Kubwerezera Kwa Xikola Ya Utumiki Wa Mulungu
Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana 25 ya nthanda ya Madzalo ya 2008. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa mu nkhani za sumana 7 ya nthanda ya Thongwe mpaka sumana 25 ya nthanda ya Madzalo ya 2008. [Cidzindikiro: Pangasoweka pipangizo peno mabukhu adabuluswa nkhani kunkhomo kwa mbvunzo, imwe musafunika kudinga towera mugumane matawiro.—Onani Escola do Ministério, tsa. 36-7.]
LUSO YAKULONGA
1. Kodi tisafunika kucitanji towera kuphedza anyakubvesera athu kubvesa mabvekero a malemba, na thangwi yanji tisafunika kucita pyenepi? [be tsa. 228 ndima 2-3] Ife tisafunika kubvunga ndzidzi towera kufokotoza na kupangiza kuti tinaphatisira tani malemba analeri ife. Mu kucita pyenepi, ife ‘tisabvekesa mwadidi’ mabvekero a malemba. (Neh. 8:8, 12) Mu kupangiza kuti tinaphatisira tani malemba, tisaphedza anyakubvesera athu kuona kuti anakwanisa tani kuphatisira mphangwa zenezi mu umaso wawo.
2. Thangwi yanji tisafunika kucitisa kuti nkhani zathu zikhale zakuphindulisa kwa anyakubvesera athu, na tinakwanisa tani kucita pyenepi? [be tsa. 230 ndima 3-5, bokosi] Kupanga kwene basi anthu pinthu pyakuti asapidziwa kale panango nee pinaaphata ntima tayu. Cifuno cathu ndi ca kugalamusa manyerezero awo na kucitisa kuti anyakubvesera apibve kuti apfunza cinthu cipswa cadidi. Ife tingakwanise kucita pyenepi mu kudinga pinadziwa anyakubvesera athu thangwi ya ntsonga ineyi na kutonga mafala athu—kulonga mwacigwagwa ntsonga zakudziwika na kulonga mwakugomezera ntsonga zipswa.
3. Kodi kudinga malemba mwacidikhodikho kunacitisa nkhani zathu kukhala zakuphindulisa mu njira zipi? [be tsa. 231 ndima 1-3] Kudinga kunadzatiphedza towera kufokotoza unyomonyomo mbuto mwa kulonga kwene basi. Ife tingakwanise kugumana pyakucitika pinango pyakuti nkhabe dziwika maka peno mafokotozero mapswa m’mphangwa zidabva ife zakuti zinakwanisa kupangiza mwadidi ntsonga inafuna ife kulonga.
4. Kodi tinakwanisa kucitanji towera kucitisa kuti malemba akudziwika anafuna ife kuleri akhale akuphindulisa kakamwe? [be tsa. 231-2 ndima 4-5] Ife tisafunika kukoya ndzidzi towera kufokotoza makhundu anango a lemba inadinga ife. Sankhulani mafala akuti asabverana na nsolo. Mwacitsanzo, khala tiri kuleri Mikeya 6:8, tingakwanise kufokotoza kuti ulungami peno kukhurudzika ndi ninji. Peno tingakwanise kupangiza kuti “kubvera anthu ntsisi” kusabvekanji.
5. Thangwi yanji ndi pyakufunika kufokotoza malemba analeri ife? [be tsa. 232 ndima 3-4] Munafokotoza ife Malemba, tisaphedza anthu towera kuti aleri Mafala a Mulungu mwacidikhodikho na kubvesesa ntsonga zizinji zakuti panango nee akhazidziwa. (Mat. 22:41-45) Ife tingakwanise kucita pyenepi mu kutculula mafala a n’khundu a lemba, makhaliro a ndzidzi udalembwa iyo, peno kulonga adailemba peno akhaibvesera.
NKHANI N.° 1
6. Kodi ndi ninji pinapangiza kuti bukhu ya Mateo yalemberwa makamaka Ayuda? [bsi08-1 tsa. 4 ndima 6-7] Kulonga kuti bukhu ya Mateo yalemberwa makamaka Ayuda, kusapangizwa na ndandanda wa madzinza, wakuti usapangiza ubalwi wakutawirika wa Yezu kutomera Abrahamu, na pipangizo pyace pizinji pya Malemba Acihebere, pinapangiza kuti iwo asalonga pya kubwera kwa Mesiya. Piripombo pinthu pinango pinapangiza kuti Mateo alemba Evanjelyu yace pakutoma mu Cihebere.
7. Kodi tinakwanisa tani kukhunganya mitima yathu towera kutambira cipfunziso caumulungu kubulukira pa platifomu? (2 Pya dziko. [Mbiri] 20:33) [be tsa. 13 ndima 4–tsa. 14 ndima 5] Njira ibodzi yakufunika kakamwe towera kukhunganya mitima yathu kuti itambire cipfunziso cakubuluka kwa Yahova ndi kuphemberera n’khaliro wakupereka takhuta. (Sal. 27:4; 95:2) Tingakwanisembo kuphembera towera tikhale na manyerezero na ntima wakupfulika towera timalise ‘kuinjipa’ kwa manyerezero akuti angakwanise kutidzudzumisa. (Sal. 94:19) Kulang’ana nyakukamba nkhani na kufungulambo malemba m’Biblya yathu kungakwanise kutiphedza towera tikhale akubvesera pinalongwa.
