Phembero Inandiphedza Tani?

Pidadzindikira Pamela kuti akhali na utenda wa cancro, iye asaka ciphedzo ca madotoro. Mbwenye iye acitambo phembero kuna Mulungu toera kuphemba mphambvu kuti apirire nyatwa yace. Kodi phembero yam’phedza?

Pamela alonga: “Mu ndzidzi ukhakondziwa ine utenda wanga wa cancro, kazinji kene ndikhagopa. Mbwenye pikhacita ine phembero kuna Yahova Mulungu ndikakhurudzika, pontho ndikhakwanisa kupirira nyatwa zanga mwakukhonda gopa. Ndisapitiriza kubva kupha kakamwe thangwi ya utenda wanga, mbwenye phembero isandiphedza toera kukhala na maonero akulinganira. Anthu angandibvundza kuti uli tani, ine ndisalonga: ‘Nee ndiri mwadidi maka, mbwenye ndiri wakukhurudzika!’”

Nee tisafunika kudikhira kuti tigwerwe na nyatwa toera titome kucita phembero. Ife tonsene tinathimbana na nyatwa, zikulu peno zing’ono; kazinji kene, tisafuna ciphedzo toera tikwanise kupirira nyatwa zathu. Kodi phembero inatiphedza?

Bhibhlya isalonga: “Siyirani Yahova nyatwa zanu zonsene, pontho iye anadzakuphedzani. Iye nkhabe kudzatawirisa kuti munthu wakulungama agwe.” (Masalmo 55:22) Ndi pyakutsandzayisa kakamwe kudziwa pyenepi. Mphapo phembero inakuphedzani tani? Mungacita phembero munjira inankomeresa, iye anakuphedzani toera mupirire nyatwa zanu.—Onani bokosi “Nkhombo Zinafuna Kukhala na Imwe Mungacita Phembero.”

Nkhombo Zinafuna Kukhala na Imwe Mungacita Phembero

Munakhala na ntendere wa m’manyerezero

“Dziwisani Mulungu maphembo anu kubulukira mu kucita phembero; natenepa, ntendere wa Mulungu wakuti usapiringana kubvesesa konsene, unadzatsidzikiza mitima yanu na manyerezero anu kubulukira mwa Kristu Yezu.” (Afilipi 4:6, 7) Mungadziwisa Mulungu pinthu pinakudzudzumisani, iye anakuphedzani toera mukhale wakukhurudzika mbamucita pinthu mwandzeru, ngakhale m’midzidzi yakunentsa.

Munakhala na Udziwisi

“Khala munthu nee ali na udziwisi wakukwana, mbapitirize kuuphemba kuna Mulungu, iye anadzaupaswa, thangwi Mulungu asapasa onsene mwakudzala manja, nee kusandika munthu.” (Tiyago 1:5) Tingathimbana na nyatwa, kazinji kene ife nee tisacita pisankhulo pyadidi. Tingacita phembero kuna Mulungu toera kuphemba udziwisi, iye anatiphedza toera kukumbuka uphungu wadidi unagumanika m’Mafalace, Bhibhlya.

Munakhala na mphambvu na cibalangazo

“Mu pinthu pyonsene, ine ndisakwanisa kukhala na mphambvu thangwi ya ule anandipasa mphambvu.” (Afilipi 4:13) Yahova ndi Mulungu wamphambvu zonsene, ndi thangwi yace iye anakwanisa kukupasani mphambvu zinafuna imwe toera mukwanise kupirira nyatwa. (Izaiya 40:29) Bhibhlya isalongambo kuti Yahova ndi “Mulungu wacibalangazo consene.” Iye anakwanisa kutibalangaza “mu nyatwa zathu zonsene.”—2 Akorinto 1:3, 4.