Aphale Na Atsikana —Munadzacitanji Na Umaso Wanu?

NTSIKANA unango alonga: “Ndisafuna kuphatisira mwakukwana umaso wanga.” Mwakukhonda penula, imwe musafunambo kuuphatisira mu njira ibodzi ene. Mphapo, munakwanisa tani kucita pyenepi? Pyakupereka mphangwa, andzanu a kuxikola na apfundzisi anu panango anakwanisa kulonga kuti musafunika kuwina kobiri izinji na kutsandzaya na basa yakuphindulisa kakamwe!

Mbwenye Bhibhlya isacenjeza aphale na atsikana kuti kufuna kakamwe mpfuma basi ene ndi “kuthamangira mphepo.” (Koelete 4:4) Na thangwi ineyi, ndi aphale na atsikana akucepa kakamwe asakhala na mpfuma na mbiri. Ale anagumana pyenepi asatsukwala. Mphale m’bodzi wa ku Britanya wakuti acita mapfundziro apadzulu alonga: “Pisakhala ninga bokosi yakusowa pinthu yakuti ungayang’ana nkati mwace nkhabemo pinthu.” Mwandimomwene, midzidzi inango basa isabweresa mpfuma na mbiri. Mbwenye nkhabe kukwanirisa ‘pifuno pyanu pyauzimu.’ (Mateo 5:3) Mwakuthimizira, 1 Jwau 2:17 isacenjeza kuti ‘dziko ikumala.’ Ngakhale kuti munadzagumana mpfuma na mbiri n’dziko ino, pinadzakhala pya ndzidzi wakucepa.

Koelete 12:1 isakulumiza aphale na atsikana kuti: ‘Kumbuka Mulungu mbuciri mphale [peno ntsikana].’ Inde, njira yadidi kakamwe toera kuphatisira umaso wanu ndi kutumikira Yahova Mulungu. Mbwenye cakutoma, musafunika kukhala akuthema toera kutumikira Mulungu. Mu njira ipi? Pontho kutumikira Mulungu kusaphatanizanji?

Musafunika Kucitanji Toera Kukhala Mboni Ya Yahova?

Cakutoma, musafunika kukulisa cifuno cakutumikira Mulungu—pontho cifuno ceneci nkhabe bwera cokha, ngakhale kuti anyakubalanu ndi Akristu. Musafunika kukhala na uxamwali wanu ene na Yahova. Ntsikana unango alonga: “Kucita phembero kunakuphedzani kukhala na uxamwali wanu ene na Yahova.”—Masalmo 62:8; Tyago 4:8.

Aroma 12:2 isalonga thanyo inango yakuti musafunika kuicita. Iyo isalonga: “Mudzindikire pyakufuniwa na Mulungu, pyakukoma, pyadidi na pyakulungama.” Kodi musapenula pinthu pinango pidapfundziswa imwe? Khala ndi tenepo, towezerani pinalonga Bhibhlya na ‘dzindikirani mwekhene’ kuti pinthu pyenepi mphyandimomwene! Fufudzani mwekhene. Lerini Bhibhlya na mabukhu akubuluswa m’Bhibhlya. Kupfundza pya Mulungu si kuphatisira basi ene manyerezero anu toera kudinga pinaleri imwe. Khalani na ndzidzi wakunyerezera mwacidikhodikho pinaleri imwe toera pipite mu ntima wanu wakuphiphirisa. Pyenepi pinadzakulisa ufuni wanu kwa Mulungu.—Masalmo 1:2, 3.

Buluka penepo, yeserani kulonga na anango pinapfundza imwe, panango na andzanu a kuxikola. Kumwaza mphangwa nyumba na nyumba ndi thanyo inango. Midzidzi inango inamwaza imwe mphangwa munadzagumanikana na ndzanu wa kuxikola na pyenepi pinakucitisani kukhala na manyadzo pa ulendo wakutoma. Mbwenye Bhibhlya isaticenjeza kuti nee tisafunika kukhala na “manyadzo” na mphangwa zadidi. (Aroma 1:16) Imwe mukumwaza mphangwa za umaso na cidikhiro! Thangwi yanji musakhala na manyadzo na mphangwa zenezi?

Khala anyakubalanu ndi Akristu, panango mwaenda nawo kale pabodzi m’basa yakumwaza mphangwa. Mphapo musacita pizinji toera kuphedza mwanaciro nyumba mbuto mwakumatama mbamugawira basi ene marevista na matratado? Musalonga nyumba na nyumba mukuphatisira Bhibhlya toera kupfundzisa mwanaciro nyumba? Khala nkhabe, phembani ciphedzo kuna anyakubalanu peno Nkristu m’bodzi wakukola mwauzimu. Kulisani cifuno ca kukhala wakuthema ninga m’mwazi mphangwa zadidi wakukhonda batizwa!

