KUCEDZA NA NYAKUENDEKANA

Thangwi Yanji Tisafunika Kukumbukira Kufa Kwa Yezu?

Mafala anatowerera ndi kucedza kwakuti m’bodzi wa Mboni za Yahova anakwanisa kukhala nako na nyakuendekana wace. Tendeni tinyerezere kuti Mboni dzinace ndi Magi asacedza panyumba na nkazi anacemerwa Sara.

‘IPI PICITENI TOERA MUNDIKUMBUKIRE’

Magi: Muli tani mai Sara. Pikhali pyakutsandzayisa kakamwe kukuonani sumana idamala pa Cikumbuso ca kufa kwa Yezu Kristu.a Mwakomerwa na nsonkhano unoyu?

Sara: Ndakomerwa kugumanika pa nsonkhano unoyu, mbwenye kulonga mwandimomwene, nee ndabvesesa pyonsene pidalongwa. Ndikhadziwa kuti anthu asakumbukira kubalwa kwa Yezu pa Khisimisi na kulamuswa kwace muli akufa pa Paskwa, mbwenye cipo ndabva pya kukumbukira kufa kwace.

Magi: Ndimomwene, Khisimisi na Paskwa ndi maphwando anacitwa na anthu azinji pa dziko yonsene yapantsi. Mbwenye Mboni za Yahova zisaona kuti mphyakufunika kakamwe kukumbukira kufa kwa Yezu. Khala muli na mphindi zingasi, mbidakhala wakutsandzaya kudinga mathangwi ace.

Sara: Nkhabe pinthu, ndiri na ndzidzi pang’ono.

Magi: Mwandimomwene, Mboni za Yahova zisakumbukira kufa kwa Yezu thangwi iye apfundzisa atowereri ace toera kucita pyenepi. Onani kuti ninji pidacitika ntsiku inango namasiku Yezu mbadzati kufa. Kodi musakumbuka thangwi ya cakudya cakupambulika cidadya iye pabodzi na atowereri ace akukhulupirika?

Sara: Musafuna kulonga Paskwa Yakumalisa?

Magi: Inde. Isacemerwambo Cakudya Cancidodo ca Mbuya. Mukhadya iwo, Yezu apereka pitsogolero pyakubveka kuna atowereri ace. Kodi munakwanisa kuleri mafalace anagumanika apa pa Luka 22:19?

Sara: Inde. ‘Akwatambo nkate, alonga maphembero akucita takhuta, aumenya mbaapasa mbati: ‘Awa ndi manungo anga anadzaperekwa thangwi ya imwe. Ipi piciteni toera mundikumbukire.’’

Magi: Takhuta. Onani pitsogolero pya Yezu m’mafala akumalisa a vesi ineyi: ‘Ipi piciteni toera mundikumbukire.’ Pontho mbadzati kupfundzisa atowereri ace toera kunkumbukira, Yezu abvekesa kuti mbadankumbukira tani. Iye alonga kuti umaso wace mbudaperekwa thangwi ya atowereri ace. Yezu afokotoza mabvero ace mwakulandana na mafala anagumanika pa Mateo 20:28. Vesi ineyi isalonga tepa: ‘Mwana wa munthu hadadza tayu toera kutumikirwa mbwenye kudzatumikira mbapereka umaso wace toera kuombola anthu azinji.’ Mwacigwagwa, ndi pyenepi pinacitisa Mboni za Yahova kugumanyikana pyaka pyonsene pa Cikumbuso ca kufa kwa Yezu​—toera kukumbukira ntsembe yaciomboli cidapereka iye. Kufa kwace kunakwanisa kucitisa anthu onsene akubvera kukhala na umaso.

THANGWI YANJI CIOMBOLI CIKHAFUNIKA?

Sara: Ndikhabva anthu mbakalonga kuti Yezu afa toera tikwanise kukhala na umaso. Mbwenye kulonga mwandimomwene, nee ndisapibvesesa kuti pisakwanisika tani pyenepi.

Magi: Nee ndimwe mwekha. Mafala akuti ntsembe yaciomboli ca Yezu ndi akunentsa kuabvesesa. Mbwenye ndi undimomwene wakufunika kakamwe wa m’Mafala a Mulungu. Kodi muli na ndzidzi pang’ono?

Sara: Inde.

Magi: Takhuta. Ndaleri nsolo unalonga pya ciomboli, natenepa ndinayesera kukufokotozerani munjira yakukhonda nentsa.

