Kubwerezera Kwa Xikola Ya Utumiki Wa Mulungu
Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana 27 ya nthanda ya Malimwe ya 2007. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa mu nkhani za sumana 2 ya nthanda ya Maluwa mpaka sumana 27 ya nthanda ya Malimwe ya 2007.
LUSO YA KULONGA
1. Kodi tinakwanisa tani kupangiza cilemedzo kwa anango m’utumiki wathu na m’mpingo? [be tsa. 192 ndima 2-4] Munamwaza ife mphangwa kwa anango, tisafunika kucalira kulonga mwakucimbiza maonero awo akuipa, mbuto mwace tisafunika kupangiza cilemedzo m’kubvesera mwakupirira na kutsalakana mabvero awo. (1 Ped. 3:15) M’mpingo tisapangiza cilemedzo m’kukumbuka kuti abale athu asafuna Yahova na asafuna kuntumikira. Anyakubvesera athu anadzaona kuti ife tisaalemedza khala tisaphatisirambo Malemba kwa ife ene na kucalira kuphatisira kazinji kene fala yakuti “imwe.”
2. Khala tisafuna kupangiza cinyindiro, kodi tisafunika kucitanji munalonga ife? [be tsa. 196 ndima 1-3] Khala tisafuna kuti anthu akhulupire kuti pinalonga ife ndi pyandimomwene na tisapilonga kubulukira m’ntima mphyakufunika kakamwe kupangiza cinyindiro cathu. Kubvesesa mwadidi mphangwa zinalonga ife na kuzilonga m’mafala athu ene kusapangiza kuti tiri na cinyindiro cakuti pinalonga ife mphyakufunika kwa anyakubvesera athu.
3. Kodi ndi api maonero mangasi akuti anadzatiphedza kukhala aluso munapereka ife umboni kwa anango? [be tsa. 198 ndima 1-5] Yeserani kutomesa makani m’kulonga ntsonga yakuti ndi yakukomeresa kwa anthu anango. Kukhala wakutsalakana maonero na manyerezero a anthu anango kunadzatiphedza kuceza nawo mbuto mwa kuasandika. Tingakwanise kubvunzika: ‘Kodi pinalonga ine pisabveka tani kwa anthu anango?’ Pyenepi pinadzatiphedza kuphatisira nzeru zadidi na kucalira kutomesa nthonga mokhonda funika. (Mis. 12:8)
4. Kodi kukhala waluso kusaphataniza tani nzidzi wakuthema munapereka ife umboni kwa anango? (Mis. 25:11) [be tsa. 199 ndima 1-3] Maseze tikhonde tawira pyonsene pinalonga mwanaciro nyumba, nkhabe funika tayu kupokanya mwakucimbiza maonero onsene analonga iye akukhonda bverana na malemba. ( Jwau 16:12) Khalani wakupirira, na lekani kuipirwa anango angapokanya peno kukhonda pinalonga imwe. Khalani wakupfulika, na onani pyenepi kukhala ninga miyai towera kudziwa mwadidi manyerezero a munthu unoyu.
5. Kodi tinakwanisa tani kukamba nkhani yathu m’njira yakuwangisa? [be tsa. 203 ndima 3–tsa. 204 ndima 1] Khala tiri na cinyindiro cakuti anzakazi anzathu asafuna kukomeresa Yahova, pinalonga ife na njira yakupilonga inadzapangiza cinyindiro ceneci. (1 Ates. 4:9, 10; 2 Ates. 3:4, 5) Ngakhale munapereka ife uphungu wa cilango, makambiro athu nkhani angakwanise kukhala adidi khala tisagomezera makamaka kuti tinacalira tani kupita m’makhaliro akuipa na kuti midida ya Yahova isatitsidzikiza tani. (Sal. 119:1)
NKHANI N.° 1
6. Kodi tingakwanise kulonganji thangwi ya mulembi wa bukhu ya Ezekyele pabodzi na ndandanda na kunyindirika kwayo? [bsi07 tsa. 6 ndima 3] Bukhu ya Ezekyele ikhadaphatanizwa m’ndandanda wa ntsiku za Esdra na isagumanika m’ndandanda wa Akristu a m’midzidzi yakale, makamaka m’ndandanda Wakutoma. Kunyindirika kwayo kusapangizwambo na mafala ayo aciphipiriso na ale a Yeremiya na Apokalipse.
