Khundu 10
Dziko Ipswa Yakudzumisa Yakucitwa Na Mulungu
1, 2. Kodi ndi ninji cinafuna kudzacitika nkhondo ya Harmagedoni ingamala kucenesa dziko?
KODI ndi ninji cinafuna kudzacitika nkhondo ya Mulungu ya Harmagedoni ingamala kucenesa dziko? Unadzatoma nzidzi upswa wambiri. Ale anafuna kudzapulumuka pa Harmagedoni, akuti amala kupangiza kukhulupirika kwawo kwa utongi wa Mulungu, anadzapita m’dziko ipswa. Unoyu unadzakhala nzidzi upswa wakukomeresa kakamwe wambiri unafuna banja ya anthu kudzakhala na maphindu akudzumisa akubuluka kwa Mulungu!
2 Pantsi pa citsogolero ca Umambo wa Mulungu, anyakupulumuka anadzatoma kucita paradizu. Iwo anadzaphatisira mphambvu zawo m’mabasa akupangiza kufuna akuti anadzaphindulisa anthu onsene anafuna kudzakhala maso m’nzidzi unoyu. Dziko yapantsi inadzatoma kusanduzwa mbikhala mudzi wa anthu wakubalika, wantendere na wakutsanzayisa.
Ulungami Unadzapitira Mbuto Uipi
3. Kodi ndi ufulu upi unafuna kudzakhala pakumala kwene Harmagedoni?
3 Pinthu pyenepi pyonsene pinadzakwanisika thangwi ya kufudzwa kwa dziko ya Sathani. Nee panadzaonekabve mauphemberi authambi, pigawiko pya anthu peno mautongi akugawana-gawana. Nee panadzaonekabve uthambi wa Sathani towera kunyengeta anthu; anthu na pigawiko pyonsene pinatomesa uthambi unoyu pinadzafudzwa pabodzi na makhaliro a Sathani. Nyerezerani pyenepi: nzimu onsene wakupha wa dziko ya Sathani unadzamala! Ndi ufulu ukulu tani unafuna kudzakhalapo!
4. Fokotozani kucinja kwa pipfunziso kunafuna kudzacitika.
4 Buluka penepo manyerezero akufudza a utongi wa anthu anadzapitirwa mbuto na pipfunziso pyakuwangisa pinabuluka kwa Mulungu. “Ine ndekha [Yahova] ndinapfundisa anthu ako.” (Izaiya 54:13) M’kukhala na cipfunziso ceneci cadidi caka na caka, “dziko inadzala na udziwisi wa Mulungu sawasawa ninga mudadzalira bara na madzi.” (Izaiya 11:9) Anthu hanadzapfunzabve pinthu pyakuipa tayu, mbwenye “anthu onsene anapfundza pyakulungama.” (Izaiya 26:9) Anthu anadzakhala na manyerezero na mabasa akuwangisa ntsiku zonsene.—Machitiro 17:31; Afilipi 4:8.
5. Kodi ndi ninji cinafuna kudzacitikira uipi onsene na anthu akuipa?
5 Natenepa, nee panadzaonekabve kuphiwa kwa anthu, uphanga, upombo wakukakamiza, kuba peno ntundu unango wa usumankha. Nee munthu mbodzi anadzaona nyatwa thangwi ya mabasa akuipa a anango. Misangani 10:30 isalonga: “Nyaulinganiri chipo anadzatekenyeka mbwenye nyakusowa ulinganiri anadzasoweka pantsi pano.”
Kubwezerwa Kwa Ungumi Waungwiro
6, 7. (a) Kodi ndi undimomwene upi wakupha ntima unafuna kudzamaliswa na utongi wa Umambo? (b) Kodi Yezu apangiza tani pyenepi mukhakhala iye pa dziko yapantsi?