Mukupita kwa ndzidzi, munadzakulumizika toera kuperekeka kwa Mulungu mbamupikira kuti munadzantumikira mu umaso wanu onsene. (Aroma 12:1) Mbwenye, kuperekeka si cinthu cakuti munacicita mwekha mu ntima mwanu. Mulungu asafuna kuti onsene ‘alonge pakweca toera apulumuke.’ (Aroma 10:10) Pa ndzidzi wakubatizwa, cakutoma musalonga pakweca cikhulupiro canu. Buluka penepo, musabatizwa m’madzi. (Mateo 28:18, 19) Mwakukhonda penula, ubatizo ndi thanyo yakufunika kakamwe. Mbwenye lekani kusiya kucita thanyo ineyi thangwi ya kugopa kucita madawo ntsogolo. Munganyindira ciphedzo ca Mulungu, iye anadzakupasani ‘mphambvu zakupiringana zacibaliro’ toera kukuphedzani kukhala akuwanga.—2 Akorinto 4:7; 1 Pedro 5:10.

Pakumala kubatizwa, munadzakhala m’bodzi wa Mboni za Yahova. (Izaiya 43:10) Pyenepi pinadzakucitisani kuona kuti munadzacitanji na umaso wanu. Kuperekeka kusaphataniza ‘kukhondeka mwekhene.’ (Mateo 16:24) Musafunika kusiya pifuno pyanu na pinasirira imwe ‘mbamusaka pakutoma Umambo wa Mulungu.’ (Mateo 6:33) Kuperekeka na kubatizwa kusafungula miyai mizinji toera kucita pyenepi. Tendeni tidinge mingasi mwa iyo.

Miyai Yakutumikira Mulungu M’basa Ya Ndzidzi Onsene

● Upainiya ndi ubodzi mwa miyai ineyi. M’mwazi mphangwa wakuti ndi mpainiya, Nkristu wakubatizwa wa citsandzo cadidi wakuti acita masasanyiro akuphatisira midzidzi 70 peno kupiringana, m’basa yakumwaza mphangwa zadidi nthanda zonsene. Kuphatisira midzidzi mizinji m’basa ineyi kunadzakuphedzani kukulisa maluso anu a kumwaza mphangwa na kupfundzisa. Apainiya azinji asatsandzaya mu kuphedza anyakupfundza awo a Bhibhlya toera kukhala Mboni zakubatizwa. Ndi basa ipi ya kudziko yakuti mbidabweresa kutsandzaya kweneku?

Toera kugula pinthu pyawo, apainiya azinji asaphata basa ya kudziko ya ndzidzi wakucepa. Azinji asacita masasanyiro mwanyapantsi a kupfundza mabasa ku xikola peno kwa anyakubalawo. Khala imwe na anyakubalanu mwaona kuti pinadzakuphindulisani kucita makursu akuthimizira pakumala kupfundza xikola ya sekundarya, citani mpholemphole toera cifuno canu cikhonde kukhala cakufuna kobiri izinji, mbwenye yakucepa toera kukuphedzani mu utumiki wanu, peno m’basa ya ndzidzi onsene.

Umaso wa mpainiya nee usafunika kusaka basi ene basa ya kudziko, mbwenye basa ya utumiki toera kuphedza anango kugumana umaso! Ndiye tani kukulisa cifuno ca kutumikira ninga mpainiya? Basa ya upainiya isatsogolera miyai inango. Mwacitsandzo, apainiya anango asafuluka kwenda ku pisa pyakuti piri na kufuna kukulu kwa amwazi mphangwa a Umambo. Anango asapfundza cilongero cinango toera kutumikira m’mpingo wa cilongero cinango peno ku dziko inango. Inde, upainiya usabweresa nkhombo mu umaso!

