Kupirira Kutcingwa Kusaphedza Toera Kupereka Umboni Wadidi—Mphangwa izi zabuluswa mu Anuário das Testemunhas de Jeová de 2013

Myanmar (Birmanya)

Tsamba 124 ndima 1

Mukupita kwa ndzidzi, mu cisa cing’ono ca Mongpaw, cifupi na madire a nzinda wa China, nsoka wakuipirwa wa gereja ya Batista wapisa Nyumba ya Umambo. Na kuona kuti ukali wawo nee wagopesa Mboni za Yahova pacisa, nsoka unoyu wapisa nyumba ya mpainiya wakupambulika, mbutoma kuthusa abale na alongo m’mamidzi mwawo. Abale aphemba ciphedzo kuna ntongi wapacisa, mbwenye iye aphedzera nsoka wa Batista. Pakumalisira, utongi waphedza abale, mbutawirisa abale toera kumanga Nyumba ya Umambo ipswa​—tayu pa mbuto yakale kunkhomo kwa nzinda, mbwenye pakati pa nzinda!

Tsamba 128 ndima 1-2

Mu ndzidzi wakuti ana akukwana 23 a Mboni za Yahova akhonda kulambira bandera ku Khampat, nzinda wakuti uli pakati pa dziko ya Birmanya na Indiya, ntsogoleri wa xikola wakuti ndi nkazi, aabulusa pa xikola. Iye acemeresa akulu a mpingo awiri toera kugumanika pa nsonkhano ukhafuna iye kucita na nsoka ukulu wa atongi, kuphatanizambo nyakugwanda miseru wa nzinda na nkadamu wa anyankhondo. Paul Khai Khan Thang, m’bodzi wa akulu a mpingo alonga: “Mukhafokotoza ife Malemba anapangiza mathangwi a cikhulupiro cathu, akulu anango a utongi aipirwa kakamwe. Buluka penepo, taapangiza tsamba ya ntemo wa utongi unalonga kuti Mboni za Yahova zisatawiriswa ‘kulimira mwakumatama na mwacilemedzo mu ndzidzi wa maserimonya a bandera.’ Akulu a utongi asowa cakulonga. Mudakhurudzika iwo, nkadamu wa anyankhondo atonga kuti ntsogoleri wa xikola atawirise anyakupfundza adabuluswa toera kupitiriza kupfundza. Ntsogoleri wa xikola agawizambo makopya a tsamba ya ntemo kwa apfundzisi onsene a pa xikola ineyi.”

Lero, akulu a utongi wa dziko ya Myanmar asadziwa mwadidi unakatinakati wa Mboni za Yahova. Mukupitiriza kuphatisira mwakuwanga midida ya Bhibhlya, atumiki a Yahova asapereka umboni wadidi kakamwe, ninga mudalongera Yezu Kristu.​—Luka 21:13