6 M’dziko ipswa, pyakuipa pyonsene pidabwereswa na upanduki wakutoma pinadzamala. Mwacitsanzo, utongi wa Umambo unadzamalisa utenda na kukalamba. Lero, ngakhale mukhale na ndida ungasi wa ungumi wadidi, undimomwene wakupha ntima unaoneka ndi wakuti munakalamba imwe, maso anu nkhabebve kuona mwadidi, mano anu asakhutcika, makutu anu nkhabebve kubva mwadidi, khanda yanu isakhala na makhwinya, piwalo pyanu nkati mwa manungo anu pisafewa, mbumumalisira na kufa.
7 Mbwenye, mokhonda dembuka pyakubwereswa pyenepi pyakutsukwalisa pidatambira ife kwa anyakubala athu akutoma pinadzamala. Kodi musakumbuka pidapangiza Yezu thangwi ya ungumi mukhakhala iye pa dziko yapantsi? Biblya isalonga: “Anthu azinji adza kuna iye na akuchimwana kufamba na akulamala na aboliboli na adrodombo mbaayikha pa myendo yache. Mbwenye iye aawangisa. Mwinji wa anthu wadzuma pa kuona kuti [abewewe] akhalonga, akulamala akhawanga, akuchimwana kufamba akhafamba, aboliboli akhaona.”—Mateo 15:30, 31.
8, 9. Fokotozani kutsanzaya kunafuna kudzakhalapo m’dziko ipswa anthu angamala kubwezerwa ungumi waungwiro.
8 Ndi kutsanzaya kukulu tani kunafuna kudzaoneka m’dziko ipswa nyatwa zathu zonsene zingamala! Nyatwa zinabwereswa na ungumi wakufewa cipo zinadzatithabusa pontho. “Nee mbodzi anakhala n’dziko mwathu anadzadwala.” “Penepo aboli-boli anadzaona pontho, madrodombo anadzabva na makutu awo. Anyanfutete anadzafamba mbanumpha ninga mbawala, alembo anachimwana kulonga anadzakhuwa na kusekera.”—Izaiya 33:24; 35:5, 6.
9 Kodi pinadzakhala pyakukomeresa tayu kulamuka namacibese onsene mbamudziwa kuti muli na ungumi wadidi? Kodi pinadzakhala pyakukomeresa tayu kwa anthu akugwesera kudziwa kuti abwezerwa mphambvu zawo zonsene za uphale na anadzakhala na ungwiro ukhakhala na Adamu na Eva pakutoma? Pikiro ya Biblya ndi iyi: “Manungo ache anadzakhala pontho ninga a mphale, iye mbadzabwerera pontho ku ungumi wa kale.” (Yobe 33:25) Pinadzakhala pyakukomeresa tani kutaya maorko, mitcini yakuphedza munthu kubva, muleta, njinga za anyakulamala na mitombwe! Nyumba za ungumi, madotoro na akonzi a mano nee anadzafunikabve tayu.
10. Kodi ndi ninji cinafuna kudzacitikira kufa?
10 Anthu anafuna kudzakhala na ungumi unoyu wadidi nee anadzafuna kufa tayu. Iwo nee anadzafa, thangwi anthu anadzapulumuswa ku kusowa ungwiro na kufa kudatambira iwo. Kristu “apangwa kutonga mpaka kuti anyamalwa ache onsene akhale pa manyalo ache. Nyamalwa anadzamalisira kundwa ndi kufa.” “Pinapasa Mulungu ndi moyo wakukhonda kumala.”—1 Akorinto 15:25, 26; Aroma 6:23; onani pontho Izaiya 25:8.
11. Kodi bukhu ya Apokalipse isalonga tani mwacigwagwa maphindu a dziko ipswa?
11 M’kulonga mwacigwagwa maphindu akubuluka kwa Mulungu wacitsalakano anafuna kudzakhala na banja ya anthu m’Paradizu, bukhu yakumalisa ya Biblya isalonga: “Iye ene Mulungu anadzakhala pabodzi na anthu, mbapukuta misozi yonsene m’maso mwawo. Kufa hakunadzakhala’po pontho tayu, nee kutsukwala, nee kulira, nee nyatwa, thangwi pya kale pyamala.”—Apokalipse 21:3, 4.
