Yahova Asakomerwa na “Ameni” Wanu

YAHOVA asakomerwa tingamulambira. Iye ‘asabvesera’ atumiki ace, pontho asakomerwa na kuwangisira konsene kunacita iwo toera kunsimba. (Mal. 3:16) Mwacitsandzo, nyerezerani fala yakuti kazinji kene tisailonga. Fala yakuti “ameni.” Kodi Yahova asakomerwa na fala ineyi yakukhonda nentsa? Inde, iye asakomerwa nayo. Toera kudziwa kuti thangwi yanji iye asakomerwa nayo, tendeni tione kuti fala ineyi isabvekanji, pontho isaphatisirwa tani m’Bhibhlya.

‘ANTHU ONSENE ANADZATAWIRA, AMENI!’

Mu cingerezi fala yakuti “ameni” isabveka “ndimomwene,” peno “mbipicitike.” Fala ineyi yabulukira ku Cihebheri yakuti isabveka “wakukhulupirika,” peno “wakunyindirika.” Midzidzi inango fala ineyi ikhaphatisirwa pakutonga miseru. Munthu angacita pikiro akhamalisira na fala yakuti “ameni” toera kupangiza kuti pidalonga iye ndi pyandimomwene, pontho anatawira pyonsene pinafuna kucitika. (Num. 5:22) Munthu angalonga fala yakuti “ameni” iye akhakulumizika toera kukwanirisa pikiro yace.—Neh. 5:13.

Citsandzo cadidi kakamwe cakuphatisira fala yakuti “ameni” cisagumanika m’bukhu ya Deuteronomyo kapitulu 27. Pidamala Aizraeli kupita mu Dziko Yakupikirwa, iwo akhafunika kugumanyikana pakati Paphiri ya Ebhali na ya Jerizimu toera kubva pontho Mwambo. Pa mbuto ineyi, iwo nee akhafunika basi ene kubvesera Mwambo, mbwenye akhafunikambo kuutawira. Iwo mbadacita pyenepi mukulonga “Ameni!” mu ndzidzi ukhapangwa iwo pikhafuna kucitika angakhonda kubvera. (Deut. 27:15-26) Nyerezerani dzumbi ya pikwi na pikwi pya amuna, akazi na anapiana mbakatawira. (Yos. 8:30-35) Nkhabe anaduwala mafala adalonga iwo ntsiku ineyi. Pontho iwo akwanirisa mafala awo, thangwi Bhibhlya isalonga: ‘Aizraeli apitiriza kutumikira Yahova mu ntsiku zonsene za umaso wa Yoswa na mu ntsiku zonsene za umaso wa akulu adapitiriza kukhala maso pidafa Yoswa, pontho akuti aona pyonsene pidacita Yahova kuna Aizraeli.’—Yos. 24:31.

Yezu aphatisirambo fala yakuti “ameni” toera kupangiza kunyindirika kwa mafalace, mbwenye iye aiphatisira munjira yadidi. M’mbuto mwakuphatisira fala ineyi toera kutawira, iye aphatisira fala yakuti “ameni” (ingathumburuzwa mu Cingerezi isabveka “ndimomwene”) mbadzati kulonga ntsonga yakufunika. Midzidzi inango iye akhabwerezera fala ineyi, mukulonga “ameni ameni.” (Mat. 5:18; Juw. 1:51) Munjira ineyi iye akhapasa cinyindiro anyakubvesera ace kuti mafalace anakwanirisika. Yezu akhalonga na cinyindiro ceneci consene thangwi ndiye adapaswa utongi wakukwanirisa mapikiro onsene a Mulungu.—2 Akor. 1:20; Apok. 3:14.

‘ANTHU ALONGA AMENI, MBASIMBA YAHOVA’

Aizraeli aphatisirambo fala yakuti “ameni” mu ndzidzi ukhacita iwo phembero na kusimba Yahova. (Neh. 8:6; Masal. 41:13) Kucita kwawo “ameni” kunkhomo kwa phembero kukhapangiza kuti atawira pidalongwa mu phembero. Munjira ineyi, onsene akhakwanisambo kucita khundu yakulambira Yahova. Pyenepi ndi pidacitika mu ndzidzi udabweresa mambo Dhavidhi Bokosi ya Cibverano mu Yerusalemu. Mu ndzidzi wa phwando idatowera, iye acita phembero ninga akuimba nyimbo, phembero ineyi isagumanika pa 1 Pya dziko ya Israele 16:8-36. ‘Anthu onsene akhali penepo alonga Ameni, mbasimba Yahova’ thangwi akhuyiwa kakamwe na mafalace. Inde, iwo atsandzaya kakamwe thangwi yakulambira Yahova pabodzi pene.

Akristu a mu ndzidzi wa apostolo aphatisirambo fala yakuti “ameni” pakusimba Yahova. Anyakulemba Bhibhlya kazinji kene aphatisirambo fala ineyi m’matsamba awo. (Aroma 1:25; 16:27; 1 Ped. 4:11) Bukhu ya Apokalipse isalonga pya aanju kudzulu mbakasimba Yahova mukulonga: “Ameni! Simbani Yahova!” (Apok. 19:1, 4) Kazinji kene akristu akutoma akhacita “ameni” kunkhomo kwa phembero ikhacitwa pa misonkhano yawo. (1 Akor. 14:16) Mbwenye “ameni” wawo nee akhafunika kukhala waciphamaso.

