Samwele Apitiriza Kucita Pyadidi

Kubulukira pa ndzidzi ukhali iye mwana kakamwe, Samwele akhakhala pa tabernakulu mbaphata basa penepo, mbuto yakuti anthu akhaenda kalambira Yahova. Usadziwa kuti Samwele afika tani pa kukhala pa tabernakulu? Pakutoma, tende tipfundze pya mai wace Samwele, Yana.

Mu pyaka pizinji, Yana nee akhabala, ngakhale kuti akhafuna kakamwe kukhala na mwana. Natenepa, iye aphembera kuna Yahova mbadembetera toera kuphedzwa. Iye apikira kuti angabala mwana wamamuna, mbadampereka toera kukhala ku tabernakulu mbaphata basa kweneku. Yahova atawira phembero yace, Yana adzabala mwana wamamuna. Iye ancemera Samwele. Ninga mudapikira iye, pikhakhala Samwele na pyaka pitatu pyakubalwa, Yana ankwata mbaenda naye ku tabernakulu toera kutumikira Mulungu kweneku.

Eli akhali nyantsembe wankulu ku tabernakulu. Anace awiri akhaphatambo basa kweneku. Kumbuka, tabernakulu ikhali nyumba ya ulambiri wa Mulungu, pontho anthu akhafunika kucita pinthu pyadidi kweneku. Mbwenye ana a Eli akhacita pinthu pyakuipa kakamwe. Samwele akhaona pikhacita iwo. Kodi Samwele acitambo pinthu pyakuipa ninga pikhacita ana a Eli?— Nkhabe, iye apitiriza kucita pyadidi, ninga pidapfundziswa iye na anyakubala ace.

Usanyerezera kuti Eli akhafunika kucitanji na anace awiri?— Iye akhafunika kuasandika. Iye nee akhafunika kuatawirisabve kuphata basa panyumba ya Mulungu. Mbwenye Eli nee acita pyenepi, natenepa, Yahova aipirwa na iye pabodzi na anace awiri. Yahova atonga kuatcinyusa.

Ntsiku inango camasiku pikhagona Samwele, abva munthu mbakancemera: ‘Samwele!’ Iye athamanga kuenda kuna Eli, mbwenye Eli ampanga: ‘Sidakucemera tayu.’ Pyenepi pyacitika kawiri. Kacitatu, Eli apanga Samwele kuti angabva pontho fala ineyi akhafunika kutawira: ‘Ndaphata miyendo Yahova, longani; ntumiki wanu ali kubva.’ Ndi pyenepi pidacita Samwele. Buluka penepo, Yahova alonga kuna Samwele: ‘Panga Eli kuti ndinadzatcinyusa banjace thangwi ya pinthu pyakuipa pinacita iwo.’ Usanyerezera kuti pikhali pyakukhonda nentsa kuna Samwele kupanga Eli mphangwa zenezi?— Nkhabe, pikhali pyakunentsa. Mbwenye, maseze Samwele akhagopa, iye acita pidapangwa iye na Yahova. Pidalonga Yahova pyacitika. Ana awiri a Eli aphiwa, pontho Eli afambo.

Samwele ndi citsandzo cadidi kwa ife. Iye acita pyadidi ngakhale kuti akhaona anthu anango mbakacita pinthu pyakuipa. Ndiye tanimbo iwe? Unadzakhalambo ninga Samwele, mbupitiriza kucita pyadidi? Ungacita pyenepi, unadzakomeresa Yahova pabodzi na anyakubala ako.