Anyakufa Anadzakhala Pontho Maso
12. Kodi Yezu apangiza tani mphambvu yace yakulamusa anthu muli akufa idapaswa iye na Mulungu?
12 Yezu acita pizinji kupiringana kuwangisa atenda na anyakulamala. Iye alamusambo anthu akuti akhali m’nthumbi. Natenepa iye apangiza mphambvu yakudzumisa yakulamusa anthu muli akufa idapaswa iye na Mulungu. Kodi musakumbuka nzidzi udaenda Yezu kunyumba ya mamuna wakuti mwana wace wankazi akhadafa? Yezu alonga kwa ntsikana wakufa: “Ntsikana, ine [ndisakupanga], lamuka.” Kodi ndi ninji cidacitika? “Ndzidzi wenewu ene ntsikana alamuka mbafamba.” M’kuona pyenepi, anthu akhali penepo “adzumirathu kakamwe.” Iwo acimwana kukoya citsanzayo cawo!—Marko 5:41, 42; onani pontho Luka 7:11-16; Jwau 11:1-45.
13. Kodi ndi anthu api anafuna kudzalamuswa muli akufa?
13 M’dziko ipswa, “[munadzaoneka] kulamuka muli akufa kwa anthu adidi na kwa akuipambo.” (Machitiro 24:15) M’nzidzi unoyu Yezu anadzaphatisira mphambvu yace idapaswa iye na Mulungu towera kulamusa anyakufa, thangwi iye alonga, “Ine ndine kulamuka na moyo. Munthu munthu ananditawira, ngakhala iye amala kufa kale, anadzakhala na moyo.” (Jwau 11:25) Pontho iye alonga: “Anthu onsene anagona mu nthumbi [m’manyerezero a Mulungu] anadzabva mafala ache [Yezu]. Penepo iwo anadzalamukambo.”—Jwau 5:28, 29.
14. Nakuti kufa nkhabe kudzakhalapobve, kodi ndi pinthu pipi pinafuna kudzamaliswa?
14 Panadzakhala citsanzayo cikulu tani pa dziko yapantsi ungadzafika nzidzi wakulamuswa kwa misoka na misoka ya anthu adamala kufa towera akhale pontho maso mbagumanikana na anyakufunika awo! Nkhabebve kudzabviwa pidziwiso pyaciriro towera kutsukwalisa anyakupulumuka. Mbuto mwa pyenepi, panadzakhala pinthu pyakusiyana: pidziwiso pya anthu akumala kwene kulamuswa muli akufa towera kubweresa citsanzayo kwa ale anaafuna. Natenepa, nkhabebve kudzakhala mabasa akuikha anyakufa, moto wakupisa anyakufa, mbuto zakupisira anyakufa, peno masiye!
Dziko Ya Ntendere Wandimomwene
15. Kodi profesiya ya Mikeya inadzakwanirisika tani m’ndida wakukwana?
15 Panadzakhala ntendere wandimomwene m’makhundu onsene a umaso. Nkhondo, anthu anazitomesa na mafabirika a pida pya nkhondo pinadzakhala pinthu pyakale. Thangwi yanji? Thangwi kupambulana kwa anthu thangwi ya ntupo, dzinza na ntundu wa khanda pinadzamala. Buluka penepo, pa ndida wakukwana, “penepombo anthu anadzasiya kuchitirana nkhondo, chipo anadzapfundza pina pya nkhondo.”—Mikeya 4:3.
16. Kodi Mulungu anadzacita tani towera nkhondo zikhonde citwa pontho?
16 Pyenepi pingakwanise kuoneka ninga pyakudzumisa thangwi ya mbiri ya anthu yakucucisa ciropa m’nkhondo zokhonda mala. Mbwenye pyenepi pisacitika thangwi anthu ali pantsi pa utongi wa anthu anzawo na mademonyo. M’dziko ipswa, pantsi pa utongi wa Umambo, ipi ndi pinafuna kudzacitika: “Bwerani kudzaona mabasa a Mbuya . . . Ndiye anamalisa nkhondo pantsi ponsene; ndiye anakhobola mawuta, anabswa madipa, anapisa ngolo za nkhondo na moto.”—Masalmo 46:8, 9.
