Yezu Abwerera Kudzulu

MUKHAPITA ntsiku, Yezu apionesa kwa atowereri ace m’maulendo mazinji. Ntsiku inango duzi na anyakupfunza 500 amuona. Kodi musadziwa kuti Yezu aapanga pinthu pyanji mudaonekera iye kwa iwo? Umambo wa Mulungu. Yahova atumiza Yezu pa dziko yapantsi towera kudzapfunzisa pya Umambo. Na iye apitiriza na kucita pyenepi ngakhale pakumala kulamuswa kwa akufa.

Kodi musakumbuka kuti umambo wa Mulungu ndi ninji? Inde, Umambo ndi utongi wandimomwene wa Mulungu kudzulu, na Yezu ndi Ule adasankhula Mulungu kuti akhale mambo. Ninga tapfunza kale, Yezu apangiza kuti iye anadzakhala mambo wakudzumatirisa tani m’kudyesa anjala, kuwangisa anyakuduwala, na kubweresa kwene akufa ku umaso!

Natenepa munadzatonga Yezu ninga mambo kudzulu m’piaka cikwi, kodi dziko yapantsi inadzakhala tani? Inde, dziko yonsene yapantsi inadzacitwa kukhala paradizu wakubalika. Nee munadzakhalabve nkhondo, upandu, peno kuduwala, ngakhale kufa. Tisadziwa kuti ipi ndimomwene thangwi Mulungu acita dziko yapantsi kukhala paradizu kuti anthu atsanzaye. Ndi thangwi ineyi pakutoma iye acita munda wa Edeni. Yezu anadzatsalakana kuti pakumalisira pikwaniriswe pire pikhafuna Mulungu kuti picitike.

Ukhadafika mphapo nzidzi wakuti Yezu abwerere kudzulu. M’ntsiku 40 Yezu apipangiza kwa anyakupfunzace. Natenepa iwo akhadziwadi kuti iye ali maso pontho. Mbwenye mbasati kusiya anyakupfunzace iye aapanga: ‘Khalani m’Yerusalemu mpaka kutambira nzimu wakucena.’ Nzimu wakucena ndi mphambvu yakuphata basa ya Mulungu, sawasawa na mphepo inapepesa, wakuti mbudadzaphedza atowereri ace kucita cifuno ca Mulungu. Pakumalisira, Yezu alonga: ‘Musafunika kumwaza mphangwa za ine mpaka ku madromero a dziko.’

Mudamala Yezu kulonga ipi, cinthu cakudzumatirisa cacitika. Iye atoma kukwira kudzulu, ninga musakwanisa kuona pano. Buluka penepo ntambo wamphimbira kuti akhonde kuoneka, na anyakupfunza nee aona pontho Yezu. Yezu abwerera kudzulu, na iye atoma kutonga atowereri ace pa dziko yapantsi kubulukira penepale.