Yahova Alonga na Samweli

Nyantsembe Wankulu Eli akhali na ana awiri akuti akhaphata basa ninga anyantsembe pa tabhernakulo. Madzina awo akhali Ofini na Fineya. Iwo nee akhabvera Yahova, pontho akhatsalakana Aizraeli mwakuipa. Aizraeli pikhapereka iwo ntsembe kuna Yahova, Ofini na Fineya akhakwata maphindi adidi a nyama mbadya. Eli akhadziwa pyonsene pikhacita anace, mbwenye nee akhacita cinthu. Mphapo Yahova acitanji?

Mu ndzidzi unoyu Samweli akhali mwana, mbwenye iye nee akhatowezera pinthu pyakuipa pikhacita Ofini na Fineya. Ndi thangwi yace, Yahova akhakomerwa na Samweli. Ntsiku inango namasiku, pikhagona Samweli iye abva munthu mbakacemera dzinace. Iye alamuka mbathamanga kuenda kuna Eli, mbalonga: “Ndabwera, mwandicemera?” Mbwenye Eli atawira: ‘Nee ndakucemera. Ndoko ukagone.’ Samweli aenda kagona. Buluka penepo Samweli acemerwa pontho. Pidaenda iye kuna Eli paulendo wacitatu, Eli adzindikira kuti ndi Yahova akhacemera Samweli. Natenepa iye apanga Samweli kuti angacemerwa pontho atawire: “Longani Yahova, ine ntumiki wanu ndiri kubva.”

Samweli pidaenda iye kagona, abva pontho munthu mbakancemera: “Samweli, Samweli!” Iye atawira: “Longani, ine ntumiki wanu ndiri kubva.” Yahova apanga Samweli: ‘Panga Eli kuti ndinadzatcunyusa iye na anthu a panyumba pace. Iye asadziwa kuti pinacita anace pa tabhernakulo yanga ndi pyakuipa, mbwenye iye nee aasandika.’ Pidalamuka Samweli, iye afungula misuwo ya tabhernakulo ninga pikhacita iye ntsiku zonsene. Iye akhagopa kupanga nyantsembe wankulu pidalonga Yahova. Mbwenye Eli ancemera mbambvundza: ‘Mwananga, Yahova akupanganji? Ndipange pyonsene.’ Natenepa Samweli ampanga pyonsene, nee kum’bisira cinthu.

Samweli akhapitiriza kukula, pontho Yahova akhali na iye. Aizraeli onsene adzindikira kuti Samweli asankhulwa na Yahova toera akhale mprofeta na ntongi.