Pfunziro 13

Ombedza Na Ufiti Mphyakuipa

Satana asafuna kuti imwe muombedze. Anthu azinji asapereka ntsembe kwa makholo awo akufa peno ku mizimu yawo towera kupitsidzikiza kwa pyakuipa. Asacita pyenepi thangwi asagopa mphambvu yamizimu ya akufa. Asabvala mphete peno mikufu ya kuombedzerwa. Asamwa “mitombwe” peno asaidzola m’manungo mwawo thangwi asanyerezera kuti ina mphambvu ya kuombedzerwa. Anthu anango asabisa m’zinyumba zawo peno pantsi mitombwe inanyerezerawo kuti ina mphambvu ya kutsidzikiza. Anango asaphatisira basa “mitombwe” ya kuombedzerwa thangwi asakhulupira kuti ineyi inaabweresera kupembera m’malonda, m’malesero aku xikola peno m’kubvunzira.

Tsidzikizo yadidi ina imwe pa kumenyana na Satana ndi kukhala na Yahova ninga xamwali anu. Yahova Mulungu na maanju ace ndi a mphambvu pikulu pene kupiringana Satana na madimoni ace. (Tyago 2:19; Apokalipse 12:9) Yahova ali wakufunisa kuonesa mphambvu ace towera kuphedza axamwali ace—ale anakhulupiratu kwa iye.—2 Pya dziko ya Israele 16:9.

Mafala a Mulungu asati: “Lekani kuombedza.” Yahova asaida kuombedza na ufiti, thangwi macitacita anewa asakwanisa kuikha munthu m’nkati mwa mphambvu ya Satana, Diyabu.—Levitiko 19:26.