Kodi Bhibhlya Ninji?
Musanyerezera kuti ndi . . .
bukhu ya udziwisi wa anthu?
bukhu ya pithankano?
Mafala a Mulungu?
BHIBHLYA ISALONGANJI?
“Malemba onsene alembwa mukutsogolerwa na Mulungu.”—2 Timoti 3:16, Bhibhlya ya Dziko Ipswa.
THANGWI YANJI MPHYADIDI KUDZIWA PYENEPI?
Kudziwa pyenepi kunakuphedzani toera kugumana:
Mitawiro yakutsandzayisa ya mibvundzo yakufunika mu umaso.—Misangani 2:1-5.
Citsogolero cakunyindirika toera kucita pisankhulo pyadidi mu umaso. —Masalmo 119:105.
Cidikhiro candimomwene cakuti umaso unadzakhala mwadidi ntsogolo.—Aroma 15:4.
TINAKWANISADI KUKHULUPIRA PINALONGA BHIBHLYA?
Inde, pana mathangwi matatu:
Pinalonga iyo pisabverana mwadidi. Bhibhlya yalembwa na amuna akusiyana-siyana akukwana 40 mu pyaka pyakupiringana 1.600. Azinji mwa iwo cipo adziwana unango na ndzace. Ngakhale tenepa, pinthu pyonsene pinalongwa m’Bhibhlya pisabverana mwadidi!
Mphangwa zakunyindirika. Kazinji kene, ale analemba pinthu pinacitika n’dziko yawo asabisa madodo a anthu awo. Mbwenye mwakusiyana na anthu anewa, ale adalemba Bhibhlya nee abisa madodo awo na a mbumba yawo.—2 Kronika 36:15, 16; Masalmo 51:1-4.
Maprofesiya akunyindirika. Bhibhlya ikhadalonga kale kuti nzinda wa Bhabhilonya mbudafudzwa. Iyo yalonga pyenepi mu ndzidzi wakuti pakhadasala pyaka 200 mbudzati kufudzwa. (Izaiya 13:17-22) Bhibhlya yalonga kuti nzinda wa Bhabhilonya mbudafudzwa tani, pontho yalongambo dzina ya munthu akhafuna kuufudza.—Izaiya 45:1-3.
M’Bhibhlya muli na maprofesiya anango akuti pidalonga iwo pyacitika sawasawa ninga mudalemberwa ipyo. Pyenepi pisapangiza kuti Bhibhlya ndi Mafala a Mulungu.—2 Pedhru 1:21.
NYEREZERANI BASI:
Kodi Mafala a Mulungu anakuphedzani tani mu umaso wanu?
Bhibhlya isatawira mbvundzo unoyu pa IZAIYA 48:17, 18 na 2 TIMOTI 3:16, 17.