Phedzani Nyakupfundza Wanu wa Bhibhlya Toera Asankhule Kutumikira Yahova

1-2. (a) Thangwi yanji anyakupfundza Bhibhlya anango asanyinyirika toera kusankhula kutumikira Yahova? (b) Tinapfundzanji mu nsolo uno?

KODI imwe mwanyinyirika toera kukhala Mboni wa Yahova? Panango mukhagopa kuti andzanu akubasa, axamwali anu peno acibale anu mbadaipirwa na imwe thangwi yakukhala Mboni wa Yahova. Peno, panango mukhanyerezera kuti mbapidakhala pyakunentsa kuna imwe kubvera Yahova. Khala mwapibva tenepo, imwe musadziwa kuti anyakupfundza Bhibhlya anango asapibva tani, pontho thangwi yanji panango pinakhala pyakunentsa kuna iwo kucita cisankhulo cakukhala Mboni wa Yahova.

² Yezu akhadziwa kuti pinthu ninga pyenepi mbapidacitisa munthu kusiya kutumikira Yahova. (Mat. 13:20-22) Mbwenye iye apitiriza kuphedza ale akhanyinyirika toera kuntowera. Toera kucita pyenepi, iye aphedza anyakupfundzace (1) kudzindikira pikhaacimwanisa kuthambaruka, (2) aaphedza toera kufuna kakamwe Yahova, (3) aaphedza toera aikhe Yahova pa mbuto yakutoma mu umaso wawo, pontho (4) aapanga pikhafunika iwo kucita angatcingwa. Tinatowezera tani njira idapfundzisa Yezu mu ndzidzi unaphatisira ife bukhu Tsandzayani na Umaso Kwenda na Kwenda! toera kuphedza nyakupfundza wathu wa Bhibhlya toera asankhule kutumikira Yahova?

PHEDZANI NYAKUPFUNDZA WANU TOERA ADZINDIKIRE PINANCIMWANISA KUTHAMBARUKA

3. Ndi cinthu cipi cakuti panango cacimwanisa Nikodhemu kukhala nyakupfundza wa Yezu?

³ Nikodhemu akhali ntsogoleri wa Ayuda, mbwenye pakhali na cinthu cikhancimwanisa kukhala nyakupfundza wa Yezu. Basi ene pidapita miyezi mitanthatu Yezu mbakacita basa yace, Nikodhemu akhadziwa kuti Yezu ndi Mesiya. (Juw. 3:1, 2) Ngakhale tenepo, Nikodhemu asankhula kucedza na Yezu ncibisobiso, thangwi “akhagopa Ayuda.” (Juw. 7:13; 12:42) Panango iye akhagopa kuti mbadakhala nyakupfundza wa Yezu, mbadaluza mphambvu yace na mpfuma yace.a

4. Yezu aphedza tani Nikodhemu toera kubvesesa pikhafuna Mulungu kuti iye acite?

⁴ Nikodhemu akhadziwa Mwambo wa Mose, mbwenye akhafuna ciphedzo toera kubvesesa pikhafuna Yahova kuti iye acite. Mphapo Yezu amphedza tani? Mwakukoma ntima, Yezu aphatisira ndzidzi wace toera kucedza naye, ngakhale namasiku. Pontho Yezu apanga Nikodhemu pikhafunika iye kucita toera akhale nyakupfundza: Iye akhafunika kutcunyuka madawo ace, kubatizwa na madzi na kukhulupira Mwana wa Mulungu.—Juw. 3:5, 14-21.

5. Tinaphedza tani nyakupfundza Bhibhlya toera adziwe pinthu pinancimwanisa kutumikira Yahova?

⁵ Ngakhale kuti nyakupfundza asadziwa pinapfundzisa Bhibhlya, panango tinafunika kumpanga pinancimwanisa kutumikira Yahova. Basa yace peno acibale ace panango asancimwanisa kucita pinafuna iye toera kutumikira Yahova. Natenepa khalani dzololo toera kuphedza nyakupfundza wanu. Imwe munakwanisa kuncemera toera kudya naye pabodzi peno kupaseari naye. Mungacita pinthu pyenepi pabodzi, panango iye anakupangani pinancitikira, pontho imwe munakwanisa kudziwa pinan’nentsa. Wangisani nyakupfundza wanu toera kucita macinjo, tayu toera kukomeresa imwe, mbwenye toera kupangiza ufuni wace kuna Yahova.

