Kodi Munthu Anakwanisa Kucita Mabasa Adidi pa Ntsiku Ya Sabudu?

Yezu acita pizinji pikhamwaza iye mphangwa ku Galileya. Mbwenye iye nee akhanyerezera basi ene pya Galileya pidalonga iye kuti ‘ndisafunikambo kumwaza mphangwa zadidi za Umambo wa Mulungu m’mizinda inango.’ Natenepa, iye amwazambo ‘mphangwa m’masinagoga a mu Yudeya.’ (Luka 4:43, 44) Pyenepi pisabveka mwadidi thangwi ukhali ndzidzi wa khoni, pontho phwando mu Yerusalemu ikhali cifupi toera kucitwa.

Ninga pidaleri ife thangwi ya utumiki wa Yezu ku Galileya, tiri na mphangwa zakucepa basi m’Maevanjelyu zinalonga pya utumiki wace ku Yudeya. Maseze anthu azinji nee akhatawira kubva mphangwa za Yezu mu Yudeya, iye nee asiya kumwaza mphangwa zadidi mwaphinga na kucita mabasa adidi mwenemu.

Mwakukhonda dembuka, Yezu mbadapita mu nzinda ukulu wa Yudeya, Yerusalemu, toera kucita Paskwa ya caka 31 N.W. Cifupi na Nsuwo wa Mabira, wakuti usapita na anthu azinji, pakhali na thawala inacemerwa Bhetisedha. Atenda azinji ninga maboliboli na anyakulamala akhaenda pa thawala ineyi. Thangwi yanji? Thangwi iwo akha- khulupira kuti anawangiswa utenda wawo angapita mu thawala ineyi madzi angatoma kucita mabimbi.

Ikhali Sabudu, pontho Yezu aona mamuna m’bodzi wakuti akhaduwala mu pyaka 38. Yezu ambvundza: ‘Usafuna uwange?’ Mamuna atawira: ‘Mbuya, ine nkhabe munthu toera kundibiza mu thawala madzi angabvunduka peno angatoma kucita mabimbi, thangwi mu ndzidzi unaenda ine, unango asandipitira patsogolo mbabira m’madzi.’—Juwau 5:6, 7.

Yezu alonga cinthu cakuti cadzumatirisa mamuna unoyu na onsene akhabvesera: ‘Lamuka! Kwata makha ako ufambe.’ (Juwau 5:8) Pa ndzidzi unoyu, mamuna awangiswa utenda wace, mbakwata makha ace mbatoma kufamba!

M’mbuto mwakukomerwa na pinthu pidacitika, Ayuda ayang’ana mamuna unoyu mbalonga mwakuipirwa: ‘Lero ndi ntsiku ya Sabudu, iwe nee usatawiriswa kuthukula makha.’ Mamuna atawira: ‘Ule adandiwangisa ndiye adandipanga kuti, ‘Kwata makha ako ufambe.’ (Juwau 5:10, 11) Ayuda anewa asumula ule akhawangisa anthu pa ntsiku ya Sabudu.

Ayuda anewa abvundza: ‘Mbani munthu unoyu adakupanga kuti kwata makha ako ufambe?’ Thangwi yanji iwo abvundza pyenepi? Thangwi Yezu ‘akhadapita pakati pa mwinji wa anthu,’ pontho mamuna adawangiswa nee akhadziwa dzina ya Yezu. (Juwau 5:12, 13) Mbwenye mamuna unoyu mbadaona pontho Yezu. Patsogolo pace, mu templo, mamuna agumana Yezu, mbadzindikira kuti ndiye adamuwangisa pa thawala.

Mamuna adawangiswa aona Ayuda adambvundza thangwi ya kuwangiswa kwace. Iye aapanga kuti akhali Yezu. Natenepa Ayuda aenda pakhali Yezu. Kodi iwo akhafuna kudziwa kuti akwanisa tani kucita pinthu pyenepi pyakudzumatirisa? Nkhabe. Iwo akhafuna basi ene kusumula Yezu thangwi yakucita mabasa adidi pa ntsiku ya Sabudu. Iwo atoma kutcinga Yezu.