7. Kodi ndi upi nkhaliro wakufunika kakamwe kwa munthu towera kupirira uipi? [w05 1/6 tsa. 29 ndima 4] Kucepeseka ndi kwakufunika kakamwe. Munthu angakhala wakuzikuza panango angakwanise kukhonda tawira kuthabuswa. Ife tisafunika kuwangisira kusangizira Yezu, wakuti “achepeseka, mbatawira mpaka kufa.” (Afil. 2:5, 8) Pontho, tisafunika kupfunza kuona anango ninga ‘akulu’ kupita ife, mbatiikha pyakufuna pyawo pa mbuto yakutoma kupiringana pyathu. (Afil. 2:3, 4)
8. Kodi tisapfunzanji ku ntawiro wa Yezu kwa Asaduki adampokanya pidalonga iye pya kulamuka muli akufa? (Luka 20:37, 38) [be tsa. 66 ndima 4] Yezu akhadziwa maonero a Asaduki—akuti iwo nee akhakhulupira kulamuka muli akufa. Natenepa, iye atawira mbvunzo wawo m’njira yakuti yamalisa maonero akuipa akhali na iwo ku ntsonga ineyi. M’kuphatisira manyerezero aluso na mbiri ya Malemba yakudziwika, Yezu alonga cinthu cakuti cipo iwo akhadacinyerezera—cipangizo capakweca cakuti mwandimomwene Mulungu anadzalamusa anyakufa.
9. Nyakupfunza Biblya peno nyakukhulupira nzathu angabvunza pinafuna cita iye pa ntsonga inango, kodi musafunika kutawira tani? [be tsa. 69 ndima 4-5] Munthu m’bodzi na m’bodzi ali na kupitawirira thangwi ya pyakusankhula pyace pyene m’umaso. (Agal. 6:5) Munthu anacita pisankhulo makamaka towera kukomeresa mpfunzisi wace wa Biblya peno anthu anango ali kutumikira anthu, nee ali kukhala maso na cikhulupiro tayu. (Agal. 1:10) Natenepa, towera kuphedza munthu kugumana ntawiro ku mbvunzo wace, mphyadidi kugomezera midida yakuthema ya Biblya na pitsanzo na kumbvunza khala asaona pinthu mwenemo pyakuti pingakwanise kumphedza kucita cisankhulo ca nzeru.
10. Kodi kukhala ‘wakusanduka mu mizimu mwanu na mu nzeru zanu’ kusaphatanizanji? (Aef. 4:23) [be tsa. 74 ndima 4] Kukhala na manyerezero akulandana kakamwe na a Mulungu na Kristu ndi pyakufunika kwa ife khala tisafuna‘kubvala umunthu upswa.’ (Aef. 4:23, 24) Pyenepi pisaphataniza kupfunza manyerezero awo nzidzi onsene. Munapfunza ife Mphangwa zadidi, tisafunika kuona pyakucitika pyenepi pya umaso wa Kristu ninga citsanzo kwa ife kuti ticitoweze. Tisafunika kusaka kudzindikira makhaliro akuthonyeka adapangiza Yezu na kuwangisira kakamwe towera kuasangizira m’umaso wathu. (1 Ped. 2:21)
KULERI BIBLYA KWA SUMANA NA SUMANA
11. Kodi mamuna wakubvala muli (linho) analongwa pa Ezekyele 9:2-4, asaphipirisira ani, na “chidzindikiro pa nkhope [zawo]” cisapangizanji? [w88 15/9 tsa. 14 ndima 18] Mamuna wakubvala muli asaphipirisira nsoka wa Akristu akudzodzwa pa dziko yapantsi m’nzidzi uno. Iwo asaikha cidzindikiro caciphipiriso kwa ale anacita khundu ya “[mwinji] ukulu,” wakuti uli ‘kutsukwala na kulira’ thangwi ya pinthu pizinji pyakuipa pinacitwa m’Cikristu caunthawatawa. (Apok. 7:9, 10, 14) “Chidzindikiro” ndi cipangizo cakuti munthu aperekeka, abatizwa na umunthu wakulandana na Kristu.