6. Munaphedza tani nyakupfundza wanu toera akhale na cipapo cakuphatisira pinapfundza iye? (1 Akorinto 16:13)

⁶ Nyakupfundza Bhibhlya angakhala na cinyindiro cakuti Yahova anamphedza kucita pinthu pyadidi, iye anakhala na cipapo cakuphatisira pinapfundza iye. (Lerini 1 Akorinto 16:13.) Basa yanu inakwanisa kulandaniswa na basa ya mpfundzisi wakuxikola. Ndi mpfundzisi upi akhakomerwa na imwe kakamwe? Panango ndi mpfundzisi wakuti mwakupirira akhakuphedzani toera kukhala na cinyindiro cakuti imwe muli na maluso. Munjira ibodzi ene, mpfundzisi wa Bhibhlya wadidi, nee asapfundzisa basi ene nyakupfundza wace pinthu pinafuna Yahova kuti iye acite, mbwenye asamphedzambo toera akhale na cinyindiro cakuti iye anakwanisa kucita pinthu pyenepi, thangwi Yahova ali kumphedza. Munacita tani pyenepi?

PHEDZANI NYAKUPFUNDZA WANU WA BHIBHLYA TOERA AFUNE KAKAMWE YAHOVA

7. Yezu aphedza tani anthu akhambvesera toera afune kakamwe Yahova?

⁷ Yezu akhadziwa kuti kufuna Mulungu mbakudaphedza anyakupfundzace toera kuphatisira pikhapfundza iwo. Iye kazinji kene akhaapfundzisa pinthu pyakuti mbapidaaphedza toera kufuna kakamwe Babawo wakudzulu. Mwacitsandzo, iye alandanisa Yahova na mamuna wakuti asapasa pinthu pyadidi anace. (Mat. 7:9-11) Anthu anango akhabvesera Yezu nee akhali na Baba waufuni. Nyerezerani kuti iwo apibva tani pidalonga Yezu kuna iwo nsangani wa baba adatambira mwanace wakuti akhadacita pinthu pizinji pyakuipa. Iwo akwanisa kuona kuti Yahova asafuna kakamwe anthu, pontho asafuna kuaphedza.—Luka 15:20-24.

8. Munaphedza tani nyakupfundza wanu toera afune kakamwe Yahova?

⁸ Imwe munakwanisambo kuphedza nyakupfundza wanu wa Bhibhlya toera kufuna kakamwe Yahova mungampanga makhaliro adidi a Mulungu. Paulendo ubodzi na ubodzi unapfundza imwe, mphedzeni toera abvesese kuti pinapfundza iye pisapangiza tani kuti Yahova asatifuna. Mu ndzidzi unampfundzisa imwe thangwi ya Ciomboli, mphedzeni toera kubvesesa kuti Yahova nee acita pyenepi basi ene thangwi asafuna anthu onsene, mbwenye thangwi asafunambo iye. (Aroma 5:8; 1 Juw. 4:10) Nyakupfundza wanu panango anafuna Yahova, angaona kuti Yahova asanfunambo.—Agal. 2:20.

9. Ninji pidaphedza Michael toera kucita macinjo?

⁹ Onani pidacitikira Michael wa ku Indonezya. Michael akuzwa na anyakubala akuti ndi Mboni za Yahova, mbwenye iye nee akhadabatizwa. Pikhali iye na pyaka 18 pyakubalwa, aenda ku dziko inango toera kuphata basa ninga nyakutekenya karu. Mukupita kwa ndzidzi, iye amanga banja ku Indonezya, mbwenye asiya banjace mbapitiriza kuphata basa mu dziko inango. Mu ndzidzi unoyu, nkazace na mwanace wankazi atoma kupfundza Bhibhlya, pontho akhaphatisira pikhapfundza iwo. Pidafa mai wace, Michael abwerera kunyumba toera kutsalakana pai wace, pontho atawira kupfundza Bhibhlya. Pikhapfundza iye khundu yakuti “Dziwani Pizinji” ya nsolo 27 wa bukhu yakuti Tsandzayani na Umaso Kwenda na Kwenda!, Michael akhuyiwa kakamwe. Mu ndzidzi udanyerezera iye kutsukwala kudakhala na Yahova thangwi yakuthabuka kwa Mwanace, Michael alira. Iye atoma kupereka takhuta kakamwe thangwi ya Ciomboli, pontho pyenepi pyamphedza toera kucita macinjo mbabatizwa.

