Munakwanisa Tani Kufikira Pifuno Pyanu Pyauzimu
1 Mokhonda penula, ninga aphale na atsikana Acikristu pifuno pyanu m’umaso pisakhuyiwa na kufuna kwanu Yahova pabodzi na mafala a Yezu kwa Akristu onsene akuti ‘sakani pakutoma dziko [peno umambo] ya kudzulu.’ (Mat. 6:33) Pifuno pyanu panango ndi kuthimizira utumiki wanu m’kutumikira ninga mpainiya peno kutumikira ku mbuto yakuti iri na kusowa kukulu kwa amwazi mphangwa a Umambo. Anango anganyerezere kuperekeka m’basa ya kumanga Nyumba za Umambo, kutumikira ku filiali, kupita m’Escola de Treinamento Ministerial peno kutumikira ninga mpainiya wakupambulika. Ndi pifuno pyakukomeresa na pyakusimbika tani!
2 Ciphedzo cibodzi towera kufikira pifuno pyanu ndi kupilemba. A Sentinela ya 15 de Julho de 2004 yalonga tenepa: ‘Pinanyerezera ife pisabveka mwadidi tingapilonga m’mafala akulinganira. Panango mungafune kulemba pifuno pyanu na pinanyerezera imwe kucita towera kupifikira.’ Mwakuthimizira, pifuno pyakufikirwa m’nzidzi wakucepa pingakwanise kukuphedzani kuona kuenda kwanu kutsogolo munapitiriza imwe kusaka kufikira pifuno pya nzidzi uzinji.
3 Pifuno Pya Nzidzi Wakucepa: Khala imwe musati kubatizwa, onani pinafunika imwe kucita towera kufikira cifuno ceneci. Panango mungafunike kubvesesa mwadidi pipfunziso pyakutoma pya Biblya. Khala ndi tenepa, khalani na cifuno ca kupfunza Biblya mwacidikhodikho m’kuphatisira bukhu yakuti Biblya isapfunzisanji, mbamusaka malemba onsene akusowa mafala m’ndima. (1 Tim. 4:15) Khalanimbo na cifuno ca kuleri Biblya yamumphu kutomera pa Genesi mpaka Apokalipse, ninga pinaphembwa kucita anatumikira ku Beteli na anyakupfunza xikola ya Gileadi. Mungamala kucita pyenepi, khalani na ndandanda okhonda phonya wa kuleri Biblya ntsiku na ntsiku. (Sal. 1:2, 3) Nyerezerani kuti pyenepi pinadzakuphedzani tani kukula mwauzimu! Tomani na malisani kuleri na kupfunza Biblya na phembero yakubulukira m’ntima, na m’nzidzi onsene sakani kuphatisira pinapfunza imwe.—Tgo. 1:25.
4 Khala mwamala kubatizwa, kodi ndi pifuno pipi pinango pyakuti mungakwanise kupitiriza kupisaka? Kodi musafuna kusasanyira luso yanu ya kumwaza mphangwa? Mwacitsanzo, kodi mungakwanise kukhala na cifuno ca kuphatisira mwaluso Mafala a Mulungu m’utumiki wa mmunda? (2 Tim. 2:15) Kodi munakwanisa tani kuthimizira utumiki wanu? Khalani na pifuno pyakuthonyeka pya nzidzi wakucepa pyakuti pisabverana na thunga na makhaliro anu pyakuti pinadzakuphedzani kufikira pifuno pyanu pya nzidzi uzinji.
5 Mbiri Yakupembera: Mudaenda Tony wa piaka 19 pyakubalwa kaona filiali ya Mboni za Yahova, iye akhala na cifuno ca kutumikira ku Beteli. Mbwenye, ntundu wa umaso wace ukhali kutali na pyenepi, na akhadasati kuperekeka kwa Mulungu. Tony asankhula kubveranisa umaso wace na njira za Yahova na acita ceneci kukhala cifuno cace towera kukhala wakutawirika kubatizwa. Pakumala kufikira cifuno ceneci, iye akhala na cifuno ca kutumikira ninga mpainiya wakuphedza na buluka penepo mpainiya wa nzidzi onsene, na alemba m’kalendariu mwace ntsiku za kufuna kutoma. Onani kuti akomerwa tani, mudacemerwa iye kuti aende katumikira ku Beteli pakumala kutumikira ninga mpainiya m’nzidzi ungasi!
6 Imwe mungakwanisembo kufikira pifuno pyanu pyauzimu munasaka imwe kuikha pifuno pya Umambo m’mbuto yakutoma. Pitirizani ‘m’mabasa anu’ pamaso pa Yahova m’phembero na wangisirani mwacidikhodikho towera kupifikira.—Mis. 16:3; 21:5.
[Study Questions]
1. Kodi ndi pifuno pipi pyauzimu piri na aphale na atsikana azinji?
2. Kodi ndi ninji pyakuti pingakwanise kukuphedzani kufikira pifuno pyanu pyauzimu?
3. Tcululani pifuno pingasi pya nzidzi wakucepa pyakuti pingakwanise kucitisa munthu kukhala wakutawirika ku ubatizo.
4. Kodi ndi pifuno pipi pya nzidzi wakucepa pinafunika kukhala na Nkristu ali na pifuno pya nzidzi uzinji ninga kutumikira ku Beteli peno kutumikira ninga mpainiya wakupambulika?
5. Kodi kukhala na pifuno pya nzidzi wakucepa kwaphedza tani mbale unango kufikira cifuno cace ca kutumikira ku Beteli?
6. Kodi ndi ninji cakuti cingakwanise kukuphedzani kufikira pifuno pyanu pyauzimu?