Iye Afuna Anthu
‘Ndikhakomerwa kakamwe na ana a anthu.’—MIS. 8:31.
MUNAKWANISA KUFOKOTOZA?
Ninji cinapangiza kuti Yezu asafuna kakamwe anthu?
Pirengo pidacita Yezu pisatipasa cinyindiro canji thangwi ya dziko ipswa?
Ndi cirengo cipi ca Yezu cinadikhira imwe kuona?
1, 2. Ninji cinapangiza kuti Yezu asafuna kakamwe anthu?
MWANA wautombo wa Mulungu ndi cipangizo cikulu kakamwe ca udziwisi wakudzumisa wa Yahova. Iye akhali na Babace ninga ‘mesiri’ wa ‘basa.’ Nyerezerani kukomerwa na kutsandzaya kudakhala na Yezu ‘pikhacita’ Babace ‘kudzulu’ na ‘dziko yapantsi.’ Mbwenye mwa pyonsene pidacita Mulungu, Yezu ‘akhakomerwa kakamwe na ana a anthu.’ (Mis. 8:22-31) Inde, Yezu asafuna kakamwe anthu kutomera pikakhala iye kudzulu.
2 Ninga cipangizo caufuni wace na kukhulupirika kwace kuna Babace, kuphatanizambo ufuni wace ukulu kwa ‘ana a anthu,’ Mwana Wautombo wa Mulungu ‘acepeseka’ mbakhala sawasawa na anthu. Yezu acita pyenepi toera ‘kuombola anthu azinji.’ (Afil. 2:5-8; Mat. 20:28) Yezu asafuna kakamwe anthu! Pikhali iye pa dziko yapantsi, Mulungu ampasa mphambvu toera kucita pirengo pidapangiza kuti iye asafuna kakamwe anthu. Munjira ineyi, Yezu apangiza pinthu pyakudzumisa pyakuti mwakukhonda dembuka pinadzacitika pa dziko yonsene yapantsi.
3. Tinadzadinganji mu nsolo uno?
3 Yezu abwera pa dziko yapantsi toera kumwaza ‘mphangwa zadidi za Umambo wa Mulungu.’ (Luka 4:43) Yezu akhadziwa kuti Umambo wa Mulungu mbudacenesa dzina ya Babace na kumalisiratu nyatwa zonsene za anthu. Pirengo pidacita Yezu mukhamwaza iye mphangwa, ndi cipangizo caufuni wace ukulu kuna anthu. Thangwi yanji pyenepi ndi pyakufunika kwa ife? Thangwi pisatipasa cinyindiro na cidikhiro ca ntsogolo. Tendeni tidinge pirengo pinai pya Yezu.
‘MPHAMBVU IKHALI NA IYE TOERA KUWANGISA’
4. Fokotozani kuonana kwa Yezu na nyamatanya.
4 Yezu akhadatoma utumiki wace, cincino iye ali mu nzinda ubodzi wa dziko ya Galileya. Kweneku agumana pinthu pyakutsukwalisa. (Marko 1:39, 40) Iye aona mamuna wakuti akhali na utenda wa matanya. Dotoro Luka alonga kuti mamuna unoyu akhali na ‘matanya m’manungo onsene.’ (Luka 5:12) ‘Pidaona iye Yezu ambulumundira, mbamphemba: ‘Mbuya, mungafuna munakwanisa kundiwangisa.’’ Mamuna unoyu nee apenula kuti Yezu akhali na mphambvu toera kumuwangisa, mbwenye akhafuna kudziwa khala Yezu akhafuna kucita pyenepi. Kodi Yezu atawira tani phembo ineyi yakubulukira mu ntima? Yezu anyerezeranji pikhaona iye mamuna unoyu wa matanya? Kodi Yezu mbadakhala ninga Afarisi, akuti nee akhabvera ntsisi anthu akhathabuka na utenda unoyu? Khala ndimwe mbamudacitanji?
5. Ninji cidakulumiza Yezu toera kulonga ‘Ndisafuna’ mudawangisa iye nyamatanya?
5 Pisaoneka kuti mamuna unoyu wa matanya nee alonga mwakugaluza: ‘Wakukhonda kucena, wakukhonda kucena’ ninga pikhaphemba Mwambo wa Mose. Yezu nee atsalakana pyenepi. Mbuto mwace, iye aikha manyerezero ace kuna mamuna unoyu na pikhafuna iye. (Lev. 13:43-46) Mwandimomwene, Ife nkhabe dziwa pikhanyerezera Yezu, mbwenye tisadziwa pikhali muntima mwace. Mu kukulumizwa na ntsisi, Yezu acita pinthu pyakudzumisa. Iye athukula nkono wace mbaphata nyamatanya. Na fala yakupangiza cinyindiro na kukoma ntima, Yezu alonga: ‘Ndisafuna, khala wakucena. Penepo matanya amala.’ (Luka 5:13) Mwandimomwene mphambvu ya Yahova yaphedza Kristu tayu basi toera kucita pirengo, mbwenye toera kupangizambo kuti Yezu asafuna kakamwe anthu.—Luka 5:17.
