Anyakufa Anakwanisadi Kukhala Pontho na Umaso?

BHIBHLYA ISALONGANJI?

“Kunadzaoneka kulamuswa muli akufa.”—Mabasa 24:15, Bhibhlya ya Dziko Ipswa.

THANGWI YANJI MPHYADIDI KUDZIWA PYENEPI?

Pikiro ineyi inatiphedza toera . . .

Kugumana cibalangazo tingaferwa.—2 Akorinto 1:3, 4.

Kukhonda gopa kufa.—Ahebheri 2:15.

Kukhala na cidikhiro candimomwene cakuti tinadzakhala pontho pabodzi na anyakufunika athu adafa.—Juwau 5:28, 29.

TINAKWANISADI KUKHULUPIRA PINALONGA BHIBHLYA?

Inde, pana mathangwi matatu:

• Mulungu ndi Nciti wa umaso. Bhibhlya isalonga kuti Yahova Mulungu ndiye “anapasa umaso.” (Masalmo 36:9; Mabasa 17:24, 25) Mwandimomwene, Mulungu wakuti ndiye adapasa umaso anthu na pinyama, anakwanisa kulamusa munthu adafa.

• Mulungu alamusa kale anthu nduli. Bhibhlya isalonga pya anthu asere akuti alamuswa muli akufa pa dziko yapantsi. Anthu anewa asaphataniza anapiana, akulu, amuna na akazi. Anango alamuswa pidapita ndzidzi ungasi mbadamala kale kufa, mbwenye m’bodzi akhadamala ntsiku zinai mu nthumbi!—Juwau 11:39-44.

• Mulungu asafuna kakamwe kulamusa pontho anthu. Yahova asaida kufa; iye asaona kufa ninga nyamalwa wace. (1 Akorinto 15:26) Iye asafuna kakamwe kufudza nyamalwa unoyu, pontho iye anamalisa kufa angadzalamusa anthu muli akufa. Yahova ‘asatsuwa’ kakamwe anthu adafa akuti ali m’manyerezero ace. Asafuna kakamwe kuaona pontho na umaso pa dziko yapantsi.—Yobe 14:14, 15.