NSOLO WA REVISTA | UTHAMBI UNACITISA ANTHU KUKHONDA KUFUNA MULUNGU

Uthambi Wakuti Mulungu Nkhabe Dzina

PINAKHULUPIRA ANTHU AZINJI “Takhala akudzitonga toera kukwanisa kulonga dzina ya Mulungu, khala ndi tenepo, kodi dzina ineyi ndi ipi.”​—Mpfundzisi David Cunningham, Theological Studies.

UNDIMOMWENE WA BHIBHLYA Mulungu alonga: “Ine ndine Yahova. Ineyi ndi dzina yanga.” (Izaiya 42:8, Tradução do Novo Mundo) Yahova ndi dzina ya Cihebere yakuti isabveka “Iye Asacitisa Pinthu Kukhalapo.”​—Genesi 2:4, NM.

Yahova asafuna kuti ife tiphatisire dzina yace. Bhibhlya isalonga: ‘Dziwisani mabasa ace pakati pa a kunja, mbamufokotoza kuti dzina yace ndi ya padzulu kakamwe.’​—Izaiya 12:4.

Yezu aphatisira dzina ya Mulungu. Mu phembero, Yezu alonga na Yahova: “Ine ndaadziwisa [anyakupfundza anga] dzina yanu, mbandithimiza kuidziwisa.” Thangwi yanji Yezu adziwisa dzina ya Mulungu kuna anyakupfundzace? Iye apitiriza kulonga: “Towera kundifuna kwanu [Mulungu] kukhale mwa iwo, inembo ndikhalembo mwa iwo.”​—Jwau 17:26.

THANGWI YANJI KUDZIWA PYENEPI NDI KWAKUFUNIKA Nyakupfundza Bhibhlya Walter Lowrie, alemba: “Mamuna wakuti nkhabe kudziwa dzina ya Mulungu, mwandimomwene iye nkhabe kundziwa ninga munthu, pontho iye nee anakwanisa kunfuna, khala asandziwa basi ene Mulungu ninga mphambvu yakukhonda oneka.”

Mamuna anacemerwa Victor akhaenda gereja masumana onsene, mbwenye nee akhapibva kuti akhadziwadi Mulungu. Iye alonga: “Natenepa, ndapfundza kuti dzina ya Mulungu ndi Yahova, pontho pikhali ninga kutoma kwene kundziwa. Ndikhapibva ninga ndagumana Munthu wakuti ndikhamubva mbakalongwa kazinji kene. Ndafika pakumuona ninga Munthu wandimomwene mbandikhala na uxamwali na iye.”

Natenepa, Yahova asafendedzera anthu anaphatisira dzina yace. Mulungu apikira ale ananyerezera dzina yace kuti: “Ine ndinadzaabvera ntsisi ninga zire za baba kuli mwanache anambvera.” (Malakiya 3:16, 17) Mulungu asapasambo nkhombo ale analonga dzina yace. Bhibhlya isalonga: “Munthu anachemera dzina ya [Yahova] anadzapulumuka.”​—Aroma 10:13.