Yezu Acenesa Templo

Pidapita miyezi mingasi pidamala Yezu kubatizwa, aenda ku Yerusalemu. Anthu azinji akhaenda kweneko kacita Paskwa. Pa phwando ya Paskwa, anthu akhapereka ntsembe za pinyama pa templo. Anthu anango akhabweresa pinyama pyawo, mbwenye anango akhapigula mu Yerusalemu.

Pidapita Yezu mu templo, aona anthu mbakagulisa pinyama mwenemo. Iwo akhali mwenemo tayu toera kulambira Yahova, mbwenye toera kuwina kobiri! Kodi Yezu acitanji? Iye acita ntcamu wa nkhambala mbathamangisa mabira na ng’ombe mu templo. Buluka penepo, iye abhoma meza za anyakucinjisa kobiri mbamwaza kobiri zawo pantsi. Yezu apanga anthu akhagulisa nkhangaiwa: “Bulusani pyenepi muno! Lekani kusanduza nyumba ya Babanga kudza mbuto yakucitira malonda!”

Anthu akhali mu templo adzumatirwa kakamwe na pidacita Yezu. Anyakupfundzace akumbuka profesiya inalonga pya Mesiya kuti: ‘Ndinadzakhala na phinga thangwi ya nyumba ya Yahova.’

Mu caka ca 33 P.K.K., Yezu acenesa pontho templo kaciwiri. Iye nee akhafuna kuti anthu apwaze nyumba ya Babace.