Kumbukirani Ale Ali M’basa Ya Ndzidzi Onsene

‘Tisakumbuka ndzidzi onsene mabasa anu akukhulupirika na mabasa anu aufuni.’​—1 ATES. 1:3.

MUNATAWIRA TANI?

Ndi mitundu ipi ya basa ikhagumanika mu pyaka dzana yakutoma, mphapo ale akhatumikira m’mabasa anewa akhatsalakanwa tani?

Ndi ntundu upi wa basa ya ndzidzi onsene inakomerwa na imwe lero?

Munakwanisa tani kuphedza munthu wakuti ali m’basa ya ndzidzi onsene?

1. Kodi Paulu akhaona tani ale akhaphata basa mwaphinga toera kutumikira Yahova?

MPOSTOLO Paulu akumbukira ale adaphata basa mwakuwanga toera kumwaza mphangwa zadidi. Iye alemba: ‘Ndzidzi onsene pamaso pa Mulungu Baba wathu, tisakumbukira mabasa anu akukhulupirika na mabasa anu aufuni, kuwangisira kwanu na kufunana kwanu na pire pidapirira imwe pakukhulupira Mbuyathu Yezu Kristu.’ (1 Ates. 1:3) Inde, Yahova asakumbukira basa yaufuni inacita atumiki ace onsene akukhulupirika, mwakukhonda tsalakana khala makhaliro a umaso wawo asaaphedza kucita pizinji peno pyakucepa.​—Aheb. 6:10.

2. Ninji pinafuna ife kudzadinga mu nsolo uno?

² Atumiki azinji​—akale na a cincino ene—​asawangisira kakamwe toera kutumikira Yahova m’basa ya ndzidzi onsene. Tendeni tione kuti atumiki anango a pyaka dzana yakutoma acitanji toera kutumikira Yahova. Tinadzadingambo njira zingasi za basa ya ndzidzi onsene inacitwa lero na kupfundza kuti tinakumbukira tani abale na alongo athu akufunika anaperekeka toera kutumikira munjira zakupambulika.

AKRISTU A PYAKA DZANA YAKUTOMA

3, 4. (a) Kodi anango atumikira tani Yahova mu pyaka dzana yakutoma? (b) Ndi ciphedzo cipi cidatambira iwo toera kutsalakana umaso wawo?

³ Pidamala iye kubatizwa, Yezu atoma basa yakumwaza mphangwa za Umambo yakuti mbidacitwa pa dziko yonsene. (Luka 3:21-23; 4:14, 15, 43) Pidamala iye kufa, apostolo ace atsogolera basa ineyi yakumwaza mphangwa. (Mach. 5:42; 6:7) Akristu anango, asiya nyumba zawo toera kutumikira ninga amisionaryo ku Palestina. (Mach. 8:5, 40; 21:8) Paulu na anango acita ulendo toera kumwaza mphangwa m’madziko anango. (Mach. 13:2-4; 14:26; 2 Akor. 1:19) Mwacitsandzo, Silvano (Sila), Marko, na Luka atumikirambo ninga anyakulemba. (1 Ped. 5:12) Alongo azinji aphata basa pabodzi pene na abale anewa akukhulupirika. (Mach. 18:26; Arom. 16:1, 2) Pyakugumana napyo pyawo pyakutsandzayisa pisacitisa Malemba Acigrego Acikristu kukhala akutsandzayisa pakuleri. Pisapangizambo kuti Yahova asakumbukira atumiki ace munjira yadidi kakamwe.

⁴ Kodi atumiki a ndzidzi onsene akhaphedzerwa tani mu pyaka dzana yakutoma? M’midzidzi inango iwo akhatawira khodzo na ciphedzo ca Akristu andzawo, mbwenye iwo nee akhaphemba ciphedzo ceneci. (1 Akor. 9:11-15) Anango kuphatanizambo mipingo ikhapereka ciphedzo. (Lerini Machitiro 16:14, 15; Afilipi 4:15-18.) Paulu na andzace akhafamba na iye, akhaphatambo basa toera kutsalakana umaso wawo.