THANGWI YANJI “AMENI” WANU NDI WAKUFUNIKA

Pakumala kupfundza kuti atumiki akale a Yahova akhaphatisira tani fala yakuti “ameni,” cincino tinaona kuti thangwi yanji mphyakufunikambo kwa ife kucita ameni kunkhomo kwa phembero. Tingacita ameni kunkhomo kwa phembero yathu, tisapangiza kuti pidalonga ife ndi pyandimomwene. Ingacitwa phembero pa mwinji ife mbiticitambo “ameni,” ngakhale mwakukhonda bveka, tisapangiza kuti tisaphedzera pidalongwa. Onani kuti thangwi yanji “ameni” wanu ndi wakufunika.

Toera kupangiza kuti tikhabvesera pikhalongwa mu phembero. Ife tisalambira Yahova mu ndzidzi wa phembero tayu basi kubulukira ku pinthu pinalonga ife, mbwenye kubulukira munjira inabvesera ife. Nakuti tisafuna kuti “ameni” wathu akhale wandimomwene, tisafunika kubvesera phembero mwacidikhodikho.

Tisakhala akuphatana ninga alambiri. Phembero inacitwa pa mwinji isagomezera pinthu pyakuti mpingo usafuna kupibva. (Mabasa 1:14; 12:5) Tingacita ameni mwakugaluza pabodzi na abale na alongo athu, tisakhala akuphatana kakamwe. Peno ticite ameni mwakugaluza peno mwakukhonda bveka, “ameni” wathu asacitisa Yahova kutipasa pidaphemba ife.

Alongo akotamisa misolo yawo mu ndzidzi unacitwa phembero, mulongo unango akubvesera misonkhano mu ntokodzi — “Ameni” wathu asaphedzera toera Yahova asimbwe

Toera kusimba Yahova. Yahova asaona pyonsene pinacita ife toera kumulambira. (Luka 21:2, 3) Iye asadziwa pifuno pyathu na piri muntima mwathu. Maseze tiphatisire ntokodzi toera kubvesera nsonkhano, “ameni” wathu ndi wakufunika basi kuna Yahova. Ameni wathu asaphedzera toera kusimba Yahova.

Panango “ameni” wathu anaoneka ninga wakukhonda kufunika, mbwenye ndi wakufunika kakamwe. Enciclopédia bíblica yalonga: “Thangwi yakuphatisira fala ineyi ibodzi,” atumiki a Mulungu anakwanisa kulonga na “cinyindiro consene pya cidikhiro cawo ca ntsogolo na uxamwali wawo na Yahova.” Natenepa, tendeni tikumbuke kuti “ameni” wathu asasimba Yahova.—Masal. 19:14.

Kodi Ndzidzi Onsene Musafunika Kucita “Ameni”?

“Ameni” ndi fala yakufunika kakamwe. Mphapo ndiye tani khala anacita phembero alonga mafala akuphonyeka? Kodi tisafunika kucalira kucita “ameni”? Si midzidzi yonsene tayu. Yahova asadziwa kuti m’midzidzi inango tonsene tisalonga pinthu pyakuphonyeka, pontho iye asatilekerera. Natenepa, m’mbuto mwakufambira nduli fala ibodzi na ibodzi inalongwa m’phembero, mphyadidi kubvesera ntsonga ikulu toera kunkhomo tikwanise kucita “ameni.”

Mbwenye anthu akuti nkhabe khulupira angacita phembero, ife nkhabe funika kucita “ameni,” nee mwakugaluza nee na muntima. Mphapo ndiye tani khala mu ndzidzi unacita iwo phembero ife tiri penepo? Mwacitsandzo, nyerezerani kuti tiri pabodzi na anthu akuti nkhabe khulupira Mulungu, mbwenye m’bodzi wa iwo aphembwa toera acite phembero. Peno tiri m’banja yakuti anyakubalathu nee ndi Mboni za Yahova, natenepa nsolo wa banja wakuti nee ndi Mboni atonga kucita phembero. Tinacitanji?

Tingagumanika pa mbuto ninga zenezi, mwacilemedzo tisafunika kumatama. Ife nee tisafunika kucita “ameni,” peno kuphatana manja nkati mwa phembero, thangwi pyenepi mbipidapangiza kuti tikuphedzerambo phembero. Panango tinacita phembero yathu yamuntima, mbwenye tisafunika kucalira kucita “ameni” mwakubveka, toera tikhonde kucitisa anango kunyerezera kuti tikucitambo khundu mu phembero yawo. Iwo angalimira, ife tinasankhula kulimirambo peno nkhabe. Kulamusa nsolo peno kuukotamisa basi, nee kusacita khundu yaulambiri. Akristu onsene asafunika kucita cisankhulo cawo kukhundu ineyi, pontho nkhabe munthu asafunika kusandika ndzace thangwi ya pyenepi.

Pidapfundza ife padzulu apa, pisapangiza kuti thangwi yanji “ameni” wathu ndi wakufunika kakamwe kuna Yahova.