6. Thangwi yanji pirengo pidacita Yezu ndi pyakudzumisa? Pirengo pyenepi pisapangizanji?
6 Mphambvu ya Mulungu yaphedza Yezu Kristu toera kucita pirengo pyakusiyana-siyana pyakudzumatirisa. Iye nee awangisa utenda wa matanya basi, mbwenye awangisambo ntundu onsene wa utenda ukhali na anthu. Bhibhlya isatipanga: ‘Mwinji wa anthu wadzumatirwa pakuona kuti mabewewe akhalonga, anyanfutete akhafamba na maboliboli akhaona.’ (Mat. 15:31) Toera kucita mabasa anewa a ntsisi, Yezu nee akhaphatisira piwalo pya manungo a munthu unango. Iye akhawangisa khundu ineyi ene ikhali na utenda. Yezu awangisa anthu mwandzidzidzi, midzidzi inango nakutali. (Jwau 4:46-54) Pinthu pyenepi pyakudzumatirisa pisapangizanji? Pisapangiza kuti Yezu wakuti cincino akutonga ninga Mambo wakudzulu ali na mphambvu, pontho asafuna kumalisa mautenda onsene kwenda na kwenda. Kupfundza njira idatsalakanira Yezu anthu kusatipasa cinyindiro cakuti mu dziko ipswa iye ‘anabvera ntsisi anyakucepeseka na anyakutcerenga.’ (Sal. 72:13) Inde, Yezu anadzakwanirisa cifuniro cace cakuphedza onsene ananentseka.
‘LAMUKA, KWATA MAKHA AKO, NDOKO’
7, 8. Longani pidacitika Yezu mbadzati kugumanikana na nyanfutete ku Betiseda?
7 Mudapita nthanda zingasi pakumala kuwangisa nyamatanya ku Galileya, Yezu aenda ku Yudeya toera kumwaza mphangwa zadidi za Umambo wa Mulungu. Pikwi na pikwi pya anthu akhakhuyiwa na mphangwa zikhamwaza Yezu, na ufuni ukhapangiza iye kwa iwo. Mwandimomwene, cifuno cace cikhali kumwaza mphangwa zadidi kwa atcerengi, kudziwisa ufulu kuna mabitcu na kuwangisa anthu a mitima yakutsukwala.—Iza. 61:1, 2; Luka 4:18-21.
8 Nthanda ya Nisane ikhadafika. Mu kubvera mwambo wa Babace, Yezu aenda ku Yerusalemu toera kadya Paskwa. Nzinda ukhali viya-viya na anthu akhafika toera kukumbuka phwando yakupambulika. Cifupi na templo, kukhundu ya kunkwiriro kukhali thawala ikhadziwika na dzina ya Betiseda, kweneko Yezu agumana nyanfutete.
9, 10. (a) Thangwi yanji anthu akhaenda ku thawala ya Betiseda? (b) Ninji pidacita Yezu pa thawala na pyenepi pisatipfundzisanji? (Onani cithundzithundzi cakutoma.)
9 Anthu azinji akuduwala akhaenda ku Betiseda. Thangwi yanji? Na mathangwi akukhonda dziwika, iwo akhakhulupira kuti madzi a thawala angatekenyeka, munthu wakuduwala angabira mbadawangiswa mwacirengo. Nyerezerani uviya-viya ukhali pa mbuto ineyi, anthu azinji akhali akudzudzumika, akupswipa ntima na akusowa cidikhiro akuti akhafuna kuwangiswa. Mphapo thangwi yanji Yezu munthu waungwiro aenda pa mbuto ineyi? Thangwi akhabvera ntsisi anthu. Ntsisi zenezi zakulumiza Yezu toera kufendedzera nyanfutete wakuti akhaduwala mu pyaka 38— pyaka pizinji kupiringa pikhali na Yezu mu ndzidzi unoyu pa dziko Yapantsi.—Lerini Jwau 5:5-9.
