Mafala Akutoma a Khundu 14

Akristu akutoma amwaza mphangwa zadidi za Umambo mpaka kunkhomo kwa dziko yapantsi. Yezu akhaatsogolera toera adziwe mbuto ikhafunika iwo kumwaza mphangwa, pontho aaphedza toera amwaze mphangwa mu pilongero pizinji pikhalonga anthu. Akristu anewa atcingwa kakamwe, mbwenye Yahova aapasa cipapo na mphambvu toera kukunda nyatwa zenezi.

Yezu aonesa mpostolo Juwau masomphenya a mbiri ya Yahova. M’masomphenya anango, Juwau aona Umambo wakudzulu mbufudza Sathani na utongi wace kwenda na kwenda. Iye aonambo Yezu mbakatonga ninga Mambo pabodzi na andzace akukwana 144.000. Kusiyapo pyenepi, Juwau aonambo dziko yonsene mbikhala paraizu, pontho anthu onsene akhalambira Yahova mwantendere na mwakuphatana.