12 Kukhazikisa Pifuno

PYENEPI PISABVEKANJI

Kukhazikisa pifuno nee ndi basi ene ndoto peno kunyerezera pinthu pinafuna ife. Mbwenye kusaphataniza kucita masasanyiro na kuwangisira toera kukwanisa pinthu pinafuna ife.

Pana pifuno pyakusiyana-siyana. Pifuno pya ndzidzi wakucepa (pyakuti tinapikwanirisa nkati mwa ntsiku zingasi peno masumana mangasi), pya ndzidzi uzinji (pyakuti tinapikwanirisa nkati mwa miyezi), na pya ndzidzi uzinji kakamwe (pyakuti tinapikwanirisa nkati mwa caka cibodzi peno pizinji). Pifuno pya ndzidzi uzinji kakamwe pinakwanirisika kubulukira mu pifuno pinango ping’ono.

THANGWI YANJI MPHYAKUFUNIKA KUKHAZIKISA PIFUNO?

Kukhazikisa na kukwanirisa pifuno kunakuphedzani toera munyindirike, mukhale na uxamwali wadidi na anango, pontho toera mukhale wakutsandzaya.

Kunyindirika: Mungakhazikisa pifuno ping’ono mbamupikwanirisa, imwe munakhala na cinyindiro cakuti munakwanisa kukhazikisa pifuno pikulu mbamupikwanirisa. Pontho munakhalambo na cinyindiro cakuti munakwanisa kuthimbana na nyatwa za ntsiku na ntsiku, ninga mikakamizo ya andzanu a kuxikola.

Uxamwali: Azinji asakomerwa kukhala pabodzi na anthu anakhazikisa pifuno, akuti ndi anthu anadziwa pinafuna iwo, pontho asawangisira toera kupikwanirisa. Kusiyapo pyenepi, cinthu cibodzi cakuti cinatiphedza toera tikhale na uxamwali wakuwanga ndi kuphata basa pabodzi na ndzathu toera kukwanirisa cifuno cibodzi cene.

Kutsandzaya: Mungakhazikisa pifuno mbamupikwanirisa, imwe munakomerwa mbamuona kuti mwakwanisa pinthu pikhafuna imwe.

Christopher alonga: “Ine ndisakomerwa kakamwe na kukhazikisa pifuno. Pisandiphedza toera ndikhale na pinthu pyakucita, pontho pisandiphedza toera ndidziwe pinthu pinafuna ine. Kusiyapo pyenepi, mungakwanirisa pifuno, imwe munakumbuka pya nduli mbamulonga: ‘Ndakwanisa kucita pikhafuna ine.’”

PINALONGA BHIBHLYA: “Ule anayang’ana mphepo nee anabzwala mbeu, pontho ule anayang’ana makole nee anabvuna.”—Ekleziaste 11:4.

PINAFUNIKA IMWE KUCITA

Towezerani maonero awa toera kukhazikisa na kukwanirisa pifuno:

Sankhulani pifuno pinafuna imwe kukwanirisa. Citani ndandanda ya pifuno, buluka penepo sankhulani pinafuna imwe kuikha pa mbuto yakutoma, yaciwiri, yacitatu, mpaka kukwanirisa pyonsene pinafuna imwe.

Masasanyiro. Toera mukwanirise cifuno cibodzi na cibodzi, citani ipi:

• Khazikisani ndzidzi wakumalisa toera mukwanirise cifuno.

• Citani masasanyiro a pyonsene pinafunika imwe kucita toera mukwanirise cifuno canu.

• Nyerezerani pinentso pyakuti pinakupingizani, pontho nyerezerani kuti munapikunda tani.

Tomani kucita pinthu toera kukwanirisa cifuno canu. Nee musafunika kudikhira pinthu pyonsene pinafunika toera mutome kucita pinthu kuti mukwanirise cifuno canu. Bvundzikani: ‘Ndi cinthu cipi cakutoma cinafunika ine kucita toera ndikwanirise cifuno canga?’ Buluka penepo, mungacidzindikira, tomani kucicita. Pontho lembani pyonsene pinakwanirisa imwe

PINALONGA BHIBHLYA: ‘Pinanyerezera kucita munthu waphinga pisafamba mwadidi.’—Misangani 21:5.