PHEDZANI NYAKUPFUNDZA WANU TOERA AIKHE YAHOVA PA MBUTO YAKUTOMA

10. Yezu aphedza tani anyakupfundzace toera atumikire Yahova mwaphinga? (Luka 5:5-11) (Onanimbo foto.)

¹⁰ Anthu anango akhatowera Yezu akhadziwa kuti iye akhali Mesiya, mbwenye akhafunika kuphedzwa kubvesesa kuti iwo akhafunika kuikha Yahova pa mbuto yakutoma mu umaso wawo. Pedhru na Andreya akhali kale anyakupfundza mu ndzidzi udaapanga Yezu toera antowere. (Mat. 4:18, 19) Iwo pabodzi na Tiyago na Juwau akhacita basa yakusodza nyama za m’madzi, pontho pisaoneka kuti basa yawo ikhafamba mwadidi. (Marko 1:16-20) Pedhru na Andreya ‘pidasiya iwo makokota awo,’ panango akhadacita masasanyiro akutsalakana mabanja awo mu ndzidzi ukhatowera iwo Yezu. Ninji pidaaphedza toera kuona basa yakumwaza mphangwa ninga yakufunika kakamwe kupiringana kobiri? Bukhu ya Luka isapangiza kuti Yezu acita pirengo pyakuti pyawangisa cinyindiro cawo cakuti Yahova mbadakwanisa kuatsalakana.—Lerini Luka 5:5-11.

11. Tinaphatisira tani pinthu pidaticitikira toera kuwangisa cikhulupiro ca nyakupfundza wathu?

¹¹ Ife nee tinakwanisa kucita pirengo ninga Yezu, mbwenye tinakwanisa kulonga pinthu pidaticitikira pinapangiza kuti Yahova asaphedza ale anamuikha pa mbuto yakutoma mu umaso wawo. Mwacitsandzo, musakumbuka kuti Yahova akuphedzani tani pidatoma imwe kwene kugumanika pa misonkhano? Panango imwe mwacedza na patrau wanu mbamumpanga kuti nee mbamudakwanisabve kuphata basa maora extra khala pyenepi mbapidakupingizani kugumanika pa misonkhano. Mu ndzidzi unalonga imwe pinthu pidakucitikirani kuna nyakupfundza wanu, fokotozani kuti cikhulupiro canu cawangiswa tani thangwi yakuona kuti Yahova akupasani nkhombo thangwi ya pisankhulo pidacita imwe toera kumuikha pa mbuto yakutoma.

12. (a) Thangwi yanji tisafunika kuphemba abale na alongo akusiyana-siyana toera atiperekere pa pfundziro yathu ya Bhibhlya? (b) Ndi cinthu cipi cinango cakuti munakwanisa kuciphatisira toera kuphedza nyakupfundza wanu kuikha Yahova pa mbuto yakutoma? Perekani citsandzo.

¹² Nyakupfundza wanu anaphedzekambo angabvesera pinthu pidacita abale na alongo anango toera kuikha Yahova pa mbuto yakutoma. Natenepa, phembani abale na alongo akusiyana-siyana toera akuperekereni pa pfundziro yanu ya Bhibhlya. Aphembeni toera afokotoze kuti adziwa tani undimomwene, pontho ndi pinthu pipi pidacita iwo toera kuikha Yahova pa mbuto yakutoma. Kusiyapo pyenepi, onani pabodzi na nyakupfundza wanu mavidhyu a khundu yakuti “Dziwani Pizinji” peno “Toera Kudziwa Pinango” m’bukhu yakuti Tsandzayani na Umaso Kwenda na Kwenda!. Mwacitsandzo, mu ndzidzi unapfundza imwe nsolo 37 mbamuona vidhyu ya nsolo wakuti Ndzidzi Onsene Yahova Anadzatsalakana Pyakufuna Pyathu, cedzani thangwi ya vidhyu ineyi, pontho phedzani nyakupfundza wanu toera aone kuti angaikha Yahova pa mbuto yakutoma, Yahova anamphedza.

PHEDZANI NYAKUPFUNDZA WANU TOERA ADZIWE PINAFUNIKA IYE KUCITA ANGATCINGWA

13. Yezu akhunganya tani anyakupfundzace toera apirire kutcingwa?

¹³ Mwakubwereza-bwereza, Yezu apanga anyakupfundzace kuti iwo mbadatcingwa, ngakhale na acibale awo. (Mat. 5:11; 10:22, 36) Mbadzati kufa, Yezu aapanga kuti panango iwo mbadaphiwa thangwi yakulambira Yahova. (Mat. 24:9; Juw. 15:20; 16:2) Iye aacenjeza toera acite mphole-mphole mu utumiki wawo. Pontho aapanga toera akhonde kuketesana na ale anaatcinga toera akwanise kupitiriza kumwaza mphangwa.

