Kuphatisira Maonero a Bhibhlya pa Kuikha Anyakufa​—Khundu 2

Pa kufa kwa munthu, piwalo pya banja, acibale na axamwali kazinji kene asadikhirwa kubvala nguwo zaciliro. Mphyakufunika kudziwa kuti nguwo zaciliro zinalongwa mu nsolo uno nee ndi nguwo zakuti zisabvaliwa kazinji kene, peno kuphatisirwa pa mwambo wakuikha nyakufa. Nguwo zaciliro basi ene zisabvaliwa pa kufa kwa munthu. Nguwo zenezi zisabvaliwa toera kupangiza kutsukwala kwa munthu thangwi yakuferwa. Ntundu wa nguwo zenezi na maonekero azo ziri na mabvekero akupambulika mwakubverana na pikhulupiro pya mauphemberi akale, pyakuti pizinji pisalonga pya makhaliro a nyakufa na uxamwali wace na anthu a maso. Nguwo zenezi zaciliro zisabvaliwa mu ntsiku ibodzi, mu ntsiku zakucepa, mu nthanda zizinji peno caka, panango pyaka pizinji pakumala kuikha nyakufa.

²Kudinga Midida: Cakutoma, mbumba ya Yahova nkhabe kupangiza pakweca ciliro na kutsukwala ninga anthu ‘akusowa cikhulupiro.’ (1 Ates. 4:13) Caciwiri, ife nkhabe funa kucita cinthu cakuti ‘mbicidagwegwedusa’ anango. (2 Akor. 6:3 Tradução do Novo Mundo) Thangwi ya n’dida unoyu tisafunika kubvundzika: ‘Kodi kubvala nguwo zaciliro kusapangiza anango kuti ndisatowezera pikhulupiro na misambo yakukhonda bverana na malemba? Kodi pyenepi pinagwegwedusa ale anadziwa pikhulupiro pya Mboni za Yahova na pinapfundzisa iwo thangwi ya anyakufa? Kodi kubvala nguwo zenezi mbakudadzudzumisa cikumbuntima ca anyakukhulupira andzathu? Kodi kubvala nguwo zenezi mbakudafewesa manungo abale athu akuti asakhonda kubvala nguwo zenezi, ngakhale kutcingwa thangwi ya pisankhulo pyawo?a

³Natenepa, pa midida yonsene inafuna kudingwa, nkhabepo unango wakufunika kakamwe kupiringana uyu: Kwa ife, ndi kusowa ndzeru kucita cinthu cakuti mbicidaxola Yahova. (Mis. 27:11; Akol. 1:9, 10) Tingabvesesa mwadidi mabvekero akuphiphirisa a nguwo zaciliro na kuphatana kwazo na cikhulupiro cakuti anyakufa aciri maso, tisafunika kudinga mwacidikhodikho kuti kutowerera nsambo unoyu kunakhuya tani uxamwali wathu na Yahova. Nee tisafunika kumwa na ndiko ya Yahova na ndiko ya mademonyo.’​—1 Akor. 10:21, 22.

⁴Mwandimomwene, anango nkhabe kudziwa mabvekero akuphiphirisa a nguwo zenezi zakupambulika. Mbwenye iwo nkhabe kwanisa kufokotoza kuti thangwi yanji asakakamizika kubvala nguwo zenezi basi ene pa ndzidzi wakuferwa. Nakuti azinji asabvala nguwo zenezi mbakhonda kudziwa mwakukwana mabvekero azo akuphiphirisa, ineyi nee ndi thangwi kwa ife toera kucita pibodzibodzi. Kucita phembero na kunyerezera mwacidikhodikho midida ineyi pisafunika kutiphedza kubvesesa thangwi yanji tisafunika kucalira kutowezera nsambo wakubvala nguwo zaciliro pakuikha nyakufa ninga cidzindikiro cakupangiza kutsukwala.

⁵Mabvaliro Akuthema Pakuikha Nyakufa: Ndi ntundu upi wa nguwo tisafunika kubvala pakuikha nyakufa? Mu pyaka pizinji, mabukhu a m’bandazi wakukhulupirika na wandzeru asalonga pya nkhani ineyi.b Tisawangiswa toera kupangiza maonekero adidi na kusankhula nguwo zakuthema mpasta mwathu zakuti ndi zamaonekero adidi. Panango, nguwo zenezi zinakwanisa kukhala za kore yadidi mwakubverana na kutsukwala kwa “panyumba ya nyakuferwa.” (Koel. 7:2, NM) Toera kukhonda kuxola peno kupindisa anango tisafunika kucalira kubvala nguwo za makore akugaka peno zamaonekero akukhonda thema kakamwe. Pa nguwo zonsene zinatonga ife kubvala, kubvesesa kwathu mwadidi makhaliro a anyakufa kunadzatiphedza kupangiza cilemedzo pa ndzidzi wakufa kwa munthu mwakukhonda kubvala nguwo zaciliro.

