Tsamba Yakubuluka Kwa Mathubo Akutonga

‘Mulungu Babathu, na Mbuyathu Yezu Kristu, akupaseni nkhombo na ntendere.’ Unoyu ndi mwanyikiro udaphatisira Paulu m’matsamba ace mazinji kwa mipingo. Mwanyikiro unoyu usapangiza mwadidi kufuna kwathu kwa imwe monsene.—Aef. 1:2.

Tiri akukomerwa tani na nkhombo peno udidi wakukhonda kutithema udapangiza Yahova kubulukira ku ntsembe yaciomboli ya Kristu Yezu! Kubulukira ku ciomboli ceneci, ife tiri na ciimiriro cakutawirika pamaso pa Mulungu. Ife nee mbitidakwanisa kufika pa ciimiriro ceneci na mphambvu zathu tayu, mokhonda tsalakana kuwangisira kwathu m’kupfunza Biblya, m’kumwaza mphangwa zadidi, peno m’kucita mabasa anango adidi. Yahova asalekerera madawo athu na kutipasa umaso okhonda mala, tayu ninga kutilipa thangwi ya kuwangisira kwathu, mbwenye ninga muoni wakupangiza udidi wace wakukhonda kutithema kubulukira ku Yezu Kristu.—Arom. 11:6.

Paulu alembera anyakukhulupira anzace: “Tinakupangani kuti: lekani kutambira pezi nkhombo za Mulungu. Pyalembwa kuti: Pa ndzidzi wa nkhombo ndakubvera mbandikuphedza pa ntsiku ya kupulumuswa. Onani, ndzidzi wa nkhombo [ulipo], ntsiku yakupulumuswa yafika.” Yerusalemu mbasati kufudzwa m’piaka dzana yakutoma, pakhali “nzidzi wa nkhombo [peno wakutawirika].” Anthu akuona ntima akuti akhafuna Yahova apulumuswa mwauzimu. Pyenepi pyacitisa kuti anthu onsene akukhulupirika adabuluka Yerusalemu mbasati kufudzwa m’caka ca 70 E.C. akwanise kupulumuswa mwaumanungo.—2 Akor. 6:1, 2.

Ifembo lero tikukhala maso ‘m’nzidzi wakutawirika’ na ‘m’ntsiku yakupulumuswa.’ Ale anatawirwa na Yahova ninga anzakazi ace na anapulumuswa mwauzimu ali na cidikhiro ca kupulumuswa mwaumanungo ‘m’ntsiku ya Mbuya’ yakuti iri cifupi.—Sof. 1:14.

Kufika kwa ntsiku ya Yahova kusatipasa kupitawirira kukulu. Ife tisafunika kucenjeza anthu thangwi ya ntsiku ineyi pabodzi na kuphedza ale akuona ntima kuphindula na udidi wa Yahova wakukhonda kutithema towera iwo akwanisembo kupulumuswa. Paulu akomerwa kakamwe na kupitawirira kweneku. Iye alemba: “Mbandidaleka kupfundisa mphangwa zadidi mbandidakhala na tsoka ikulu ene.” Na mafala awa akutowerera iye apangizambo mabvero ace: “Anyanzeru na mapsiru, sinaleka kuaonera tayu. Mbwenye pingakwanisika, ndinakupfundisanimbo, imwe.”—1 Akor. 9:16; Arom. 1:14, 15.

Tingapwaza basa ineyi yakufunika kakamwe ya kucenjeza anthu, tinadzapitawirira kwa Yahova. Tisadziwa pidalonga Yahova kwa mprofeta Ezekyele: “Iwe munthu, Ine ndinadzakukhalisa nyakuonera wa anthu a Israele towera ulonge nawo mafala anga onsene. Ndingadzakupanga kuti munthu wakuipa anadzafa, iwe mbukhonda kundziwisa towera asiye njira zache zakuipa iye anadzafadi na kuipa kwache, iwembo mbupitawirira.”—Ezek. 3:17, 18.

Ntsiku zino zakumalisa ndi zakunensa kakamwe. Kulinganirisa mabasa athu apanyumba, mabasa adziko, mabasa ampingo na akumwaza mphangwa si cinthu cakululupa tayu. Kusiyapo pyenepi, azinji a imwe musathimbana na utenda, kutsukwala, kukalamba na mpingizo. Azinji a imwe ndi ‘akulemerwa.’ Tisafuna kukupangizani kuti tisapidziwa pyenepi, mwakubverana na pidalonga Yezu: “Bwerani kuna ine, imwe mwonsene akuneta na anyakulemerwa, inembo ndinadzakupumisani.” (Mat. 11:28) Tisakusimbani kakamwe imwe monsene munawangisira kupitiriza kutumikira Yahova mwakukhulupirika mokhonda tsalakana pinenso pikulu na ping’ono pinathimbana na imwe.

Ninga phindu ya basa yanu ya kumwaza mphangwa na kupfunzisa pabodzi na nkhombo za Yahova, anthu 4.762 m’medya ali kubatizwa pa sumana. Nkati mwa caka ca basa cidamala, kwakhazikiswa mipingo ipswa yakukwana 1.375. Tisaphembera na kudikhira kuti bukhu ipswa yakuti Kodi Mwandimomwene Biblya Isapfunzisanji?, inagumanika m’pilongero pyakupiringana 120, inadzaphedza mamiliyau a anthu kuphindula na udidi wakukhonda kutithema na ntendere wa Yahova nkati mwa ‘ntsiku ino yakupulumuswa.’

Khalani na cibaso cakuti Mathubo Akutonga asakufunani na tisakuphembererani. Tisaperekambo takhuta thangwi ya kutiphemberera kwanu.

Abale  anu,

Mathubo  Akutonga A Mboni Za Yahova