Makhaliro Adidi Asafungula Njira Toera Kubzwala Mbeu za Undimomwene​—Mphangwa zino zabuluswa mu Anuário das Testemunhas de Jeová de 2015

Europa

Mphambvu Yacilemedzo

Tsamba 73

Mu ntsiku 30 ya Murope ya 2014, Vasilii, anatumikira ku Beteli ya Rusiya m’pyaka pizinji, akhamwaza mphangwa mukuphatisira karinya ya mabukhu cifupi na ofesi ya filiali. Mwakukhonda dembuka, wafika pana iye motokala wa apolixa. Mpolixa atcita m’motokala mbapanga Vasilii toera asiye kucita basa yace, thangwi anyakuendekana anango adungunya pya iye. Mpolixa unango akhagravari vidyu ya makani anewa. Vasilii aona kuti mbapidakhala pyadidi kubvera pidalonga mpolixa mbuto mwakuthimbana naye thangwi ya ufulu wace. Pa ndzidzi unoyu, anyakupita na njira anango akhadalimira toera kuona pikhacitika. Vasilii abuluka, mbwenye pakupita ntsiku ziwiri iye aphemba toera kulonga na nkulu wa apolixa. Phembo yace yatawirwa. Nkati mwa makani awo, Vasilii apereka takhuta kuna nkulu wa apolixa thangwi ya basa yakufunika inacita apolixa kwa anthu a pacisa, pontho thangwi ya njira yadidi idalonga iwo na iye ntsiku ziwiri zidapita. Nkulu wa apolixa azungunuka mbalonga na nyakuphedzera wace kuti: “M’pyaka 32 pya basa yanga ya upolixa, uyu ndi munthu wakutoma kupereka takhuta thangwi ya basa yathu!” Nkati mwa kucedza kwawo, nkulu wa apolixa aphedzwa kubvesesa kuti basa yathu yakumwaza mphangwa ndi yakutawirika. Nkulu wa apolixa abvundza kuti thangwi yanji Vasilii, mbadziwa kuti ali na ufulu onsene wakucita basa yace nee apwekera mpolixa adamulimirisa kucita basa yace? Vasilii atawira: “Ndisalemedza apolixa. Nyerezerani kuti mbapidakhala tani khala ndalonga pamaso pa anthu ale onsene kuti mpolixa nkhabe kudziwa mwambo.” Nkulu wa apolixa na nyakuphedzera wace akhali akudzumatirwa kakamwe, mbapasa Vasilii cinyindiro cakuti kutomera ndzidzi unoyu nkhabepo anafuna kumpingiza kucita basa yace yakumwaza mphangwa.