Masasanyiro Toera Kuikha Nyakufa

⁶Kuikha manungo Kwacikristu kusafunika kukhunganywa mu njira yakuti isapangiza cilemedzo kuna anyakutonga, na unyai wakufunika. Khala kuikha nyakufa kunacitwa mu njira yakuti inadzapereka cibalangazo cakubulukira m’Malemba na kubvekesa mwadidi undimomwene wa makhaliro a anyakufa, nee kunatawiriswa kucita misambo yakukhonda bverana na Malemba peno miyambo inango. (Aef. 5:7-11) Pinafuna kucitiwa pakuikha nyakufa nee pisafunika kudzudzumisa pikumbuntima pya anyakukhulupira andzathu. (1 Akor. 10:32) Kodi midida ineyi ya Bhibhlya inaphatisirwa tani pakucita masasanyiro akuikha manungo Kwacikristu.

⁷Mbani Anafunika Kutsogolera? Mu pisa pizinji acibale akukhonda khulupira asakhala na mphambvu yakutonga kuti acibale onsene ali na ufulu wakusankhula kuti nyakufa anaikhwa tani, pontho lini. Natenepa, Masasanyiro a banja Yacikristu, asapasa mamuna na nkazi ufulu toera kucita pisankhulo pyakufunika pyakuti pisakhuya makhaliro awo na a anawo. Anyakubala, acibale, ngakhale piwalo pya mpingo Wacikristu asafunika kulemedza ntemo unoyu wa Bhibhlya. (Mat. 19:​5, 6) Pyenepi mbipidakhala pyandimomwene pa ndzidzi wakuikha nyakufunika wathu wakufa. (Gen. 23:​19; 35:​29) Toera kucalira “kumangirwa na Ajentiyu pa gole ibodzibodzi” Nkristu asafunika kubvekesa mwadidi kuti masasanyiro onsene a kuikha nyakufa anadzatsogolerwa mwakubverana na midida ya Bhibhlya. (2 Akor. 6:14-17) Ndi mathanyo api anakwanisa kucitwa toera kukhala na cinyindiro cakuti pyenepi pinatowezwa.

⁸Dziwisani Pakweca Pisankhulo Pyanu: Khala munthu apangiza maonero ace mu kulemba mwanyapantsi pitsogolero pya masasanyiro akuikhwa kwace, kudinga pyenepi na acibale mphyakukhonda nentsa, ninga musalemedza iwo kazinji kene pifuno pya nyakulowa. (Gen. 50:5) Tsamba yakuti yakorondzwa na kucitirwa umboni ndi yadidi kakamwe. Tsamba ineyi inakwanisa kuikhwa pakhundu mbikhonda kubvungazwa na tsamba inapangiza kuti pinthu pyakumanungo na unthaka wa munthu pinaphatisirwa tani. Ale akuti asanyerezera pya ntsogolo mwandzeru na mwaudziwisi asadziwa kuti nee asafunika kudikhira kukalamba kakamwe, peno kuduwala kakamwe toera kucita pyenepi. (Koel. 9:11) Kodi kuikha nyakufa kusafunika kucitwa tani, lini, pontho kusafunika kucitwa kupi, mbani asafunika kucita masasanyiro na kutsogolera makhundu onsene a masasanyiro akuikha nyakufa, ndi pinthu pyakufunika pyakuti pisafunika kudziwiswa pa ndzidzi wakuti munthu aciri maso, na waungumi wadidi.

