Programu Ipswa Ya Ntsiku Ya Nsonkhano Wakupambulika

Nsolo wa programu ya ntsiku ya nsonkhano wakupambulika wa caka ca basa ca 2008 ndi wakuti “Ife Ndife Dongo—Yahova Ndi Nyakuumba Wathu,” wakubuluswa m’bukhu ya Izaiya 64:8. Cenjezo ya Malemba inafuna kudzaperekwa m’programu ineyi inadzathimizira kubvesesa kwathu mu kulonga pya udziwisi, ulungami, mphambvu na kufuna kwa Yahova ninga Nyakuumba Wankulu.

Nkhani ya muyang’aniri wa cisa yakuti, “Kutumikira Ninga Pyombo Pyakulemedzeka Mu Utumiki,” inadzapangiza kuti anthu azinji kakamwe asatsanzaya tani na nkhombo zakukhonda lengeseka za kudziwa undimomwene na kuulonga kwa anango. Nkhani yakuti “Kunyerezera Mwacidikhodikho Kunadzakutsidzikizani” inadzapangiza kuti kunyerezera midida yakulungama ya Yahova kusatitsidzikiza tani. Nyakukamba wamulendo anadzakamba misolo yakuti: “‘Lekani Kusangizira Makhaliro Ano A Pinthu’” na “Tawirani Kuumbiwa Na Nyakuumba Wankulu.” Anyakubala na aphale na atsikana anadzagumana ciwangiso m’makhundu akuti “Aphale Na Atsikana Akuti Ndi Akuthema Kwa Yahova” na “Khundu Yakufunika Kakamwe Ya Anyakubala M’basa Ya Kuumba.” Nkati mwa pitsanzo na mabvunzo na matawiro, tinadzakomerwa mukubva na kuona pinacita abale athu na alongo mu utumiki wawo. Ale anafuna kupangiza kuperekeka kwawo kwa Mulungu mu kubatizwa m’madzi asafunika kudziwisa mwakucimbiza kakamwe nyakuyang’anira wakutsogolera. Lekani kuduwala kubweresa revista yanu ya A Sentinela inafuna kupfunzwa pa sumana ineyi ya ntsiku ya nsonkhano wakupambulika.

Consene cinatonga Nyakuumba Wankulu kucicita asacicita. Mbwenye pyonsene pisanyindira ku matawiriro athu ku maumbiro anafuna kuticita iye. Tenepa ninga ntsama ya dongo m’manja mwa nyakuumba, ale akuti mwanzeru asangonjera midida na macinjo a Yahova angakwanise kusasanyirwa, kukidingwa na kucinjwa towera adzakhale pyombo pyakuthema kuphatisirwa. Munangonjera ife Yahova, tisapasa mbiri utongi wace ukulu na tisatambira nkhombo zizinji.