8. Kodi anyakubala anakwanisa kucitanji towera kupfunzisa anawo kukhala na “nzeru zakupulumuka”? (2 Tim. 3:15) [be tsa. 16 ndima 3-4] Anyakubala asafunika kucita pyonsene pinakwanisa iwo towera kuenda na anawo ku misonkhano ya mpingo, ya cisa, ya ntsiku yakupambulika na ya gawo. Pa nyumba, anyakubala angakwanise kusaka ndzidzi towera anang’ono akhale pantsi na kuona pithunzithunzi pinagumanika m’mabukhu athu Acikristu. Anapiana angakwanise kupaswa bukhu yawo ene inafuna kupfunzwa ku misonkhano yathu ya mpingo. Mu kupita kwa ndzidzi, anyakubala angakwanise kuphedza anawo ang’ono kukhunganya matawiro akubvira.
9. Kodi Evanjelyu ya Mateo yagomezera tani kukwanirisika kwa profesiya ya Biblya? [bsi08-1 tsa. 5 ndima 32] Evanjelyu ya Mateo yatculula kazinji kene Malemba Acihebere na yapangiza kuti maprofesiya anewa asakwanirisika tani. Mwacitsanzo, Mateo 13:14, 15 isatculula Izaiya 6:9, 10; Mateo 21:42 mbilonga kukwanirisika kwa Masalmo 118:22, 23; na Mateo 26:31, 56 mbigomezera kukwanirisika kwa Zakariya 13:7. Kukwanirisika kweneku kusatipasa cibaso cikulu ca kukhulupira kuti Yezu ndi Mesiya na towera kukhulupirambo maprofesiya adalongwa na Yezu ene mbalembwa na Mateo.
10. Munafokotoza Evanjelyu ya Mateo pya Yezu ninga Mesiya wakupikirwa na Mambo, kodi Evanjelyu ya Marko isanfokotozambo tani? [bsi08-1 tsa. 7 ndima 7-8] Evanjelyu ya Marko isafokotoza Yezu ninga Mwana wa Mulungu, wakucita pirengo na Mpulumusi. Pirengo pyakukhonda kucepa 19 pyafokotozwa mwadidi. Marko asagomezera mabasa a Yezu mbuto mwa pipfunziso pyace. Maseze Mwambo wa Mose na ndandanda wa dzinza ya Yezu nkhabe kulongwa maka, misambo ya Ayuda isafokotozwa, mbipipangiza kuti Marko alemba makamaka towera kuphindulisa Aroma.
KULERI BIBLYA KWA SUMANA NA SUMANA
11. Kodi kupangiza ukali ndi kwakudawika kakamwe kupiringana kukhala wakuipirwa? (Mat. 5:21, 22) [w08 15/1 “A Palavra de Jeová É Viva — Destaques do livro de Mateus”] Yezu acenjeza kuti kupitiriza kuipirwa na ‘m’bale wako’ ndi kudawa kukulu kwakulandana na kupha. Mbwenye, kupangiza kuipirwa kwanu mu kulonga mafala akupwaza ndi pyakudawika kakamwe, mbukucitisa munthu kutongwa pa nthando ikulu kupiringana nthando ya ulungami.
12. Kodi Akristu anakwanisa tani kukhala na “diso” yakuyang’ana kubodzi? (Mat. 6:22, 23) [w06 1/10 tsa. 29] Munthu wakukhala na diso yakuyang’ana kubodzi asakhala wa ntima wadidi, cifuno cadidi, nkhabe khala wakufuna pyonsene na nkhabe kucenama. Kukhala na diso yakuyang’ana kubodzi nee pisabveka kukhala ntcerengi peno kukhala wakukhonda kutsalakana mabasa athu Acikristu tayu. Mbuto mwace, pisabveka kukhala na ‘nzeru zadidi’ munapitiriza ife kuikha basa ya Yahova pa mbuto yakutoma. (2 Tim. 1:7)
13. Kodi ndi ntsonga ipi ikhagomezera Yezu pidabvunza iye anyakupfunzace kuti: “Ipyo pyonsene, mwapibvesa?” (Mat. 13:51, 52) [w08 15/1 “A Palavra de Jeová É Viva — Destaques do livro de Mateus”] Yezu akhagomezera kufunika kwa kubvesesa pinthu pyauzimu. Ale anabvesesa pipfunziso pya Umambo ali na kupitawirira kwa kupfunzisa anango na kugawana nawo mpfuma zenezi.
14. Thangwi yanji kazinji kene Yezu akhapanga ale akhawangiswa na iye ‘kuti aleke kufotokozera anthu’? (Mat. 12:16) [w87 15/5 tsa. 9; cl tsa. 93-4] Yezu akhaphatisira mphambvu yace mu njira yadidi. Iye nee akhacita pirengo towera apangizike tayu. (Mat. 4:5-7; Luka 23:8, 9) Iye nee akhafuna kuti anthu andziwe thangwi ya mphangwa zakudzumisa tayu.
15. Kodi ikhali ipi ntsonga ya Yezu pidalonga iye pya ‘mpimo unapima na munthu’? (Marko 4:24, 25) [w80 15/12 tsa. 12; gt nsolo 43] Tingakhonda kufuna maka Yezu, mbitikhonda kuntsalakana, ife nkhabe funika kudikhira pizinji kwa iye tayu. Mbwenye, tingantsalakana mwadidi tingakwanise kudikhira citsalakano cace mu kutipasa mphangwa na cidziwiso ca Malemba kupiringana pikhadikhira ife. Mu njira ineyi, tinadzakwanisa kukhala na cidziwiso cakukwana na kugawana cidziwiso ceneci mu njira yadidi na anango.