10 Nyerezerani kutsukwala kwa mamuna unoyu pidabvundzwa iye na Yezu khala asafuna kuwanga! Mwakukhonda dembuka atawira, mbwenye nee akhadziwa kuti mbadawangiswa tani thangwi nee pakhali na munthu wakumphedza toera kubira m’madzi. Yezu amphemba toera kucita cinthu cakunentsa kwa iye, kukwata makha ace toera aende. Mu kunyindira mafala a Yezu, mamuna unoyu akwata makha ace mbatoma kufamba. Cirengo ceneci ndi cipangizo cakutsandzayisa ca pinthu pinafuna kudzacita Yezu mu dziko ipswa. Pontho cisapangiza ufuni wace ukulu kwa anthu. Iye akhasaka anthu akhafuna ciphedzo. Citsandzo ca Yezu cisafunika kutikulumiza toera kupitiriza kusaka anthu mu cisa cathu akuti asanentseka thangwi ya nyatwa zinacitika mu dziko ino.
‘MBANI ADAKHUYA NGUWO YANGA?’
11. Lemba ya Marko 5:25-34 isapangiza tani kuti Yezu akhabvera ntsisi anthu akuduwala?
11 Lerini Marko 5:25-34. Nkazi unango amala pyaka 12 mbathabuka na utenda wakutsukwalisa. Utenda unoyu ukhakhuya makhundu onsene a umaso wace, kuphatanizambo ulambiri wace. Maseze adotoro azinji akhadayesera kukondza utenda wace, pontho ‘akhadabvunga pinthu pyace pyonsene,’ utenda wace ukhadatekera kakamwe. Mbwenye ntsiku inango, nkazi unoyu anyerezera njira inango toera kuwanga. Iye aenda kakhala pa mbuto yakuti mbadakhala dhuzi na Yezu. Nkazi unoyu apita na pakati pa mwinji mbakhuya nguwo ya Yezu.’ (Lev. 15:19, 25) Yezu adzindikira kuti mphambvu yace ikhadabuluka, natenepa abvundza kuti mbani adankhuya. ‘Na kutetemera thangwi ya kugopa,’ nkazi unoyu ‘ambulumundira, mbampanga undimomwene onsene.’ Na kudziwa kuti ndi Yahova adawangisa nkazi unoyu, Yezu antsalakana mwaufuni mbampanga: ‘Mwananga, cikhulupiro cako cakuwangisa. Ndoko mwantendere, utenda wako wawangiswa.’
12. (a) Mwakubverana na pidadinga ife mu nsolo uno, munafokotoza tani makhaliro a Yezu? (b) Ndi citsandzo cipi cidatisiyira Yezu?
12 Yezu ndi wadidi kakamwe! Tisaona kuti iye akhali na ntima wakubalangaza anthu makamaka ale akhanentseka na mautenda. Sathani asafuna tinyerezere kuti ndife akukhonda thema pontho nkhabe funiwa. Mbwenye pirengo pya Yezu pyapangiza kuti mwandimomwene iye asatsalakana ife na nyatwa zathu. Mphyakuwangisa kakamwe kukhala na Mambo na Nyantsembe Wankulu waufuni wakuti asabvera ntsisi anthu. (Aheb. 4:15) Panango pinanentsa kubvesesa mabvero a ale ananentseka na utenda wakukhonda wanga, makamaka khala cipo tathimbana na utenda unoyu. Mbwenye Yezu abvesesa nyatwa za anyakuduwala, maseze iye cipo athimbana na utenda. Citsandzo ca Yezu cisafunika kutikulumiza toera kucita pyonsene pinakwanisa ife toera kubvesesa nyatwa za anango.—1 Ped. 3:8.
“YEZU ALIRAMBO”
13. Kodi kulamuswa kwa Lazaro kusapangizanji thangwi ya makhaliro a Yezu?
13 Yezu akhakhuyiwa kakamwe na nyatwa za anango. Pidaona iye axamwali na acibale a Lazaro mbakalira thangwi ya kufa kwace, Yezu ‘atsukwala’ ‘mbalirambo.’ Iye apangiza mabvero anewa, maseze akhadziwa kuti mwakukhonda dembuka mbadalamusa Lazaro. (Lerini Jwau 11:33-36.) Yezu nee akhali na manyadzo toera kupangiza kutsukwala kwace. Ale akhali penepo akwanisa kuona kuti Yezu akhafuna kakamwe Lazaro na acibale ace. Yezu apangiza ntsisi mu kuphatisira mphambvu idapaswa iye na Babace toera kulamusa xamwali wace muli akufa!—Jwau 11:43, 44.