17, 18. M’dziko ipswa, kodi ndi uxamwali wa ntundu wanji unafuna khalapo pakati pa anthu na pinyama?
17 Anthu na pikala pinadzakhala pa ntendere, ninga pikhacitika m’Edeni. (Genesi 1:28; 2:19) Mulungu asalonga: “Ntsiku izo ndinachita chibverano na pikala pyonsene na mbalame zonsene . . . mbandikhalisa mbumba yanga mu ntendere.”—Ozeya 2:20 [2:18, NM].
18 Kodi ntendere unoyu unadzafika mpaka papi? “Mibindzi na mabira anakhala pabodzi, mbapfulikirana. Anyarugwe anagona duzi na anambuzi. Anang’ombe na anankhalamu anadya pabodzi pene mbaonerwa na ana ang’ono basi.” Pinyama nkhabe kudzathusa pontho anthu peno pinyama pinango. Ngakhale “nkhalamu zinadya mawudzu ninga ng’ombe”!—Izaiya 11:6-9; 65:25.
Dziko Yapantsi Inadzasanduzwa Mbikhala Paradizu
19. Kodi dziko yapantsi inadzasanduzwa mbikhala tani?
19 Dziko yonsene yapantsi inadzasanduzwa mbikhala mudzi wa anthu wa paradizu. Na thangwi ineyi Yezu apikira mamuna akhankhulupira: “Unadzakhala m’parayizo pabodzi na ine pano.” Biblya isalonga: “Thando inadzasekera, maluwa mbaoneka m’mataka akuwuma. . . . Mikulo ya madzi inadzanyukira mbifamba n’thando.”—Luka 23:43; Izaiya 35:1, 6.
20. Thangwi yanji njala cipo inadzathabusa pontho anthu?
20 Pantsi pa Umambo wa Mulungu, njala cipo inadzathabusa pontho mamiliyau a anthu. “Ku dziko kwonsene kukhale utende, utende wa mapira na pa mapiri ene.” “Miti ene inadzabala misapo mizinji, kubvunambo mbakuoneka kazinji, munthu-munthu mbakhalika pyache n’dziko mwache.”—Masalmo 72:16; Ezekyele 34:27.
21. Kodi ndi ninji cinafuna kudzacitikira anthu akusowa nyumba, pisa pya acerengi na pisa pyausumankha?
21 Nkhabe kudzakhalapobve ucerengi, anthu akusowa nyumba, pisa pya acerengi, peno pisa pyakudzala na usumankha. “Munthu-munthu nyumba inamanga iye njache ene kwenda na kwenda na munda wa mawuva udatcheka iye. Vinyu yache inadzamwiwa na iye mambo onsene.” “Munthu na munthu anadzakhalika pyache mu ntendere pantsi pa miti yache ya mawuva na ya misambvu nee kudzudzumiswa na chinthu tayu.”—Izaiya 65:21, 22; Mikeya 4:4.
22. Kodi Biblya isafokotoza tani nkhombo za utongi wa Mulungu?
22 Anthu anadzapaswa pinthu pyenepi pyonsene, na pinango, m’Paradizu. Masalmo 145:16 isalonga: “Munafungula dzanja yanu [Mulungu] mbamupikhutisa mu utende mwanu pyonsene pina moyo.” Na thangwi ineyi profesiya ya Biblya isalonga: “Anyakupfulika anakhala na dziko, mbakomerwa na ntendere ukulu kakamwe. . . . “Anyakulungama anatambira dziko, mbakhala [mwenemo] kuenda na kuenda.”—Masalmo 37:10 [37:11, NM], 29.
Kufudzwa Kwa Pinthu Pyakale
23. Kodi Umambo wa Mulungu unadzafudza tani nyatwa zonsene zinatamba ife?
23 Utongi wa Umambo wa Mulungu unadzafudza pyakuipa pyonsene pidacitikira banja ya anthu m’piaka pikwi pitanthatu pidamala. Utsanzayi m’nzidzi unoyu unadzapiringana nyatwa zonsene zidatamba anthu. Umaso nee unadzanenseka na kunyerezera nyatwa zakale. Pang’ono na pang’ono, manyerezero na mabasa akuwangisa anafuna kudzacita anthu m’umaso wa ntsiku na ntsiku anadzafudza manyerezero akutsukwalisa.
