Mibvundzo Inacitwa na Anyakuleri

Ndi ‘manyerezero’ api akuti thimize pano Mulungu anaaikha m’mitima mwa mautongi?

Bukhu ya Apokalipse 17:16, 17 isalonga tenepa thangwi yakutoma kwa nyatwa ikulu: “Nyanga khumi zidaona iwe na cikala pinadzaida nkazi wauputa; iwo anadzansakaza mbansiya cipezipezi, pontho anadzadya manungo ace, mbampisa onsene pa moto. Thangwi Mulungu aikha m’mitima yawo cifuno cakucita pinanyerezera iye, inde, toera acite cinthu cibodzi basi cinanyerezera iwo, kupereka umambo wawo kuna cikala.” Kale, mabukhu athu akhalonga kuti ‘manyerezero’ anafuna kuikha Yahova m’mitima mwa mautongi ndi kufudza mauphemberi authambi.

Mbwenye tafunika kucinja kubvesesa kwathu. ‘Manyerezero’ anafuna kuikha Yahova m’mitima mwa mautongi ndi a “kupereka umambo wawo kuna cikala.” Toera tibvesese kuti profesiya ineyi inakwanirisika tani, tendeni titawire mibvundzo mingasi.

Mbani anthu analongwa pa profesiya ineyi? “Nkazi wauputa,” anacemerwa “Bhabhilonya Wankulu” asaimirira mauphemberi authambi. ‘Cikala cakufira’ cisaimirira Nações Unidas. Nsoka unoyu wakhazikiswa mu caka ca 1919 na cifuno cakukhazikisa ntendere pa dziko yonsene, pontho ukhacemerwa Liga das Nações. (Apok. 17:3-5) “Nyanga khumi” zisaimirira mautongi onsene anaphedzera cikala.

Nkazi wauputa na cikala cakufira pisabverana tani? Nkazi wauputa ‘ali nawa’ pa cikala. Pyenepi pisabveka kuti iye asaphedzera cikala, pontho asayesera kucitonga.

Ninji pinafuna kucitikira nkazi wauputa? Cikala na nyanga khumi “pinadzaida nkazi wauputa” mbapikwata mpfuma yace yonsene mbapangiza anthu kuti iye ndi wakuipa. Buluka penepo, iwo anadzafudza nkazi wauputa mwakubverana na pidalonga Yahova. (Apok. 17:1; 18:8) Ndi munjira ineyi inafuna kufudzwa mauphemberi onsene authambi. Mbwenye pyenepi mbapidzati kucitika, Yahova anacitisa mautongi kucita cinthu cakuti cipo cacitika kale na anthu.

Yahova anacitisa mautongi kucitanji? Iye anacitisa mautongi kucita “pinanyerezera iye” peno kupereka mphambvu zawo na utongi wawo kuna cikala [cakufira] cakuti ndi Nações Unidas. (Apok. 17:13) Pyenepi pisabvekanji? Kodi mautongi anapereka okhene mphambvu zawo na utongi wawo kuna cikala? Nkhabe. Profesiya isapangiza kuti ndi Mulungu anafuna kuacitisa kucita pyenepi. (Apok. 21:1; onani Izaiya 44:28.) Kodi pyenepi pinacitika mwapang’ono na pang’ono? Nkhabe! Pinacitika mu ndzidzi ubodzi ene. Buluka penepo, cikala cinafudza mauphemberi authambi ninga munafuna Yahova.

Mphapo tisafunika kudikhiranji? Nee tisafunika kudikhira kuona peno kubvesera mphangwa zinalonga kuti mautongi mwapang’ono na pang’ono ali kuphedzera Nações Unidas. Pinafunika ife kudikhira ndi pyakuti: Mwakukhonda dikhira na mu ndzidzi ubodzi ene, Yahova anacitisa kuti mautongi apereke mphambvu zawo kuna cikala. Pyenepi pingacitika tinadziwa kuti nyatwa ikulu iri dhuzi. Mu ndzidzi unadikhira ife pyenepi, tendeni “tikhonde kuodzira mbatipitiriza kukhala na manyerezero adidi,” thangwi thimize pano pinthu pinacinja mwakucimbiza.—1 Ates. 5:6.