Muoni Wakutsandzayisa Kwa Anthu A Ku Japau

Nsonkhano wakupambulika udacitwa ku Nagoya mu dziko ya Japau pa ntsiku 28 ya Bwinja ya caka 2013, Anthony Morris wa Mathubo Akutonga acita cidziwiso cakudzumisa kwa onsene adagumanika​—kubuluswa kwa bukhu ipswa mu Cijapau ya nsolo wakuti: A Bíblia—​O Evangelho Segundo Mateus. Anthu akupiringana 210.000 akhali penepo kuphatanizambo ale adaona nsonkhano mu kuphatisira vidyu ya mu Interneti akomerwa mbamenya manja mu ndzidzi wakulapha.

Bukhu ineyi ya Evanjelyu ya Mateo ya matsamba 128 yadhindwa kubulukira m’Bhibhlya ya Tradução do Novo Mundo mu Cijapau, iyo ndi yakupambulika kakamwe. M’bale Morris afokotoza kuti bukhu ineyi yacitwa toera “kuphedza basa yakumwaza mphangwa mu Cijapau.” Kodi bukhu ineyi yakhala tani? Thangwi yanji yacitwa? Kodi iyo yakhuya tani ale adaitambira?

KODI IYO YAKHALA TANI?

Makhaliro a bukhu ineyi ya Mateo adzumisa kakamwe anyakubvesera. Maletra a Cijapau anakwanisa kulembwa mwaulaphi peno mwaugugumi. M’mabukhu anango akudziko, kuphatanizambo m’mabukhu athu adabuluswa cincino, mwaphatisirwa maletra adalembwa mwaugugumi. Mbwenye m’bukhu ineyi idabuluswa cincino, mwaphatisirwa maletra aulaphi. Mwaphatisirwambo malembero na makhaliro anaphatisirwa m’matsamba a mphangwa na mabukhu anango mu Cijapau. Anyakuleri ku Japau asaona njira ineyi yakulemba ninga yakukhonda nentsa kuleri. Mwakuthimizira, ntsonga zakufunika zalembwa ninga misolo ming’ono, natenepa nyakuleri anakwanisa kuona mwakukhonda nentsa ntsonga zikulu.

Mwakucimbiza, abale na alongo ku Japau abandza mwai wa makhaliro a bukhu ineyi ya Mateo. Mulongo unango wa pyaka 80 pyakubalwa alonga: “Ndisaleri bukhu ya Mateo mu pyaka pizinji, mbwenye maletra aulaphi na misolo ming’ono yandiphedza toera kubvesesa mwadidi Nkhani Ya Paphiri.” Mulongo unango wacitsikana alemba: “Ndakhala pantsi mbandileri bukhu yonsene ya Mateo mpaka kumala. Ndadzolowera kuleri maletra augugumi, mbwenye anthu azinji ku Japau asakomerwa na maletra aulaphi.”

YACITWA TOERA KUPHEDZA BASA YAKUMWAZA MPHANGWA MU CIJAPAU

Thangwi yanji bukhu ineyi ya Bhibhlya mbidaphedza kakamwe basa yakumwaza mphangwa mu Cijapau? Maseze anthu azinji ku Japau nee asadziwa mwadidi Bhibhlya, iwo ali na cifuno ca kuileri. Bukhu ineyi ya Evanjelyu ya Mateo inadzaphedza ale akuti cipo aona Bhibhlya toera kukhala na khundu ibodzi ya Bhibhlya na kuileri.

Thangwi yanji yasankhulwa bukhu ya Mateo? Kwa anthu azinji a ku Japau, fala yakuti “Bhibhlya” isaakumbusa pya Yezu Kristu. Natenepa, bukhu ya Mateo yasankhulwa thangwi iyo iri na ndandanda wa makolo a Yezu, Nkhani yace yakudziwika kakamwe ya Paphiri, na profesiya idalonga iye thangwi ya ntsiku zakumalisa. Mphangwa zenezi zinadzakhuya anthu azinji ku Japau.

Mwaphinga, amwazi mphangwa ku Japau atoma kugawira bukhu ineyi nyumba na nyumba na kucita maulendo akubwereza. Mulongo unango alemba: “Cincino ndiri na miyai mizinji toera kugawira Mafala a Mulungu kwa anthu a mu cisa cathu. Mwandimomwene, ndakwanisa kugawira bukhu ibodzi ya Mateo pa maulo a ntsiku ya nsonkhano wakupambulika!”

KODI IYO YAKHUYA TANI ALE ADAITAMBIRA?

Kodi amwazi mphangwa asaphatisira tani bukhu ya Mateo? Anthu azinji ku Japau asadziwa mafala ninga awa: ‘Nsuwo wakucepa,’ ‘kuponya miyala ya ntengo ukulu pana nkhumba,’ na ‘lekani kudzudzumika thangwi ya ntsiku ya mangwana.’ (Mat. 6:34; 7:6, 13) Iwo asadzuma angadziwa kuti mafala anewa ndi a Yezu Kristu. Azinji angaona mafala anewa mu Evanjelyu ya Mateo asalonga: “Ndzidzi onsene, ndikhafuna kakamwe kukhalambo na mwai wakuleri Bhibhlya.”

Amwazi mphangwa angacita ulendo wakubwereza kwa ale adatawira bukhu ya Mateo, kazinji kene anaciro nyumba asalonga kuti aleri mwakucimbiza bukhu yonsene peno khundu ibodzi. Mamuna unango wa pyaka 60 pyakubalwa apanga m’mwazi mphangwa unango: “Ndaileri yonsene kazinji kene, iyo ndi yakuwangisa kakamwe. Ndaphata miyendo, ndipfundziseni mphangwa zakuthimizirika za Bhibhlya.”

Bukhu ya Mateo ikugawirwa pakupereka umboni m’mbuto zapakweca. Mukhacita iye basa ineyi, Mulongo unango apereka e-mail yace kuna ntsikana unango adatawira bukhu ya Mateo. Mudapita ndzidzi ubodzi, ntsikana atumiza mphangwa kuna mulongo mbalonga kuti aleri khundu ya bukhu ineyi ya Bhibhlya, pontho akhafuna kudziwa pizinji. Mudapita sumana ibodzi, ntsikana unoyu atoma kupfundza Bhibhlya, mwakukhonda dembuka iye atoma kugumanika pa misonkhano.

Makopya akupiringana 1.600.000 a bukhu A Bíblia​—O Evangelho Segundo Mateus atumizwa m’mipingo ku Japau. Mu nthanda ibodzi na ibodzi, Mboni za Yahova zisagawira pikwi na pikwi pya bukhu ineyi. Mafala akutoma a bukhu ineyi asapangiza mabvero a asasanyi a bukhu ineyi: “Tisadikhira na ntima onsene kuti kuleri kwanu bukhu iyi kunadzakulisa kufuna kwanu Bhibhlya.”