Pfunziro 5
Kodi Cifuniro Ca Mulungu Na Dziko Yapantsi Ndi Cipi?
Thangwi yanji Yahova acita dziko yapantsi? (1, 2)
Thangwi yanji dziko yapantsi lero si paradizu tayu? (3)
Kodi ndi ninji cinafuna citikira anthu anacita pyakuipa? (4) Kutsogolo, kodi Yezu anadzacitanji kwa anyakuduwala? anyakukalamba? anyakufa? (5, 6)
Towera kutambira nkhombo zakutsogolo, kodi imwe musafunika kucitanji? (7)
1. Yahova acita dziko yapantsi towera anthu akwanise kutsanzaya na umaso mwenemu kwenda na kwenda. Iye akhafuna kuti nzidzi onsene dziko yapantsi ikhaliwe na anthu akulungama na akutsanzaya. (Masalmo 115:16; Izaiya 45:18) Cipo dziko yapantsi inadzafudzwa; iyo inadzakhala kwenda na kwenda.—Masalmo 104:5; Koelete [Mlaliki] 1:4.
2. Mulungu mbasati cita munthu, Iye asankhula pa dziko yapantsi khundu ing’ono mbaicita kukhala paradizu wakubalika. Iye aicemera munda wa Edeni. Ndi mwenemu mudaikha iye mamuna na nkazi wakutoma, Adamu na Eva. Cifuniro ca Mulungu kwa iwo cikhali cakuti abale ana na adzadze dziko yonsene yapantsi. Pang’ono na pang’ono iwo mbadasanduza dziko yonsene yapantsi kukhala paradizu.—Genesi 1:28; 2:8, 15.
3. Adamu na Eva mwanyakhomo adawa mu kuswa mwambo wa Mulungu. Natenepa Yahova aathamangisa m’munda wa Edeni. Paradizu atayika. (Genesi 3:1-6, 23) Mbwenye Yahova hadaduwala tayu cifuniro cace na dziko ino yapantsi. Iye akupikira kubweresa pontho paradizu, munafuna kudzakhala anthu kwenda na kwenda. Kodi iye anadzacita tani pyenepi?—Masalmo 37:29.
4. Dziko ino yapantsi mbisati kukhala paradizu, anthu anacita pyakuipa asafunika kufudzwa. (Masalmo 37:38) Pyenepi pinadzacitika pa Harmagedoni, nkhondo ya Mulungu yakumalisa uipi. Patsogolo pace, Sathani anadzaikhwa nkaidi mu piaka 1.000. Pyenepi pisabveka kuti nkhabe kudzasala pina nyakucita pyakuipa towera kufudza dziko yapantsi. Mbumba ya Mulungu basi ndiyo inafuna kudzapulumuka.—Apokalipse 16:14, 16; 20:1-3.
5. Buluka penepo Yezu Kristu anadzatonga ninga Mambo pa dziko ino yapantsi mu piaka 1.000. (Apokalipse 20:6) Pang’ono na pang’ono iye anadzabulusa madawo m’manyerezero na m’manungo mwathu. Ife tinadzakhala anthu aungwiro tenepa ninga mukhakhala Adamu na Eva mbasati kudawa. Buluka penepo, nee panadzakhalabve utenda, kukalamba na kufa. Anyakuduwala anadzawangiswa na anyakukalamba anadzakhala pontho aphale.—Yobe 33:25; Izaiya 33:24; Apokalipse 21:3, 4.
6. Nkati mwa Utongi wa Yezu wa Piaka Cikwi, anthu akukhulupirika anadzaphata basa towera kusanduza dziko yonsene yapantsi kuti ikhale paradizu. (Luka 23:43) Pontho, mamiliyau a anyakufa anadzalamuswa muli akufa towera akhale maso pa dziko yapantsi. (Machitiro 24:15) Angacita pinafuna Mulungu kwa iwo, iwo anadzapitiriza kukhala maso kwenda na kwenda pa dziko yapantsi. Angakhonda cita pinafuna Mulungu, iwo anadzafudzwa kwenda na kwenda.—Jwau 5:28, 29; Apokalipse 20:11-15.
7. Mu njira ineyi cinadzakwanirisika cifuniro cakutoma ca Mulungu na dziko yapantsi. Kodi imwe musafunambo kutsanzaya na nkhombo zenezi zakutsogolo? Khala ndi tenepo, musafunika kupitiriza kupfunza pya Yahova na kubvera matongero ace. Kugumanika pa misonkhano ya mpingo pa Nyumba ya Umambo ya Mboni za Yahova kungakwanise kukuphedzani kucita pyenepi.—Izaiya 11:9; Ahebere 10:24, 25.
[Foto pa tsamba 10]
Paradizu wakutayika
[Foto pa tsamba 11]
Pakumala Harmagedoni, dziko yapantsi inadzasanduzwa mbikhala paradizu