ATUMIKI A NDZIDZI ONSENE LERO

5. Kodi banja inango yalonganji thangwi ya umaso wawo m’basa ya ndzidzi onsene?

⁵ Lero, anthu azinji asawangisirambo toera kutumikira munjira zakusiyana-siyana za basa ya ndzidzi onsene. (Onani bokosi “Mitundu ya Basa ya Ndzidzi Onsene.”) Kodi iwo asaona tani ntundu wa basa idasankhula iwo? Unoyu ndi mbvundzo wakuti munakwanisa kuacita, mwakukhonda penula imwe munadzaona kuti mphyakuwangisa kucita pyenepi. Onani citsandzo cibodzi: M’bale unango adatumikira ninga mpainiya wa ndzidzi onsene, mpainiya wakupambulika, misionaryo, pontho ninga m’bodzi wa banja ya Beteli ku dziko yakunja alonga: “Ndisaona kuti kupita m’basa ya ndzidzi onsene, ndi cisankhulo cadidi kakamwe cidacita ine. Pikhakhala ine na pyaka 18 pyakubalwa, ndanentseka kakamwe toera kusankhula kutawira miyai yakuenda ku universidade, kuphata basa ya kudziko, peno kutumikira ninga mpainiya. Pyakugumana napyo pisandipangiza kuti Yahova nkhabe kuduwala kuwangisira kunacita atumiki ace toera kutumikira m’basa ya ndzidzi onsene. Ndisakwanisa kuphatisira maluso onsene adandipasa Yahova munjira zakuti cipo mbidakwanisa kuaphatisira khala ndasankhula kuphata basa kudziko.” Nkazace alonga: “Basa yonsene inapaswa ife isatiphedza toera kuthambaruka. Tisaona ciphedzo ca Yahova ndzidzi onsene munjira zakuti cipo mbatidaziona khala tasankhula kukhala ku cisa cathu cing’ono cakuthambaruka. Ntsiku zonsene ndisapereka takhuta kuna Yahova thangwi ya umaso wathu m’basa ya ndzidzi onsene.” Musafunambo kuona umaso wanu munjira ineyi?

6. Ndi cinyindiro cipi cakuti atumiki onsene a Yahova anakwanisa kukhala naco?

⁶ Ndimomwene kuti anango ali na makhaliro akuti nkhabe kuatawirisa toera kupita m’basa ya ndzidzi onsene munjira ineyi. Tisanyindira kuti Yahova asapasambo ntengo basa inacita iwo na ntima onsene. Nyerezerani pya ale adalonga Paulu pa Filemoni 1-3, kuphatanizambo onsene akhacita khundu ya mpingo wa Kolose. (Lerini.) Paulu apasa ntengo kuwangisira kwawo, ndi pyenepi pidacitambo Yahova. Munjira ibodzi ene, Babathu wakudzulu asapasa ntengo basa yanu. Mphapo, munakwanisa tani kuphedzera ale anatumikira m’basa ya ndzidzi onsene lero?

KUPHEDZERA APAINIYA

7, 8. Kodi basa ya upainiya isaphatanizanji, kodi anango m’mpingo anakwanisa tani kuphedza apainiya?

⁷ Ninga amwazi mphangwa a pyaka dzana yakutoma, lero apainiya aphinga asapereka ciwangiso kakamwe m’mipingo. Azinji asawangisira toera kuphatisira midzidzi yakukwana 70 mu utumiki nthanda zonsene. Munakwanisa tani kuaphedza?

⁸ Mulongo unango anacemerwa Shari wakuti ndi mpainiya alonga: “Apainiya asaoneka ninga ndi akuwanga, thangwi asabuluka mu utumiki ntsiku zonsene. Ngakhale tenepo, iwo asafunambo ciwangiso.” (Arom. 1:11, 12) Mulongo unango adatumikira ninga mpainiya mu pyaka pingasi alonga thangwi ya apainiya m’mpingo wace: “Iwo asaphata basa mwakuwanga, mwakukhonda limira. Anango angaperekeka toera kuakwata na motokala, kuacemera toera kudya, kuapasa kobiri toera kugula mafuta a motokala peno ciphedzo cinango, iwo asapereka takhuta. Pyenepi pisapangiza kwa iwo kuti imwe musaatsalakana kakamwe!”

9, 10. Ninji pinacita anango toera kuphedza apainiya m’mipingo yawo?

