Kodi Mungakwanise Kuleri Cilongero Canu?

Tiri akukomerwa kuona kuthimizirika kwa mabukhu a pilongero pyathu pya Mosambiki. Cincino asagumanika mabukhu akubuluswa m’Biblya m’cilongero ca Chichewa, Cichuabo, Cilomwe, Cimacua, Cindau, Cisena, Cishona, Citsonga na Xitshwa. Bukhu yakuti Kodi Mwandimomwene Biblya Isapfunzisanji? inafuna kudzaphatisirwa pa pfunziro ya Biblya isagumanika m’pilongero pinomwe pya dziko yathu. Utumiki Wathu Wa Umambo ungakwanise cincino kulerwi m’pilongero pixanu pya dziko yathu. Kodi tinaphindula tani mwakukwana na masasanyiro anewa akufuna a mbandazi wakukhulupirika?

Tingakwanise kuphindula mwakukwana kakamwe m’kudziwa kuleri cilongero cathu. Kodi musakwanisa kuleri mwekhene, peno musabvesera basi munthu unango angaleri? Kudziwa kuleri cilongero cathu kunadzatiphedza, tayu m’misonkhano ya mpingo basi, mbwenye kunadzaphedzambo munamwaza ife mphangwa zadidi za Umambo.−1 Tim. 4:16.

Gulu yacita masasanyiro a xikola ya kupfunza kuleri na kulemba yakukhonda lipa pa mipingo yonsene. Natenepa, tikuwangisa mipingo yonsene kupitiriza na xikola ineyi. Phatisirani mwadidi bruxura yakuti Dzoloerani Kuleri Na Kulemba inagumanika m’Chichewa, Cichuabo, Cilomwe, Cimacua, Cisena, Cishona, Citsonga na Xitshwa.

Towera kuona kuti munakwanisa tani kutsogolera mapfunziro anewa, onani Nosso Ministério do Reino wa Janeiro de 2002, tsamba 7. Tendeni tipangize kupereka takhuta ku masasanyiro anewa akufuna a kucita mabukhu mazinji m’kupfunza kuleri cilongero cathu.