Sara: Mphyadidi.

Magi: Toera kubvesesa ciomboli, pakutoma tisafunika kubvesesa makhaliro a Adhamu na Eva mudadawa iwo m’munda mwa Edeni. Toera kutiphedza kupibvesesa, tendeni tileri pabodzi Aroma 6:23. Munakwanisa kuleri vesi ineyi?

Sara: Nkhabe pinthu. Isalonga tepa: ‘Madawo anapasa anthu kufa mbwenye pinapasa Mulungu ndi umaso wakukhonda mala mwa Kristu Yezu Mbuyathu.’

Magi: Takhuta. Tendeni tidinge mafala anewa. Pakutoma, onani mafala akutoma a vesi: ‘Madawo anapasa anthu kufa.’ Unoyu ndi ntemo ukhadakhazikisa Mulungu pakutoma kwa mbiri ya anthu​—madawo asabala kufa. Mwandimomwene, pakutoma nee m’bodzi akhadadawa. Adhamu na Eva akhadacitwa aungwiro, pontho mbeu yawo mbidabalwambo yaungwiro. Natenepa, nee pakhali thangwi toera anthu afe. Adhamu na Eva pabodzi na anawo akhali na cidikhiro cakutsandzaya na umaso wakukhonda mala. Mbwenye ninga tisadziwa, pinthu nee pyacitika munjira ineyi, si tenepo tayu?

Sara: Inde. Adhamu na Eva adya nsapo udakhondeswa iwo.

Magi: Ndimomwene. Pontho pidadya​—Adhamu na Eva asankhula kukhonda bvera Mulungu​—iwo adawa. Natenepa, asankhula kukhala akusowa ungwiro mbakhala anyakudawa. Cisankhulo ceneci mbacidabweresa nkandzo, tayu basi kuna Adhamu na Eva, mbwenye kuna mbeu yonsene.

Sara: Musafuna kulonganji?

Magi: Mphyadidi panango ndiphatisire citsandzo. Kodi musadziwa kuphika bholo?

Sara: Inde! Ndisadziwa.

Magi: Tinyerezere kuti muli na forma ipswa yakuphikira mabholo. Mbwenye mbamudzati kuiphatisira, yagwa pantsi mbibofoka. Natenepa, ninji pinafuna kudzacitika na mabholo anaphikirwa mwenemu? Nee anabulukambo akubofoka?

Sara: Inde.

Magi: Munjira ibodzi ene, mudasankhula Adhamu na Eva kukhonda bvera Mulungu, iwo adzakhala “akubofoka,” peno akukhonda kukwana, thangwi ya madawo na kusowa ungwiro. Nakuti iwo adawa mbadzati kukhala na ana, anawo onsene abalwambo na nkandzo ubodzi ene wa madawo. M’Bhibhlya, fala yakuti “madawo” nee isabveka basi ene ncitiro, mbwenye isabvekambo n’khaliro wakubalwa nawo. Maseze imwe na ine nee tacita pinthu pyakuipa​—thangwi ife nee tikhadzati balwa mudadawa Adhamu na Eva​—athaphulisa ife na mbeu zace zonsene za ntsogolo madawo na umaso wakusowa ungwiro wakuti usamalisira na kufa. Ninga pidaleri ife pa Aroma 6:23, madawo anapasa anthu kufa.

Sara: Ndi pyakutsukwalisa kakamwe. Thangwi yanji anthu onsene asathabuka na madawo a Adhamu na Eva kwenda na kwenda?

Magi: Ndimomwene​—mphyakutsukwalisa. Mbwenye pana pizinji piringana pyenepi. Thangwi ya ulungami wace waungwiro, Mulungu atonga kuti Adhamu na Eva afe thangwi ya madawo awo, mbwenye ife ninga mbeu zawo tapaswa cidikhiro. Mulungu acita masasanyiro kwa ife toera kutipulumusa mu nkandzo unoyu. Masasanyiro anewa ndi ntsembe yaciomboli ca kufa kwa Yezu. Onani pontho pa Aroma 6:23. Pakumala kulonga kuti ‘madawo anapasa anthu kufa,’ vesi isapitiriza kulonga: ‘Mbwenye pinapasa Mulungu ndi umaso wakukhonda mala mwa Kristu Yezu Mbuyathu.’ Natenepa, kufa kwa Yezu kwafungula njira kwa ife toera kutipulumusa ku madawo na kufa.b

CIOMBOLI​—MUONI UKULU KAKAMWE WA MULUNGU

Magi: Pa vesi ineyi pana mafala anango akuti ndisafuna kukufokotozerani.