⁹ Njira inango toera kuphedza apainiya ndi kuphata basa na iwo mu utumiki. Mulongo unango wakuti ndi mpainiya adembetera: “Tisafuna kakamwe ciphedzo pakati pa sumana.” Mpainiya wa m’mpingo ubodzi ene athimiza: “Pisanentsa maningi kuona munthu wakuenda naye m’basa ya m’munda cakumaulo.” Mulongo unango wakuti cincino asatumikira ku Beteli ya ku Brooklyn alonga mwakukomerwa thangwi ya basa yace ya upainiya: “Mulongo unango wakuti akhali na motokala alonga, ‘Ndzidzi onsene unasowa imwe munthu wakubuluka naye m’basa ya m’munda ndicemereni, ndinaenda na imwe m’basa ya m’munda.’ Mwandimomwene, iye aphedzera basa yanga ya upainiya.” Mulongo Shari alonga: “Angakotoka m’basa ya m’munda, apainiya akuti ndi akukhonda manga banja, kazinji kene asakhala okha. Midzidzi inango, imwe munakwanisa kucemera abale na alongo anewa toera kugumanika pa kulambira kwanu kwa banja. Kuaphataniza m’mabasa anango kusaaphedzambo toera kukhala akuwanga.”

¹⁰ Angakumbuka basa yace ya upainiya pabodzi na alongo anango akukhonda manga banja, mulongo unango adatumikira m’basa ya ndzidzi onsene mu pyaka 50 asalonga: “Akulu a mpingo wathu akhaenda kaona apainiya mukupita kwa nthanda zingasi. Iwo akhabvundza pya ungumi wathu na basa yathu ya kudziko toera kuona khala ciripo cikhatidzudzumisa. Ndi pyenepi pikhacita iwo. Iwo akhabwera kunyumba kwathu toera kuona khala tikhafuna ciphedzo.” Pyenepi, panango pisakukumbusani mafala akupereka takhuta a Paulu thangwi ya mabasa adacitirwa iye na mamuna unango ku Efeso.​—2 Tim. 1:18.

11. Kodi basa ya upainiya wakupambulika isaphatanizanji?

¹¹ Mipingo inango iri na nkhombo yakutumikira pabodzi na apainiya akupambulika. Azinji mwa abale na alongo anewa asawangisira toera kuphatisira midzidzi yakukwana 130 nthanda zonsene mu utumiki. Nakuti asaphatisira midzidzi mizinji mu utumiki na kuphedza anango munjira zizinji, iwo nkhabe ndzidzi wakukwana toera kuphata basa ya kudziko. Ofesi ya filiali isapereka ciphedzo ca kobiri yakucepa pa nthanda toera akwanise kuikha manyerezero awo m’basa ya utumiki.

12. Kodi akulu a mpingo na anango anakwanisa tani kuphedza apainiya akupambulika?

¹² Tinakwanisa tani kuphedzera apainiya akupambulika? Nkulu wa mpingo wakuti asatumikira pa ofesi ya filiali, pontho asatsalakana pya apainiya akupambulika alonga: “Akulu a mpingo asafunika kucedza na iwo, kudziwa makhaliro awo, na kuona kuti anakwanisa tani kuaphedza. Mboni za Yahova zinango zisanyerezera kuti apainiya akupambulika asatsalakanwa munjira zonsene thangwi iwo asapaswa kobiri yakucepa, mbwenye abale na alongo a pa mpingo anakwanisa kuaphedza munjira zizinji.” Ninga apainiya a ndzidzi onsene, apainiya akupambulika asakomerwa kakamwe angakhala na munthu wakuenda naye mu utumiki. Munakwanisa kuaphedza munjira ineyi?

KUPHEDZA AYANG’ANIRI A CISA

13, 14. (a) Tisafunika kukumbukiranji thangwi ya ayang’aniri a cisa? (b) Munakwanisa kucitanji toera kuphedza ale anatumikira ninga ayang’aniri a cisa?

¹³ Ayang’aniri a cisa na akazawo kazinji kene asaoniwa ninga akuwanga mwauzimu akuti ndi akuthema toera kupereka ciwangiso. Pyenepi ndipyodi, ngakhale tenepo, iwo asafunambo ciwangiso, asafunambo munthu toera kuenda naye mu utumiki, pontho asapereka takhuta angacemerwa toera kucita khundu m’masendzekero pabodzi na abale na alongo. Ayang’aniri a cisa na akazawo angaduwala peno kuendeswa kunyumba ya ungumi, tinakwanisa kuaphedza mu kuenda kaaona, peno kupereka ciphedzo toera kutsalakana ukondzi wawo. Luka, akhali ‘dotoro wakufuniwa’ adalemba bukhu ya Machitiro, mwakukhonda penula iye atsalakana kakamwe pifuno pya Paulu na andzace akhafamba na iye.​—Akol. 4:14; Mach. 20:5–21:18.

