Kulisani Nsambo Wakufika Nakweru
1. Ndi citsandzo cipi cakukhonda kudembuka cinakhazikisa Yahova?
1 Yahova cipo asadembuka. Mwacitsandzo, iye asapereka ciphedzo kuna atumiki ace ‘pa ndzidzi wakuthema.’ (Aheb. 4:16, Tradução do Novo Mundo) Iye asaperekambo cakudya cauzimu “pa ndzidzi wadidi [peno wakuthema.]” (Mat. 24:45) Natenepa, tinakwanisa kunyindira kuti ntsiku ya ukali wace ‘nee inadzadembuka.’ (Hab. 2:3, NM) Tisaphindula kakamwe na kukhonda dembuka kwa Yahova! (Sal. 70:5) Mbwenye ninga anthu akusowa ungwiro akuti ali na mabasa mazinji toera kucita, kufika nakweru kungakhale kwakunentsa kakamwe kwa ife. Thangwi yanji tisafunika kukulisa nsambo wakufika nakweru?
2. Thangwi yanji kufika nakweru kusapasa mbiri Yahova?
2 Mu ntsiku zino zakumalisa zakuti anthu azinji asafuna pyawo basi na akukhonda kudzitonga, kufika nakweru kusaoniwa ninga cinthu cakuti nkhabe kucitwa ndzidzi onsene. (2 Tim. 3:1-3) Natenepa, Nkristu angafika nakweru kubasa na pa misonkhano, anango asaona pyenepi, pontho pyenepi pisapasa mbiri Yahova.—2 Ped. 2:12. Kodi tiri na nsambo wakufika nakweru kubasa ya kudziko, mbwenye kazinji kene mbatifika mwakudembuka m’mabasa Acikristu? Kufika nakweru pa misonkhano Yacikristu, kusaphataniza kukhala nanthu pa nyimbo na phembero yakutoma, pyenepi pisapangiza cifuno ca kusangizira Babathu wakudzulu wakuti asacita pinthu munjira yadidi. (1 Akor. 14:33, 39)
3. Thangwi yanji kufika nakweru kusapangiza cilemedzo kwa anango?
3 Kufika nakweru kusapangizambo cilemedzo kuna anango. (Afil. 2:3, 4) Mwacitsandzo, tingafika nakweru pa misonkhano Yacikristu, kuphatanizambo misonkhano toera kuenda m’basa ya m’munda, alambiri andzathu nee asadzudzumika mwakusowa thangwi. Munjira inango, tingafika mwakudembuka ndzidzi onsene, pisapangiza kwa anango kuti tisaona ndzidzi wathu kukhala wakufunika kakamwe kupiringana wawo. Kufika nakweru kusapangiza kuti ndife akunyindirika, aphinga, na akukhulupirika—makhaliro akuti asakomeresa anthu onsene anatizungulira.
4. Khala kazinji kene tisafika mwakudembuka, tinakwanisa tani kusasanyira?
4 Khala kazinji kene nee musafika nakweru, nyerezerani mwacidikhodikho mathangwi anakudembukisani. Sasanyirani mwekhene mu kukhazikisa ndandanda yakulinganira yakuti inakuphedzani kucita mabasa anu pa ndzidzi wakuthema. (Koel. 3:1; Afil. 1:10) Phembani Yahova toera akuphedzeni. (1 Jwau 5:14) Kufika nakweru ndi njira ibodzi yakupangiza kuti tisabvera matongero makulu mawiri a Mwambo—kufuna Mulungu na kufuna ndzathu.—Mat. 22:37-39.