14. Tinaphedza tani nyakupfundza wathu wa Bhibhlya toera adziwe pinafunika iye kucita angatcingwa? (2 Timoti 3:12)

¹⁴ Ninga Yezu, ife tinakwanisa kupanga nyakupfundza wathu pinthu pyakuti panango andzace akuxikola, akubasa, axamwali na acibale anapilonga thangwi yakusankhula kwace kupfundza Bhibhlya. (Lerini 2 Timoti 3:12.) Andzace anango akubasa panango anansingirira thangwi yakupfundza Bhibhlya. Anangombo, ngakhale acibale anamulonga mwakuipa. Ndi pyadidi kakamwe kuphedza anyakupfundzathu toera kukhunganyika nakweru pinafuna iwo kulonga mbadzati kutcingwa. Thangwi munjira ineyi, nee anadzumatirwa pyenepi pingacitika.

15. Ninji pinafuna kuphedza anyakupfundza Bhibhlya toera apirire angatcingwa na acibale?

¹⁵ Khala nyakupfundza wanu ali kutcingwa na acibale, mphedzeni kunyerezera mathangwi akuti panango asacitisa acibale ace anango kuntcinga. Acibale ace anango panango asanyerezera kuti Mboni za Yahova zisapfundzisa uthambi peno ndi anthu akuipa. Ngakhale acibale anango a Yezu, nee akhakomerwa na pinthu pikhacita iye. (Marko 3:21; Juw. 7:5) Pfundzisani nyakupfundza wanu toera apitirize kukhala wakupirira na wacilemedzo kuna anango, kuphatanizambo acibale ace.

16. Tinaphedza tani nyakupfundza Bhibhlya toera kupanga anango mwacilemedzo pinapfundza iye?

¹⁶ Maseze acibale a nyakupfundza wanu akhale na cifuno cakudziwa thangwi ya Bhibhlya, ndi pyadidi kuti nyakupfundza wanu akhonde kuyesera kufokotoza pinthu pizinji ndzidzi ubodzi ene. Iye angacita pyenepi, acibale ace ananeta thangwi yakubvesera pinthu pizinji kakamwe, pontho nee anafunabve kucedza na iye thangwi ya Bhibhlya. Natenepa, wangisani nyakupfundza wanu toera alonge pinapfundza iye mwacigwagwa. Angacita pyenepi, iwo anafuna pontho kucedza naye thangwi ya Bhibhlya. (Akol. 4:6) Panango iye anakwanisa kupanga acibale ace toera apite mu saiti jw.org. Pyenepi pinaaphedza toera apfundze pizinji thangwi ya Mboni za Yahova.

17. Munaphedza tani nyakupfundza wanu toera akwanise kutawira mibvundzo yakuti panango iye anaicitwa thangwi ya Mboni za Yahova? (Onanimbo foto.)

¹⁷ Imwe munakwanisa kuphatisira khundu ya mu jw.org ya nsolo wakuti “Perguntas Frequentes” toera kuphedza nyakupfundza wanu kudziwa kuti anatawira tani angacitwa mibvundzo na andzace akubasa peno acibale. (2 Tim. 2:24, 25) Pakumala kupfundza nsolo ubodzi na ubodzi, cedzani thangwi ya khundu yakuti “Anthu Anango Asalonga” ya bukhu yakuti Tsandzayani na Umaso Kwenda na Kwenda! Pangani nyakupfundza wanu toera ayesere kutawira na mafala ace ene. Lekani kunyinyirika toera kumpanga kuti anatawira tani munjira yadidi. Kucita pyenepi kunamphedza toera akwanise kufokotoza pinakhulupira iye na cinyindiro.