¹⁴ Ayang’aniri a cisa na akazawo asafuna ciwangiso ca axamwali aufuni. Muyang’aniri unango wa cisa alemba: “Ndisaona kuti axamwali anga asadziwa ndzidzi unafuna ine ciwangiso. Iwo asacita mibvundzo mwaluso, pyenepi pisandiphedza toera kulonga pinandidzudzumisa. Nakuti asabvesera mwadidi, iwo asandiphedza kakamwe.” Ayang’aniri a cisa na akazawo asapereka takhuta kakamwe thangwi ya citsalakano cinapangiza abale na alongo.

KUPHEDZA ALE ANATUMIKIRA KU BETELI

15, 16. Ndi mabasa api anacitwa na ale anatumikira ku Beteli na Nyumba za Misonkhano, mphapo tinakwanisa tani kuaphedzera?

¹⁵ Pa dziko yonsene, ale anatumikira ku Beteli na Nyumba za Misonkhano asaphedzera kakamwe basa ya Umambo m’madziko anatsalakanwa na ofesi ya filiali yawo. Khala mpingo wanu peno cisa canu ciri na abale na alongo anatumikira ku Beteli, munapangiza tani kuti musaakumbukira?

¹⁶ Angafika pa Beteli, panango anathimbana na citsuwo, thangwi iwo asiya acibale awo na axamwali awo akufunika. Iwo asapereka takhuta kakamwe pa ndzidzi wakuti andzawo a pa Beteli, peno abale na alongo a pa mpingo wawo upswa asapangiza uxamwali kwa iwo! (Mko. 10:29, 30) Basa yawo isaatawirisa kugumanika pa misonkhano ya mpingo na kuenda mu utumiki pakumala kwa sumana. Mbwenye midzidzi inango, abale na alongo ku Beteli asaphata mabasa anango kusiyapo anacita iwo pa ntsiku. Mipingo ingabvesesa pyenepi na kupangiza kuti isapereka takhuta thangwi ya basa inacita abale na alongo ku Beteli, anthu onsene asaphindula.​—Lerini 1 Atesalonika 2:9.

KUPHEDZA ATUMIKI A NDZIDZI ONSENE ANATUMIKIRA M’MADZIKO AKUNJA

17, 18. Ndi basa ipi inacitwa na atumiki anatumikira m’madziko akunja?

¹⁷ Ale anatawira kutumikira m’madziko akunja, panango anagumana cakudya, cilongero, misambo, na makhaliro akuti ndi akusiyana kakamwe na ale adadzolowera iwo. Thangwi yanji iwo asatawira kuthimbana na makhaliro anewa?

¹⁸ Amisionaryo anango asatumikira mu pisa pyakuti anthu azinji anakwanisa kuphindula na cipfundziso cawo cakupambulika. Ofesi ya filiali isapereka ciphedzo ca mbuto yakukhala, na kobiri yakucepa toera kutsalakana pyakufuna pyawo. Anango anatumikira m’madziko akunja asaphembwa toera kutumikira pa ofesi ya filiali peno kuphedza basa yakumanga mafiliali, maofesi akuthumburuzira mabukhu, Nyumba za Misonkhano, peno Nyumba za Umambo. Iwo asapaswa cakudya, mbuto yakugona, na pinthu pinango pyakufunika. Ninga ale anatumikira ku Beteli, ndzidzi onsene iwo asagumanika pa misonkhano na kuenda mu utumiki pacisa cawo, natenepa, iwo ndi nkhombo munjira zizinji.

19. Tisafunika kukumbukiranji thangwi ya ale anatumikira m’madziko akunja?

¹⁹ Munakwanisa tani kupitiriza kukumbukira atumiki anewa? Kumbukani kuti pakutoma, panango iwo adzati kudzolowera cakudya ca pacisa canu. Munakwanisa kunyerezera pyenepi mu ndzidzi unaacemera imwe toera kudya kunyumba kwanu; pakutoma munakwanisa kuabvundza kuti ndi cakudya cipi cinakomerwa na iwo, peno cakuti asafuna kuciyesera. Khalani wakupirira mu ndzidzi unapfundza iwo cilongero na misambo ya pacisa canu. Panango anamala ndzidzi uzinji toera kubvesesa mwadidi pinalonga imwe, mbwenye imwe munakwanisa kuaphedza toera kulonga mwadidi mafala. Iwo asafuna kupfundza!

