Yahova Asatipfundzisa Toera Kucita Basa Ineyi

1. Yahova asacitanji angapasa anthu basa?

¹ Yahova angapasa anthu basa, iye asaapasambo ciphedzo toera kucita basa ineyi. Mwacitsandzo, pa ndzidzi udapanga Yahova kuti Nowa asasanye mwadiya ukulu, cinthu cakuti cipo Nowa akhadzati kucicita, Yahova apangambo Nowa kuti anacita tani. (Gen. 6:14-16) Mose, nkumbizi wakukhurudzika, mudapaswa iye basa toera kulonga na akulu Aisraele, pontho na Farao, Yahova ampasa cibaso: “ine ndinadzakhala na iwe ungalonga mbandiku-pfundzisa pinafuna dzalonga iwe.” (Eks. 4:12) Tingalonga pya basa yathu toera kumwaza mphangwa zadidi, Yahova nee asatisiya tekhene. Iye asatipfundzisa toera kucita basa ineyi kubulukira ku Xikola ya Utumiki wa Mulungu na Nsonkhano wa Basa. Tinaphindula tani na kupfundziswa kweneku?

2. Tinaphindula tani na Xikola ya Utumiki wa Mulungu?

² Xikola Ya Utumiki Wa Mulungu: Dingani mphangwa za Xikola ya Utumiki wa Mulungu mbamudzati kugumanika pa nsonkhano ubodzi na ubodzi. Mungaona kuti anyakupfundza asaphatisira tani mphangwa zenezi mu nkhani zawo, munadzapitiriza kupfundza kuti munapfundzisa tani. (Mis. 27:17) Kwatani bukhu yanu ya Escola do Ministério pakuenda ku misonkhano ya Xikola ya Utumiki wa Mulungu, pontho iphatisireni ninga bukhu yakuphedza. Muyang’aniri wa xikola angalonga toera kufungula bukhu ineyi nyakupfundza m’bodzi na m’bodzi angamala kucita nkhani, lembani nthemba pa ntsonga zakufunika zinafuna imwe kuziphatisira, pontho phatisirani mbuto ziri nkhundu-nkhundu toera kulemba pinafuna imwe kukumbuka. Njira yadidi toera kuphindula na xikola ineyi, ndi kucita khundu. Kodi mwalembesa pa xikola ineyi? Mungapaswa nkhani, khunganyikani mwadidi na phatisirani uphungu unatambira imwe. Mu utumiki, phatisirani pidapfundza imwe.

3. Ninji cinadzatiphedza toera kuphindula na Nsonkhano wa Basa?

³ Nsonkhano Wa Basa: Tinadzakumbuka mwadidi maonero anaperekwa nkati mwa nsonkhano unoyu tingaleri mwanyapantsi mphangwa za nsonkhano wa basa na kukhunganyika toera kutawira. Khala matawiro athu nee ndi akulapha, anthu azinji anadzakwanisambo kutawira. Bveserani mwadidi pitsandzo, pontho phatisirani maonero onsene anaona imwe kuti anadzacitisa utumiki wanu kukhala wakuphindulisa. Utumiki Wathu Wa Umambo ungabweresa misolo yakuti inakwanisa kukuphedzani m’basa yanu ya utumiki, koyani misolo ineyi.

4. Thangwi yanji tisafunika kuphatisira mwadidi cipfundziso ca Mulungu?

⁴ Ninga mabasa adapaswa Nowa na Mose, basa yathu toera kumwaza mphangwa zadidi mu dziko yonsene yapantsi ndi basa yakunentsa. (Mat. 24:14) Tinakwanisa kupembera tinganyindira Yahova, Mpfundzisi wathu Wankulu, pontho tingaphatisira mwadidi cipfundziso cinapereka Yahova.—Iza. 30:20, Tradução do Novo Mundo.