⁹Anango anapiona kukhala pyakunentsa kulemba pitsogolero pyenepi mwanyapantsi pa tsamba. Mbwenye kucita pyenepi kusapangiza kukhala Nkristu wakukola mwauzimu, na waufuni. Ale akuti ali na cidziwiso ca undimomwene wa Bhibhlya, asadziwa kuti kucita masasanyiro anewa nkhabe kudzacimbizisa peno kucinja ntsiku yakufa kwa munthu. Mwandimomwene, pitsogolero pyakulembwa mwadidi pyakuti pisabvekesa pakweca kuti acibale akukhonda kukhulupira nee asafunika kucita khundu pa masasanyiro akuikha nyakufa, panango pinaacitisa kuipirwa peno kupinda. Natenepa, mphyadidi kucita masasanyiro anewa pa ndzidzi unakhala munthu maso, mbuto mwakusiya kuti pinthu picitwe na acibale akuti ali akutsukwala, akuti panango anakakamizwa toera kucita misambo yakukhonda cena yakuti nee ikhatawirwa peno kukhulupirwa na nyakulowa. (Afil. 2:⁠4) Kucita masasanyiro anewa akukhonda cenama ndi cipangizo ca ufuni wa munthu na citsalakano cace kwa anango.​—Aef. 5:28, 33.

¹⁰Kubverana Na Acibale Akuti Nee Ndi Mboni za Yahova: Anthu anagumanika m’mbuto zinango ali na nsambo wakugumanyikana mwakucimbiza, mbadzati kuikha nyakufa. Azinji asacemera kugumanyikana kweneu ninga phwando ya sumana. Cifuno cakugumanyikana kweneku ndi cakugumana kobiri na maonero a mwambo wakuikha nyakufa, pontho kusankhula ntsiku na kutonga kuti nyakufa anaikhwa tani. Pyakucitika pisapangiza kuti pa ndzidzi unoyu pana ngozwi ikulu kakamwe yakuti Nkristu anakwanisa kucitirwa pisankhulo na acibale akukhonda khulupira. Ninga mudaonera ife, Malemba asapangiza pakweca kuti nee tisafunika kutawirisa anyakukhonda khulupira kuti atsogolere khundu ibodzi ya masasanyiro akuikha nyakufa, mu ndzidzi wakuti mpingo ukutsogolera khundu inango. (2 Akor. 6:14) Natenepa, khala munthu adafa akhali Nkristu wakukhulupirika, nee mbipidakhala pyakuthema kutawirisa kuti acibale anango akukhonda khulupira acite “nsoka wakutsogolera” masasanyiro akuikha nyakufa. Nee ndi pyakufunika kuti piwalo pya mpingo pyakuti nee pisacita nkhundu ya banja ineyi pigumanike pa misonkhano inacitwa mbadzati kuikwa manungo a nyakufa peno kucita khundu m’masasanyiro akuikha nyakufa.

¹¹Banja Yacikristu isafunika kufokotoza mwadidi na mwakupirira masasanyiro adacitwa toera kuikha nyakufa. Khala acibale akukhonda khulupira ali dzololo toera kuphedzera masasanyiro anewa, mphyadidi kuatawirisa. Mphapo, ndiye tani khala piwalo pinango pya banja pisakakamira kucita misambo yakuipa na macitiro akukhonda cena? Mphyakufunika kukhala wakuwanga na wacilemedzo, mbwenye mbatifokotoza mwacipapo cikhulupiro cathu ninga Akristu. Mwandimomwene, kulongezana kunakwanisa kucalirwa khala nyakufa asiya tsamba ya pitsogolero pinapangiza masasanyiro akuikhwa kwace mwakubverana na pifuno pyace.

¹²Kusiyapo pyenepi, khala acibale akukhonda khulupira asapitiriza kufuna kucita masasanyiro onsene, mwandzeru, acibale akukhulupira anakwanisa kusiya kucita khundu m’masasanyiro onsene akuikha nyakufa. Pyenepi pingacitika, panakwanisa kucitwa nkhani ku Nyumba ya Umambo peno ku mbuto inango yakuthema toera kupereka ‘cibalangazo ca Malemba’ kwa ale akuti ali akutsukwala thangwi yakuferwa na nyakufunika wawo. (Arom. 15:4; Sal. 119:50) Ngakhale kuti manungo a nyakufa nee anagumanika, kucita masasanyiro anewa mbukudakhala kwakuthema na kwakutawirika kakamwe. (Deut. 34:5-6, 8) Ngakhale kuti macitiro a acibale akukhonda khulupira anathimizira nyatwa na kubva kupha thangwi ya kuferwa, ife tisabalangazwa mu kudziwa kuti kutonga kwathu kucita pinthu pyakulungama kusakomeresa Mulungu, wakuti asapereka “mphambvu yakupiringana yacibaliro” kwa atumiki ace akukhulupirika.​—2 Akor. 4:7, NM.