Paulu na Timoti

Timoti akhali m’phale wa mpingo wa ku Listra. Pai wace akhali n’Gerego, mai wace akhali Muyuda. Kutomera mu uwana wace, Timoti apfundziswa pya Yahova na mai wace akhacemerwa Eunise na yavu wace akhacemerwa Loidhi.

Pidaenda Paulu ku Listra paulendo wace waciwiri m’basa yakumwaza mphangwa, iye aona kuti Timoti akhafuna kakamwe abale, pontho akhaaphedza. Natenepa, Paulu akwata Timoti toera acite naye ulendo. Ndzidzi onsene, Paulu akhapfundzisa Timoti toera kumwaza mphangwa na kukhala mpfundzisi wadidi.

Yahova aphatisira nzimu wace wakucena toera kutsogolera Paulu na Timoti konsene kukhafunika iwo kuenda. Ntsiku inango namasiku, Paulu aoneswa masomphenya. M’masomphenya anewa, mamuna m’bodzi apanga Paulu toera aende ku Masedhonya kuti aaphedze. Natenepa, Paulu, Timoti, Sila na Luka aenda kweneko toera kamwaza mphangwa mbakhazikisa mipingo.

Ku Tesalonika, nzinda wa Masedhonya, anthu azinji adzakhala Akristu. Mbwenye, Ayuda anango akhaida Paulu na andzace. Iwo abverana mbaphata Paulu na andzace mbaenda nawo kuna atongi a nzinda, mbakhuwa: ‘Amuna awa ndi anyamalwa a utongi Waciroma!’ Paulu na Timoti aona kuti umaso wawo ukhali pangozwi, na thangwi ineyi, iwo athawa namasiku mbaenda ku Bhereya.

Anthu a ku Bhereya akhafuna kakamwe kupfundza mphangwa zadidi, pontho Agerego na Ayuda atomambo kukhulupira. Mbwenye Ayuda anango a ku Tesalonika atoma kupingiza mwinji. Na thangwi ineyi, Paulu athawa mbaenda ku Atena. Mbwenye Timoti na Sila apitiriza ku Bhereya mbakawangisa abale. Mukupita kwa ndzidzi, Paulu aphemba Timoti kuti abwerere ku Tesalonika toera aphedze abale akuti akhatcingwa na mayesero kweneko. Buluka penepo, Paulu aphemba pontho Timoti toera aende kaone mipingo inango na kuiwangisa.

Paulu apanga Timoti: ‘Onsene anafuna kutumikira Yahova anadzatcingwa.’ Timoti atcingwa mbaikhwa nkaidi thangwi ya cikhulupiro cace, mbwenye iye atsandzaya thangwi yakupitiriza kukhala wakukhulupirika kuna Yahova.

Paulu apanga Akristu a ku Filipi: ‘Ine ndiri kutumiza Timoti kuna imwe. Iye anadzakupfundzisani kuti pisabvekanji kufamba mu undimomwene, pontho anadzakupfundzisani kuti munamwaza tani mphangwa.’ Paulu akhadziwa kuti mbadanyindira Timoti, thangwi iwo aphata basa pabodzi ninga axamwali mbapitiriza kutumikira Yahova mu pyaka pizinji.