12. Kodi atsogoleri auphemberi a Cikristu caunthawatawa alandana tani na ‘alongeri peno aprofeta a dzedze akusowa nzeru, akuti asanyindira nzeru zawo,’ anafokotozwa pa Ezekyele 13:3? [w99 1/10 tsa. 13] Ninga atsogoleri auphemberi ambiri na akudziwika kakamwe m’ntsiku za Ezekyele, atsogoleri auphemberi a Cikristu caunthawatawa asacimwana kucenjeza anthu pya kutonga miseru kwa Mulungu kunadza. Atsogoleri auphemberi a Cikristu caunthawatawa nkhabe fokotoza kuti Umambo wakuikhwa wa Yahova mokhonda dembuka unadzacinja pinthu pya pa dziko yapantsi. (Dan. 2:44) Munalonga iwo kuti ali kucita pyenepi m’dzina ya Mulungu, iwo akupanga mikumbi yawo pinafuna kubva mikumbi ineyi.
13. M’kulonga pya “nsangani” unagumanika pa Ezekyele18:2, kodi Aisraele akhayesera kucitanji, na ndi pfunziro ipi yakufunika ya kupitawirira inagomezerwa? [w88 15/9 tsa. 18 ndima 10] Aisraele akakhonda kutawira kuti ndiwo akhacitisa mbumba kuthabuka thangwi ya makhaliro akuipa akhatamba dzinza. Iwo akhalonga kuti mbumba ikhathabuka thangwi ya pyakubwereswa pya uipi wa makholo awo. Mbwenye Ezekyele alonga kuti munthu m’bodzi na m’bodzi akhali na mulando wa makhaliro ace ene na akhafunika kutongwa na Yahova. (Ezek. 18:20, 27-30)
14. Kodi Ezekyele akhala ‘okhonda kwanisa kulonga,’ peno ‘bewewe,’ m’njira ipi m’nzidzi wa kuzungulirwa na kufudzwa kwa Yerusalemu? (Ezek. 24:27; 33:22) [w03 1/12 tsa. 29] Ezekyele hadakhaladi okhonda kwanisa kulonga peno bewewe tayu. M’kulonga mokhonda nensa, iye nee akhalibve na pinthu pinango pyakulonga thangwi ya kutongwa kwa Yerusalemu na Yahova kukhacitika tayu. Natenepa iye alonga mphangwa za kutongwa kwa anyamalwa a mbumba ya Mulungu akuti akomerwa na kufudzwa kwa Yerusalemu. (Ezek., kapitulu 25-32) M’kupita kwa nzidzi, pakumala kutambirwa mphangwa zakulonga pya kufudzwa kwa Babilonya, Ezekyele aprofetizari pya kumangwa papswa kwakuti mbukudadzacitika.
15. Kodi ‘Goge wa mu dziko ya Magoge’ mbani, na anatoma lini kufudza mbumba ya Yahova? (Ezek. 38:2, 16) [w97 1/3 tsa. 14 ndima 1–tsa. 15 ndima 3] Mwandimomwene Goge wa Magoge ndi Sathani Dyabo kutomera nzidzi udathamangiswa iye kudzulu mbabwera cifupi na dziko yapantsi. (Apok. 12:13, 17) Iye asatsogolera misoka ya madzinza, na anadzapomokera mbumba yonsene ya Yahova inaoneka ninga yakusowa citsidzikizo m’njira ikulu kakamwe Babilonya Wankulu angamala kufudzwa. (Ezek. 38:4-6, 8, 11, 15; Apok. 17:12-14) Kupomokera kweneku kunadzacimbizisa Harmagedoni, m’nzidzi unafuna Yahova kubwezera utongi wace ukulu na kupulumusa mbumba yace. (Ezek. 38:21-23)