogolo kwa ana ace akukhulupirika. Isatiphedza pina kumalisa pinatinetsa na kukhala akutsanzairwa.—2 Timoti 3:16, 17.

Mboni za Yahova ndi axamwali a Mulungu; izo zinadzakuphedzani kubvesa pinapfunzisa Bibilya. Pyakwana kuwapanga kuti musafuna kupfunza Bibilya. Iwo nkhabe phemba kobiri tayu. (Mateo 10:8) Mwakuthimizira pyenepi, munadzakwanisa kubvesera misonkhano yacikristu inacitwa m’mbuto zakulambira zinacemerwa Nyumba za Umambo. Imwe mungabvesera misonkhano yacikristu, munadzathimizira mwakucimbiza cidziwiso canu ca Mulungu.

Imwe munakwanisa kupfunza pya Mulungu mwa kuona pinthu pidacita iye. Mwacitsanzo, Bibilya isati: “Mulungu asasanya kudzulu na dziko yapantsi.” (Genesi 1:1) Yahova pakusasanya “kudzulu”, iye acita dzuwa. Mphapo, pyenepi pisatipangaji thangwi ya Yahova Mulungu? Pisatipanga kuti iye ali na mphambvu kakamwe. Iye basi mbadakwanisa kucita cinthu cakukhala na mphambvu ninga dzuwa. Pisatipanga pina kuti Yahova ngwanzeru, nakuti pikafunika kukhala na nzeru towera kucita dzuwa, inatipasa kupisa na ceza, cakuti nkhabe mala.

Pyakusasanywa na Yahova pisaonesa kuti iye asatifuna. Nyerezerani mitundu yonsene ya misapo inagumanika pa dziko yapantsi. Yahova mbadakwanisa kupereka ntundu ubodzi basi wa nsapo—peno nee ubodzi. Mbuto mwace, Yahova atipasa mitundu mizinji ya misapo, yakukhala na maonekero, kukula, kore, na kudzipa kwa kusianasiana. Pyenepi pisaonesa kuti Yahova si Mulungu basi wakufuna mbwenye pina ndi wakufewa manja pikulu pene, wakutsalakana na wakukoma ntima.—Masalmo 104:24.