14, 15. (a) Ninji cinapangiza kuti Yahova asafuna kakamwe kumalisa nyatwa za anthu? (b) Tisapfundzanji kubulukira m’mafala akuti ale “anagona mu nthumbi”?
14 Bhibhlya isafokotoza Yezu ninga “cithundzithundzi candimomwene” ca Nciti. (Aheb. 1:3, Tradução do Novo Mundo) Pirengo pya Yezu pisapangiza kuti iye na Babace asafuna kumalisa nyatwa zinabwereswa na utenda na kufa. Cifuno ceneci cakulamusa anyakufa cinadzapiringana pire pinalongwa m’Bhibhlya. Yezu alonga: ‘Unadzafika ndzidzi wakuti anthu onsene anagona mu nthumbi . . . anadzalamuka.’—Jwau 5:28, 29.
15 Fala idaphatisira Yezu yakuti ‘anagona mu nthumbi’ ndi yakuthema thangwi isaphataniza manyerezero a Mulungu. Mulungu Wamphambvu Zonsene, Nciti wakudzulu na pantsi, anakwanisa kukumbuka unyomonyomo onsene wa anyakufunika athu adafa, kuphatanizambo makhaliro awo. (Iza. 40:26) Yahova anakwanisa kukumbukira anthu anewa, pontho iye na Mwanace asafuna kakamwe kucita pyenepi. Kulamuswa kwa Lazaro na anango analongwa m’Bhibhlya kusapangiza kulamuswa kunafuna kudzacitika pa dziko yonsene mu dziko ipswa.
TISAPFUNDZANJI KUBULUKIRA MU PIRENGO PYA YEZU
16. Ndi mwai upi unafuna kudzakhala na Akristu azinji akukhulupirika a lero?
16 Tingapitiriza kukhala akukhulupirika, tinadzaona cirengo cikulu kakamwe kupiringana pirengo pyonsene—kupulumuka pa nyatwa ikulu. Pakumala kwene kwa Armagedoni, pirengo pizinji pinadzacitika, ninga kucitisa anthu onsene kukhala na ungumi wadidi. (Iza. 33:24; 35:5, 6; Apok. 21:4) Nyerezerani kuona anthu mbakataya maorko, ndodo, muleta, njinga ya anyakulamala, mitcini yakuphedzera kubva, na pinango ninga pyenepi. Mwandimomwene, Yahova anadzaphedza anyakupulumuka pa Armagedoni toera kukhala na ungumi wadidi, thangwi iwo anadzakhala na mabasa mazinji toera kucita. Iwo anadzakwanisa kuphata basa mwakutsandzaya mu kucitisa dziko yonsene kukhala paradizu, ninga muoni udapaswa ife na Mulungu.—Sal. 115:16.
17, 18. (a) Thangwi yanji Yezu acita pirengo? (b) Thangwi yanji musafunika kuwangisira toera kupita mu dziko ipswa ya Mulungu?
17 Kuwangisa mautenda kudacita Yezu nduli, kusabalangaza ‘mwinji ukulu’ lero thangwi pisawangisa cidikhiro cawo cakuti anadzawangiswa mautenda onsene. (Apok. 7:9) Kuwangiswa kweneku kusapangiza ntsisi zikulu za Yezu. Pisapangizambo kuti Mwana wautombo wa Mulungu asafuna kakamwe anthu. (Jwau 10:11; 15:12, 13) Ntsisi za Yezu zisapangiza pakweca citsalakano ca Yahova kwa m’bodzi na m’bodzi wa atumiki ace.—Jwau 5:19.
18 Lero dziko yapantsi yadzala na nyatwa, kuthabuka na kufa. (Arom. 8:22) Natenepa, ife tisafuna kakamwe dziko ipswa ya Mulungu yakuti nkhabebve kudzaoneka mautenda. Lemba ya Malakiya 4:2 isatipasa mathangwi toera kunyindira kuti anyakuwangiswa ‘anadzanumpha-numpha ninga anang’ombe’ mbasekera na kukomerwa thangwi yakusudzulwa mu umaso wakusowa ungwiro. Tisadikhira kuti kupereka kwathu takhuta kuna Mulungu na cikhulupiro cathu cakuwanga ku mapikiro ace, pitikulumize kucita pyonsene pinakwanisa ife toera tikhale akuthema kupita mu dziko ipswa. Mphyakutsandzayisa kakamwe kudziwa kuti pirengo pidacita Yezu pikhali iye pa dziko yapantsi ndi cipangizo cakuti mwakukhonda dembuka pantsi pa utongi Waumesiya anthu anadzaombolwa mu nyatwa zonsene kwenda na kwenda!