Bandzani Miyai Yanu Toera Kumwaza Mphangwa Za Umambo!
1. Tisapfundzanji kubulukira ku citsandzo ca Dhavidhi?
1 Mambo Dhavidhi ndi munthu wakuti nee atawirisa kuti makhaliro ace ampingize. Mwacitsandzo, Dhavidhi akhafuna kumanga nyumba ya Yahova. Mudakhondeswa iye kucita pyenepi, Dhavidhi acinja pifuno pyace mbaphedza kugumanya pinthu toera Salomoni amange templo. (1 Am. 8:17-19; 1 Pya dziko. 29:3-9) Mbuto mwakunyerezera kucita pinthu pyakuti nee mbadapikwanisa, Dhavidhi aikha manyerezero ace ku pinthu pyakuti mbadakwanisa kupicita. Tinasangizira tani citsandzo ca Dhavidhi mu ndzidzi unasaka ife miyai toera kumwaza mphangwa za Umambo?
2. Ninji pisafunika ife kudinga?
2 Citani Pinakwanisa Imwe: Azinji asalulupisa umaso wawo toera kutumikira ninga apainiya akuphedza peno a ndzidzi onsene. (Mat. 6:22) Munakwanisambo kukhala m’bodzi wa iwo? Mungacita phembero na kudinga makhaliro anu, panango munaona kuti ‘nsuwo ukulu toera kucita mabasa’ uli wakufunguka kwa imwe. Mungaona pyenepi, bandzani mwai unoyu!—1 Akor. 16:8, 9.
3. Khala makhaliro athu nkhabe kutitawirisa kutumikira ninga apainiya, ndi miyai ipi iri na ife toera kupereka umboni?
3 Mphapo, ndiye tani khala makhaliro anu asakupingizani kutumikira ninga mpainiya? Phatisirani miyai inango iri na imwe. Mwacitsandzo, khala kubasa kwanu musaonana na anthu azinji akukhonda khulupira, thangwi yanji nkhabe bandza mwai unoyu toera kupereka umboni? Khala musathimbana na nyatwa za ungumi, munakwanisa kubandza mwai toera kupereka umboni kwa ale anatsalakana ungumi wanu? Kumbukani kuti pana masasanyiro akuti ale anacimwana kucita pizinji thangwi ya kugwesera peno nyatwa ikulu ya ungumi, anakwanisa kupereka mphindi 15 pa nthanda. Pakulemba lipoti yanu ya basa ya m’munda pa nthanda, lekani kuduwala ndzidzi unaphatisira imwe pakupereka umboni wantsusukano, mabukhu anagawira imwe, kuphatanizambo matratado na micemerero ya Cikumbuso na ya nsonkhano wa gawo. Panango imwe munadzuma kuona kuti mwakucimbiza ndzidzi unaphatisira imwe m’miyai ineyi yakucepa ukuthimizirika!
4. Kodi muli wakutonga toera kucitanji?
4 Mwakukhonda tsalakana makhaliro athu, tendeni tibandze mwai onsene toera kumwaza mphangwa zadidi. Natenepa, tinadzakhala akutsandzaya mu kudziwa kuti tikucita pyonsene pinakwanisa ife toera kuphedzera Umambo.—Marko 14:8; Luka 21:2-4.