24, 25. (a) Kodi ndi ninji pidalongeratu Izaiya kuti pinadzacitika? (b) Thangwi yanji tingakwanise kukhala na cibaso cakuti manyerezero a nyatwa zakale anadzafudzika?
24 Mulungu wacitsalakano asalonga: “Ndinadzachita papswa kudzulu [utongi upswa wakudzulu unafuna kutonga anthu] na pantsi [mbumba yakulungama ya anthu]. Pya kale pinadzadwalikirathu kakamwe. Iwe Yerusalemu utsandzaye mbukomerwa napyo.” “Apo chinchino madziko onsene anapfulika mbatsandzaya pyawo.”—Izaiya 14:7; 65:17, 18.
25 M’kuphatisira Umambo wace, Mulungu anadzacinjiratu pinthu pyakuipa pyakuti pisacitika m’nzidzi uzinji. Iye anadzapangiza kwenda na kwenda citsalakano cikulu kwa ife m’kutikhuthulira nkhombo zakuti zinadzapiringana nyatwa zonsene zidatamba ife m’piaka pya nduli. Nyatwa zidatamba ife kale zinadzafudzika m’manyerezero, khala ife tinadzafuna kupinyerezera.
26. Thangwi yanji Mulungu anadzatipasa nkhombo thangwi ya nyatwa zidatamba ife kale?
26 Ndi m’njira ineyi inafuna kutipasa Mulungu nkhombo thangwi ya nyatwa zinapirira ife m’dziko ino. Iye asadziwa kuti ife nkhabe mulando thangwi yakubalwa akusowa ungwiro, thangwi tatambira kusowa ungwiro kwa anyakubala athu akutoma. Ife nkhabe mulando thangwi yakubalwa m’dziko ya Sathani, thangwi Adamu na Eva mbadakhala akukhulupirika, ife mbitidabalwa m’paradizu. Natenepa na ntsisi zikulu Mulungu anadzacita pizinji kupiringana kutibulusa m’pyakuipa pyakale pikhadatigwera.
27. Kodi m’dziko ipswa tinadzaona kukwanirisika kwa maprofesiya api akudzumisa?
27 M’dziko ipswa, anthu anadzakhala na ufulu udalongerwatu pa Aroma 8:21, 22: “[Pyakucitwa] pinadzaomboliwa mu ubichu wakuipa towera pione ufulu wa mbiri wa ana a Mulungu. Ande, tinadziwa kuti mpaka lero ene pinthu pyonsene pidachitwa pinabulira thangwi pinabva nyatwa ninga nkazi pa kulekwa na mwana.” M’nzidzi unoyu anthu anadzaona kukwanirisika kwa phembero yakuti: “Dziko [peno umambo] yanu mbidze kuna ife. Pinafuna imwe mbapichitwe pantsi pano ninga kudzulu.” (Mateo 6:10) Makhaliro akudzumisa m’Paradizu ya dziko yapantsi anadzapangiza makhaliro a kudzulu.
[Mafoto pa tsamba 23]
M’dziko ipswa, anthu akugwesera anadzabwezerwa mphambvu zawo za uphale
[Foto pa tsamba 24]
Mautenda na kulamala konsene pinadzamala m’dziko ipswa
[Foto pa tsamba 25]
M’dziko ipswa, anyakufa anadzalamuswa mbakhala pontho maso
[Foto pa tsamba 26]
‘Anthu chipo anadzapfundza pya nkhondo’
[Mafoto pa tsamba 27]
Anthu na pinyama anadzakhala m’ntendere ukulu m’Paradizu
[Foto pa tsamba 27]
‘Mulungu anadzafungula dzanja yace mbakhutisa mu utende pyonsene pina moyo’
[Foto pa tsamba 28]
Umambo wa Mulungu unadzacita pizinji kupiringana kumalisa nyatwa zonsene zidapirira ife