● Xikola ya Amwazi Mphangwa a Umambo ndi mwai unango wakutumikira. Xikola ineyi ya nthanda ziwiri yakhazikiswa toera kupfundzisa apainiya akuthema, akuti mwakufuna asasiya nyumba zawo toera katumikira ku pisa pinafunika iwo. Mwakukomerwa iwo asalonga: “Ine pano ndinenda! Nditumeni!” mu kutowezera M’mwazi Mphangwa wankulu adatumikira pa dziko yapantsi, Yezu Kristu. (Izaiya 6:8; Jwau 7:29) Kufuluka kusaphataniza kudzolowera makhaliro akukhonda funa pinthu pizinji. Misambo, makhaliro akudambo na cakudya, panango pinakhala pyakusiyana na pyakale. Panango pisafunikambo kupfundza cilongero cipswa. Kazinji kene ndi kwakufunika kupfundza cilongero cinango toera kucedza na anthu a pacisa. Xikola ineyi isaphedza abale na alongo akukhonda manga banja na akumanga banja, a pyaka 23 mpaka 65, toera kukulisa makhaliro auzimu akuti ndi akufunika m’mabasa awo na maluso akuti anadzaacitisa kuphatisirwa mwakukwana na Yahova pabodzi na gulu yace.

● Basa ya ku Beteli isaphataniza kutumikira ninga nyakuperekeka mu ibodzi mwa maofesi a filiali a Mboni za Yahova. Piwalo pya mabanja a Beteli, anango asaphata basa yakucita mabukhu akubuluswa m’Bhibhlya. Anango asaphedzera mabasa ninga kusasanyira papswa nyumba na mitcini, peno kutsalakana pyakumanungo pya banja ya Beteli. Miyai yonsene yakutumikira ndi mabasa akucena a Yahova. Mwakuthimizira, ale anatumikira pa Beteli asakhala akutsandzaya mu kudziwa kuti pyonsene pinacita iwo pisaphindulisa abale awo azinji pa dziko yonsene yapantsi.

Midzidzi inango, abale a maluso akupambulika asacemerwa toera kutumikira pa Beteli. Azinji asapfundza mabasa angafika pa Beteli. Iwo nee asaphata basa toera kugumana mpfuma, mbwenye asakomerwa na masasanyiro anacitwa a cakudya, pakugona na ciphedzo ca kobiri yakucepa toera kutsalakana pyakufuna pya munthu payekha. Mphale m’bodzi wakuti asatumikira pa Beteli asimba pya basa yace kuti: “Mabasa a pa Beteli ndi akutsandzayisa kakamwe! Ngakhale kuti asafuna mphambvu, mbwenye ine ndatambira nkhombo zizinji mu kutumikira pano.”

● Basa yakumanga isapasa mwai munthu toera kucita khundu m’basa yakumanga maofesi a filiali na Nyumba za Umambo. Atumiki akumanga, mwakubverana na dzina yawo, asaphedzera basa yakumanga. Ineyi ndi khundu inango ya basa yakucena, yakulandana na basa ya ale adamanga templo ya Salomoni. (1 Amambo 8:13-18) Masasanyiro akutsalakana atumiki akumanga ndi akulandana na ale a banja ya Beteli. Ndi mwai tani uli na abale na alongo anatumikira m’basa ineyi yakusimba Yahova!

Kutumikira Yahova Na Ntima Onsene

Kutumikira Yahova ndi njira yadidi kakamwe yakuphatisira umaso wanu. Ndiye tani kukhazikisa cifuno ca kutumikira Mulungu m’basa ya ndzidzi onsene? Cedzani pya basa ya ndzidzi onsene na anyakubalanu, akulu a mpingo wanu na muyang’aniri wanu wa cisa. Khala musafuna kutumikira pa Beteli peno kuenda ku Xikola ya Amwazi Mphangwa a Umambo, gumanikani pa misonkhano ya anafuna kucita khundu m’makhundu anewa a utumiki pa misonkhano ya gawo.

Ndimomwene kuti si onsene tayu anakwanisa kutumikira m’basa ya ndzidzi onsene. Midzidzi inango pisacimwanika thangwi ya nyatwa za ungumi, kusowa kobiri, na kuphatika na mabasa a pabanja. Ngakhale tenepa, Akristu onsene akuperekeka asafunika kubvera matongero a Bhibhlya: ‘Funa Yahova, Mulungu wako, na ntima wako wonsene, na moyo wako wonsene, na ndzeru zako zonsene.’ (Mateo 22:37) Yahova asafuna kuti mucite pyadidi kakamwe pinakwanisa imwe mwakubverana na makhaliro anu. Mu pyonsene pinakucitikirani, ikhani kutumikira Yahova pa mbuto yakutoma mu umaso wanu. Kulisani pifuno pya basa yakutumikira Mulungu. Inde, ‘kumbukani Mulungu mbumuciri mphale [peno ntsikana]’—na munadzapaswa nkhombo za kwenda na kwenda thangwi yakucita pyenepi!

Kusiyapo cidzindikiro cinango, Malemba a Bhibhlya adaikhwa abuluswa m’BIBLYA CHISENA.