Sakani Miyai Towera Kumwaza Mphangwa

¹ Mpingo Wacikristu usacitwa na anthu a makhaliro akusiyana-siyana. Ngakhale tenepa, tiri akuphatana m’kusankhula kwathu kulemedza Yahova. (Sal. 79:13) Kodi tinakwanisa tani kusaka miyai ya kumwaza mphangwa, khala ungumi wathu ndi wakufewa peno makhaliro anango akunensa asatipingiza kumwaza mphangwa zadidi?

² M’pyakucita Pya Ntsiku Na Ntsiku: Yezu abanza nzidzi onsene ukakhala iye na anthu towera kupereka umboni. Iye alonga na Mateo mukhapita iye na pa nyumba ya kupimira misonkho, alonga na Zakeu mukhacita iye ulendo na alongambo na nkazi wa ku Samariya mukhapuma iye. (Mat. 9:9; Luka 19:1-5; Jwau 4:6-10) M’pyakucita pyathu pya ntsiku na ntsiku, tingakwanisembo kupereka umboni kwa anthu onsene anaceza na ife. M’kukhala na Biblya, pabodzi na matsamba peno mabruxura, pinadzatiwangisa kukhala dzololo towera kulonga pya cidikhiro cathu.—1 Ped. 3:15.

³ Kodi musacimwana kupereka umboni wa nyumba na nyumba na thangwi ya kukhonda kwanisa kufamba? Sakani miyai ya kupereka umboni kwa anyabasa a m’nyumba ya ungumi anakukonzani na ale anadzakuonani. (Mach. 28:30, 31) Khala musacimwana kazinji kene kubuluka panyumba, kodi mwatoma kuyesera kupereka umboni na ntokodzi peno na tsamba? Mulongo unango ana nsambo wa kulembera acibale ace okhonda khala Amboni. Iye asaphataniza manyerezero akuwangisa a Biblya na pinagumanikana na iye m’kumwaza mphangwa.

⁴ Ku Xikola Peno Ku Basa: Cifuno cathu ca kulemedza Yahova cinadzaticitisambo kusaka miyai ya kudzwala mbeu za undimomwene ku xikola peno ku basa. Mmwazi mphangwa unango wa piaka pisere pyakubalwa agawana na turma yace pidaleri iye m’Despertai! pinalonga thangwi ya mwezi. Pakumala kudziwa kudagumana iye mphangwa zenezi, mpfunzisi wace atoma kutambira A Sentinela na Despertai! mokhonda phonya. Pa mbuto ya basa, kusiya kwathu basi pakweca bukhu yakuti Biblya Isapfunzisanji panango kungakwanise kusosa mabvunzo akutipasa mwai wa kupereka umboni.

⁵ Kodi mungakwanise kunyerezera njira za kugumana miyai towera kumwaza mphangwa m’pyakucita pyanu pya ntsiku na ntsiku? M’kubanza makhaliro athu, tingakwanise ntsiku na ntsiku ‘kupereka kuna Mulungu ntsembe ya kunsimba.’—Aheb. 13:15.