Bokosi Ya Mabvunzo

◼ Kodi “mbandazi wakukhulupirika na wanzeru” asatawirisa kuti misoka yakutongereka ya Mboni igumanyikane towera idinge Malemba peno iketesane?—Mat. 24:45, 47, Mphangwa Zadidi.

Nkhabe, pyenepi nkhabe tawiriswa. Ngakhale tenepa, m’makhundu mazinji a dziko, anthu akucepa a gulu yathu asagumanya misoka towera kudinga ntsonga zinango za m’Biblya. Anango asatowerera nsoka wakutongereka unapfunza Malemba Acihebere na Acigerego towera kudinga ulinganiri wa Tradução do Novo Mundo. Anango asasaka nkhani za siyensiya zinalongwa m’Biblya. Iwo asakhala na mbuto za Interneti na mbuto za kucedzera na cifuniro ca kuketesana maonero awo. Pontho iwo asacita misonkhano na kubulusa mabukhu towera kumwaza maonero awo na kuthimizira pinalongwa m’misonkhano yathu Yacikristu na kubulukira m’mabukhu athu.

Kuzungulira dziko yonsene yapantsi, mbumba ya Yahova isatambira pipfunziso pizinji pyauzimu na ciwangiso m’misonkhano ya mpingo, misonkhano ya cisa, ya kupambulika na ya gawo pontho na kubulukira m’mabukhu a gulu ya Yahova. Pantsi pa citsogolero ca nzimu wakucena wa Yahova na Mafalace a undimomwene, iye asapereka pinthu pinafunika towera kuti mbumba yonsene ya Mulungu ‘ikhale yakubverana m’mitima yawo’ na ipitirize ‘kukhazikika mu cikhulupiro.’ (1 Akor. 1:10; Akol. 2:6, 7) Mwandimomwene, ife tisafunika kupereka takhuta ku masasanyiro auzimu anatipasa Yahova mu ntsiku zino zakumalisa. Natenepa, “mbandazi wakukhulupirika na wanzeru” nkhabe kutawirisa mabukhu, misonkhano, peno mbuto za Interneti zakuti nkhabe kucitwa peno kutsogolerwa na iye.—Mat. 24:45-47, MZ.

Mphyakufunika kuti anthu onsene aphatisire luso yawo yakunyerezera towera kutsidzikiza mphangwa zadidi. Mbwenye, nkhabe funika kuti munthu apwaze pinacita Yezu Kristu kubulukira ku mpingo wace pa dziko yapantsi lero. Mu piaka dzana yakutoma, mpostolo Paulu acenjeza pya pinthu pyakunetesa, ntsonga zakubvunga ndzidzi, ninga “mabukhu mudalembwa madzina mazinji akukhonda lengesiwa a makholo a madzindza na madzindza; mabukhu ale anapasa anthu kuketesana basi, hanaphedza tayu mabasa a Mulungu,” mwakubverana na cikhulupiro. (1 Tim. 1:3-7) Akristu onsene asafunika kuwangisira towera acalire “kuketesana kwakusowa nzeru, pa kutchululirwa madzina a makholo, pa makani a pya mwambo wa kale, thangwi hanapasa nzeru iwo tayu, mba apezi basi.”—Tito 3:9.

Kwa ale anafuna kupfunza na kudinga Biblya mwakuthimizirika, tiri kuaphemba kuti apfunze Estudo Perspicaz das Escrituras, “Toda a Escritura É Inspirada por Deus e Proveitosa,” na mabukhu athu anango, ninga ale analonga pya maprofesiya anagumanika m’mabukhu a Biblya a Danyele, Izaiya na Apokalipse. Mabukhu anewa asapereka mphangwa zizinji towera kuzipfunza na kunyerezera pya Biblya, pontho mwa iwo tingakwanise kukhala na ‘udziwisi wonsene na nzeru zonsene, mbitikhala tenepa ninga munafunira Mulungu, mbiticita pyonsene pinakoma kuli iye, mbitibala misapo m’mabasa athu onsene na mbitithimizira kubvesa ntsiku na ntsiku pinafuna Mulungu.’—Akol. 1:9, 10, MZ.