Wangisanani Unango na Ndzace

Ife tonsene tisakomerwa tingawangiswa na abale na alongo athu. Bhibhlya isalonga kuti kuwangisana cikhulupiro unango na ndzace ndi “nkhombo zauzimu.” (Aroma 1:11, 12) Kuwangisana ndi pyakusiyana kakamwe na kukhala basi ene pabodzi. Mphapo tisafunika kucitanji toera tikhale na cinyindiro cakuti tikuphatisira mwadidi nkhombo ineyi?

Wangisani anango na mafala anu. Mwacitsandzo, pakupereka mitawiro pa misonkhano nee ndi pyadidi basi ene kulonga manyerezero athu. M’mbuto mwace, ndi pyadidi kulonga pidapfundza ife thangwi ya Yahova, thangwi ya Bhibhlya na atumiki a anango akukhulupirika. Pakucedza na abale na alongo athu, tisafunika kulonga pinthu pinawangisa cikhulupiro cathu na cikhulupiro cawo.

Wangisani anango bulukira ku pisankhulo pinacita imwe na pinthu pinacita imwe. Abale anango asawangisira kupitiriza m’basa ya ndzidzi onsene maseze ali kunentseka. Anangombo asawangisira kakamwe toera kugumanika pa misonkhano midzidzi yonsene. Iwo asacita pyenepi maseze ali kuduwala peno amala kuneta. Khala imwe muli kuthimbana na nkandzo unoyu, ngakhale pikhale pyakunentsa kuna imwe, kuwangisira kwanu kusawangisambo abale na alongo anango.

Musaona tani? Kodi imwe musawangisa abale na mafala anu peno na pinthu pinacita imwe? Kodi imwembo muli dzololo toera kuwangiswa na pinthu pinacita anango peno pinalonga iwo?