Esdhra Apfundzisa Mwambo wa Mulungu

Pidapita pyaka 70, Aizraeli azinji abwerera ku Yerusalemu, mbwenye anango apitiriza kukhala mu nzinda wa Persya. M’bodzi wa iwo akhali nyantsembe Esdhra. Iye apfundzisa Mwambo wa Yahova. Esdhra aona kuti anthu a mu Yerusalemu nee akhabvera Mwambo, natenepa akhafuna kuenda kaaphedza. Mambo Artaxerxe wa ku Persya ampanga: ‘Mulungu akupasa udziwisi toera upfundzise Mwambo wace. Ndoko pabodzi na ale onsene anafunambo kuenda.’ Esdhra acemeresa onsene akhafuna kubwerera ku Yerusalemu. Iwo acita phembero kuna Yahova toera aatsidzikize mu ndzidzi ukhacita iwo ulendo.

Pidapita miyezi minai, Aizraeli afika ku Yerusalemu. Akulu a mbumba apanga Esdhra: ‘Aizraeli asiya kubvera Yahova, pontho amanga banja na akazi analambira alungu apezi.’ Kodi Esdhra acitanji? Esdhra agodama patsogolo pa mbumba, mbacita phembero kuna Yahova: ‘Yahova, imwe mwaticitira pinthu pizinji pyadidi, mbwenye ife tisakudawirani.’ Maseze Aizraeli akhadatcunyuka, mbwenye iwo akhacita pinthu pinango pyakuipa. Esdhra asankhula akulu a mbumba na atongi toera atsalakane nkandzo unoyu. Pidapita miyezi mitatu, anthu akuti nee akhalambira Yahova athamangiswa.

Pidapita pyaka khumi na piwiri, mipanda ya Yerusalemu yamala kumangwa papswa. Natenepa, Esdhra acemeresa mbumba toera kuleri Mwambo wa Mulungu. Pidafungula Esdhra bukhu, anthu onsene alimira. Esdhra asimba Yahova, pontho onsene alamusa manja awo mbasimbambo. Buluka penepo, Esdhra aleri Mwambo mbaufokotoza, mu ndzidzi wakuti mbumba ikhabvesera mwadidi. Iwo adzindikira kuti adawira Yahova, mbatoma kulira. Mangwana mwace, Esdhra aleri pontho Mwambo kuna mbumba. Iwo aona kuti ukhadasala ndzidzi wakucepa toera acite Phwando ya Misasa. Mu ndzidzi ubodzi ene, iwo atoma kukhunganyika toera kucita phwando.

Mu ntsiku zinomwe za phwando, mbumba yatsandzaya kakamwe mbipereka takhuta kuna Yahova thangwi iye akhapasa nkhombo minda yawo. Nee akhadacita kale Phwando ya Misasa ninga ineyi kutomera mu ntsiku za Yoswa. Pidamala phwando, mbumba yagumanyikana mbicita phembero: ‘Yahova, imwe mwatibulusa mu ubitcu, mwatipasa cakudya n’thando, pontho mwatipasa dziko yakubalika. Mbwenye kazinji kene, ife nee takubverani. Mukhatuma aprofeta toera kuticenjeza, mbwenye ife nee tikhaabvera. Imwe mwapitiriza kupirira. Mwakoya pikiro idacita imwe kuna Abhrahamu. Cincino tikupikira kuti tinakubverani.’ Iwo alemba pidapikira iwo. Toera kupangiza kuti mbadakwanirisa pikiro ineyi, akulu, Alevi na anyantsembe aikha cidzindikiro.