18. Munaphedza tani nyakupfundza wanu toera atome kumwaza mphangwa pabodzi na abale na alongo mu mpingo? (Mateu 10:27)

¹⁸ Yezu apanga anyakupfundzace toera amwaze mphangwa zadidi. (Lerini Mateu 10:27.) Nyakupfundza angatoma kumwaza mphangwa pabodzi na abale na alongo mu mpingo, iye anaona kuti Yahova ali kumphedza, pontho anatoma kun’nyindira kakamwe. Munaphedza tani nyakupfundza wanu toera kucita pyenepi? Mu ndzidzi wa kampanya mucisa canu, phedzani nyakupfundza wanu toera adziwe pinafunika iye kucita kuti akhale m’mwazi mphangwa. Mpangeni kuti thangwi yanji ndi pyakukhonda nentsa kutoma kumwaza mphangwa mu ndzidzi wa kampanya. Cinthu cinango cakuti cinakwanisa kumphedza, ndi kucita nkhani pa misonkhano ya pakati pa sumana. Mu ndzidzi unawangisira iye toera kucita pyenepi, iye anapfundza kulonga pinakhulupira iye na cinyindiro.

PANGIZANI KUTI MUSANYINDIRA NYAKUPFUNDZA WANU

19. Yezu apangiza tani kuti akhanyindira anyakupfundzace, pontho ife tinantowezera tani?

¹⁹ Yezu mbadzati kuenda kudzulu, apanga anyakupfundzace kuti na ntsiku yace, iwo anadzakhala pontho pabodzi. Iwo nee abvesesa kuti Yezu akhalonga pya kuenda kwawo kudzulu. Maseze iwo nee akhabvesesa pinthu pyonsene, Yezu akhali na cinyindiro cakuti iwo akhafuna kutsandzayisa Yahova. (Juw. 14:1-5, 8) Iye akhadziwa kuti pakhafunika ndzidzi toera iwo abvesese pinthu pinango; cibodzi mwa pinthu pyenepi cikhali cidikhiro cakuenda kudzulu. (Juw. 16:12) Ninga Yezu, ife tinakwanisambo kupangiza kuna anyakupfundzathu kuti tisadziwa kuti iwo asafuna kutsandzayisa Yahova.

20. Mulongo Chifundo apangiza tani kuti asanyindira nyakupfundza wace?

²⁰ Khalani na cinyindiro cakuti nyakupfundza wanu asafuna kucita pinthu pyadidi. Onani citsandzo ca mulongo Chifundo wa ku Malawi. Iye atomesa pfundziro ya Bhibhlya na bukhu yakuti Tsandzayani na Umaso Kwenda na Kwenda! na ntsikana wa gereja katolika anacemerwa Alinafe. Mu ndzidzi ukhapfundza iwo nsolo 14, Chifundo abvundza nyakupfundza wace maonero ace thangwi yakuphatisira madzimunthu pakulambira. Alinafe aipirwa mbatawira: “Ceneci ndi cisankhulo ca munthu paekha!” Buluka penepo, Chifundo anyerezera kuti panango Alinafe anasiya kupfundza Bhibhlya. Mbwenye iye apitiriza kupfundza na Alinafe na cidikhiro cakuti na ntsiku yace, iye anabvesesa kuti kuphatisira madzimunthu pakulambira ndi pyakuipa. Pidapita miyezi mingasi, Chifundo ancita mbvundzo unagumanika mu nsolo 34: “Mpaka pano, kupfundza thangwi ya mphangwa zinagumanika m’Bhibhlya na kupfundza thangwi ya Yahova Mulungu wandimomwene, kwakuphedzani tani?” Chifundo alonga tenepa thangwi ya ntawiro wa Alinafe: “Iye alonga pinthu pizinji pyadidi. Cibodzi mwa pinthu pyenepi ndi cakuti Mboni za Yahova nee zisacita pinthu pyakuti Bhibhlya isakhondesa.” Mwakukhonda dembuka, Alinafe asiya kuphatisira madzimunthu, pontho abatizwa.

21. Tinaphedza tani nyakupfundza wathu toera asankhule kutumikira Yahova?

²¹ Maseze Yahova ndi ‘ule anakulisa,’ ife tinakwanisa kuphedza nyakupfundza wathu wa Bhibhlya toera aphatisire pinapfundza iye. (1 Akor. 3:7) Ife tisacita pizinji kupiringana basi ene kumpfundzisa pinthu pinafuna Mulungu kuti iye acite. Tisamphedza toera afune kakamwe Yahova. Kusiyapo pyenepi, tisampanga toera aikhe Yahova pa mbuto yakutoma mu umaso wace toera apangize kuti asanfuna. Pontho tisampfundzisa kuti iye anakwanisa kukhala na cinyindiro cakuti Yahova anamphedza angatcingwa. Tingapangiza kuna nyakupfundza kuti ife tiri na cinyindiro cakuti iye asafuna kutsandzayisa Yahova, ife tinamphedza toera akhale na cipapo cakusankhula kutumikira Yahova.