Umaso M’Dziko Ipswa Yantendere

Mungayang’ana chithunzithunzi pa katsamba kano, musava tani? Ntima wanu nkhabe kufuna tayu ntendere, kukomerwa na kutsanzaya kunawoneka penepa? Ndimomwene kuti inde. Mbwenye, kungakhale basi ninga ndoto peno mpheketsera, kutawira kuti pinthu penepi nsiku yace pinadzakhalapo pa dziko yapantsi?

Anthu adzinji panango alikunyeredzera kuti inde. Piripo lero ndi nkhondo, usumankha, njala, utenda, kukalamba​—kuthula basi pyakulengeseka. Napyonsene, pali thangwi ya cidikhiriro. Pakuyang’ana kutsogolo, Bibilya isati “Mulungu atipikirira kudzulu kupswa na pantsi pano papswa. Penepo panakhalabve pyakuipa tayu, thangwi panachitwa pinafuna Mulungu basi. Ndi pantsi penepo papswa panadikhira ife.”​—2 Pedro 3:13, Mphangwa Zadidi; Izaiya 65:17.

“Kudzulu kupswa” kweneku na “pantsi pano papswa” ninga pisalonga Bibilya, sikudzulu kupswa kwa thupi peno pantsi pano papswa pamataka tayu. Pantsi pano na kudzulu kwathupi pyaumbiwa mwadidi kakamwe, natenepa Bibilya isawonetsa kuti pinakhalapo kwenda na kwenda. (Masalmo 89:36, 37; 104:5) “Pantsi pano papswa” ndi mbumba ya anthu akulungama anafuna dzakhala pa dziko yapantsi, “kudzulu kupswa” ndi umambo, peno utongi, wakulungama kakamwe wa kudzulu, unafuna dzatonga mbumba ineyo ya anthu pa dziko yapantsi. Mbwenye, ndi kakamwe kutawira kuti “pantsi pano papswa”, peno dziko ipswa yakudzala na mbiri, inakwanitsikadi?

Inde, nyeredzerani kuti pinthu penepi pikhacita khundu ya cifuniro cakutoma ca Mulungu na dziko yapantsi. Iye aikha banja yakutoma yaumunthu mu paradizu ya pa dziko yapantsi ya Yedeni, mbaapasa basa yadidi kakamwe: “Balanani muinjipe, mudzadze dziko yapantsi, na kuingonja.” (Genesi 1:28) Inde, Mulungu akhafuna kuti iwo akhale na ana nakuti patsogolo pace akulitse paradizu wawo mpanka pa dziko yonsene yapantsi. Ngakhale kuti pakupita kwa ndzidzi iwo asankhula kukhonda bvera Mulungu, mbapangisa natenepa kuti acimwana kukhala na umaso wakukhonda mala, cifuniro cakutoma ca Mulungu hacida cinja tayu. Natenepa cinati cikwanitsike m’dziko ipswa!​—Izaiya 55:11.

Ndimomwene kuti, mungaphembera phembero ya Baba wathu, mbamuphemba kuti Umambo wa Mulungu udze, mulikuphemba utongi wa kudzulu kuti ubulutse kuipa pa dziko yapantsi nakuti utonge dziko ipswa ineyi. (Mateo 6:9, 10) Natenepa tingakhulupire kuti Mulungu anadzatawira phembero ineyo, thangwi Mafala aace apikira: “Akulungama anapasiwa dziko yapantsi mbadzakhalamo kwenda na kwenda.”​—Masalmo 37:29.

Umaso m’Dziko Ipswa ya Mulungu

Umambo wa Mulungu udzabweretsa pa dziko yapantsi udidi wakukhonda kulandanitswa, mbudzakwaniritsa pinthu pyadidi pyonsene pikhafuniwa na Mulungu pakutoma kuti anthu ace atsandzaye napyo pa dziko yapantsi. Kuidana na tsankhulo pinadzamala, na pakumalitsira pace anthu onsene pa dziko yapantsi anadzakhala axamwali akakamwe unango na ndzace. M’Bibilya, Mulungu apikira kuti ‘adzamalitsa nkhondo mpaka kumadromero a dziko yapantsi’. “Ntundu nkhabe kudzathukulabve trasada kumenyana na ntundu unango, nee dzapfundzirabve nkhodo tayu.”​—Masalmo 46:9; Izaiya 2:4.