20. Ndi munjira ipi yadidi kakamwe yakuti tinakwanisa kuphedza atumiki a ndzidzi onsene na anyakubala awo?

²⁰ Atumiki a ndzidzi onsene asagwesera, pyenepi pisacitikambo kwa anyakubala awo. Khala anyakubala ndi Amboni, cifuno cawo cikulu ndi cakuti anawo apitirize m’basa yawo. (3 Jwau 4) Mwandimomwene, khala anyakubala awo asafuna ciphedzo, atumiki a ndzidzi onsene anadzacita pyonsene pinakwanisa iwo. Ngakhale tenepo, ale ali kunyumba anakwanisa kuphedzera ale ali m’basa ya ndzidzi onsene mu kuperekeka toera kuatsalakana khala anyakubala akugwesera asafuna ciphedzo. Kumbukani kuti atumiki a ndzidzi onsene ali na pizinji toera kucita m’basa yakufunika kakamwe​—kumwaza mphangwa zadidi. (Mat. 28:18, 19) Kodi imwe peno mpingo wanu, munakwanisa kuphedza anyakubala a atumiki a ndzidzi onsene?

21. Kodi ale anatumikira m’basa ya ndzidzi onsene asabva tani thangwi ya ciphedzo na ciwangiso cinapereka anango?

²¹ Anthu azinji asaphata basa mwakuwanga toera kupfuma. Mbwenye ale anasankhula basa ya ndzidzi onsene asaphata basa mwakuwanga thangwi asafuna kutumikira Yahova na anango. Iwo asapereka takhuta thangwi ya ciphedzo consene cinapereka imwe. Mulongo unango anatumikira ku dziko yakunja aphataniza mabvero a azinji: “Ngakhale tsamba yakupereka takhuta isapangiza kuti anango asakunyerezera, pontho kuti iwo asakomerwa na pinacita iwe.”

22. Ndi api maonero anu thangwi ya basa ya ndzidzi onsene?

²² Mwandimomwene, kutumikira Yahova m’basa ya ndzidzi onsene, ndi njira yadidi kakamwe ya umaso. Ndi basa yakuti isaphemba phinga, mbwenye isatsandzayisa. Pontho, ale anatumikira m’basa ya ndzidzi onsene asapfundza maluso na makhaliro akuti ndi akufunika kakamwe lero na ntsogolo pantsi pa Umambo wa Mulungu. Tendeni tonsene tipitirize kukumbukira ‘basa yakukhulupirika na yaufuni’ inacitwa na atumiki a ndzidzi onsene.​—1 Ates. 1:3.

[Bokosi pa tsamba 29]

Mitundu ya Basa ya Ndzidzi Onsene

Apainiya a ndzidzi onsene kazinji kene asaphatisira midzidzi yakukwana 70 nthanda zonsene m’basa yakumwaza mphangwa, asatumikira pa mpingo wawo peno m’mbuto zakuti zisafuna kakamwe ciphedzo.

Apainiya akupambulika kazinji kene asaphatisira midzidzi yakukwana 130 m’basa yakumwaza mphangwa pa nthanda, kazinji kene asatumizwa mu pisa pyakuti kusafunika kakamwe ciphedzo.

Ayang’aniri a cisa asacedzera mipingo mizinji peno pisa, mbatsogolera basa ya utumiki na kuphedza mipingo munjira zakusiyana-siyana.

Anyakutumikira ku Beteli asatumikira pa ofesi ya filiali peno ofesi yakuthumburuza toera kutsalakana mabukhu peno kupereka citsogolero mu cisa ca filiali yawo.

Amisionaryo kazinji kene asatumizwa m’madziko akunja. Amisionaryo azinji asaphatisira midzidzi 130 mu utumiki nthanda zonsene.

Atumiki a dziko yonsene na anyakuperekeka asaenda m’madziko akusiyana-siyana toera kuphedza kumanga maofesi a filiali, maofesi akuthumburuzira mabukhu, Nyumba za Misonkhano, na Nyumba za Umambo

Atumiki akumanga Nyumba za Umambo asapfundziswa toera kumanga Nyumba za Umambo na kuphedza mabasa anango akumanga mu dziko yawo.