Sara: Ndi mafala api?

Magi: Ndi mafala awa: ‘Pinapasa Mulungu ndi umaso wakukhonda mala mwa Kristu Yezu Mbuyathu.’ Mphapo, khala Yezu ndiye adathabuka na kufa thangwi ya ife, kupereka umaso wace thangwi ya ife, thangwi yanji vesi ineyi isalonga ciomboli ninga ‘muoni unapereka Mulungu, tayu muoni unapereka Yezu’?c

Sara: Hum. Nkhabe kupidziwa.

Magi: Mulungu acita Adhamu na Eva, pontho ndiwo adadawira Mulungu pakukhonda bvera kwawo m’munda mwa Edeni. Iye abva kupha kakamwe muntima mwace mu ndzidzi udadawa anthu anewa awiri akutoma. Mbwenye Yahova acita pinthu mwakucimbiza.d Iye acita masasanyiro akuti m’bodzi wa anace auzimu abwere pa dziko yapantsi ninga munthu waungwiro, mbamalisira na kupereka umaso wace ninga ntsembe yaciomboli. Natenepa, masasanyiro onsene a ciomboli akhali muoni wa Mulungu. Pana njira inango inapangiza kuti ciomboli cikhali muoni wa Mulungu. Kodi mwanyerezera kale kuti Mulungu apibva tani mudasiya iye Yezu kuphiwa?

Sara: Cipo ndanyerezera.

Magi: Ndikuona mabhoneka pacintalo canu. Nkhupangiza kuti muli na ana.

Sara: Inde, ndiri nawo awiri​—m’phale na ntsikana.

Magi: Ninga nyakubala, nyerezerani kuti Baba wakudzulu wa Yezu, Yahova Mulungu, apibva tani pa ntsiku ya kufa kwa Yezu. Ndisafuna kulonga kuti, apibva tani kubulukira kudzulu pikhaona iye Mwanace wakufunika mbamangwa, kutikanwa na kumenywa? Pontho apibva tani mukhakhomerwa Mwanace pa muti mbasiyiwa penepo mpaka kufa ninga nsumankha?

Sara: Iye abva kupha kakamwe. Cipo ndanyerezera pyenepi!

Magi: Mwandimomwene, mphyakunentsa kwa ife kulonga kuti Mulungu apibva tani pa ntsiku ineyi. Mbwenye tisadziwa kuti iye abva kupha na tisadziwambo kuti thangwi yanji alekerera pinthu pyenepi kucitika. Pisafokotozwa mwakubveka mu lemba yakudziwika kakamwe ya Jwau 3:16. Munakwanisa kuleri lemba ineyi?

Sara: Nkhabe pinthu. Isalonga tepa: “Mulungu afuna pikulu pyene dziko yapantsi, mbapereka Mwanace m’bodzi ekha toera munthu onsene anankhulupira, akhonde kufudzwa, mbwenye aone umaso wakukhaliratu.”

Magi: Takhuta. Onani pontho mafala akutoma a vesi ineyi. Asalonga kuti: “Mulungu afuna pikulu pyene dziko yapantsi.” Ntsonga ndi iyi​—ufuni. Ufuni wacitisa Mulungu kutuma Mwanace pa dziko yapantsi toera kutifera. Mwandimomwene, ntsembe yaciomboli ndi cipangizo cikulu kakamwe ca ufuni wa Mulungu kwa ife. Ndi pyenepi pinacitisa Mboni za Yahova kugumanyikana pyaka pyonsene toera kukumbukira kufa kwa Yezu. Mwaphedzeka na kucedza kwathu?

Sara: Inde, mwandiphedza kakamwe. Takhuta na kumala kwanu ndzidzi uzinji mbamundipanga pyenepi.

Kodi musafuna kudziwa pyakuthimizirika thangwi ya Bhibhlya? Musafuna kudziwa misambo na pinakhulupira Mboni za Yahova? Khala ndi tenepo, khalani wakusudzuka toera kubvundza m’bodzi wa Mboni za Yahova. Iye anadzakhala wakutsandzaya kudinga pabodzi na imwe ntsonga zenezi.

[Pidzindikiro pyapantsi]

[Ntsonga ikulu pa tsamba 13]

Ntsembe yaciomboli ndi cipangizo cikulu kakamwe ca ufuni wa Mulungu kwa ife