BHIBHLYA ISACINJA UMASO WA ANTHU
Ndikhanyerezera Kuti Ndiri Kutsandzaya Na Umaso
Yakulongwa na Pawel Pyzara
CAKA CAKUBALWA: 1982
DZIKO YAKUBALWA: POLONIYA
MBIRI: KUSAKA BASA YA MBIRI, KUMWA MITOMBWE YAKULEDZERESA NA KUCITA UPHANGA
MBIRI YANGA: Ndabalwa mu nzinda ung’ono wa Poloniya, cifupi na madire a Alemanya. Ndikhali wakutsandzaya kakamwe thangwi nzinda unoyu ukhali wakuzungulirwa na maminda pontho misitu. Anyakubalanga andiwangisa toera kukhala na umaso wadidi, kupembera kuxikola na kusaka basa ya mbiri.
Nyatwa zanga zatoma mudaenda ine kapfundza pya mwambo ku universidade mu nzinda wa Wrocław. Nakuti kukhali kutali na anyakubalanga, ndasankhula axamwali akuipa. Ndzidzi onsene ndikhakomerwa na masendzekero a bhola, mbwenye thangwi ya axamwali, ndadzakhala nyakuphedzera wankulu. Nsoka ukhakomerwa na ine ukhali wa ku Varsóvia, pontho pakumala kwa sumana ndikhaatowerera konsene kukhaenda iwo kagwa bhola. M’maulendo anewa tikhaledzera kakamwe, kuphatisira mitombwe yakuledzeresa, pontho midzidzi inango tikhamenyana na anyakuphedzera a nsoka unango. Ndikhaona pyenepi ninga njira toera kupungula nyatwa zanga za ntsiku na ntsiku, maseze ndikhadziwa kuti kumangwa na apolixa mbakudandiluzisa kupfundza pya mwambo.
Ine na axamwali anga tikhakomerwa kuenda mbuto zinaimba na zinabvina anthu. Kweneko, kazinji kene tikhamenyana. Ndamangwa maulendo mazinji na apolixa, mbwenye ndikhaphatisira mwambo toera kutuna miseru inango, pontho midzidzi inango ndikhadyekera. Mwandimomwene ndikhanyerezera kuti ndiri kutsandzaya na umaso. Ngakhale tenepo, pantsi pa ntima ndikhadziwa kuti pikhacita ine pikhali pyakuipa. Madimingu onsene ndikhaenda ku gereja toera kukhurudza cikumbuntima canga.
BHIBHLYA YACINJA TANI UMASO WANGA: Mu caka 2004, Mboni za Yahova ziwiri zafika pa nyumba panga, mbanditawira kucedza nawo thangwi ya Bhibhlya. Mudapfundza ine kuti kukhala Nkristu wandimomwene kusabvekanji, cikumbuntima canga catoma kundithabusa kakamwe. Ndadziwa kuti ndikhafunika kusiya kuledzera, kuphatisira mitombwe yakuledzeresa na axamwali akuipa akuti umaso wawo nee ukhabverana na midida ya Bhibhlya. Ndaonambo kuti ndikhafunika kucinja makhaliro anga aukali na auphanga. Maseze ndikhadziwa kuti ndikhafunika kucinja, ndikhapitiriza kucita pyakuipa.
Ntsiku inango na masiku, ndacinja manyerezero mudamenyana ine na amuna asere. Ndisakumbuka kuti andigwisa mu nseu, mbandimenya na kundibhutsula mu nsolo. Mudabva ine kuti ndikhali cifupi na kufa, ndaphembera: “Ndilekerereni Yahova, thangwi yakukhonda kuphatisira Mafalanu. Ndingapulumuka, ndikupikira kuti ndinapfundza Bhibhlya na Mboni za Yahova, pontho ndinacinja umaso wanga.” Mwakudzumatirisa, ndapulumukadi. Ndakwanirisa pikiro yanga ya kupfundza Bhibhlya.
Mu caka 2006, ndaenda ku Inglatera. Cifuno canga cikhali kuwina kobiri yakukwana toera ndibwerere ku Poloniya kapfundza mabukhu makulu a pya mwambo. Mukhapitiriza ine kupfundza Bhibhlya, lemba inango yandikhuya kakamwe. Mpostolo Paulu alemba: ‘Ande ndinanyerezera kuti pinango pyonsene mphyapezi ndingapilandanisa na mpfuma ikulu kakamwe ya kudziwa Kristu, Mbuya wanga. Thangwi ya Kristu ine ndasiya pyonsene mbandipiona ninga khuku toera ndiwine Kristu.’ (Afilipi 3:8) Ninga ine, mpostolo Paulu akhadapfundziswa pya mwambo, pontho iye akhalimbo phanga. (Machitiro 8:3) Ngakhale tenepo iye adzindikira kuti umaso wadidi ukhali: kutumikira Mulungu na kucita pinakwanisa iye toera kutowezera Yezu. Mudanyerezera ine mwacidikhodikho citsandzo ca Paulu, ndadzindikira kuti basa ya mbiri na uphanga nee pikhali njira ya kutsandzaya kwandimomwene. Ndakhulupira kuti khala Paulu acinja, ine ndinakwanisambo kucinja. Natenepa, ndatonga kukhala ku Inglatera mbandisiya kusaka kupfundza mabukhu makulu a pya mwambo.
Mukhapfundza ine pizinji thangwi ya Yahova, ndikhapibva kukhala cifupi kakamwe na iye. Ndakhuyiwa na pikiro yace yakulekerera ale anafuna kucinja na ntima onsene. (Machitiro 2:38) Pontho, mudanyerezera ine mwacidikhodikho lemba ya 1 Jwau 4:16, inalonga kuti ‘Mulungu ndi ufuni,’ ndatoma kudzindikira thangwi inacitisa Mulungu kuida uphanga.
Ndakhalambo wakudzumatirwa na makhaliro a Mboni za Yahova. Pyandipangiziratu kuti iwo asawangisira toera kukhala maso mwakubverana na midida yapadzulu ya Bhibhlya. Ndikhafuna kucita khundu ya ubale wakutsandzaya wapadziko yonsene uli na iwo. Pakumala kuwangisira na kucita macinjo mu umaso wanga, ndabatizwa ninga m’bodzi wa Mboni za Yahova mu caka 2008.
NDAPHINDULA TANI: Bhibhlya yandiphedza kusiya kusirira, uphanga, kuphatisira mitombwe yakuledzeresa, kuledzera, kuphedzera kakamwe bhola, kudza ntumiki wa Mulungu wakuti asakomerwa kupfundzisa anango Bhibhlya. Ndisapitiriza kuona bhola, mbwenye ndiri wakutonga kuikha masendzekero anewa pa mbuto yawo yakuthema.
Ndiri wakukomerwa kakamwe kumanga banja na Esther, nkazi wadidi wakulambira Yahova. Tisatsandzaya kakamwe kupfundzisa Bhibhlya anthu analonga Cipoloniya kuno kumulolo kwa Inglatera. Ndi ulendo wakutoma mu umaso wanga, kupibva wakutsandzaya mwandimomwene. Ndiri na cikumbuntima cakucena, pontho umaso wakuphindulisa.
[Ntsonga ikulu pa tsamba 11]
Ndikhafuna kucita khundu ya ubale wakutsandzaya wapadziko yonsene uli na Mboni za Yahova