Pakumalitsira pace dziko yonsene yapantsi idzakhala ninga munda wa malwa. Bibilya isati: “Thando na mbuto yakuuma zinadzakomerwa, dziko yakusowa makata, inadzakomerwa na kuphukira ninga safarau. . . . Thangwi m’thando mudzabuluka madzi, na mikulo m’dziko yosowa makata. Natenepa mataka akuuma adzatsanduka kukhala mitete, na dziko yosowa madzi, idzatsanduka kukhala micera yamadzi.”​—Izaiya 35:1, 6, 7.

Padzakhala thangwi yonsene yakupangisa kukhala wa kukomerwa pa dziko yapantsi ya paradizu. Cipo na cipo anthu adzakhala na njala thangwi ya kusowa pyakudya. “Dziko yapantsi inadzapereka misapo yace”, isalonga Bibilya. (Masalmo 67:6; 72:16) Onsene anadzadya misapo ya basa yawo, ninga mwenemo, Nciti wathu apikira: “Anadzacheka miyuva mbadzadya misapo yace . . . nkhabe dzacheka mbadzadya ndi unango tayu.”​—Izaiya 65:21, 22.

M’dziko ipswa ya Mulungu, anthu nkhabe dzakhala pontho akupanikidzana mu nyumba zikulu zikulu dzamidadada peno m’nyumba dzakusowa ucesa, thangwi Mulungu apikirira: “Anadzamanga nyumba mbadzakhalamo . . . Iwo nkhabe dzamanga mbadzakhala ndi unango.” Bibilya isapikira pontho: “Iwo nkhabe dzaphata basa papezi tayu.” (Izaiya 65:21-23) Mwatenepa, anthu anadzakhala na basa yakuphindulitsa na yakukomeretsa. Umaso nkhabe dzakhala wakunetesa tayu.

Pa ndzidzi wace, Umambo wa Mulungu udzabwedzera civerano cantendere cikakhalapo m’mumda wa Yedeni pakati pa pinyama, na pakati pa pinyama na anthu. Bibilya isati: “Mbindzi, unadzakhala pabodzi na mwanabira na nyalugwe anadzagona pantsi na mwanambuzi, na mwanang’ombe, na mwanankhalamu, na cifuyo ca kunenepa, pabodzipene; natenepa mwana mphale anadzakhala nkumbizi wapyo.”​—Izaiya 11:6-9; Ozeya 2:18.

Nyeredzerani, m’dziko yapantsi ya paradizu matenda onsene na kulamala kwa thupi kunadzakonzwa! Mafala a Mulungu asatidumbirira: “Akukhalamo nkhabe dzalonga: ‘Ndirikuduwala.’” (Yesaya 33:24) “[Mulungu] anapukuta misozi yonsene m’maso mwawo. Kufa kunaoneka pontho tayu, née kutsukwala, née kubulira, née kupha. Pikhakhala kale pyamala.”​—Apokalipse 21:4, MZ.

Mungapikwanitse Tani

Ndimomwene ntima wanu ungakhale wakudikitira na mapikiriro anewa a Mulungu a umaso m’dziko yace ipswa ya udidi. Natenepa, ngakhale kuti anango anganyeredzere kukwanitsika kwa nkhombo dzenezi kukhala pinthu pyadidi kakamwe kuti pikhale pya ndimomwene, ipyo sipyadidi maka tayu kuti pibulukire kwa Nciti wathu wa cifuno.​—Masalmo 145:16; Mikeya 4:4.

Ndimomwene, toera kuti tikhale na umaso wa kwenda na kwenda m’paradizu ya kutsogolo ya pa dziko yapantsi, pali mitemo yofunika kwiicita. Yezu aupangisa ubodzi wa ikulu ikulu, pakulonga m’phembero kwa Mulungu: “Ndiwo moyo wakukhaliratu kuti anthu akudziweni imwe, Mulungu mbodzi kakamwe, mbadziwambo Yezu Kristu adatumwa na imwe.”​—Jwau 17:3, MZ.

Natenepa, ngati tisafunadi kukhala na umaso m’dziko ipswa ya Mulungu, tisafunika pakutoma kupfundza cifuniro ca Mulungu buluka penepo mbaticicita. Thangwi, ndipyopene kuti: “Pantsi pano na pyonsene pinasirira anthu a penepo, pinamala. Mbwenye anachita pinafuna Mulungu hanamala tayu,” toera atsandzaye kwenda na kwenda na nkhombo dzakuthirirwa na Nciti wathu wa cifuno.​—1 Jwau 2:17, MZ.

Kusiapo ngati pali cidzindikiro cinango, mafala onsene a Bibilya adathulwa muno mbakubulukira mu New World Translation of the Holy Scriptures​—With References.